Solid Joys ShqipShembull

Bëjani të ditur satanit mposhtjen e tij

“Kundërshtoni djallin dhe ai do të arratiset prej jush.” (Jakobi 4:7)

Sa më real të duket satani në ditët tona—pra, kur është e dukshme që ai është aktiv—aq më e çmuar do të bëhet fitorja e Krishtit për ata që i besojnë Atij.

Dhiata e Re na mëson se kur Krishti vdiq dhe u ringjall sërish, satani u mund përfundimisht. Tani atij i është dhënë një periudhë lirie e kufizuar, por fuqia e tij kundër popullit të Perëndisë është thyer dhe shkatërrimi i tij është i sigurt.

• “Për këtë është shfaqur Biri i Perëndisë: për të shkatërruar veprat e djallit.” (1 e Gjonit 3:8)
• “Po ashtu edhe ai [Krishti] u bë pjesëtar në po ato gjëra [mish dhe gjak], që të shkatërronte, me anë të vdekjes atë, që ka pushtetin e vdekjes, domethënë djallin.” (Hebrenjve 2:14)
• “[Perëndia] i zhveshi principatat dhe pushtetet, i turpëroi botërisht, duke ngadhënjyer mbi ata, nëpërmjet tij.” (Kolosianëve 2:15)

E thënë ndryshe, satani mori goditjen vendimtare në Kalvar. Një ditë, kur lirisë së kufizuar të satanit t’i vijë fundi, Zbulesa 20:10 thotë: “Dhe djalli... u hodh në liqenin e zjarrit e të squfurit... dhe do të mundohen ditë e natë në jetë të jetëve.”

Çfarë do të thotë kjo për ata nga ne që ndjekim Jezu Krishtin?

• “Tani, pra, nuk ka asnjë dënim për ata që janë në Krishtin Jezus.” (Romakëve 8:1)
• “Kush do t’i padisë të zgjedhurit e Perëndisë? Perëndia është ai që i drejtëson.” (Romakëve 8:33)
• “As engjëjt, as pushtetet, as fuqitë dhe as gjërat e tashme, as gjërat e ardhshme, as lartësitë, as thellësitë, as ndonjë tjetër krijesë, nuk do të mund të na ndajë nga dashuria e Perëndisë që është në Jezu Krishtin, Zotin tonë.” (Romakëve 8:38-39)
• “Ai në ju është më i madh se ai në botë.” (1 e Gjonit 4:4)
• “Dhe ata [shenjtorët] e mundën atë me anë të gjakut të Qengjit dhe me anë të fjalës së dëshmisë së tyre.” (Zbulesa 12:11)

Prandaj, “kundërshtoni djallin dhe ai do të largohet nga ju”. Ai është mposhtur dhe neve na është dhënë fitorja. Detyra jonë tani është të jetojmë në atë fitore dhe t’ia bëjmë të ditur satanit mposhtjen e tij.