Luke 16
16
1နောက်လောင်နော့် စောင့်ယေရှုန အောင်းတပဲ့မွန်းလေ ဆက်ဆီလောင်(ဝ်)ပြားန "မေတန်ဟာ ဆဌေးလုန်ကော်နိမ်လ အောင်းလောင်မွန်းလေတောင်းလုန် ဟပေါနယ်ဟေ ကွန်းအောင်းမွန်းနယ့်ယွန်(မ်) ကော်နိမ် ဟဟေမန်နေဂျာဆီ ဝိုက်ဝိုက်ကော်ဝိုက်။ တော်နယ်ကော့် မွန်းန အောင်းငွန်းလေ ဟေဆုဆတ်ဝါလ ဟုကော်ဝိုက်။ 2ကောပ်နယ့်ညော့ ဆဌေးန အောင်းမန်နေဂျာ ဟောင့်ဆီ "အောင်းအကြောင်းမော ကောနယ့်ဟဉ်းန နောင်နူး။ အောင်းမော နေရာမန်နေဂျာန ဆက်ဆီ မဝိုက်ပဲ့ကော့်ညော့ အောင်းစရန်းမောစီစဉ်န မားပြားနူ"ဆီ ဝါကော်ဝိုက်။ 3မေနယ့်လော့် မန်နေဂျာကော့် အောင်းမွန်းတောင်းမွန်း "ကောတနယ့်ဟေနောင်နူး။ စောင့်ကောလ အောင်းကော ဟောင့်ဆီ ဆီးမေလောင် တထုဝေကော့်။ ခွန်(မ်)လေကော့် ကောမကွန်ပဲ့ကော့်၊ တနယ့်ရောန်းကျဉ်းကော့် ကောနီးအိုင်း။ 4စောင့်ကော ဆီမေလောင်ဟိုက် ဟောင်ပေါထုဝေကော် ကွန်းလေ အောင်းကော တော်ပေါဟောင့် တော်ပေါဖတ်အောင်းကော တနယ့်ဟေနောင်နူးဝါလ ကောဟုကော်"ဆီ မွန်းစဉ်းစားကော်ဝိုက်။ 5နောက်လောင်နော့် မွန်းနာ့ အောင်းစဆဌေး ကွန်းတနယ့်ဟောင့်(ဝ်)အကြွေးလေ ကော်နိမ်ရောင့်(ဝ်)ကော်နိမ် ဟောင့်ကော်ဝိုက်။ 6အောင်းပထမကော်နိမ်လ "အောင်းစောင့်ဟော အကြွေးခလောခနီးဟောင့်(ဝ်)ရောင်းအွန်"ဆီ ထန်(မ်)ကော်ဝိုက်။ ကွန်းဟိုင့်ကော့် "သံလွင်ဆီ မော့်စဉ်ဟဉ်ပတ်နိမ်(၃၀၀၀လီတာ)ကျန်အွန်"ဆီ ဝါကော်ဝိုက်။ မန်နေဂျာန စရန်းမော ကွာအောင်းမားကျန် ပေါရောင့်(ဝ်) ဟာ့ဆစ်(ပ်)ဆီ(၁၅၀၀လီတာ)မားတင့်(မ်)ကော်"ဆီ ဝါကော်ဝိုက်။ 7နောက်လောင်နော့် အောင်းကော်နိမ်လ "မောပဲ ခလောတနယ့်ဟောင့်(ဝ်)"ဆီ ထန်(မ်)ကော်လော့် "ခေါင့်(ဝ်) ဟူအိမွန်းပတ်နိမ်"ဆီ ဝါကော်ဝိုက်။ "စာရန်း ကွာအောင်း(မ်)မား ပက်ဆစ်(ပ်)ဆီ တင့်(မ်)ကော်"ဆီ ဝါကော်ဝိုက်။ 8မေနယ့်လော့် ပေါ်လိမ့်န အောင်းမန်နေဂျာဟေလောင်န အောင်းစအတွိုက်မွန်းနဲဟော်ဝါလ ကျေနပ်ဆီ ရောကော်ဝိုက်။ နောင်နယ့်ကျဉ်းနော့် အောင်းရောင်းခနေကမ္ဘာဟိုင့် အမျိုးကွန်းလေန ပေါဟေလောင်မနော်ပေါဝါလော့် နောင်လအောင်စောင့်ဖလားမကား အောင်းလောင်စောင့်ကောင်(ဝ်)နဲဟော် ဆာဆီစန်ဟေဟင်း"ဆီ ဝါကော်ဝိုက်။ 9နောက်လောင်ဟာနိမ် စောင့်ယေရှုဝါအောင်းတပဲ့မွန်းလေန "အောင်းမဆူကောခဝါလ၊ မဆူလေန တကော့်နမ်နမ်ဟပေါနွိုက် အောင်းလောကီစည်းစိမ်လေ ဆွန်းဟင်း။ လောကီစည်းစိမ်လေ ဟောင်ပေါမိုကော်လော့် အောင်းစမဆူ ဟုန်းနိစ္စထာဝရလ တဟပ်ထဟင်းဝိုက်။ 10ရာလောင်အောင်းဆေးလေ ကွန်းသစ္စာရောင်းလ ရာလောင်အောင်းရောင်(ဝ်)လေကော့် သစ္စာတရောင်းကျဉ်းနော့်ဝိုက်။ တော်နယ့် ရာလောင်အောင်းဆေးလေ ကွန်းသစ္စာမရောင်းနာ့ ရာလောင်အောင်းရောင်(ဝ်)လေကော့် သစ္စာအောင်းတရောင်းမစော်။ 11မောလ လောကီစည်းစိမ် နောင်နယ့်အင်ကိုးသကော့် တော်ပေါစော် ပေါမစန်ဆွန်းလ စည်းစိမ်အောင်းစော်ပေါလော့် ရာမဆူ ဖောလာတအပ်ကော့်။ 12ပစ္စည်းပွန်ပိုင်လေ နီးနီးငမ်းငမ်းဟပေါနယ့်ဆွန်း ရာမဆူ သစ္စာဟောင်ပေါမရောင်းလော့် အောင်းမဆူပစ္စည်းဟပေါပိုင် ဖောလာတဟောင့်(ဝ်) အောင်းစမဆူ။ 13ခထောကော့်ခရောင့်(ဝ်) အောင်းစောင့်ဆောင်(န်)ကော့်လ ဟာနိမ်တောင်း အောင်းတဟေခမစော်။ အကြောင်းလ မွန်းန အောင်းကော်နိမ်ဟောင်ပေါစောန်း အောင်းကော်နိမ် တနယ့်ဟောက်။ နောင်နယ့်ပေါမစော် အောင်းကော်နိမ်ဟောင်ပေါသစ္စာရောင်း အောင်းကျန် အောင်းစကော်နိမ်လ တဟေမလေးမစား"ဆီ ဝါကော်ဝိုက်။ မဆူလေန စောင့်ဖလားတောင်း အောင်းလောကီစည်းစိမ်န ဟာနိမ်တောင်း ခံစားဆီ မနွိုက်ပဲ့"ဆီ ဝါကော်ဝိုက်။ 14ဖာရိရှဲအောင်းမက်ငွန်းလေန နယ့်ဟဉ်းအောင်းယေရှုဝါလေကော်လော့် မားအောဝ်းမောဝ်းဟင်းကော်ဝိုက်။ 15တော်နယ်ကော့် မွန်းစောင့်န "မဆူလေန ခနာ့ကွန်းလေ အောင်းစောင့်ကော်(ဝ်)တောင်းကော်(ဝ်) ကွန်းနီးဆီ စန်ဝါဟင်း။ တော်နယ့်ကော် စောင့်ဖလားန အောင်းစောဝ်မဆူ ဟု။ အောင်းကွန်းလေဝိုက်အမြတ်တနိုးန ခနာ့စောင့်ဖလား ပေးအောင်းပတ်ဆတ်ကော်ဝိုက်။ 16ခေတ်ရေနှစ်မင်္ဂလာဆရာဟောဟန်မထီန်ခွေတ် ကွန်းလေန နောင်မောရှေဥပဒေလေတောင်း နောင်ကျမ်းပရောဖက်လေညော့ စောင်း(မ်)ဟေဟင်းမား။ တော်နယ်ကော့် သာသနာတော်စောင့်ဖလား ထီန်မားကော်လော့် ကွန်းလေန ဟပေါနယ့်ခေါင့်(ဝ်) ခနောဝ်သာသနာဟိုင့် ဟေဟင်းဝိုက်။ 17တော်နယ်ကော့် အောင်းပါရာခနောဝ်ကျမ်းစောင့်ဖလား လိအောင်းချဉ်းဆေးဟွေနိမ်တပျတ်လ ဆာဆီနောင်နဉ်းတောင်းတောင့်ဖ တဟိုင်လ ချဉ်းလွယ်ဝိုက်။ 18အောင်းပရစောင့်ကော်(ဝ်) ခွါပ်ဝေဆီ အောင်း(ဝ်)အောင်းကော့်ယဉ်းတန်းတီကော်လ ကွန်းဖောက်ပြန်ကျဉ်းနော့။ တောင်းကော့်ယဉ်းအောင်း(ဝ်)ခွါပ်ဝိုက်တောင်း ပေါအောင်း(ဝ်)ကော့် တူဟင်းကျဉ်းနော့်"ဆီ ဝါကော်ဝိုက်။ 19နောက်လောင်နော့် မွန်းစောင့်န "မေတန်ဟာ ဆဌေးလုန်ကော်နိမ်လ ဆေလုန်အောင်းခေါန်နောက်ဝုန်နွန်ဆီ ကူဝမ်းကူဝမ်း ပျော်ရာကာမဂုဏ်ဝိုက်။ 20တောင်းတိုးတိုးပေးအနာဆီ အောင်းစေလာဇရု ကွန်းဖန်ကော်နိမ်န ရာခနာ့နာ့ဆတ်တူးဟုန်းဆဌေးဟောန့် လုမ့်ဆီအူဝိုက်။ 21မွန်းလ ဆီမေ စားပွဲဆဌေးလုန်ဟော်ကျဉ်းန အောင်းကျဉ်းကျန်လေ တချားတိုမားထန်ဆီ စွုမ်းဆီထအီ့ဝိုက်။ ရာတိုးမွန်းကော့် တွန်ချိုတွန်ဖီလေ အောက်ဝိုက်။ မာလေန မားဆီ အောင်းတွန်ချိုတွန်ဖီမွန်းဟိုင့် မားလေးဟင်းဝိုက်။ 22နောက်လောင်နော့် ကွန်းဖန်လ သိုင်းကော်လော့် ဖီလေန အောင်းစမွန်း အောင်းပေးပူလဉ်မွန်း ရာခန့်အာဗြဟံပွန့် ဟောင့်ကွာကော်ဝိုက်။ ဆဌေးလုန်သိုင်းကော်လော့် အောင်းဖောင်နယ့်ခမ်ဝိုက်။ 23ဆဌေးန ရာမှိန်းမရဏဟောန့် နယ့်ခမ်ဒုက္ခဆင်းရဲလုန်ဆီ မွန်းတွဲခွန့်ခနေကော်လော့် ရာခန့်အာဗြဟံ အောင်းလာဇရု ဆီမေအောင်းကိုင်း နယ့်ဟောန်ကော်ဝိုက်။ 24မေနယ့်လော့် မွန်းန ဟိုင့်ဆီ "ပေါ အာဗြဟံ၊ အောင်းကောအီနူအီ့အွန်။ ကောန ခနောဝ်ဖိုင်းဟိုင့် နယ့်ခမ်ဝေဒနာလေညော့ အောင်းရုမေးလာဇရု စွပ်နမ့်ဆီ အောင်းလဉ့်ကော ဟပေါကောက် အောင်းမွန်း ပွယ်မားဟောင့်(ဝ်)အွန်"ဆီ ဝါကော်ဝိုက်။ 25မေနယ့်လော့် အာဗြဟံဝါပေါက်ကော်လ "လုစိုင်း ယဉ်းဖမ်ကော်နူ။ မော မေအဆတ်ရောင်းလ နယ့်အူနီးနီးငမ်းငမ်းဆီ လာဇရုလ နယ့်ခမ်ဒုက္ခမား။ အစောင် လာဇရုလ နယ့်စွုမ်းဆီ မောလ နယ်ခမ်ဒုက္ခကော်။ 26နောင်နယ့်မကား ခနောဝ်ကြားဟောတောင်းမဆူန ဖောကော့်အောင်းမခမ့်ပဲ့ ဟွေ့လုန်ဟွေ့နိမ်ရောင်းညော့ ဆီမေနေရာဟိုင့် တော်မဆူကော့်ခရောင့်(ဝ်)၊ ဆီမေမဆူန တော်ရာဟောကော့်ခရောင့်(ဝ်) ခဖြတ်မေကော့် ကော့်နိမ့်ကော့်မဖြတ်ပဲ့"ဆီ ဝါကော်ဝိုက်။ 27ဆဌေးဟိုင့်လ "ကောခရောန်းအွန် ပေါ်ကောခအာဗြဟံ၊ အောင်းလာဇရုပွယ်ကော်အိ ရာပေါ်ဟောခဆီဝါကော်ဝိုက်။ 28ရာကော နောင့်စိုင်းဟာ့ကော့်ရောင်းစောင့်။ အောင်းစမနော် ဟာ့ပေါမထီန်မားရာဟိုင့် ဟကွာလောင်(ဝ်)အီ့"ဆီ ဝါကော်ဝိုက်။ 29တော်နယ့်ကော့် အာဗြဟံကော့် "နောင့်စိုင်းမောလေန အောင်းလိမောရှေပညတ်ကျမ်းလေတောင်း ကျမ်းပညာရှိပရောဖက်လေရောင်း။ အောင်းမနော်တင့်(မ်)ဝိုက်လေ ဟဟေစောင်း(မ်)ကော်ဆီ ဝါကော်ဝိုက်။ 30တော်နယ်ကော့် ဆဌေးလုန်န "ပေါ်ကောခအာဗြဟံ နောင့်နယ့်မစော်။ ကွန်းသိုင်းရောင့်(ဝ်)ကော်နိမ်မကော်နိမ်လ ကွာရာမွန်းဆီ ပေါကွာလောင်(ဝ်)ပြားမှ မနော်လေန တနွိုက်နောင်တဟင်း"ဆီ လောင်(ဝ်)ပြားကော်ဝိုက်။ 31မေနယ့်လော့် အာဗြဟံန အောင်းစမနော် "မနော်လ အောင်းခွမ်းမောရှေတောင်း အောင်းခွမ်းပရောဖက်လေ ဟောင်ပေါမစောင်း(မ်)ဟေလော့် ဆီမေအောင်း(ဝ်)သိုင်းန အောင်းခွမ်းကွန်းခွန်းပေါက်မားကော့် အောင်းတထောင်(မ်)မစော်"ဆီ ဝါကော်ဝိုက်။
നിലവിൽ തിരഞ്ഞെടുത്തിരിക്കുന്നു:
Luke 16: ttpv-rv
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
