Hechos 3
3
Swaꞌxubꞌal Yajan Naj Sicbꞌinaj El Yajan
1Jaꞌ yet junel, yet yeycꞌualil xa, yaman stoo naj Pedro yetoj naj Juan bꞌey stemplo Dios, yutol queytuꞌ yorail xali ebꞌ Israel tuꞌ tituꞌ. 2Ey jun winaj cꞌam chi skeꞌ sbꞌeyi yin tax cꞌaltaꞌ yalubꞌal. Junjun cꞌal cꞌu chi bꞌet bꞌatxle can bꞌey stiꞌ jun spuertail stemplo Dios chi yij Sakꞌal Yili, catuꞌ chi skꞌanon stumin tet ebꞌ ánima chi bꞌetecꞌ bꞌey templo tuꞌ. 3Jaꞌ yet jix yilon naj yapni Pedro yetoj Juan bꞌey templo tuꞌ, yet lalan yoctoj ebꞌ, jix skꞌanon stumin naj tet ebꞌ. 4Catuꞌ jix oc tꞌanan Pedro yetoj Juan tuꞌ yin naj:
—Ocan tꞌanan kin jon, ẍi Pedro tet naj.
5Jaꞌ yet jix oc tꞌanan naj yin ebꞌ tuꞌ, jaꞌ snaꞌon naj, tol oj akꞌle niꞌoj stumin naj yu ebꞌ, snaꞌoni. 6Jix yalon pax naj Pedro tuꞌ tet naj jaxca tiꞌ:
—Jain tiꞌ, cꞌam jin tumin. Ey pax jun tzet ey, ey jin an, oj wakꞌ ey jaach an. Yu yipal Jesucristo a Nazaret, aan linanoj, bꞌeyan, ẍi naj Pedro tet naj.
7Catuꞌ jix oc mitxꞌan naj Pedro yin swatxꞌ kꞌabꞌ naj, jix oc yip snukꞌ yajan naj scaabꞌil. 8Jix a jucna naj, catuꞌ jix a linan naj, jix ẍaꞌon el yich sbꞌey naj, catuꞌ jix octoj naj yul stemplo Dios tuꞌ yetoj ebꞌ. Jix a julnaoj, jix bꞌeyi, catuꞌ jix yalon swatxꞌ kꞌane tet Dios. 9Jix yil masanil ánima eyecꞌ tituꞌ sbꞌey naj. Jix yabꞌ pax ebꞌ yalon swatxꞌ kꞌane naj tet Dios. 10Yuxan, caw jix qꞌueya scꞌul ebꞌ sicꞌlebꞌil yu tzet jix yun swaꞌxi naj, yutol yotaj ebꞌ, tol junjun cꞌal cꞌu chi ey chotan naj stiꞌ jun spuertail templo chi yij Sakꞌal Yili, jatuꞌ chi skꞌan stumin naj tet ánima.
Jix Kꞌanabꞌ Naj Pedro Bꞌey Jun Yamakꞌil Templo Chi Yij Yet Salomón
11Jaꞌ naj jix waꞌxi can yajan tuꞌ, tzajan xacꞌal yecꞌ naj yintaj Pedro cꞌal Juan. Jal masanil ánima xin, tuxa cꞌal jix qꞌueycan a scꞌul ebꞌ. Yuxan jix syambꞌa sbꞌa ebꞌ, catuꞌ jix apni ebꞌ scꞌatan ebꞌ, yet eyecꞌ bꞌey jun yamakꞌil stemplo Dios chi yij sbꞌi yet Salomón tuꞌ. 12Jaꞌ yet jix yilon naj Pedro jaxca tuꞌ, jix yalon tet ebꞌ jaxca tiꞌ:
—Jex wet Israelal, ¿tzet yuxan caw chi qꞌueya je cꞌul yu jun tiꞌ? ¿Tzet yuxan chi qꞌueya je cꞌul kin? ¿Tumi che naꞌ tol yul ket, ma yu cu watxꞌil, yuxan jix bꞌey can a jun winaj tiꞌ? 13Jaꞌ cu Diosal, jacꞌal ton oc sDiosal kichmam Abraham, yetoj Isaac, cꞌal Jacob. Yu Dios tuꞌ, yuxan, miman yeloc apnoj Jesús. Jal jex jaex tiꞌ, jix je yaoc yul skꞌabꞌ ebꞌ yaaw. Jaꞌ naj Pilato jix yoche naj jix sjajeloj. Jaex xa ma yal je cꞌul. 14Jaꞌ Jesús tuꞌ, yet ton Dios yei. Caw jichan sbꞌeybꞌal. Jal jex jaex tiꞌ, ma yal je cꞌul jix jajle eloj. Jaꞌ jun makꞌom cam ánima jix je kꞌan jajchaoj. 15Yuxan, queytuꞌ jix je yute je yakꞌon makꞌle cam Naj a kꞌinale. Jix pitzcꞌunele pax a Naj yu Dios xol ebꞌ camnaj. Caw chi kakꞌ cu bꞌa testigoal yin jun tiꞌ. 16Jaꞌ naj che yil tiꞌ, je yotaj xa taꞌ naj. Jaꞌ Jesús jix akꞌon waꞌxoj naj, yutol jaꞌ yin chi kaoc cu cꞌul. Yuxan jix waꞌxi naj je sattaj je masanil.
