Hechos 4

Jaꞌ Yet Jix Iꞌletoj Pedro Yetoj Juan Sattaj Ebꞌ Yaaw

1Lalan skꞌanabꞌ Pedro yetoj Juan snan xol ánima, catuꞌ jix apni ebꞌ yakꞌomal xaambꞌal ebꞌ Israel tet Dios yin ebꞌ, yetoj naj sat steynemal templo, cꞌal ebꞌ Saduceo.#4:1 Jaꞌ ebꞌ yaawil templo, jaꞌton ebꞌ Saduceo. Jaꞌ ebꞌ chi cuywai, tol cꞌam chi pitzcꞌu a ebꞌ camnaj. Yuxan jix tit sjowal ebꞌ yin scuybꞌanil ebꞌ ẍejabꞌ Jesús. Lucas 20:27. 2Caw jix tit sjowal ebꞌ sicꞌlebꞌil, yutol lalan scuywa Pedro yetoj Juan tuꞌ xol ánima. Cꞌuxan lalan yalon ebꞌ tol oj pitzcꞌu a ebꞌ camnaj, yutol queytuꞌ jix yun spitzcꞌu a Jesús. 3Yuxan jix mitxꞌletej ebꞌ yu ebꞌ, catuꞌ jix ale oc ebꞌ preso, yutol yeycꞌualil xa, cꞌamxa cꞌu, yuxan jix cancan ebꞌ yul preso jun akꞌbꞌal. 4Ecꞌal ebꞌ jix yabꞌ skꞌane Dios tuꞌ. Jix yaoc ebꞌ yin scꞌul, yuxan jix a can sbꞌisil ebꞌ creyente tuꞌ. Joebꞌ mi mil sbꞌisil ebꞌ winaj.

5Jaꞌ yet junxa cꞌual xin, jix syambꞌa sbꞌa ebꞌ sat yaaw bꞌey Jerusalén tuꞌ, yetoj ebꞌ ichamtaj winaj ey yopiso, cꞌal ebꞌ cuywam yin sley Moisés. 6Jix syambꞌa sbꞌa ebꞌ yetoj jun naj yaawil yakꞌomal xaambꞌal ebꞌ tet Dios, chi yij Anás, yetoj pax naj Caifás, yetoj naj Juan, cꞌal Alejandro, cꞌal masanil ebꞌ naj yicꞌaal naj yaawil yakꞌomal xaambꞌal ebꞌ tet Dios. 7Catuꞌ jix yakꞌon iꞌletoj Pedro cꞌal Juan sattaj ebꞌ, catuꞌ jix apni ebꞌ snan xol ebꞌ. Jix skꞌanlen el ebꞌ tet ebꞌ jaxca tiꞌ:

—¿Bꞌeytuꞌ jix je yiꞌ jun je yopiso tiꞌ, yuxan che yun wan tiꞌ? ¿Mactxequel jix akꞌon je yip? ẍi ebꞌ tet ebꞌ.

8Yu caw eyoc Santo Espíritu yin Pedro, yuxan jix yal jaxca tiꞌ:

—Jex yaaw icham winaj Israel, cꞌal jex yaawil conobꞌ. 9Yakꞌ sbꞌa tol che kꞌanle el ey jon, yu jun watxꞌcꞌulalil jix kakꞌ tet naj cꞌam taꞌ chi skeꞌ sbꞌey tiꞌ, tejan che yoche che yabꞌ tzet jix yun swaꞌxi can naj. 10Yuxan oj kaltej jun tiꞌ ey jex, yet watxꞌ chi yotajne el masanil ebꞌ ket Israelal. Jaꞌ naj eecꞌ je sattaj tiꞌ, asan yu yipal Jesucristo jix waꞌxi naj. Jaꞌ Jesucristo tuꞌ, jaꞌ jix je yakꞌ locbꞌale a yin culus. Jix pitzcꞌunele pax a yu Dios xol ebꞌ camnaj. 11Jaex tiꞌ, laan jex jaxca junoj waꞌnem na. Jaꞌ Naj Jesús, laan jaxca junoj chꞌen chꞌen cꞌam chi oc yopiso je yu, jaꞌ jix oc pax yopiso jaxca chꞌen yel miman yopiso.#Salmos 118:22. 12Cꞌam junojxa mac chi skeꞌ cu scoloni, yutol jaꞌ bꞌey yul yibꞌankꞌinal tiꞌ, cꞌam junoj mactxequel jix akꞌle yopiso yu Dios yakꞌon colbꞌanile, asan Jesús, ẍi naj Pedro.

