Luká 22
22
Issáay koshagay pandal o sázesh
(Mattá 26:2–5; Markás 14:1–2)
1Béhomirén Naganay Aid, hamá ke Sargwaz gwashaga bit nazzikk at. 2Mazanén dini péshwá o Sharyatay zánóger pa Issáay kóshárénagá, ráh o nimmóné shóház kanagá atant, bale cha mardomána torsetesh. 3Hamá wahdá, Yahudá ke Eskaryuti nám kaptagat o wat cha Issáay dwázdahén moridán yakké at, Shaytán áiay póstá potert. 4Yahudá, mazanén dini péshwá o mazanén parasteshgáhay negahpánén sepáhigáni masteráni kerrá shot o gón áyán gend o nendi kort ke che paymá Issáyá bedróhit o áyáni dastá bedant. 5Á báz wassh butant o shawresh kort ke áiá chizzé zarr bedayant. 6Yahudáyá mannet o nun gwam o gégén wahd o móhéay shóházá at ke cha mardománi mocchiá dur, Issáyá áyáni dastá bedant.
Sargwazay shámay tayári
(Mattá 26:17–19; Markás 14:12–16)
7Gorhá, Béhomirén Naganay Aiday hamá róch átk ke gwarándhá korbániga kanant. 8Issáyá Petros o Yuhanná dém dátant o gwashti: “Berawét Sargwazay Aiday shámay tayáriá bekanét ke bwarén.” 9Áyán jost kort: “Taw ché lóthay, má é tayáriá kojá bekanén?” 10Passawi dát: “Shahrá ke rasét, mardéá gendét ke ápi kunzagé gón enti,#22:10 É ajabén habaré. Áp kasshag janénáni kár at. áiay randá hamá lógá berawét ke á rawt. 11Lógay wáhondá begwashét: ‘Ostád josta kant: “Mehmánhánah kojá ent ke man gón wati moridán Sargwazay shámá hamódá bwarán?”’ 12Á mard, shomárá wati lógay sarborá, práhén bán#22:12 Bán, bezán kóthi, kamrah, óták. o diwánjáhé pésha dárit ke ódá har chizz hast, shámay tayáriá hamódá bekanét.” 13Á shotant. Ódá, áyán har chizz hamá paymá dist ke Issáyá gwashtagat. Sargwazay shámesh hamódá tayár kort.
Goddhi shám
(Mattá 26:24, 26–29; Markás 14:22–25)
14Hamá sáhat ke raset, Issá gón moridán parzónagay sará nesht. 15Gón áyán gwashti: “Mani masterén armán hamé butag ke gránén sakki o sóriáni saggagá pésar, é Sargwazay shámá gón shomá hórigá bwarán. 16Shomárá gwashán, tán Hodáay bádsháhi barjáh dárag mabit, dega baré é shámá nawarán.”
17Gorhá, jámé chesti kort, Hodáay shogri gept o gwashti: “É jámá bezurét, wati nyámá bahr kanét. 18Shomárá gwashán ke cha ed o rand, tán Hodáay bádsháhi mayayt o marasit, man anguray dahl o samará nanóshán.” 19Nagani ham zort, Hodáay shogri gept, chondh chondhi kort, moridáná dát o gwashti: “É mani jesm ent ke pa shomá korbániga bit, é rasmá pa mani yát o yátmáná barjáh bedárét.”
20Hamé dhawlá, cha waragá rand, jámé zort o gwashti: “É jám, mani nókén ahd o karáray hón ent ke pa shomaygi réchaga bit. 21Bale, hamá ke maná dróhit, áiay dast gón mani dastá yakkén parzónagá ent. 22Chéá ke hamá dhawlá ke péshá shawr borrag#22:22 Shawr borrag, bezán paysalah kanag. butag, Ensánay Chokka rawt, bale bazhn o apsóz pa hamá mardomá ke áiá dróhit.” 23Á wahdi, morid yakdomiá jost kanagá laggetant: “Bárén, cha má kay choshén káré kant?”
