Ang Salita ng Diyos Para sa Bawat PangangailanganHalimbawa

ANG PAG-IBIG NG LAHAT NG PAG-IBIG

Anong kahanga-hangang pag-ibig ang ipinaabot sa atin ng Ama!

Wala nang mas hihigit pang kagalakan sa buhay kaysa sa malaman na ang Diyos ay ang ating maibiging Ama, subalit maraming mga tao, kabilang na ang mga nasa loob ng Simbahan, ang hindi pa nakaranas ng hindi masayod na kagalakang ito. Marami ang sinugatan ng kanilang ama sa lupa at, bilang resulta, ikinokonekta ang kanilang sariling karanasan ng pagiging ama sa Diyos Ama. Pagkatapos ay nililikha nila ang Diyos ayon sa larawan ng kanilang ama sa lupa—nakikita nila ang Diyos bilang isang nawawala o nang-iiwan na magulang. Ang iba ay may larawan ng Diyos bilang isang malayo at mapaghiganting Ama. Wala sa mga ito ang tamang representasyon ng larawan na ipininta ni Jesus. Naparito si Jesus upang ihayag ang kahanga-hangang pag-ibig ng Ama. Oo ang Diyos ay Hari. Oo ang Diyos ay Panginoon. Oo ang Diyos ay Hukom. Subalit higit sa lahat Siya ay Ama na labis na umibig sa naulilang planetang ito kaya't ipinadala Niya ang Kanyang bugtong na Anak upang gawing mga anak ang mga alipin at ang mga ulila bilang mga tagapagmana. Ito ang pinakamataas na pagpapala sa lahat—na malaman na ang Diyos ang pinakadakilang Ama ng sanlibutan. Kung wala kang isang mabuting ama sa lupa, alamin ito: ikaw ay may isang perpektong Ama sa Langit at ipinaabot Niya ang Kanyang kamangha-manghang pag-ibig sa iyo sa pamamagitan ni Jesus.

PANALANGIN

Dakilang Diyos, nagpapasalamat ako sa Iyo na hindi ka malayo kundi may kaugnayan ka sa amin. Tulungan akong tamasahin ang pagiging mas malapit sa Iyo habang binabasa ko ang mga debosyong ito. Sa pangalan ni Jesus. Amen.