Luká 21
21
Janózáméay hayrát
(Markás 12:41–44)
1Issáyá sar borz kort o disti ke lahtén hazgár o hastómand, wati hayráti zarrán mazanén parasteshgáhay pétiá#21:1 Péti, bezán sanduk. mán kanagá ent. 2Áiá, yakk nézgárén janózámé ham dist ke pétiay tahá do paysahi#21:2 Asligén Yunáni nebeshtánka gwashit: “do lepton”, bezán á zamánagay gwandhterén zarr. dawr dát. 3Nun gwashti: “Shomárá rásténa gwashán, é béwasén janózámá cha sajjahénán géshter mán kort. 4Chéá ke á degarán cha wati géshén málá chizzoké dát, bale é janózámá, gón wati nézgári o garibiá, harché ke áiá hastat dáti, bezán wati sajjahén bonmál.”
Áyókén zamánagay bárawá Issáay péshgói
(Mattá 24:1–14; Markás 13:1–13)
5Lahtén mardom mazanén parasteshgáhay bárawá habar kanag o gwashagá at ke “É gón chónén dhawldárén seng o gránkimmatén hayrát o thékián nakshband kanag butag.” 6Á wahdi Issáyá gwasht: “Cha eshán ke shomá maróchi gendagá ét, róché kayt ke yakk sengé ham domi sengay sará namánit. Sajjahénána próshant o karójant.” 7Jostesh gept: “Oo ostád! Bárén, é prosht o prósh kadéna bit o eshiay nazzikk bayagay nesháni ché ent?” 8Issáyá gwasht: “Hozzhár bét, kasé shomárá gomráh makant. Chéá ke bázéné pa mani námá kayt o gwashit: ‘Man hamá án’ o ‘Wahd átkag o nazzikk ent,’ bale shomá áyáni habará gón makapét. 9Wahdé shomá jang o áshópay kukkárá eshkonét, matorsét o paréshán mabét. Chéá ke awalá báyad ent é dhawlá bebit, bale halásiay wahd hamá damáná pa sara narasit.”
10Gorhá gón áyán gwashti: “Yakk kawmé dega kawméay sará o yakk hokumaté dega hokumatéay sará páda kayt. 11Mazanén zeminchandha#21:11 Zeminchandh, bezán zeminjomb, zelzelah. bit o bázén jágahán dhokkál o wabá kapit. Cha ásmáná torsnákén sargwast o ajabbatén nesháni paddara bit.
12Bale cha é sajjahénán o pésar, shomárá gerant o pa shomá jawr o ázára kanant, kanisah o jélána barant o bandiga kanant. Pa mani námay sawabá bádsháh o hákemáni démá barant o pésha kanant. 13Gorhá shomárá pa gwáhi dayagá sharrén móhé rasit. 14Gón wat shawr kanét ke pa wati démpániá, cha wahdá pésar paréshán mabét. 15Chéá ke man shomárá anchén habaráni zántkáriá dayán ke hecch dozhmené shomay démá maóshtit o shomay habarán prósht makant. 16Tantaná#21:16 Tantaná, bezán hattá, tán é haddá ke. shomay mát o pet, brát o syád o dóst, shomárá geráénant o lahténá kóshárénant. 17Sajjahén mardom pa mani námay sawabá cha shomá naprata kanant, 18bale cha shomay sará yakk mudé ham kamma nabit. 19Agan pa deléri sakkián besaggét, wati sáhá rakkénét.
Urshalimay harábi o wayrániay péshgói
(Mattá 24:15–21; Markás 13:14–19)
20Wahdé shomá gendét ke Urshalim, pawj o lashkará chapp o chágerdá angerr kortag, gorhá bezánét ke eshiay wayrániay wahd nazzikk ent. 21Á wahdá hamá ke Yahudiahá ant, kóhán betachant, á ke Urshalimá ant dhanná dar bekapant o á ke cha shahrá dhann ant shahrá marawant. 22Chéá ke á wahd sezáay wahda bit o sajjahén nebeshtánkáni habar purah o sarjama bant. 23Á róchán, apsóz pa lápporr o chokmátén janénán, chéá ke molkay sará báz sakki o janjála kayt o é kawmay sará Hodáay kahra kapit. 24Dozhmen áyán zahmáni dapá dayant o bázénéá bandig o sajjahén donyáay tahá darándhéha#21:24 Darándhéh, bezán jaláwatan. kanant. Urshalim, darkawmáni pádáni lagatmála bit, tán á wahdá ke darkawmáni wahd o báriga kotthit o halása bit.
Issáay per tarrag
(Mattá 24:29–31; Markás 13:24–27)
25Cha róch o máh o estárán ajabbatén nesháni paddara bant o donyáay sajjahén kawm cha daryáay chawl o mawjáni trondén tawárá paréshán o sargardána bant. 26Mardom, donyáay sará áyókén janjál o sakki o sóriáni tors o bimmá béhósha bant, chéá ke ásmánay zór o wák larzénaga bant. 27Á wahdá, mardom Ensánay Chokká gendant, ke gón mazanén wák o twán o shán o shawkaté cha jambaréay nyámá kayt o paddara bit. 28Wahdé é jáwara káyant o rasant, gorhá wati sará borz kanét o tachkátachk bóshtét ke shomay rakkénagay wahd nazzikk ent.”
Enjiray drachk
(Mattá 24:32–35; Markás 12:28–31)
29Issáyá pa áyán é mesál ham dát ke “Enjir o é dega drachkán bechárét, 30anchosh ke tákesh jat, wata zánét ke nun garmágay mósom nazzikk ent. 31Hamé paymá, wahdé é chizzána gendét, wata zánét ke Hodáay bádsháhi nazzikk ent. 32Shomárá rásténa gwashán, tán é sajjahén jáwar mayáyant, é nasl o padréch halása nabit. 33Zemin o ásmán gára bant, bale mani habar hechbar gár o zyána nabant.
34Hozzhár bét, chosh mabit ke shomay del pa neshah o malárán berawt o zenday pegr o andóh shomay delá gránbár bekant o á róch anágat shomay gotthá lóp bebit. 35Chéá ke á róch pa donyáay sajjahén mardomána kayt. 36Paméshká harwahd hozzhár bét o dwá bekanét, tán shomárá á róchá ke chosha bit o é jáwar pa sara rasant dar rawagay wák bebit o Ensánay Chokkay bárgáhá óshtát bekanét.”
37Issáyá har róch, mazanén parasteshgáhá sabakk o tálima dát. Har shap cha shahrá dhann, Zaytun námkaptén kóhay sará shot o wati shapi sabáha kort. 38Mardom ham har sabáhá máhallah, pa áiay habaráni gósh dáragá, mazanén parasteshgáhá átkant.
Выбрано:
Luká 21: HPKB
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2015-2022, Wycliffe Bible Translators, Inc. and the Balochi Bible Translation Team. All rights reserved.
