Luká 20
20
Issáay wák o ehtiáray bárawá
(Mattá 21:23–27; Markás 11:27–33)
1Yakk róché ke Issá mazanén parasteshgáhay péshgáhá mardomán tálim o wasshén mestág dayagá at, mazanén dini péshwá o Sharyatay zánóger gón kawmay kamáshán áiay kerrá átkant o 2gwashtesh: “Márá begwash ke taw gón kojám hakk o ehtiárá é kárána kanay? Kayá tará é káráni ehtiár dátag?” 3Issáyá passaw dát: “Maná ham cha shomá yakk josté hast. Begwashét, 4Yahyáyá, pákshódi dayagay ehtiár cha ásmáná rasetagat yá cha ensánay némagá?” 5Áyán watmánwatá shawr o saláh kort o gwashtesh: “Agan begwashén ‘cha ásmáná at,’ gwashit: ‘Pa ché imánó nayáwort?’ 6Oo agan begwashén ke ‘mardomi káré butag,’ gorhá mardom márá sengsára kanant, chéá ke áyáni setk o báwar hamesh ent ke Yahyá nabié butag.” 7Paméshká passawesh dát: “Má nazánén cha kojá at.” 8Issáyá gwasht: “Gorhá man ham shomárá nagwashán ke gón kojám hakk o ehtiárá é kárána kanán.”
Badén bágpánáni mesál
(Mattá 21:33–46; Markás 12:1–12)
9Randá, Issáyá pa mardomán é mesál áwort: “Mardéá anguri bágé addh kort o pa konandahkári o zamán,#20:9 Konandahkári o zamán, bezán paymánkári, ejáray sará, thékah. lahtén bágpánay dastá dát o wat drájén saparéá shot. 10Wahdé anguray mósom but, bágay hodábondá pa wati bahray geragá, hezmatkáré ráh dát, bale zamánzurén bágpánán á hezmatkár latth o kotth kort o gón hórk o háligén dastán per tarrént. 11Bágay hodábondá, padá dega hezmatkáré dém dát, bale bágpánán á ham jat o béezzat kort o gón hórk o háligén dastán per tarrént. 12Gorhá sayomi randá, dega hezmatkáré ráhi dát, bale áyán á ham jat o thappig kort o dhanná gallént.
13Nun bágay hodábondá wati delá pegr kort ke ‘chón bekanán?’ É randá, wati dóstén chokká ráha dayán, balkén áiay ruá bedárant. 14Bale wahdé bágpánán áiay chokk dist, watmánwatá shawr kort o gwashtesh: ‘Bágay mirásdár o poshpad hamesh ent, eshiá ham bekoshén tán bág may mirás bebit.’ 15Gorhá cha bágá dhann bort o koshtesh. Nun shomay gománá, bágay hodábond gón é bágpánán ché kant? 16Á kayt, é bágpánána koshit o bágá dega bágpánáni dastá dant.” Wahdé mardomán Issáay é habar eshkot, gwashtesh: “Chosh mabát!”
17Issáyá áyáni némagá cháret o gwashti: “Gorhá, á nebeshtahay máná ché ent ke gwashit: ‘Hamá seng ke bánbandén ostáyán pasond nakort o nazort, hamá seng bonhesht#20:17 Bonhesht, bezán lógay awali hesht yá seng. but.’#20:17 Zabur 118:22. 18Harkas ke á sengay sará bekapit, thokkor thokkora bit o kasé ke seng áiay sará kapit, hurta bit.”
19 Sharyatay zánóger o mazanén dini péshwáyán zánt ke Issáyá é mesál hamáyáni bárawá áwortag. Paméshká, shawresh kort hamá damáná Issáyá begerant, bale cha mardomána torsetesh.
