Luke 15
15
1ဝမ်းနိမ်လော့် ကွန်းကျေ(ပ်)ငွန်းလေတောင်း ကွန်းမနီးလေနာ့ အောင်းတလားတော်စောင့်ယေရှုဟောလေ တော်ပေါနဲ့ထောင်(မ်)ဆီ မားစူးဟင်းဝိုက်။ 2ကောပ့်နဲ့ညော့ ဖာရိရှဲတောင်းကွန်းပညတ်ကျမ်းစမ်လေန "ကွန်းဟိုင့်လ တောင်းကွန်းမနီးလေတောင်း အူနွေ့ဟင်းဆီမကား ကျဉ်းခေါင့်(ဝ်)နွေ့ဟင်းအွန်"ဆီ ဝါအပြစ်ဟင်းကော်ဝိုက်။ 3နယ့်ရောင့်(ဝ်)လော့် စောင့်ယေရှုလ အောင်းမနော် ပွန်ပုဒ်နိမ်လောင်(ဝ်)ပြားကော်လော့် 4"ရာမဆူ ပယ်ရာ့ဟူတိုးမွန်းပတ်နိမ်ရောင်းဆီ ဆီမေဖွန်ပယ်ရာ့န တူးနိမ်ပေါဟိုင်ကော် အောင်းကောဝ့်ဆစ်(ပ်)ပိုင်းကောဝ့်န ဝိုင့်ဝိုက်ဆီ အောင်းပယ်ရာ့အောင်းဟိုင်ကော်န တော်ပေါဟောန် တခါဟင်းမစော်လေး။ 5နောက်လောင်နော့် အောင်းပယ်ရာ့ဟောန့် ပေါဟောန် စွုမ်းအားကြီးဆီ အောင်းပယ်ရာ့ဟောန့် တန်ခွန့်မောင်မာဆီ တပေါက်ဟုန်းဟင်းမား။ 6နောက်လောင်နော့် မွန်းန အောင်းဟုန်းကောင့်တောင့်ဖိုင်လေ "ပယ်ရာ့ကော အောင်းဟိုင်နိုင်းကော်လ ခေါက်(ပ်)ပေါက်ကော်၊ တောင်းကောတောင်း စွုမ်းနွေ့ဟင်းမေ"ဆီ လောင်(ဝ်)ပြားကော်ဝိုက်။ 7ကောပ့်နယ့်ညော့ အောင်းမဆူကောခဝါလ၊ "နောင်တလေအောင်းနွိုက်ရောင့်(ဝ်) ဆာဆီကွန်းကောဝ့်ဆစ်(ပ်)ပိုင်းကောဝ့်န တောင်းနောင်တတောင်း အောင်းလှည့်ပေါက်မား ကွန်းမနီးကော်နိမ်န ရာနိဗ္ဗာန်ဟောန့် ဆာဆီတနယ့်စွုမ်း" ဆီ ဝါကော်ဝိုက်။ 8"ကော့ယဉ်းကော်နိမ်လ ငွန်းဆစ်(ပ်)နိမ်ရောင်း ခနောဝ်ငွန်းဆစ်(ပ်)နိမ်ဟိုင့်လ ဖတ်နိမ်ဟောင်ပေါဟိုင်နိုင်းကော် မွန်းန အောင်းကလောက်ဖိုင်း ဖိုင်းစပ်ဆီ တောင်းရူးပတ်တောင်းပတ်ဝေဆီ မခေါက်(ပ်)တော်ပေါခေါက်(ပ်) တခါကျဉ်းနေ့ာ်မစော်လေး။ 9နောက်လောင် ခါဆီပေါခေါက်(ပ်)ကော်လော့် ကော့်ယဉ်းဟိုင့်လ အောင်းတကော့်မွန်းလေ၊ အောင်းဟုန်းကောင့်(ဝ်)တောင့်(ဝ်)ဖိုင်လေ ဟောင့်ဆီ "ငွန်းကော အောင်းဟိုင်နိုင်းကော်လ ခေါက်(ပ်)ပေါက်ကော် ဟောစွုမ်းဟင်းစို့"ဆီ တဝါဝိုက်။ 10နောင်နယ့်ကျဉ်းနော့် ကောခဝါအောင်းမဆူလ၊ ကွန်းကော်နိမ်လ တောင်းနောင်တတောင်း တောင်းပါ့စောင့်ဖလား ပေါလှည့်မားကော်လော့် ဖီစောင့်ဖလားလေကော့် စွုမ်းဟင်းဝိုက်"ဆီ ဝါကော်ဝိုက်။ 11နောက်လောင်ဟာနိမ် မွန်းစောင့်လ အောင်းကွန်းဖွန်လေ ပွန်ပုဒ်နိမ် လောင်(ဝ်)ပြားကော်ဝိုက်။ မေတန်ဟာ ကွန်းကော်နိမ်လ လုစိုင်းဆောင်(န်)ကော့်ရောင်းဝိုက်။ 