LUK 21
21
Jihi Chaithio
(Mrk 12:41-44)
1Yisuüh lemkü thapnai, memei haiüh amkham chai kamtaiutsün nai ngüso paopei nouso thiokü ep, 2naiuso tsosilu jihi tsaküh nungai poisa nime thiotsün lüko ep. 3Yisuüh ngiom, “Atsüoting ngo asam tü ngioko, ngüso chikükonai nung tsosilu jihi nou pia thio-iu. 4Tititenai ngüso chikü nou jengtsaiu apia ainou chai kamtaiutsün nai thiokiu, lüko jihi nouto apa tsosilu ainou apa aa thaiutha kamtaiutsün apem thiokiu.”
Yisuüh Amkham Tsam Lotheanao Thaiutha Chiteji
(Mat 24:1-2; Mrk 13:1-2)
5Sahoi ajantsoüh Amkham tsam nung titi athapao meikü lung naiuso Goa hau chaithio kiukü aleng meikü shan ta chitenai, apaüh ngiom, 6“Asamüh ti epji nung thaiutha ajekhaiu shisao-e, nungko lung tsüloiankü tsak chiai tsak ta poikü tsünoi-e.”
Angja naiuso Ajeiat
(Mat 24:3-14; Mrk 13:3-13)
7Ngüsoüh apa tü sang, “Atsandetsün, naito nung tilai shinape? Tilai nung shinapao atao shimkü shisao-e, ii nou ti noi-e?”
8Yisuüh ngiom, “Asam atsüotsüdekünai tsünialükhun-iao lütsüolou. Tititenai piakü nou jü nianko shikü ‘ngo apa’ ta ngio-e; naiuso Atao shisao-iu ta ngio-e; ngüso phiai lahoilut! 9Tilai ehli naiuso angemsingem sungtsün lula-e, lalekkat; tititenai nung chong shinapao noin, lüko nung athon tsüde.”
10Nungai apaüh ngüso tü ngiom, “Singkhan nou shingkhan thako, nok nou nok thako tsalou-e. 11Nungai ajantso ai gohhaiu asong, ajantso ai naiusile, ajantso ai imkia, naiuso aün ainou ahattao ii asong noi-e. 12Lüko nung apem moshinapkünai jü nianko ngüso pha asam tü pou-e, naiuso nokpaohoi naiuso nokshingpao dongai kankü shikü asam Yihuda kamthang naiuso akhou tsamai wankü omhean-i-e. 13Nungko asamüh mitha kiuao thaiutha atao noi-e. 14Nungtiphe asamüh titi thala-e atao mosaokünai tsüyangelatao lüyangsan. 15Tititenai asam eh apemüh athalaao tsüshiokü nou son naiuso mongthat ngo asam hao kiu-e. 16Lüko asam posinyiu, deisinioso, tsammongso hai nousoüh janhe-e, naiuso ngüsoüh asam ajantsoto ean-i-e. 17Jü nian thaiutha apem nou asam lon chinyan-e. 18Lüko asam khaiu ainou khaiuou pem tsaktso tsümo-e. 19Ajeilu nai asamüh asam onthso shio-e.
Yisuüh Yirusalem Lotheanao Thaiutha Chiteji
(Mat 24:15-21; Mrk 13:14-19)
20“Lüko tilai asamüh Yirusalem lemlouwankü eppe, nungai alotheantsün atao shimaniu ta lüngelou. 21Nungai Yihuda nai noinso king nai lükhuwan, naiuso Yirusalem awem nai noinso soikü lükhu, naiuso nok kumai noinso nokai lanap. 22Tititenai asiongio nai satkü taiutsün apem shinapao thaiutha nung, ‘Angja kiutsün Ajekhaiu noin.’ 23Nung taoko pem tsükengkü naiuso nyao chepitsünso thaiutha inyate! Tititenai goumchi ko angja asong nung khaiunia tü mongmattsün noi-e. 24Ajantso sah nou loat-e, naiuso ajantso thaloukü shingkhan apem dongai nialükhun-e. Melemaohai thaiutha atao mosaokün chikü ngüsoüh Yirusalem tü ngamkei-e.
Khaiunia Thso Shitsün
(Mat 24:29-31; Mrk 13:24-27)
25“Nungai aje, alei naiuso kianthsüo nai ii sung-e. Goumchi ko shingkhan naiuso khiamnok naiuso khiampek ngem angtsün nou angja-e. 26Khaiuniahoi ahat nou goumchiko shinaptsün epkü eao lümeikü iula-e, tititenai thengmia nai oukong naiuso ajinka asong hakü shitsün eppe. 27Nai thengmia nai oukong asong ajinka nouko Khaiunia Thso shitsün eppe. 28Lüko tilai nungso thawao-e asam kha koiyai athapsan, tititenai asam aasan shimkü shiji.”
Lat Pai Tsangkü Athatlu
(Mat 24:32-35; Mrk 13:28-31)
29Nungai Yisuüh ngüso hau athatlu ngio tsak chite: “Latpai naiuso amao pai apem ta athaplu, 30Ngüso tilai paison iulakü asah nou sung-e nung epnai asamüh asam chija asaiu shimkü noin ta ngeji. 31Nungtili tilai asamüh nung thawaotsün eppe, Goa nokshing shimkü noin ta lüngelu.
32“Lo kihkü noitsün khaiuniahoi nouso moeankhemkünai nung apem thawao-e ta lüyangsan. 33Aün naiuso goum yanlükhun-e, lüko jü ngio tsüyanlükhun-e.
Jiokü Noiao Poukü Noin
34“Lüko asam chija lütsüolu! Nungti tsüdekünai thaipup, thengtok naiuso nung aakih ayangelat nou asam lethsangkü la-iula-i, naiuso nung ajekhaiu ko jin naili asam monan-e. 35Tititenai nung goumchi apem dongai shi-e. 36Ashinapao noitsün apem nai thakhuao naiuso Khaiunia Thso khako tsaao shiokü hau asam atao pungkü nai thsümonkü lünoi!”
37Ajekhaiu pungkü Yisuüh Amkham tsamai tsandekü noiküla, naiuso aso pungkü apa khukü Olip ta jontsün king nai atao wan. 38Ahom tsütokü khaiunia apemüh amkham tsamai apa ngio angao shin.
Currently Selected:
LUK 21: KHIABSI
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.