13Jaꞌ yet jix yilon oc ebꞌ yaaw tuꞌ, tol caw tecꞌan chi yute sbꞌa Pedro yetoj Juan tuꞌ skꞌanabꞌi, jix yilon pax ebꞌ tol man cuywinaj oj ebꞌ, jaxca tol comon ánima cꞌal ebꞌ, yuxan, caw jix qꞌueya scꞌul ebꞌ yu ebꞌ. Catuꞌ jix naꞌcha el yu ebꞌ tol jix ecꞌ ebꞌ yetoj Jesús. 14Catuꞌ linan oc naj jix waꞌxi yajan tuꞌ scꞌatan ebꞌ. Yuxan, cꞌamxa junoj tzet jix skeꞌ yaon oc ebꞌ yibꞌan ebꞌ. 15Yuxan jix yal ebꞌ tol chi iꞌle el Pedro yetoj Juan tuꞌ xol ebꞌ, yajbꞌan chi kꞌanabꞌ ebꞌ xꞌojli. 16Jix el cꞌal ebꞌ xol ebꞌ xin, jix yalon ebꞌ jaxca tiꞌ:

—¿Tzet watxꞌ chi kute ebꞌ scawanil chi cu naꞌwej xin? Yutol masanil ebꞌ a Jerusalén tiꞌ, yotaj jun milagro* jix el yunen ebꞌ tiꞌ. Yuxan, jaꞌ tinaniꞌ, cꞌam chi skeꞌ kaloni, tol tucꞌal chi yal ebꞌ. 17Jaꞌ tinaniꞌ xin, manche xa ojabꞌ sajlemtoj jun tiꞌ xol ánima. Yuxan cu xibꞌtewej ebꞌ, yet watxꞌ cꞌamxa chi yalel skꞌaneal Jesús ebꞌ tuꞌ tet junojxa mactxequel, ẍi ebꞌ yaaw tuꞌ.

18Jix lawi tuꞌ xin, jix awtele ebꞌ yu ebꞌ yaaw tuꞌ. Jix cam yalon ebꞌ tet ebꞌ, tol cꞌamxa bꞌakꞌin chi yal ebꞌ niꞌojxa skꞌaneal Jesús, catuꞌ cꞌamxa chi cuywa ebꞌ tet ebꞌ ánima. 19Jix takꞌwi pax Pedro yetoj Juan tuꞌ tet ebꞌ jaxca tiꞌ:

—Chi cam wal je naꞌoni. ¿Watxꞌ mi yul sat Dios che naꞌ, ta jaꞌ je yet chi cu jije, jal Dios cꞌam chi cu jije tzet chi yalaꞌ? 20Yuxan, tutun ma skeꞌ cu bꞌejon kalon el skꞌaneal tzet jix kilaꞌ, cꞌal tzet jix kabꞌe, ẍi ebꞌ.

21Yu tzet jix yal ebꞌ tuꞌ xin, jix xibꞌtele ebꞌ yu ebꞌ. Catuꞌ jix jajle el ebꞌ. Cꞌam chi naꞌcha el yu ebꞌ tzet watxꞌ bꞌey chi can mitxꞌan ebꞌ, catuꞌ chi ale oc syaꞌilal ebꞌ yu ebꞌ, yutol masanil ánima chi yal watxꞌ kꞌane tet Dios yu jun tzet jix el yunen ebꞌ tuꞌ. 22Jaꞌ naj jix waꞌxi can yajan yu jun milagro tuꞌ, ecꞌbꞌanxa cuarenta abꞌil naj.

Jix Skꞌan Stecꞌanil Ebꞌ Creyente Tet Dios

23Jaꞌ yet jix jajcha Pedro yetoj Juan tuꞌ xin, catuꞌ jix too ebꞌ, catuꞌ jix apni ebꞌ bꞌey eyecꞌ wanxa yetbꞌi ebꞌ. Jix yal ebꞌ tet ebꞌ masanil tzet jix al-le tet ebꞌ yu ebꞌ yaawil yakꞌomal xaambꞌal ebꞌ Israel tet Dios, yetoj ebꞌ ichamtaj winaj ey yopiso. 24Jix yabꞌ cꞌal ebꞌ yetbꞌi ebꞌ tuꞌ xin, catuꞌ jix txali ebꞌ masanil tet Dios. Jix yal ebꞌ jaxca tiꞌ yin xa ebꞌ:

—Mamin, jaach jix ja waꞌne satcan, cꞌal txꞌotxꞌ txꞌotxꞌ tiꞌ, yetoj jaꞌ mar, cꞌal masanil tzettaj yetal. 25Jaach jix ja wakꞌbꞌalne Santo Espíritu, catuꞌ jix jaach kꞌanabꞌ yin stiꞌ ja chejabꞌ David, yet jix yalon can jaxca tiꞌ:

¿Tzet yuxan chi jowbꞌi a ebꞌ ánima bꞌey junjun conobꞌ?

