Paglakad Kasama Ni Hesus (Paglago)Halimbawa

Pagsunod sa Dayami

Ayon sa isang alamat na kwento ng mga gurong Hudyo, nang si Jose ay naging punong ministro ng Ehipto sa panahon ng taggutom, itinapon niya ang dayami mula sa mga imbakan sa Nile. Susundan ng dayami ang agos ng ilog at makikita ito ng mga taong nakatira sa ibaba ng agos. Kapag nakita nila ang lumulutang na dayami, naniniwala sila na may trigo sa kabila nito. Aakyat sila sa itaas na pinagmumulan ng agos upang hanapin ang pinagmulan ng dayami. Makakahanap sila ng masaganang suplay ng butil upang pawiin ang kanilang gutom sa lugar na iyon.

Ang pagkakaroon ng dayami ay nagpapahiwatig ng pagkakaroon ng isang supply ng butil. Ganito rin ang mga Salita ng Diyos. Ang Bibliya ay ang nakasulat na salita ng Diyos na gumagabay sa atin upang matugunan ang ating espirituwal na mga pangangailangan. Gayunpaman, madalas nating tinatrato ang Bibliya bilang huling layunin. Tayo ay nasisiyahan matapos basahin ang Bibliya at pinupunuan ito ng mga debosyonal at espirituwal na mga aklat, nasisiyahan tayo pagkatapos na makilahok sa mga grupo ng pag-aaral ng Bibliya at masipag na makinig sa mga sermon tuwing Linggo. Tayo ay nasisiyahan dahil pakiramdam natin alam na natin ang Bibliya.

Ang lahat ng mga aktibidad na may kaugnayan sa Bibliya ay kailangan at mahalaga, ngunit ang mga ito ay mga dayami lamang. Ang paggawa ng lahat ng ito nang buong sikap ay hindi sapat upang makuha ang tunay na pakinabang ng salita ng Diyos. Ang pagbabasa, pakikinig, at pag-aaral ng Bibliya ang mga unang hakbang lamang. Ang paunang hakbang na ito ay magpapalaki lamang ng ating kaalaman sa Bibliya. Ang ating nababasa, naririnig, at natututuhan ay magiging kapaki-pakinabang lamang kapag handa tayong sumunod at gawin ito sa ating pang-araw-araw na buhay. Sa pana-panahon ay babaguhin tayo ng Bibliya. Ang kaalaman sa Bibliya ay hindi magbabago ng anuman, ngunit ang paggawa ng sinasabi ng Bibliya sa ating buhay ay magbabago ng maraming mga bagay. Iyan ay isang masaganang tustos ng butil para sa atin.

Pagninilay:

1. Paano mo natutugunan ang iyong espirituwal na mga pangangailangan? Sa tingin mo ba sapat na iyon para baguhin ka?

2. Anong mga bagay ang nagbago sa iyo ayon sa iyong kaalaman sa Bibliya?

Pagsasanay:

Ang pag-alam sa salita ng Diyos ay hindi sapat para sa atin dahil ang salita ng Diyos ay may potensyal na baguhin tayo. Buksan ang iyong puso at hayaan ang salita ng Diyos na umantig dito.