Luká 23
23
Issá Pilátusay démá
(Mattá 27:1–2, 11–14; Markás 15:1–5; Yuhanná 18:28–37)
1Randá, diwánay sajjahén mardom pád átkant o Issáesh Pilátusay démá bort. 2Áiay sará tohmat o bohtám janáná gwashtesh: “Má distag ke é mard, kawmá gomráha kant, Rumay Kaysaray song o máliát dayagá manah o makana kant o gwashit: ‘Man Masih o bádsháh án.’” 3Pilátusá jost kort: “Taw Yahudiáni bádsháh ay?” Issáyá passaw dát: “Taw wat gwashagá ay.”
4Pilátusá gón mazanén dini péshwá o á dega mardomán gwasht: “Man pa é mardá hecch mayáré nagendán.” 5Bale mardom wati habaray sará óshtátant o gwashtesh: “É mard, gón wati tálimán, Yahudiahay sajjahén damagay mardomána shórénit. Cha Jalilá bongéji kortag o annun edá rasetag.” 6Pilátusá mardománi é habar ke eshkotant, lótheti bezánt, bárén, á cha Jalilay mardomán ent? 7Wahdé sahig but Issá Jalilié, gorhá Hirudisay némagá ráhi dát, chéá ke Jalilay hákem, Hirudis á wahdá Urshalimá at.
Issá o Hirudis
8 Hirudisá Issá ke dist, báz wassh but, chéá ke dérén wahdé at ke áiay gendagá wáhagdár#23:8 Wáhagdár, bezán lóthók, delmánag, hodónák. at. Cha Issáay kortagén káráni eshkonagá rand, nun ométwár at ke yakk mójezah o ajabbatén neshánié begendit. 9Gorhá, cha Issáyá bázén jost o porsé korti, bale Issáyá hecch passawé nadát. 10Mazanén dini péshwá o Sharyatay zánóger ke hamódá óshtátagatant, Issáay sará bázén tohmat o bohtám janagá atant. 11Hirudisá ham gón wati sepáhigán hórigá, Issá béezzat kort o kalág gept. Randá, dhawldárén kabáhé gwará dát o padá Pilátusay kerrá rawán kort. 12Cha hamá róchá, Hirudis o Pilátus, bél o sangat butant. Pésará, á watmánwat dozhmen atant.
Issáay markay hokm
(Mattá 27:15–26; Markás 15:6–15; Yuhanná 18:39—19:16)
13 Pilátusá, mazanén dini péshwá, Yahudiáni kamásh o mahluk lóthetant o 14gwashti: “Shomá, é mard mani gwará áwortag o tohmat o bohtám jatag ke mardomán gomráh o yágia kant. Bale cha á jostán ke man shomay démá kortagant, áiay sará shomay jatagén bohtámán hecch rástié nadiston. 15Hirudisá ham mayáré nadistag, paméshká padá may gwará ráhi dátag. É mardá choshén hecch gonáh o mayáré nakortag ke sezái mark bebit. 16Gorhá, man áiá adaba dayán#23:16 Edá adab dayagay máná shallák o hayzarán janag ent. o yalaha kanán.” 17#23:17 Lahtén daznebeshtá é band nést, bale lahténá chó átkag: Pilátusá har Sargwazay Aidá, cha wati bandigán yakké, allamá ázát kanagi at. 18Bale sajjahén mardomán kukkár kort o gwasht: “Issáyá bekosh! Bárábásá yalah beday!” 19Bárábás, Urshalimay shahrá, áshóp o hón kanagay mayáray sará, bandig kanag butagat.
20Pilátus, Issáay yalah dayagá delmánag at, Paméshká dega yakk randé áiay bárawá gón mardomán habari kort. 21Bale mardom sakk kukkár kanagá atant o gwashtesh: “Salibi kassh! Salibi kassh!”
22Pilátusá, sayomi randá cha áyán jost kort: “Chéá bárén? É mardá che badén káré kortag? Man pa eshiá hecch choshén mayáré nagendán ke kóshay hokmá bedayán, paméshká adabia dayán o yalahia kanán.” 23Bale mardom gón kukkár wati habaray sará óshtátant o gwashtesh: “Salibi kassh!” Néth,#23:23 Néth, bezán godhsará, áherá. áyáni wáhag o kukkár pa sar raset. 24Pilátusá áyáni wáhagay sará hokm dát. 25É dhawlá, áiá hamá mard ke pa áshóp pád kanag o hónay bohtámá bandig at o mardomán áiay yalah dayaga lóthet, ázát kort o áyáni wáhagay sará, pa Issáay kóshá hokm dát.
Issá dém pa salibá
(Mattá 27:32–44; Markás 15:21–32; Yuhanná 19:17–24)
26Wahdé Issáyá baragá atant, Shamun námén mardé distesh ke Keriniay shahray mardomé at o dém pa shahrá pédák at. Sepáhigán á mard gept, salib áiay baddhá dát o hojjesh kort ke Issáay randá berawt. 27Issáay randá, bázén mardomé rawagá at o gón áyán rombé janén ham gón at ke pa Issáaygi gréwán o mótk kanán atant. 28Issáyá chakk tarrént, áyáni némagá cháret o gwashti: “Oo Urshalimay jenekkán! Pa man magréwét, pa wat o wati chokkán begréwét. 29Yakk anchén wahdé kayt ke gwashant: ‘Bahtáwar ant á janén ke santh o bérand ant, hamá janén ke chokkesh nabutag o cha wati sénagán chokkesh naméchéntag.’ 30Hamá wahdá, mardom kóhán tawára kanant: ‘Byáét may sará bekapét’ o jompána gwashant: ‘Márá panáh dayét.’ 31Wahdé á gón sabzagén drachká chosha kanant, gorhá gón hoshkéná ché nakanant?”