17Jaꞌ tinaniꞌ xin, jex wet conobꞌ, wotaj an, tzet yuxan jix je yakꞌ cam Naj Jesús tuꞌ, yutol man je yotaj oj tzetyetal lalan je yuneni. Jacꞌalaꞌ pax ebꞌ yaaw, man yotaj oj ebꞌ. 18Jaxca ton tiꞌ jix yun yunen el yu Dios tzet albꞌilcan yu ebꞌ ẍejabꞌ yin eyojto. Yutol yalnaj can ebꞌ, tzet utbꞌil tol jaꞌ Cristo, sowalil chi yabꞌ syaꞌil. 19Yuxan, naꞌwej je bꞌa. Qꞌuexwej je bꞌeybꞌal, awej oc je naꞌbꞌal yin Dios, yet watxꞌ chi joꞌole qꞌuey je penail. Yuxan, ta chi kute jaxca tuꞌ, ey jun tiempoal oj juloj catuꞌ oj yakꞌon cu tzalacꞌulal Dios Kaawil, jaon Israel jon tiꞌ. 20Jaꞌ oj chejon pax tej Jesús yet scaelal, jaꞌton Cristo. Jaꞌton Naj sicꞌbꞌilxa el yu Dios yet tax peyxa yu chi oc cu Colomaloj. 21Jal tinaniꞌ, sowalil chi eecꞌ Jesucristo satcan, masantaꞌcꞌal chi jul stiempoal sjul swaꞌnen oc masanil tzetyetal. Queytuꞌ jix yute yalon can Dios yin yakꞌbꞌalnen stiꞌ ebꞌ ẍejabꞌ yet peyxa, ebꞌ tol yet cꞌal Dios yei. 22Jaꞌ naj Moisés jix alon can jaxca tiꞌ tet ebꞌ kichmam: “Jaꞌ Naj Kaawil, Dios oj sicꞌon el jun ẍejabꞌ snan xol ebꞌ ket conobꞌ, jaxca jix yun jin sicꞌle el jain tiꞌ. Caw che yaoc je txiquin tet masanil tzet oj yal ey jex. 23Yutol yal cꞌal mac man oj yaoc xiquin yabꞌen tzet oj yal jun ẍejabꞌ Dios tuꞌ, oj qꞌueyle can el xol ebꞌ ket conobꞌ,” ẍi can naj Moisés yul An Juun tuꞌ.#Deuteronomio 18:15, 18, 19. 24Masanil cꞌal ebꞌ ẍejabꞌ Dios ecꞌnaj peyxa, ebꞌ jix ẍaꞌel yich yin naj Samuel, jix al-le can el skꞌaneal yin jun tiempoal lalan yunen tiꞌ yu ebꞌ. 25Jaex tiꞌ, yicꞌaal jex ebꞌ ẍejabꞌ Dios tuꞌ ketoj. Yuxan, jaꞌ yet jix yakꞌon can swa kꞌane Dios yetoj ebꞌ kichmam tuꞌ, jix yakꞌ pax can ey jon yetoj ebꞌ. Chi yal jun swa kꞌane yakꞌnaj can yetoj naj Abraham jaxca tiꞌ: “Yu ebꞌ ja wicꞌaal, yuxan oj wakꞌ jin yaxilal yin masanil ebꞌ ánima,” ẍi Dios tet naj.#Génesis 22:18; 26:4. 26Jaꞌ yet jix pitzcꞌunele a Scꞌaal tuꞌ, jaꞌ ey jon jix bꞌabꞌi ẍejtej, yet watxꞌ chi yakꞌ watxꞌcꞌulal kibꞌan, catuꞌ chi cu bꞌejon can cu penail junjun jon, ẍi naj Pedro tet ebꞌ yet Israelal tuꞌ.
നിലവിൽ തിരഞ്ഞെടുത്തിരിക്കുന്നു:
Hechos 3: knj
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2016, Wycliffe Bible Translators, Inc. All rights reserved.