12ဝမ်းနိမ်လော့် လုစိုင်းအင်န အောင်းပေါ်မွန်း "ဟွေးပေါ အောင်းကောနွိုက် အမွေလေ မိုင်ဟောင့်(ဝ်)အီ့ "ဆီ တရောန်းဝိုက်။ ကောပ့်နယ့်ညော့ ပေါ်မွန်းကော့် အောင်းအိုက်ပီနောင့်ဆောင်(န်)ကော့် အောင်းမွန်းပိုင်လေ အမွေမိုင်ဟောင့်(ဝ်)ကော်ဝိုက်။ 13နယ့်ရောင့်(ဝ်) မဟူအွန် လုစိုင်းအင်န အောင်းမွန်းပိုင်လေ တောင်းလုန်အောင်း(ဝ်)ဆီ အောက်ကွာမှိန်းတန်းတီကော်ဝိုက်။ မွန်းန အောင်းအမွေလေ ဆွန်းဆွတ်ဆတ်ရောင့်(ဝ်)ဆီ အူလိုင်အူလောကော်ဝိုက်။ 14ပစ္စည်းအောင်းမွန်းပိုင်လေ ဆွန်းရောင့်(ဝ်)ကော်လော့် ရာမှိန်းဟောန့်လ ကပ်ဒုက္ခအောင်းကိုင့်တောင်းကြုံကော်ဝိုက်။ မဟူအွန် မွန်းနာ့ ထီန်ဘဝကွန်းကိုင့်ခေါင့်(ဝ်)ကိုင့်နမ့်ကော်ဝိုက်။ 15မွန်းနာ့ ရာမှိန်းဟောန့် ရာကွန်းကော်နိမ်လ ကွာထန်(မ်)လောင်ဝိုက်။ ကွန်းဟောန့်ကော့် အောင်းစမွန်း ဟာ့ဟေကွန်းထီန်းမူကော်ဝိုက်။ 16မွန်းန တောင့်မိုက်ညော့ အောင်းမူလေကျဉ်းန တွဲဆီ မွန်းကော့် ခကျဉ်းမားကော်ဝိုက်။ တော်နယ်ကော့် အောင်းမွန်းဖောကော့် ခေါင်ကျဉ်းမမားဟောင့်(ဝ်)ဟင်းဝိုက်။ 17နောက်လောင်နော့် မွန်းကော့် ဟုထောင်(မ်)မားကော်လော့် "ကွန်းဟေလောင်ပေါ်ဟောလေကိုးသကော့် တော်ပေါအိဉ်(မ်) နယ့်ကျဉ်းဟင်း။ ကောလ ရာဟိုင့် ကိုင့်ဆီနယ့်အူ။ 18ကောလုဆီ ပေါက်ဟုန်းပေါ်ဟောဆီ "ပေါ ကောလ အောင်းစောင့်ဖလား ဟေဖစ်မားရောင့်(ဝ်)ကော် အောင်းပေါ်ဟောပါ ကောဟေဖစ်မားရောင့်(ဝ်)ကော်ညော့ ရာကောအပြစ်ရောင်းစောင့်။ 19လုစိုင်းပေါ်ဟောဆီ အောင်းကော ပီသတ်မှတ်ကော့်။ နောင်ခကော်နိမ်ဆီ သတ်မှတ်ကော်"ဆီ ကောတနယ့်ဝါ"ဆီ မွန်းစဉ်းစားကော်ဝိုက်။ 20နောက်လောင်နော့် လုစိုင်းအင်ဟိုင့်ကော့် ဆီမေစနွန်းန လုဆီ ပေါက်ကော်ရာပေါ်မွန်းကော်ဝိုက်။ ဆီမေအောင်းကိုင်း အောင်းလုစိုင်းမွန်းမားလ ပေါ်မွန်းဟောန်ကော်လော့် အီနူအားကြီးဆီ စောဝ်ကိုးမနီးကော့်ဝိုက်။ ပိုင်စူးရာလုစိုင်းအင်းမွန်းဆီ နုမ်းဆီ ကော်ကော်ဝိုက်။ 21နောက်လောင်နော့် လအောင်မွန်းလ" ပေါ ကောလ အောင်းစောင့်ဖလားမကား အောင်းပေါ်ဟောပါ ကောပြစ်မားကော်ညော့ ရာကောအပြစ်လေရောင်း။ အောင်းကော လုစိုင်းမောဆီ ပီဟောင့်ကော့်"ဆီ ဝါကော်ဝိုက်။ 22တော်နယ့် ပေါ်မွန်းကော့် အောင်းခမွန်းလေ "အောင်းစမွန်း ဆေဖအောင်းနီးလေ အောင်း(ဝ်)မားဆီ နွန်ဟောင့်(ဝ်)ကော်နူ။ ရာမေးမွန်း လုစော့ပ်လေ ဆွတ်(ပ်)ဟောင့်(ဝ်)ကော်နူ။ ရာတဉ်းမွန်း ချပ်တဉ်းဆွတ်(ပ်)ဟောင့်(ဝ်)ကော်နူ။ 23စဟေပျော်ပွဲစား ငိုးတန်အင်အောင်းချဉ်းပီးအောင်းချဉ်းဆန်းတိုးနိမ် ဟေဖောက်ဆီ တောင့်ဟင်းကော်။ 24လအောင်ကောလ သိုင်းရောင့်(ဝ်) ခွန်းပေါက်မားကော်ဆီ လအောင်ကော အောင်းဟိုင်လ အစောင် ဟောန်ပေါက်ကော်"ဆီ လောင်(ဝ်)ရောင့်(ဝ်) မနော်လေန ဟေပွဲဟင်းကော်ဝိုက်။ 25မေနဲ့လော့် လုစိုင်းလုန်မွန်း စားဆီတုန်နားဟေလောင်ရောင့်(ဝ်) ပေါက်မားကော်ဝိုက်။ မွန်းတကောင့်(ဝ်)ထီန်ပေါက်ဟုန်းကော့်လော့် ဆိန်စွုမ်း၊ ဆိန်ကလေ နယ့်ဟဉ်းကော်ဝိုက်။ 26ကောပ့်နဲ့ညော့ မွန်းနာ့ အောင်းခကော်နိမ်လ ဟောင့်ဆီ "ရာဟောန့်န ဟေဟောင်းဟင်း"ဆီ ထန်(မ်)ကော်ဝိုက်။ 27ခဟိုင့်လ "နောင့်စိုင်းမော မခိုင့်မနော်ဆီနီးနီးငမ်းငမ်း ထီန်ပေါက်မားညော့ ပေါ်မဆူလ ငိုးတန်အင်တိုးနိမ်ဟအောင်း(ဝ်)သိုင်းဆီ ဟေပျော်ပွဲစားဟင်း"ဆီ ဝါကော်ဝိုက်။ 28လုစိုင်းလုန်မွန်းန ခထားကော်ညော့ ခနောဝ်ဟုန်းမခေါင့်(ဝ်)ဝိုက်။ ကောပ်နယ့်ညော့ ပေါ်မွန်းနာ့ အောက်ခနောက်မားရောင့်(ဝ်) အောင်းလုစိုင်းလုန်မွန်း ဟခေါင့်(ဝ်)ခနောဝ်ဟုန်းဆီ မွန်းတော်ပေါဟုထောင်(မ်) နီးနီးငမ်းငမ်း မားဝါကော်ဝိုက်။ 29မွန်းန "ကောန အောင်းပေါ်ဟော ပီးလေမကျေးလေမစော် နာခမ်ဆီ ဟေလိမ့်မားမေကော့် ပေါ်ဟောလ အောင်းစကော တောင်းသကော့်လေတောင်း ဟပေါနယ့်ကျဉ်းပျော်ပွဲစား ပယ်ရာ့တိုးနိမ်အင်ကိုးသကော့် မဟောင့်(ဝ်)မားကောင်(ဝ်)။ 30တော်နယ်ကော့် လုစိုင်းအင်ဟိုင့်န အောင်းပစ္စည်းပေါ်ဟောလေ တောင်းမယ်ပြတ်လေတောင်း ဆွန်းဆွတ်ဆတ်ရောင့်(ဝ်)ဆီ ပေါက်မားလော့် ပေါ်ဟောန အောင်းငိုးတန်ဆန်းဝုန် အောင်း(ဝ်)သိုင်းဆီ ပျော်ပွဲလေ ဟေဟောင့်(ဝ်)အွန်"ဆီ ဝါကော်ဝိုက်။ 31မေနယ့်လော့် ပေါ်မွန်းကော့် အောင်းလုစိုင်းလုန်မွန်း "လုစိုင်း၊ မောလ တောင်းကောတောင်းကူမေ့ရောင်း၊ အောင်းရောင်းရာကောတောင်းလုန်န အောင်းစမောကျဉ်းနော့်။ 32တော်နယ် နောင့်စိုင်းမောလ သိုင်းမေကော့် အစောင်ခွန်းပေါက်မားဆီ၊ ဟိုင်နိုင်းမားမေကော့် အစောင် နယ့်ခေါက်(ပ်)မားကော်ညော့ ဟောတနယ့်စွုမ်းဟင်း"ဆီ ဝါ"ဆီ ဝါကော်ဝိုက်။
നിലവിൽ തിരഞ്ഞെടുത്തിരിക്കുന്നു:
Luke 15: ttpv-rv
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
