12 Malalaking Pagkakamali na Maaaring Maiwasan ng mga MagulangHalimbawa

Pinahahalagahan Natin ang Pagtatanggal ng Lahat ng Sakit

Umiiyak? Narito ang isang pacifier. Nagngingipin? Narito ang isang tablet. Hindi makatulog? Narito ang ilang Tylenol na pwede sa sanggol. Baradong ilong? Masisipsip ito ng gadget na ito. Kinakabagan? Mayroon din kaming panlunas para dyan. Ang lahat ng mga panlunas sa sakit na ito ay ginagamit bago pa mag-isang taon ang ating mga anak! Hindi rin naman masama ang mga ito. Ang ating pagnanais na ilayo ang ating mga anak mula sa sakit ay napakasidhi na marahil ito ay likas sa atin. Gayunpaman, habang ipinagpapatuloy natin ang ganitong kalakaran, kailangan nating matanto ang mga kahihinatnan ng pag-aalis ng lahat ng sakit.

Kapag ang mga astronaut ay nasa isang istasyon ng kalawakan, maaari silang naroroon ng maraming buwan nang walang bigat ng gravity na nagpapagana sa kanilang mga kalamnan. Ang resulta? Pagliit ng mga kalamnan. Ang mga astronaut ay umuuwi sa kalupaan na nakakondisyon ang katawan sa kadalian ng paggalaw sa kalawakan na ang paglalakad sa lupa ay isang nakakapagod na gawain. Isang seryosong bagay ito kaya kinailangan ng NASA na magdisenyo ng napakamahal na kagamitan para gayahin ang pagbubuhat, pagbibisikleta, at paglalakad sa normal na gravity na nararanasan natin sa Mundo.

Ang pag-aalis ng sakit sa lahat ng sitwasyong kinakaharap ng ating mga anak ay parang pagpapadala sa kanila sa kanilang kinabukasan sa isang padded shuttle na walang gravity. Pagdating nila roon, hindi na sila gagana ayon sa bigat ng katotohanan. Sumasang-ayon dito si Tim, "Kapag inalis natin ang sakit, ang kakayahan ng [ating mga anak] na tiisin ang paghihirap ay nawawala." Sumasang-ayon din si Apostol Pedro, na nakasaksi sa matinding sakit na naranasan ni Jesus sa krus. Isinulat niya sa kanyang unang liham sa mga unang Cristiano, sa 1 Pedro 2:21 RTPV05, Ang pagtitiis ng hirap ay bahagi ng pagkatawag sa inyo ng Diyos, sapagkat nang si Cristo ay magtiis para sa inyo, binigyan niya kayo ng isang halimbawang dapat tularan. …

Kaya, sa halip na alisin ang lahat ng sakit para sa ating mga anak, kailangan nating gabayan ang kanilang pagtugon sa sakit. Matutulungan natin silang makita ang sakit bilang pansamantalang kahirapan na kadalasang nagdadala ng pangmatagalang benepisyo. Maaari nating sabihin sa kanila ang mga kuwento kung paano nakatulong sa atin ang sakit upang maging mas malakas. Higit sa lahat, mapaalalahanan natin ang ating mga anak na lagi nating kasama si Cristo sa ating pasakit.

Sandaling Huminto: Paano ko matutulungan ang aking mga anak na makahanap ng ginhawa sa kanilang sakit? Iniiwasan ko ba ang sarili kong sakit? Jesus, ipapakita Mo ba sa akin ang Iyong presensya sa aking sakit?