32Áyán, do radkárén mardom áwort ke gón Issáyá hór, koshagi atant. 33Wahdé hamá “Kámpól” námén jágahá rasetant, áyán Issá salibay sará dratk. Áiay rástén némagá yakk radkáré salib kasshet o chappén némagá domi radkár. 34Issáyá gwasht: “Oo Pet! Áyán pahell kan, chéá ke nazánant ché kanagá ant.” Gorhá sepáhigán Issáay pocch o póshák kasshetant o pa áyáni bahr kanagá shartesh bast ke bárén kayá rasant.
35Mardom pa sayl o nedáragá#23:35 Nedárag, bezán sayl, tamáshá. óshtátagatant o sarókáni diwánay básk#23:35 Básk, bezán ozw, membar. rishkand kanáná, gwashagá atant ke “Eshiá, á dega rakkéntant, bale agan Masih ent o Hodáay hamá gechén kortagén, nun gorhá watá berakkénit.”
36Sepáhig ham áiay nazzikká shotant o kalágesh gept, tropshén sharábesh cháshént o gwashtesh: 37“Agan taw Yahudiáni bádsháh ay, gorhá watá berakkén.” 38Issáay saray borzádiá é dhawlén mayárnámagé ham lónj kortagat ke: “É Yahudiáni bádsháh ent.”
39Cha doén radkárán ke salibá dratkagatant, yakkéá dozhmán dayáná gwasht: “Taw Masih naay? Gorhá, byá watá o márá berakkén!” 40Bale domi radkárá á hakkal kort o gwashti: “Záná, tará cha Hodáyá natorsit? Tará ham hamé sezá rasagá ent. 41May sezá barhakk ent, chéá ke may kortagén káráni ásar ent. Bale é mardá hecch mayáré nakortag.” 42Gorhá gwashti: “Oo Issá! Wahdé taw wati bádsháhiá sar butay, mani hayálá ham bekap.” 43Issáyá passaw dát: “Tará rásténa gwashán ke taw maróchi mani hamráhiá, baheshtá raway.”
Issáay mark
(Mattá 27:45–56; Markás 15:33–41; Yuhanná 19:28–30)
44Némróchay wahd at.#23:44 Asligén Yunáni nebeshtánka gwashit: “shashomi sáhat”. Yahudiáni róchay hesáb, sáhat sohbay shashá bongéja but. Anágat sajjahén molk tahár but o é taháróki tán bégáhá mant.#23:44 Asligén Yunáni nebeshtánka gwashit: “shashomi sáhatá beger tán nohomi sáhatá”, bezán maróchigén sáhatáni hesábá, dwázdahá beger tán sayá. 45Chéá ke róchay drapshag band butagat o mazanén parasteshgáhay pardah cha nyámá dert o do ném but. 46Issáyá borzén tawáréá chihál kasshet o gwasht: “Oo Pet! Man wati ruh o sáhá tai dastá dayán.”#23:46 Bechár: Zabur 31:5. Gón hamé habará, sáhi dát.
47Pawjiáni yakk apsaréá é nedárag dist, Hodái satá kort o gwashti: “Béshakk ke é nékén mardé at.” 48Á dega sajjahén mardom ke pa saylá átkagatant, gón é nedáragay gendagá sar o sénag janán o mótk kanáná wati lógán per tarretant. 49Hamá mardom ke Issáay pajjárók atant o hamá janén ke cha Jalilá áiay hamráhiá átkagatant, dur o gestá óshtátagatant o é sajjahén sargwastesh distant.
Issáay kabr kanag
(Mattá 27:57–61; Markás 15:42–47; Yuhanná 19:38–42)
50Hamódá, Issop námén mardé ham gón at ke tachk o pahrézkárén mardé at. Belli ke sarókáni diwánay báské at, 51bale pa Issáay mayárig kanagá gón áyáni shawr o habarán hamdel naat. Á, Yahudiáni shahr Arimátiáay mardomé at o Hodáay bádsháhiay rahchár o wadárig at. 52Pilátusay kerrá shot o cha áiá Issáay jónay baragay ejázati lóthet. 53Issáay jóni cha salibay sará ér gétk, lilomén#23:53 Lilom, goday tahré ke Engréziá “linen” gwashaga bit. godéay tahá kapan kort o taláray tráshtagén kabréá ér kort ke pésará ódá hechkas kall kanag nabutagat. 54Á róch, tayáriay róch at o Shabbat bongéj bayagi at.
55Hamá janén ke cha Jalilá, Issáay hamráhiá átkagatant, Issopay randá rawán butant o hamá kabresh dist. Áyán é ham dist ke Issáay jón che paymá kabrá ér dayag but. 56Randá, wati lógán átkant o washbóén atr o rógenesh tayár kort. Shabbatay róchá, Sharyatay rahbanday sará, áyán árám kort.
Выбрано:
Luká 23: HPKB
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2015-2022, Wycliffe Bible Translators, Inc. and the Balochi Bible Translation Team. All rights reserved.