LydenstydSample

Die Seën van Bekering

Lees: 2 Kronieke 7:14; Handelinge 2:38; 1 Johannes 1:9

SOAP: 1 Johannes 1:9

"Maar as ons ons sondes bely — Hy is getrou en regverdig, Hy vergewe ons ons sondes en reinig ons van alle ongeregtigheid."

Oordenking

Bekering is 'n seën. Dit is 'n wonderbaarlike gawe dat God ons behoefte aan bekering aan ons uitwys deur die werk van die Heilige Gees en dan betoon Hy nog meer genade en goedgunstigheid aan ons deur ons daarheen te lei.

God weet wanneer ons in sondige patrone verval het en wanneer ons in vleeslike begeertes of die dinge van die wêreld vasgevang is. Sy begeerte is dat ons nederig sal wees, sal bid, probeer om Hom te behaag en ons van ons sondes sal wegkeer. Hy belowe dat wanneer ons dit doen, Hy ons sal vergewe.

Bekering is nie net vir diegene wat volgelinge van Jesus is nie. Bekering is die eerste stap om 'n verhouding met God te hê. As ons nog nie 'n verhouding met God het nie, moet ons eers erken dat ons sonde 'n probleem is en dat dit ons van God af weghou. Bekering is eenvoudig 'n erkenning dat ons sondig is, dat ons nie onsself kan red nie en dat ons God nodig het om ons te red.

Wanneer ons ons bekeer, moet ons glo dat Jesus se offer genoeg was om ons sondes te bedek. Ons aanvaar God se vergifnis en die regverdiging van Christus. Ons vra God om ons die krag te gee om ons van ons sondes af weg te keer en Hom te gehoorsaam, sodat ons nie sal toegee wanneer die versoeking weer kom nie.

Ongelukkig, solank as wat ons hier leef, sal ons ons elke dag moet bekeer. Gelukkig is God se genade elke oggend nuut. Terwyl ons lewe, is dit nooit te laat om ons te bekeer nie. Ongeag of jy jou nog nooit van jou sonde bekeer het en jou geloof in Christus geplaas het nie; of jy van God af weggedryf het en in sondige patrone verval het; en of jy met God wandel, maar steeds worstel met sonde (soos ons almal), kan jy jou altyd bekeer. Wat 'n genadegawe het ons nie in bekering nie, in die vermoë om ons sondes te bely en God se genadige vergifnis te aanvaar.