Luke 14
14
1ဝမ်းဥပုဝမ်းနိမ်လော့် စောင့်ယေရှုလ ရာဟုန်းဟိုဖာရိရှဲညော့ ဟပေါနယ့်ကျဉ်းခေါင်ကျဉ်းလေဆီ မေကွာလော့် ကွန်းတောင်းလုန်ကော့် အောင်းမွန်းစောင့်လ ဟေအလေးဆီ တွဲစောင်း(မ်)ဟင်းဝိုက်။ 2မေနယ့်လော့် ခနောဝ်ကွန်းဟိုင့်လေန ကွန်းတိုးရောင်ကော်နိမ်လ ခနာ့စောင့်ယေရှုညော့ စိန်ကော်ဝိုက်။ 3ဖာရိရှဲလေတောင်း ကွန်းကျမ်းစမ်လေန အောင်းမွန်းစောင့် "ဝမ်းဥပုဝုန် အောင်းရောဂါကွန်းလေ ရားဟောင့်(ဝ်)လ တောင်းတလားတော်တောင်း ညီလေး၊ မညီလေး"ဆီ ထန်(မ်)ကော်ဝိုက်။ 4တော်နယ် မနော်လေန ခွမ်းကမ်းနိမ်အင်ကော့် မတန့်ပေါက်ဟင်းမားကော့်ဝိုက်။ ကောပ့်နောင်ညော့ မွန်းစောင့်န အောင်းကွန်းမအူနီးဟိုင့် တောင်းမေမွန်းစောင့်တောင်း ထိဆီ ရားဟောင့်(ဝ်)ကော်ညော့ ကွန်းဟိုင့်လ ရောဂါဟိုင်ကော်လော့် ဟပေါက်ဟုန်းကော်ဝိုက်။ 5နောက်လောင်နော့် မွန်းစောင့်ယေရှုကော့် အောင်းစကွန်းလေ "လအောင်မဆူကော့်ခရောင့်(ဝ်)၊ ငိုးမဆူကော့်ခရောင့်(ဝ်) ပေါချားခေါင့်(ဝ်) နမ့်ခွန်(မ်)ကော် ဝမ်းဥပုခပေးပေး ချရှ်ချန်း မဆူတဆွဲခွန့်ဟင်းမစော်လေး"ဆီ ထန်(မ်)ပေါက်ကော်ဝိုက်။ 6မေနယ့်လော့် ကွန်းဟိုင့်လေန အဟောင်းကော့် မဖြေပေါက်ဟင်းကော့်ဝိုက်။ 7နောက်လောင်နော့် မွန်းစောင့်န ကွန်းအောင်းပန်းနယ့်ခမ်လေန ရာနေရာအောင်းချဉ်းနီးလေ နှောင်ဆီ ဟပေါနယ့်ကျဉ်း အောင်းလိတ်ဟင်း နယ့်ဟောန်ကော်လော့် အောင်းမနော်လေ ပွန်ပုဒ်နိမ်လောင်(ဝ်)ပြားကော်လော့် 8ကွန်းကော်နိမ်မကော်နိမ်န အောင်းစမော ဆီမေမင်္ဂလာ ဟောင်ပေါပန်းဝိုက် ရာနေရာအောင်းနီးလေ ပီကွာနှောင်ဟင်း။ တော်နယ်ကော့် အောင်းအရေးပါကွန်းကော်နိမ် မနော်ခဟောင့်(ဝ်)တဟောင့်(ဝ်)ဝိုက်။ 9ကွန်းဟိုင့်ဟောင်ပေါထီန်မား "နေရာမော အောင်းစမွန်း ဖယ်ဟောင့်(ဝ်)ကော်"ဆီ အောင်းဝါနယ့်ခမ်လော့် မောလ နီးအိုင်းဆီ ရာခလောင်လောင်ညော့ တနယ့်ကွာနှောင်ဝိုက်။ 10တော်နယ်ကော့် မဆူလေ ပေါကွာမင်္ဂလာ ရာနေရာခလောင်လ ဟောင်ပေါကွာနှောင် ကွန်းဖိတ်ဝိုက်အောင်းမောလ ဟောင်ပေါဟောန်ကော်လော့် မွန်းန မားဆီ "အိုက်ကော့် မားနှောင်ရာနေရာအောင်းနီးဟိုင့်"ဆီ ဟောင်ပေါဝါ ခနာ့ဖွန်ကွန်းလေန အောင်းပွန်ချီးကျူးတနယ့်ခမ်။ 11အောင်းစောင့်ကောင်(ဝ်)တောင်းကောင်(ဝ်) ကွန်းရောလ နယ့်ခမ်အောင်းပွန်နှိမ်ဆီ အောင်းစောင့်ကောင်(ဝ်)တောင်းကောင်(ဝ်) ကွန်းနှိမ်လ အောင်းပွန်ရော တနယ့်ခမ်"ဆီ ဝါကော်ဝိုက်။ 12နောက်လောင်နော့် စောင့်ယေရှုလ အောင်းစောင့်ဟုန်း "မောလ ပေါဟေပွဲကျဉ်းခေါင့်(ဝ်)မားခမ်လ အောင်းတကော့်မောလေ၊ အောင်းစောင့်ဟုန်းမောလေ၊အောင်းပီနောင့်မောလေတောင်း အောင်ကွန်းငွန်းရောင်းခန့်ဟုန်းမောလေ ပီဟောင့်။ မောပေါဟေနောင်နယ့်လော့် မနော်လေကော့် ဟာနိမ်တပန်းပေါက်အောင်းမောဆီ တလိမ့်ပေါက်ဟွန်းဝိုက်။ 13ရာပွဲဟပ်ချိုက်မောလ အောင်းကွန်း မရောင်းကျဉ်းလေ၊ အောင်းကွန်းမခွန်လေ၊အောင်းကွန်းဆိုင်လုမ်းခတ်လေ၊ အောင်းကွန်းဟွေတားမဟောန်လေနဲဟော် ဟောင့်ဟော။ 14ရာကွန်းဟောန့်လေ အောင်းစမော စနီးဟောင့်(ဝ်)ပေါက် အဟောင်းကော့်မရောင်း။ တော်နယ်ကော့် စောင့်ဖလားန အောင်းမော မင်္ဂလာအောင်းနီးလေ တဟောင့်(ဝ်)ဝိုက်။ ကွန်းနီးလေ ဆီမေအောင်းသိုင်း အချီန်အောင်းတခွန်းပေါက် စောင့်ဖလားန အောင်းစမဆူ အောင်းကျေးဇူးတန်ပေါက် တနယ့်ခမ်"ဆီ ဝါကော်ဝိုက်။ 15တောင်းစောင့်ယေရှုတောင်း စားပွဲပွဲနိမ်တောင်း ကွန်းနယ့်ကျဉ်းနွေ့ဟင်း ခနောဝ်စောင့်ချိုက်န ကွန်းကော်နိမ်လ "ခနောဝ်သာသနာတော်စောင့်ဖလား နှောင်ဆီ ကွန်းနယ့်ကျဉ်းန တနယ့်ခံစားအောင်းနီးအောင်းငမ်းလေ"ဆီ ဝါကော်ဝိုက်။ 16စောင့်ယေရှုလ အောင်းစကွန်းဟိုင့် "ကွန်းကော်နိမ်လ တဟေပွဲလိမ့်ချိုက်ဆီ အောင်းစောင့်ချိုက်လေ ပန်းဝိုက်ကော်ဝိုက်။ 17အချီန်ပန်းစောင့်ချိုက် ထီန်မားကော်လော့် ရာကွန်းအောင်းမွန်းပန်းဝိုက်ဟောန့်လေ အောင်းခမွန်း ပွယ်ဆီ "တောင်းလုန်အဆင့်သင့်ပေးကော် တောင်းလုန်ကြွဟင်းမားပဲ့ကော့်"ဆီ ဟကွာလောင်(ဝ်)ကော်ဝိုက်။ 18စောင့်ချိုက်လေန ကော်နိမ်ရောင့်(ဝ်)ကော်နိမ် အကြောင်းအမျိုးမျိုးပြားဆီ ငြင်းဟင်းကော်ဝိုက်။ အောင်းကော်နိမ်လ "ကောဆေ့ဝိုက်နားကွမ်နိမ် ကောတနယ့်ကွာတွဲအွန်၊ အောင်းကော ဟကွာအွန်"ဆီ ဝါကော်ဝိုက်။ 19နောက်လောင်ကော်နိမ်လ "ကော ငိုးဟာ့ကပ်ဆေ့ဝိုက် ကောတနယ့်ကွာတွဲအွန်၊ အောင်းကောဟကွာအွန်"ဆီ ဝါကော်ဝိုက်။ 20နောက်လောင်ကော်နိမ်ကော့် "ကောအစောင်အင် အောင်း(ဝ်)ပရဝိုက်အွန်ညော့ ကောမမားပဲ့ကော့်"ဆီ ဝါပေါက်ကော်ဝိုက်။ 21ခဟိုင့်ကော့် အဖြစ်ပျက်ဟိုင့်လေ လောင်(ဝ်)ပေါက်အောင်းစောင့်မွန်းကော်လော့် စောင့်မွန်းကော့် အိုက်ခထားဆီ "ကွာဟကျန်၊ ခနောဝ်မှိန်း အောင်းအူရာခွန်တန်း အောင်းကွန်းဖန်လေ၊အောင်းကွန်းဆိုင်လုမ်းခတ်လေ၊ အောင်းကွန်းဟွေတားမဟောန်လေတောင်းလုန် ကွာဟောင့်မား"ဆီ စောင့်ကော်ဝိုက်။ 22ခဟိုင့်ထီန်ပေါက်မားကော်လော့် "နောင်မောစောင့် စောင့်(ဝ်)ညော့ ဟေမားရောင့်(ဝ်)ကော်။ တော်နယ်ကော့် နေရာဟိုင့်လ အောင်းကွန်းစအူလေ နေရာလေ ကျေးလေမစော်ရောင်းအွန်"ဆီ ဝါကော်ဝိုက်။ 23စောင့်မွန်းန အောင်းစမွန်း "ကွန်းအောင်းရောင်းရာခွန်တန်းလုန်တောင်း ရာခွန်တန်းအင်လေတောင်းလုန် ကွာဟောင့်မားရာဟုန်းကော။ နောင်နယ့်မှ ရာဟုန်းကော ကွန်းလေသတိမ်းမား။ 24အောင်းမောကော်တဝါ။ ကွန်းအောင်းကောပန်းအောင်းတိုင်းလေ ပေါထီန်မား ခေါင်ကျဉ်းကောလေ အိအိအင်ကော့် ပီလိမ့်"ဆီ ဝါအောင်းစခမွန်း"ဆီ ဝါကော်ဝိုက်။ 25နောက်လောင်နော့် တောင်းမွန်းစောင့်တောင်း အောင်းပါစောင်း(မ်)ဟင်းမား အောင်းကွန်းဖွန်လေ မွန်းစောင့်န လှည့်တွဲကော်ပါ့မနော်ဆီ အောင်းစမနော် 26"မဆူလေန နောင်ပေါ်မယ်မဆူ၊ လအောင်မဆူ၊ ပရမဆူ၊ ပီစိုင်းနောင့်စိုင်းမဆူ၊ ပီဆောင်(ဝ်)နောင့်ဆောင်(ဝ်)မဆူလေမကား အောင်းကော မေတ္တာပေါမဝိုင့်ပဲ့ တပဲ့ကော မပေးပဲ့။ နောင်နယ့်မကား နောင်အဆတ်မဆူကော့်မကား အောင်းကော မေတ္တာပေါဝိုင့်ပဲ့မှ တပေးတပဲ့ကော။ 27လက်ဝါးကပ်တိုင်မဆူ ဟပ်ဆီ တောင်းကောတောင်း ပေါမစောင်း(မ်)ပဲ့ကော့် တပဲ့ကောမပေးပဲ့။ 28မဆူပေါတတောင့်မျှော်စင်တူးနိမ်ဆီ ဝါဟင်းစို့။ ဟောင်ပေါတောင့်မျှော်စင်ဟိုင့်လ ခလောပွန့်တမို ရာဟောပဲ အောင်းတမို့ဟိုင့်လ ရောင်းလေးမရောင်းလေးဝါလ ဟပေါဟု နောင်ဆီ မတွုပ်ဆီ မဆူမအူဆဲ။ 29နောင်နယ့်မတွုပ်ဆီ ပေါတောင့်မျှော်စင်ကော်လော့် မျှော်စင်ဟိုင့် တော်ပေါရောင့်(ဝ်) အောင်းတတောင့်ပဲ့မစော်။ ဟောင်ပေါဟောန်အောင်းအဖြစ်ပျက်ဟိုင့်လော့် ကွန်းလေန တမားအောင်း(ဝ်)မောဝ်း အောင်းစမဆူကော့်။ 30မနော်လေန အောင်းစမော "ကွန်းဟိုင့်လ မေအစလော့် နောင်ဟေပဲ့လိုလိုဆီ အောင်းလောင်တူးနိမ်လ တော်ပေါရောင့်(ဝ်) မဟေပဲ့ဝုန်န" ဆီ တမားအထန်ဆေးဟင်းကော့်။ 31နောက်လောင်နော့် အောင်းစစောင့်ခွန်ဟော်ခမ်းစစ်သားမွမ်နိမ်ရောင်းလ စောင့်ခွန်ဟော်ခမ်းစစ်သားဆောင်(န်)မွမ်ရောင်း ဟောင်ပေါမားတူတ်စစ်လော့် မွန်းန တောင်းကွန်းဟောင့်(ဝ်)အကြံလေတောင်း နှောင်ဆီ မသုံးသပ်အောင်းတိုင်းဆီ အောင်းတတူတ်မစော်။ မနော်လေန စစ်သားမွမ်နိမ်အင်တောင်း အောင်းစစ်သားဆောင်(န်)မွမ်ရောင်း အောင်းစောင့်ခွန်ဟော်ခမ်းတန်းတီ တော်ပေါပဲ့ တနယ့်ဟေနောင်နူးဝါလ တဆုံးဖြတ်ဟင်း။ 32တော်နယ်ကော့် တော်ပေါပဲ့ပေါမတူတ်ပဲ့ဆီ စဉ်းစားပေါနွိုက်လော့် စောင့်ခွန်ဟော်ခမ်းဟိုင့်လ အောင်းစစောင့်ဆုန်လိမွန်း ပွယ်ကော်ရာစောင့်ခွန်ဟော်ခမ်းတန်းတီဆီ အကြောင်းအောင်းမတူတ်စစ်န တနယ့်ဟာ့လောင်(ဝ်)။ 33နောင်နယ့်ကျဉ်းနော့် အောင်းမဆူပိုင်တောင်းလုန် ပေါမဝေပဲ့ တပဲ့မပေးပဲ့"ဆီ ဝါကော်ဝိုက်။ 34စောင့်ယေရှုန ကေးလနီး။ တော်နယ်ကော့် အစင်း(မ်)ပေါဟိုင်ကော် အောင်းကေးဟိုင့်လ ဟပေါစင်း(မ်)ဟွန်း တနယ့်ဟေနောင်နူး။ 35ကေးဟောန့်လ အောင်းစနောင်နဉ်းကော့်ခရောင့်(ဝ်) အောင်းစအော်ကော့်ခရောင့်(ဝ်) မဆွန်းကော့်ဝိုက်။ ကောပ့်နဲ့ညော့ အောင်းကေးဟိုင့် တဟူဝေဟင်းဝိုက်။ ကွန်းစမ်ထောင်(မ်) ကွန်းပဉ်ဟူရောင်းလေ အာရုံစိုက်ဆီထောင်(မ်)ဟင်း"ဆီ ဝါကော်ဝိုက်။
നിലവിൽ തിരഞ്ഞെടുത്തിരിക്കുന്നു:
Luke 14: ttpv-rv
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
