Soma Biblia Kila Siku 12/2020Mfano

Kabla Yesu hajaja, waumini huhitaji faraja na maonyo (2:13-3:15) juu ya kusimama imara katika imani. Hiyo yawezekana tu tunapolishika Neno la Mungu, tukikubali kuipenda ile kweli. Maana kwa njia hiyo Mungu hutuita tuwe watu wake (m.14, Aliwaitia ninyi kwa injili), kututakasa (m.13, kutakaswa na Roho, na kuiamini kweli; taz. pia Yn 17:17, Baba, uwatakase kwa ile kweli; neno lako ndiyo kweli), kutupa tumaini jema, na kutufariji (m.16-17, Akatupa faraja ya milele na tumaini jema, katika neema, awafariji mioyo yenu). Hivi tutaimarika wenyewe kiimani, na maisha yetu yote ya kila siku yatashuhudia neema na wema wake Mungu (m.17, kuwafanya imara katika kila neno na tendo jema). Angalia pia aya hizi zinavyomshuhudia Paulo. Ndiye mfano mzuri wa neno katika 1 The 5:17, Ombeni bila kukoma.