Mazani o masteriay bárawá
(Mattá 20:25–27; Markás 10:42–44)
24Moridáni nyámá arh o dáwáé pád átk ke “Bárén, may nyámá sajjahénáni master o kamásh kay ent?” 25Issáyá gón áyán gwasht: “Darkawmáni bádsháh, wati mardománi sará gón zóráki wájahia kanant o áyáni hákemáni maksad o morád esh ent ke mardom áyán hayr o barkat dayók bezánant. 26Bale shomá chosh makanét, bellét ke shomay masterén, kasterénay dhawlá bebit o shomay hákem, hezmatkáray dhawlá. 27Bárén, kay master ent? Hamá ke neshtag o waragá ent, yá hamá ke hezmat kanagá ent? Albat, hamá ke neshtag o waragá ent. Bale man shomay nyámá, hezmatkáréay dhawlá án. 28Shomá hamá ét ke mani ázmáesh o chakkásán, gón man hamráh o hamkópag butagét. 29Hamá dhawlá ke Petá maná bádsháhi bakshetag, man ham áiá shomárá bakshán 30tán mani bádsháhiay tahá cha mani parzónagá bwarét, benóshét, tahtáni sará benendét o Bani Esráilay dwázdahén kabilaháni dádrasiá bekanét.
Petrosay enkáray péshgói
(Mattá 26:31–35; Markás 14:27–31; Yuhanná 13:36–38)
31Shamun, oo Shamun! Shaytáná mókal o ejázat lóthet ke shomárá gandomay dhawlá kamak bekant o begéchit. 32Bale man pa taw dwá kort tán tai báwar o imán zawál mabit. Gorhá, wahdé per tarret o padá mani ráhá átkay, wati brátáni dastá beger o delbaddhi beday.” 33Bale Petrosá passaw tarrént: “Oo Hodáwand! Man gón taw hórigá pa kayd o band o marká ham tayár án.” 34Issáyá gwasht: “Oo Petros! Man tará gwashán ke maróchi taw cha korósay bángá pésar, mani pajjáh áragá say randá enkára kanay.”
35Randá cha áyán josti kort: “Bárén, hamá wahdá ke man shomárá bé zarturag o pélek, bé chawath o swásá dém dát, shomá pa chizzé wázmand o mohtáj butét?” Áyán passaw dát: “Na, pa hecch chizzá.” 36Gorhá gwashti: “Bale nun cha shomá agan kaséay kerrá zarturag o pélek hast, gón wat bezurit o áiay kerrá ke zahm nést, wati kabáhá bahá bekant o zahmé bahá begipt, 37chéá ke é nebeshtah mani bárawá, báyad ent purah o sarjam bebit ke gwashit: Á gón gonahkárán hesáb kanag but.#22:37 Eshayá Nabiay Ketáb 53:12. Haw! Á chizz ke mani bárawá nebisag butag nun sarjam bayagi ent.” 38Moridán gwasht: “Oo Hodáwand! Bechár, márá do zahm gón ent.” Gwashti: “Bass ant.”
Jetsimániay bágá Issáay dwá
(Mattá 26:36–46; Markás 14:32–42)
39Randá, Issá dar átk o anchosh ke áiay hél o ádat at, dém pa Zaytunay kóhá shot. Morid ham áiay randá shotant. 40Ódá ke sar but, gwashti: “Dwá kanét ke ázmáesh o chakkásá makapét.” 41Randá, yakk dhókéay chagaljáhay kesásá, cha moridán dur but, kóndháni sará nesht o chosh dwái kort: 42“Oo mani Pet! Agan tai razá ent gorhá é sakkiáni jám o pyálahá#22:42 Issáay maksad wati markay sakki o sórián ent. cha man dur kan o bethagalén, bale na pa mani lóth o wáhagá, pa tai jenday washnódiá.” 43Hamá wahdá, cha ásmáná préshtagé záher but o Issái deldári o delbaddhi dát. 44Á, yakk grán o jánsóchén ranjéá dochár at, paméshká géshter dwái kort o áiay héd, hónay trampáni dhawlá zeminay sará petthetant.
45Cha dwáyá ke pád átk, moridáni némagá per tarret, disti ke cha bázén gam o andóhán, wáb kaptagant. 46Gwashti: “Pa ché waptagét? Pád áét, dwá kanét ke chakkásá makapét.”
