MARAKO 8

1OMU biro ebi ebitebe obubyasagaine muno, kandi batanyina byokulya, yayeta abegeswabe namberali, 2yabagambira ati Ninganyira ebitebe, baitu hati bunu ebiro bisatu baikaire nanyowe, kandi tibanyina byokulya: 3obundaba nimbohereza basibire enjara okugenda owabu, baragwa ensazi omu muhanda; nabandi bakaruga hara. 4Abegeswabe bamugarukamu ngu Omuntu nasobora ata okuigusa abantu banu emigati hanu omui irungu? 5Yabakaguza ati Muyina emigati ingaha? Bagamba ngu Musanju. 6Yaragira ekitebe okuika’ra hansi: yakwata emigati musanju yasima, yacwamu, yaha abegeswabe okugita omu maiso gabu: bagita omu maiso gekitebe. 7Kandi bakaba banyina encu enke: yazisimira, naragira nazo bazite omu maiso gabu. 8Balya nibaiguta: bakomaho oburagalika obwasigaireho, ebigega musanju. 9Kandi bakaba bali nkenkumi ina: yabohereza. 10Ahonaho yagwe’ra omu bwato nabegeswabe, yaija omu nsi eya Daramanusa.

11Kandi Abefalisayo bakaturuka nibaija, nibase’ra haluwe akokuro’raho akanyakuruga omu iguru, 12nibamwohya. Yasinda muno omu mutimagwe, nagamba ati Abobusinge bunu nibaseru’ra ki akokuroraho? Mananukwo nimbagambira nti Abobisinge bunu tibalihebwa kokuro’raho. 13Yabasiga, yagaruka okugwe’ra omu bwato, yayambuka nseri.

14Kandi bakebwa okutwara emigati; kandi bakaba batanyinayo omu bwato, rundi omugati gumu. 15Yabatere’ra ati Murole, mwerinde ekitumbisa kya Bafalisayo nekitumbisa kya Herode. 16Bakaguzangana bonka, nibagamba ngu Titunyina migati. 17Yesu obuyamanyire yabagambira ati Nimukaguzanganira ki obwokutaba nemigati? Timukamanyire, nobukwakuba okwetegereza? Emitima yanyu egumangaine? 18Inywe muyina amatu, timurukuhu’ra? Kandi timurukuijuka? 19Obunacwerire enkumi itano emigati etano, mwakoma ebigega bingaha ebiijuire oburagalika? Bamugambira ngu Ikumi nebibiri. 20Kandi obunacwerire enkumi ina omusanju, mwakoma ebigega bingaha ebiijuire oburagalika? Bamugambira ngu Musanju. 21Yabagambira ati Timuketegerize?

22Kandi bahika omu Besesaida. Kandi baleta namberali omufu wamaiso, nibamwesengereza omukoleho. 23Yakwata omufu wamaiso ha Mukono, yamuturukya aheru yekika; obuyamucwerire amacwanta ha maiso, namutaho engaro, yamukaguza ati Nohweza kantu? 24Yarora haiguru nagamba ati Nimpweza abantu; baitu nindora nibasisana nkemiti nibagenda. 25Kandi yagaruka okumutaho engaro ha maiso; yabyona kurungi. 26Tamwohereza okugenda owe, nagamba ati Otataha nomu kika kinu.

27Kandi Yesu yarugayo, nabegeswabe, nagenda omu bika bya Kaisaliya Firipi: obubahikire omu muhanda yakaguza abegeswabe, nabagambira ati Abatu nibanyeta okuba oha? 28Bamugambira ngu Yohana Omubatizi: nabandi ngu Eriya;baitu abandi ngu Omu hali banabi. 29Uwe yabakaguza ati Baitu inywe nimunyeta okuba oha? Petero yagarukamu namugambira ati Niwe Kristo. 30Tabatere’ra batagambiraho muntu haluwe. 31yabanza okubegesa ngu kihikirire Omwana womuntu okusalizibwa bingi, nokuhakanwa abakuru, nabahandiki, nokuitwa, kandi nokuhumbuka ebiro bisatu bihinguireho. 32Ekigambo eki akakigamba bwa. Kandi Peteroyamutwara, nabanza okumubana. 33Baitu obuyahindukire narora abegeswabe, yahana Petero, nagamba ati Garuka enyuma yange, Setani; baitu torukutereza bya Ruhanga, baitu ebyabantu. 34Yayeta namberali ekitebe nabegeswabe, yabagambira ati Omuntu wena anyakugonza okunkuratira, ayeyangise wenka, ayetweke omutigwe, ampondere. 35Baitu omuntu wena anyakwenda okukiza obwomezibwe, bulimubura; na wena anyakubuza obwomezibwe habwange na habwenjiri alibukiza. 36Baitu nikimugasira ki omuntu, okutunga ensi yona nokuburwa obwomezibwe? 37Baitu omuntu yakuhaireyo ki okucungura obwomezibwe? 38Baitu omuntu wena alikwatwa ensoni habwange, na habwebigambo byange omu businge bunu obwobusihani obubihire, Nomwana womuntu nauwe alikwatwa ensoni habwogu, obwaliija omu kitinisa kya Ise, nabamaraika abarukwera.

Выбрано:

MARAKO 8: BRR64

Выделить

Копировать