¿Tzet yuxan chi snaꞌ ebꞌ wan tzetyetal cꞌam yeloc apnoj?

26Jix syambꞌa oc sbꞌa ebꞌ rey yul yibꞌankꞌinal tiꞌ, catuꞌ jix syambꞌa oc sbꞌa ebꞌ yaaw masanil.

Jix yamcha oc ebꞌ, catuꞌ jix skꞌumenlen sbꞌa ebꞌ yin cu Mam Dios, Kaawil, cꞌal yin Naj Cristo* sicꞌbꞌil el yu Dios, ẍi yul An Juun Tzꞌibꞌebꞌilcanoj.#Salmos 2:1, 2.

27Caw yel, jaꞌ naj Herodes, yetoj naj Poncio Pilato, cꞌal ebꞌ man Israeloj, yetoj pax ebꞌ Israel, jix syambꞌa oc sbꞌa ebꞌ yul conobꞌ tiꞌ, catuꞌ jix kꞌanabꞌ el ebꞌ yin ja Cꞌaal, asan jaach ja wet yei. Jaach tiꞌ jix ja waoc yopiso yin Mesías. 28Jix el yunen masanil tzet albꞌilcan yet peyxa. Yutol jix el yin ja cꞌul tol jaxca tuꞌ oj el yunen ebꞌ. 29Jal tinaniꞌ xin, Mamin ilaꞌ ebꞌ tiꞌ, caw chi tit sjowal ebꞌ kin. Yuxan, akꞌ cu tecꞌanil yet watxꞌ cꞌam chi cu xiw kalon el ja kꞌane, ilaꞌ tol ja chejabꞌ jon. 30Akꞌ ja wipal ey jon, yet watxꞌ cha wakꞌcan waꞌxoj scꞌul ebꞌ yaꞌey ku jon. Jaach jix ja wun wan milagro jix xꞌoxon el ja wipal yin Naj Jesús. Jaꞌ Jesús tuꞌ, ja Cꞌaal, asan jaach ja wet yei, ẍi ebꞌ tet Dios.

31Jaꞌ yet jix lawi xali ebꞌ tuꞌ, catuꞌ jix tzicle jun na bꞌey yaman ecꞌ ebꞌ tuꞌ yu Dios, catuꞌ caw jix oc can Santo Espíritu yin masanil ebꞌ. Yuxan, caw ey stecꞌanil ebꞌ yalon el skꞌane Dios.

Junne Ye Stzettaj Yetal Ebꞌ Creyente

32Jun laan xacꞌal snaꞌbꞌal ebꞌ creyente masanil. Caw ey watxꞌcꞌulal yin ebꞌ. Cꞌam junoj mactxequel chi yaloc junoj tzetyetal yetoj xꞌojli. Yutol junne cꞌal ye stzettaj yetal ebꞌ masanil. 33Jaꞌ ebꞌ ẍejabꞌ Jesús, caw tecꞌan cꞌal chi yute sbꞌa ebꞌ yalon eloj tzet utbꞌil tol jix pitzcꞌu a Naj Kaawil Jesús. Caw chi oc cꞌal Dios yetoj ebꞌ creyente masanil. 34Cꞌam mac mebꞌa xol ebꞌ, yutol masanil cꞌal mac ey xꞌotxꞌ, cꞌal sna, jix xoneloj, catuꞌ jix yiꞌontej stool tuꞌ, 35catuꞌ jix yakꞌon tet ebꞌ ẍejabꞌ Jesús tuꞌ. Jaꞌ ebꞌ chi poꞌon ecꞌ xol ebꞌ creyente tuꞌ, jatacꞌalaꞌ tzet sowalil chi oc yu junjun ebꞌ. 36Ey jun creyente chi yij José, jun jix oc can sbꞌi Bernabé yu ebꞌ ẍejabꞌ Jesús tuꞌ. Bernabé chi yal yeloc apnoj, “Mimancꞌulnewom”. Jaꞌ Bernabé tuꞌ, yicꞌaal naj Leví, a Chipre naj. 37Ey jun xꞌotxꞌ jix xoneloj, catuꞌ jix jul yakꞌon stool tet ebꞌ ẍejabꞌ Jesús tuꞌ.

നിലവിൽ തിരഞ്ഞെടുത്തിരിക്കുന്നു:

Hechos 4: knj

ഹൈലൈറ്റ് ചെയ്യുക

പങ്ക് വെക്കു

പകർത്തുക