Buksan Sa Panahon Ng Kagipitan Halimbawa

Nakatanim sa Diyos

Lahat tayo ay nakakita na ng mga punong nalalaglag ang kanilang mga dahon at natutulog sa panahon ng taglamig, ngunit sa disyerto ng Israel, may mga puno na maaaring makaligtas sa deka-dekada ng matinding init at tagtuyot. Sa ibabaw, ang mga punong ito ay maaaring mukhang tuyo at walang buhay, ngunit mayroon silang malalim na sistema ng ugat na nagpapanatili sa kanila sa pinakamahihirap na panahon. At kahit na sa panahon ng matindi at patuloy na tagtuyot, ang mga punong ito ay nagagawa pa ring magbigay ng lilim para sa mga tao, kahoy para sa apoy, at sa ilang mga kaso, kahit prutas para sa pagkain. Talagang idinisenyo ng Diyos ang mga punong ito upang mabuhay sa pinakamahihirap na panahon.

Ito ang larawang ginamit ni propeta Jeremias nang isulat niya: "Mapalad ang mga taong nagtitiwala kay Yahweh, pagpapalain ang umaasa sa kanya. Katulad niya'y isang punongkahoy na nakatanim sa tabi ng batisan; ang mga ugat ay patungo sa tubig."

Nahihirapan ka ba ngayon? Nasa kalagitnaan ka ba ng tagtuyot? Ito ang panahon kung kailan nais ng Diyos na magkaroon ka ng malalim na pagtitiwala at pananalig sa Kanya - hindi lamang para makaligtas ka sa iyong sariling kalagayan, kundi upang pati na rin ang mga nasa paligid mo ay pagpalain sa pamamagitan ng iyong pananampalataya.