MARAKO 9

1YABAGAMBIRA ati Mananukwo nimbagambira nti Hali banu abemerire hanu, haroho abandi abataliroza ha kufa na kake, okuhikya obubalirora obukama bwa Ruhanga nubuija namani.

2Kandi ebiro mukaga obubyahinguireho, Yesu yatwara petero, na Yakobo, na Yohana, yabatembya orusozi oruraihire bonka, omunsita: yahindurwa omu maiso gabu: 3ebyokujwarabye nibyengengeta, nibyera tititi; kandi busaho mwogi hansi arukusobora obubyeza ati. 4Kandi Eriya na Musa bababonekera; bakaba nibabaza na Yesu. 5Petero yagarukamu yagambira Yesu ati Rabi, kisemire itwe okuikara hanu; twombeke obuju busatu; akamu kawe, akndi ka Musa, nakandi ka Eriya. 6Baitu atamanye ekyaragarukamu; baitu bakaba batinire muno. 7kandi ekicu kyaija nikibasikiriza; niraka lyaturuka, lirugire omu kicu, ngu Onu nuwe Mwana wange oungonza: mumuhu’re. 8Obubahindukire bwango okurora, tibabona muntu kandi, rundi Yesu wenka hamu nabo.

9Kandi obubakaba nibasirimuka orusozi, yabatere’ra batagambiraho muntu ebibaboine, rundi Omwana womuntu obwalikahumbuka omu bafu. 10Kandi bakalinda ekigambo eki, nibakaguzangana bonka ngu Okuhumbuka omu bafu kuliba kufa? 11Bamukaguza ngu Abahandiki nibagamba ngu Kimuhikirire Eriya okubanza okuija. 12Yabambira ati Nukwo Eriya abanza okuija, aga’reho byona: kandi kikahandikirwa kita Omwana womuntu, okusalirwa bingi nokugayibwa? 13Baitu nimbagambira nti Eriya akamara okuija, kandi bakamukora nkokubayenzire, nkokukyamuhandikirweho.

14Kandi obubahikire hali abegeswa, barora ekitebe kingi kibehingulirize, nabahandiki nibabasonasona. 15Ahonaho ekitebe kyona, obubamuboine, bahuni’ra muno,bairuka nibaija namberali, bamuramukya. 16Yabakaguza ati Nimubosonasonera ki? 17Omu hali ekitebe yamugarukamu ati Omwegesa, ndesere haliwe omwana wange aloho omuzimu ogutarukugamba; 18nambere gumutwara hona, gumutera hansi: aleta ifuro, aruma amaino, akehe’ra: nagambira abegeswa bawe bagubinge; baitu tibasobora. 19Yabagarukamu nagamba ati Inywe abobusinge obutarukuikiriza ndihikya nkaha okuikara nainywe? Ndihikya nkaha okubagumisiriza? Mumulete namberendi. 20Bamuleta namberali: kandi obuyamuboine, ahonaho omuzimu gwamutagura muno: yagwa hansi, nayekulingura, baleta ifuro. 21Yakaguza ise ati Ebiro bingaha akaba kurwara ati? 22Yagamba ati Okuruga omu butobwe. Emirundi mingi gwamunagaga omu mu’ro, nomu maizi, okumuita: baitu obworaba nosobora kyona, otuganyire otujune. 23Yesu yamugambira ati Obworaba nosobora! Byona bisoboka hali anyakuikiriza. 24Ahonaho ise omwana yayamuza nagamba ati Ninyikiriza; konyera obutaikiriza bwange. 25Kandi Yesu obuyaboine ekitebe nikiiruka nikigoma namberali hamu, yacomera omuzimu omubi, nagugambira ati Iwe omuzimu ogutarukugamba, omufu wamatu, nyowe nkuragire omurugeho, otalimugarukira na kake. 26Kandi gwayamuza, gwamutagura muno, gwamurugaho: yasisana afire. 27Baitu Yesu yamukwata ha Mukono, namuimukya; 28uwe yayeme’ra. Kandi obuyatahireomu nju, abegeswabe bamukaguza omunsita ngu Itwe titusoboire kugubinga. 29Yabagambira ati Omulingo gunu tigurukusobora kurugaho obwekigambo, baitu obwokusaba.

30Kandi bakarugayo, nibaraba omu Galiraya; okukimanya. 31Baitu akegesa abegeswabem, yabagambira ati Omwana womuntu yahebwayo omu mikono yabantu, balimuita; kandi obwalimara okuitwa, nebiro bisatu buhinguireho, alihumbuka. 32Baitu batamanye kigambo eki, batina okumukaguza

33Kandi bakahika Kaperenaumu:kandi obwakabali omu nju yabakaguza ngu Mubaire nimute’ra ki empaka omu muhanda? 34Bahuna kwonka: baitu bakaba nibatezangana empaka bonka omu muhanda ngu Omukuru noha? 35Yaika’ra, yayeta ikumi nababiri; yabagambira ati Omuntu obwagonza okuba owokubanza aliba wa ha mpero wa bona, nomuhereza wa bona. 36Yakwata omwana omuto, yamuta hagati yabu: kandi yamukikira omu mikono, 37nabagambira ati Omuntu wena aliikiriza omu hali abana abato abarukusisana nkonu, omu ibara lyange, buli aikirize nyowe; nomuntu wena arukuikiriza nyowe, taikiriza nyowe, baitu ogu ayantumire.

38Yohana yamugambira ati Omwegesa, tukarora omuntu nabinga emizimu omu ibara lyawe: twamutanga, baitu atakuratire itwe. 39Baitu Yesu yamugambira ati Mutamutanga: baitu busaho muntu alikora ekyamani omu ibara lyange, alisobora bwango okunjuma. 40Baitu atali munyanzigwa waitu, 41buli ali habwaitu.Baitu omuntu wena alibanywisa empwahwa yamaizi, inywe obwokuba aba Kristo, mananukwo nimbagambira nti taliburwa emperaye na kake. 42Nomuntu wena alisitaza omu hali abo abato abarukunyikiriza, hakire ogu okubohwa orubengo orukoto omu bikyabye, anagwe omu nyanja. 43Omukono gwawe obugukwesitaza, ogucwehoga; hakire iwe okutaha omu bwomezi obuzirweho ekicweka; okukira okugenda omu gehena oyina emikono yombi, omu mu’ro ogutarara. 44[Enzito zabu nambere zitafa, nomu’ro gutarara] 45Nokuguru kwawe obukukwesitaza, okucwehoga, hakire iwe aokutaha omu bwomezi obuzirweho okuguru, okukira okunagwa omu Gehena oyina amaguru gombi. 46[Enzito zabu nambere zitafa, nomu’ro gutarara.] 47Neriso lyawe obulikwesitaza, oliihemuga; hakire iwe okutaha omu bukama bwa Ruhanga oyina eriso limu, okukira okunagwa omu Gehene, oyina amaiso gombi; 48Enzito zabu nambere zitafa, nomu’ro gutarara. 49Baitu bona balirungibwamu omu’ro. 50Ekisura kirungi: baitu ekisura obukihwamu obunuzi,muliga’ramuki? Inywe muikale nekisura omuli inywe, muterane omu businge.

Выбрано:

MARAKO 9: BRR64

Выделить

Копировать