Spreuke – eenjaarleesplanSample

Spreuke waarsku teen leuenagtigheid en ligsinnigheid. Regdeur Spreuke word die vernietigende effek van die bedrog van leuens uitgewys. Dit stook rusie tussen broers (Spreuke 6:19; 24:28). Dit maak alles vals en besoedel jou karakter (Spreuke 12:17; 14:25). Dit bring jou in die moeilikheid (Spreuke 19:5,9; 21:28).

Leuens is soos ’n knopkierie waarmee jy iemand slaan, of ’n swaard waarmee jy iemand steek, of ’n skerp pyl waarmee jy iemand skiet (Spreuke 25:18). Ligsinnigheid is net so erg (Spreuke 13:1). Dit dui op iemand wat met geen respek van ander praat en wat vir hulle belangrik is nie.

Spreuke gebruik die woord “spotter” vir so 'n persoon. Dit is iemand wat spot met wat vir ander heilig is; wat wysheid op ’n arrogante, siniese manier minag. Hulle het geen waardering vir wyse woorde nie, ook nie dié van teregwysing nie. Die tragiese gevolg is dat ’n spotter soms vir wysheid sal soek, maar dit nie vind nie. Terwyl ’n wyse baie maklik kennis bekom.