Soma Biblia Kila Siku/ Machi 2023Mfano

Hayo nimewaambia, ili furaha yangu iwe ndani yenu, na furaha yenu itimizwe (m.11). Furaha ni jambo muhimu na la msingi katika Ukristo. Furahini katika Bwana sikuzote; tena nasema, Furahini (Flp 4:4)! Itakuwaje furaha ya Yesu kuwa ndani yetu? 1. Kwa kuutambua upendo wake kwetu na kuupokea (m.9 na 12-13, Kama vile Baba alivyonipenda mimi, nami nilivyowapenda ninyi, kaeni katika pendo langu. ... Amri yangu ndiyo hii, Mpendane, kama nilivyowapenda ninyi. Hakuna aliye na upendo mwingi kuliko huu, wa mtu kuutoa uhai wake kwa ajili ya rafiki zake). 2. Kwa kutambua hivyo tutatiwa furaha ya kuzitii amri zake na kuzifuata, na kufanya hivyo kutazidisha tu furaha yetu (m.10, Mkizishika amri zangu, mtakaa katika pendo langu; kama vile mimi nilivyozishika amri za Baba yangu na kukaa katika pendo lake). Ni amri kama hii: Mpendane, kama nilivyowapenda ninyi (m.12 na 17). Tukishapokea upendo wake, yaani wokovu wake, twapata moyo mpya unaompenda Yesu na amri zake.