Máliátay bárawá
(Mattá 22:15–22; Markás 12:13–17)
20Gorhá Issáesh chammáni chérá kort, wati chárig o jásusesh rawán dátant tán watá Issáay démá tachk o pahrézkárén mardom pésh bedárant. Áyáni maksad esh at ke Issáyá cha áiay jenday habarán mán begisshénant o Rumay wáliay dastá bedayant. 21Áyán jost kort: “Oo ostád! Má zánén taw harché ke gwashay, har tálimé ke dayay, á sajjahén rást ant o hechkaséay némagá nageray o pa rásti Hodáay ráhá sója dayay. 22Nun márá begwash, bárén Rumay bádsháh Kaysará song o máliát dayag rawá ent yá na?” 23Bale Issáyá áyáni é repk o mandr#20:23 Mandr, bezán repk, sázesh, pachali. zánt o gwashti: 24“Maná yakk dináré pésh bedárét, eshiay sará kai nám o naksh per ent?” Áyán passaw dát: “Kaysaray.” 25Issáyá gwasht: “Gorhá Kaysaraygá Kaysará bedayét o Hodáaygá Hodáyá bedayét.” 26É dhawlá, áyán mardománi démá Issá cha áiay jenday habarán dámá dawr dát nakort o cha áiay passawán bah mant o bétawár butant.
Áherat o sáng o sur
(Mattá 22:23–33; Markás 12:18–27)
27Randá, lahtén Saduki, ke áheratay namannók ant, Issáay kerrá átk o 28jostesh kort: “Oo ostád! Mussáyá pa má nebeshtag: Agan kaséay sur kortagén bráté bé chokká bemerit o janózámi zendag bebit, gorhá áiay brát báyad ent gón á janózámá sur bekant tánke chokk o rand o ráhé pa wati brátá bellit.#20:28 Mussáay Wáz 25:5 o rand. 29Nun hapt brát atant, awali brátá jané gept, chokki nabut o mort, 30domi brátá o 31padá sayomi brátá gón á janéná sur kort o á ham bé chokká mortant. Hamé paymá haptén brátán gón hamá janéná sur kort o bé pad o rand cha donyáyá shotant. 32Godhsará, á janén ham mort. 33Nun taw begwash, áheratay róchá, é janén, kojám brátayga bit, chéá ke har haptén brátán bárig bárigá gón áiá sur kortagat.”
34Issáyá passaw dát: “Mardom, é jaháná sáng o sura kanant, 35bale hamá mardom ke namiránén zendá karzant o áheratay láhek ant, á na sura kanant o na sur dayaga bant. 36Á hechbar padá namerant o préshtagáni dhawlá ant, Hodáay chokk ant, chéá ke namiránén zenday chokk ant. 37Bale mordagáni zendag bayagay habaray rásti, Mussáyá mán bon geptagén dhólokay kessahá pésh dáshtag. Ódá Mussá Hodáwandén Hodáyá, Ebráhémay Hodá, Esákay Hodá o Ákubay Hodá#20:37 Darraw 3:6. gwashit. 38Á mordagáni Hodá naent, zendagénáni Hodá ent, chéá ke áiay gwará, sajjahén zendag ant.”
39Cha Sharyatay zánógerán lahténá gwasht: “Oo ostád, taw sharr gwasht.” 40Cha ed o rand, hechkasá del nakort cha áiá dega josté begipt.
Masih kai chokk ent?
(Mattá 22:41–46; Markás 12:35–37)
41Issáyá gón áyán gwasht: “É chónén habaré ke gwashant: ‘Masih, Dáud bádsháhay chokk ent?’ 42Chéá ke Dáud wat Zaburay ketábá gwashit:
Hodáwandá gón mani Hodáwandá # 20:42 Mani Hodáwand, bezán Issá Masih. gwasht
mani rástén némagá benend
43 tán hamá wahdá ke tai dozhmenán tai pádáni chéray padag o chárchóbahé bekanán. # 20:43 Zabur 110:1.
44Nun agan Dáud, Masihá wati Hodáwanda gwashit, gorhá Masih chón áiay chokk buta kant?”
Issá Sharyatay zánógerán páshka kant
(Mattá 23:1–7; Markás 12:38–40)
45Hamé wahdá ke sajjahén mardom gósh dáragá atant, Issáyá gón moridán gwasht: 46“Cha Sharyatay zánógerán hozzhár bét, ke áyán drájén jámag o kabáh gwará kanag dósta bit o bázáráni tarr o gardá cha mardomán wasshátk o drahbáta lóthant. Kanisaháni sharterén jáhán gechéna kanant o mehmánián, awali reday nendagesh pasond ent. 47Janózámáni lógán gón málwáriá barant o pa pésh dáragá wati dwá o sanáyán drájkassha kanant. Eshán sakterén sezá o padmozza rasit.”
Выбрано:
Luká 20: HPKB
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2015-2022, Wycliffe Bible Translators, Inc. and the Balochi Bible Translation Team. All rights reserved.