Issáay dazgir kanag
(Mattá 26:47–56; Markás 14:43–50; Yuhanná 18:3–11)
47Angat Issá gón moridán habar kanagá at ke rombé mardom átk o raset. Cha Issáay dwázdahén moridán yakké, bezán Yahudá, áyáni rahshón at. Á, Issáay nazzikká átk tán bechokkiti. 48Issáyá gwasht: “Oo Yahudá! Taw gón chokkag o drót,#22:48 Drót, bezán chokkag, bósah. Ensánay Chokká geráénay?”
49Wahdé Issáay hamráhán dist ché bayagá ent, jostesh kort: “Oo Hodáwand! Wati zahmán bekasshén?” 50Cha moridán yakkéá wati zahm kasshet o masterén dini péshwáay nawkaray rástén góshi sest. 51Bale Issáyá gwasht: “Bass ent! Dast bedárét!” Áiay góshá dasti per mosht o dráhi kort.
52Á wahdá, Issáyá gón mazanén dini péshwá, mazanén parasteshgáhay negahpánén sepáhigáni master o kawmay kamáshán ke pa áiay dazgir kanagá átkagatant, gwasht: “Záná, man yági o rahzané án ke shomá gón zahm o latthán pa mani dazgir kanagá átkagét? 53Man har róch mazanén parasteshgáhá gón shomá hór o yakjáh butagán, ódá shomá maná dast najatag. Bale haw! Nun wahd shomayg ent o taháróki hákem ent.”
Petrosay enkár
(Mattá 26:57–58, 69–75; Markás 14:53–54, 66–72; Yuhanná 18:12–18, 25–27)
54Gorhá, Issáesh dazgir kort o masterén dini péshwáay lógá bort. Petros dur durá, áyáni poshtá rawán at. 55Lógay péshgáhá, ásé rókesh kortagat o ásay chágerdá neshtagatant. Petros ham gón áyán nesht. 56Móledéá, ásay rozhnáiá, Petros dist, rogurogu cháret o gwashti: “É mard ham gón Issáyá hamráh butag.” 57Bale Petrosá namannet o gwashti: “Oo janén! Man áiá nazánán.”
58Kammé wahdá rand, degaréá Petros dist o gwashti: “Taw ham cha hamáyán ay.” Petrosá passaw dát: “Oo mard! Man cha áyán naán.”
59Kamm o gésh sáhatéá rand, dega yakkéá Petrosay némagá cháret o pa deljami gwashti: “É mard allamá Issáay hamráh butag chéá ke á ham Jalilié.” 60Petrosá darráént: “Oo mard! Man sarpada nabán taw ché gwashagá ay.” Petros hamé habará gwashagá at ke korósá báng dát. 61Hodáwandén Issáyá chakk tarrént o Petrosay némagá cháret. Gorhá, Petros Hodáwanday habaray yátá kapt ke gwashtagati: “Taw maróchi korósay bángá pésar, say randá mani pajjáh áragá enkára kanay.” 62Nun dhanná dar átk o sakk gréti.
Issáay sará malandh o rishkand
(Mattá 26:67–68; Markás 14:65)
63Á sepáhigán ke Issá wati nyámá geptagat, áiay janag o malandh o maskará kanagesh bongéj kort. 64Issáay chammesh bastant o gwashtesh: “Nun paygambari kan, begwash kayá tará jat?!” 65Dega bázén bad o radé ham gwashtesh.
Sarókáni diwáná Issáay pésh kanag
(Mattá 26:59, 63–66; Markás 14:61–63; Yuhanná 18:19–21)
66Wahdé róch but, kawmay kamásháni diwán, bezán mazanén dini péshwá o Sharyatay zánóger yakjáh butant, Issáesh lóthet o áwort. 67Jostesh kort: “Agan taw Masih ay gorhá márá begwash.” Issáyá passaw dát: “Agan man begwashán, báwara nakanét. 68Oo agan jost begerán, passawa nadayét. 69Bale cha annun o rand, Ensánay Chokk zóráwarén Hodáay rástén némagá nendit.” 70Á wahdá sajjahénán gwasht: “Acha, taw Hodáay Chokk ay?!” Passawi dát: “Shomá wat gwashagá ét ke Man Hamá Án.” 71Áyán gwasht: “Nun dega chónén gwáh o sháhedié lóthén? Má wat cha áiay jenday zobáná é habar eshkot.”
Выбрано:
Luká 22: HPKB
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2015-2022, Wycliffe Bible Translators, Inc. and the Balochi Bible Translation Team. All rights reserved.