Matius 15
15
Aang co umpi dulun jarin pali
15:1-20
(Mrk. 7:1-23)
1Opaiyoh, oko pira-pira pomimpin agama Yahudi, iyohonon kolompok dulun Parisi hintang kawan guru agama ingkan Yerusalem. Iroh dombut hia Yesus. Hien doh, 2“Kura kawan murid-Mu non molangar adat turan tatu hiang to? Iroh aroko manyo silu sorinai iroh kuman.”
3Tapi useh Yesus ma iroh, “Kura ikan molangar porentah Mohotara, baya tului jere nontumun adat turan tatu hiang me? 4Awi Mohotara mantun, ‘Ngohormat eh tinan tamam mu.’#15:4 Ingkan buku Koluaran 20:12 hintang Ulangan 5:16. Mohotara mahi mantun, ‘Dulun co mohina tinai atawa tamaieh mositi tomohukum matoi.’#15:4 Ingkan buku Koluaran 21:17 hintang Imamat 20:9. 5Tapi ikan majar: amun dulun mantun ma dulun ongkoeh, ‘Ome co sobulih tomihikuh indan ine atawa apa, ocop ihing kuh indan Mohotara,’ 6maka are aroko sobulih ngohormat tinai atawa tamaieh bat. Jadi, antun Mohotara aroko bolaku bat tului adat turan me non. 7Jadi, sobujur eh ikan baya pura-pura pio. Tangar lau hiah jaman sinan, nabi Yesaya ocop porapot antun Mohotara tintun ikan:
8‘Kawan dulun tatuh baya nara Akuh ma baun doh.
Podahar atoi doh ocu ma Akuh.
9Porocuma iroh nyembah hia-Akuh, sadangkan ajaran co tomajar doh iyohco porentah kolunon.’ ”#15:9 Ingkan buku Yesaya 29:13. Hiah jaman sinan, nabi Yesaya mantun onon tintun bangsa Israel. Tapi nyan jaman Yesus, antun conon mula tangar gamaran orong indan pomimpin agama Yahudi!
10Paluh, Yesus naah dulun orong. Are mantun ma iroh, 11“Ngoneh ehlah hintang momaham otuh: Kawan aang co muntam ponah bau aroko umpi kawan dulun jarin pali. Tapi kawan aang co bolua ingkan bau, ciohboh co umpi dulun jarin pali.”
12Kawan murid Yesus dombut paluh mantun ma-Eh, “Mainboh Iko monau bahawa antun-Mu non umpi dulun Parisi tosingung?”
13Useh Yesus, “Oko imbun-komulan#15:13 Imbun komulan nyan intoi boraoi borati ajaran atawa dulun. Pomimpin agama aroko majar dulun ina iroh meleh paham caraeh ika ngonyorih Mohotara. Pomimpin agama potambah porentah hintang ajaran co sala. Jadi, ‘imbun tonuruk’ borati Mohotara angar monyia-nyia kokon porentah hintang ajaran co sala yoh. ATAWA ‘Imbun tonuruk’ mahi boraoi borati Mohotara angar ngolumat kawan pomimpin agama tanon. co aroko tomimbun pian Tamang-Kuh co nyan sorga. Sika imbun cioh angar tonuruk dapot koakat-akat eh! 14Jadi, aroh porhati iroh. Iroh aroko boraoi mombimbing dulun ma cara co buah samah isan dulun bobuto. Amun dulun bobuto nyuwah nuntun dongai co bobuto, mositi koduo-duoeh angar tahak nyan ponah lebak.”
15Paluh Petrus mantun ma-Eh, “Dohop monjelas eh ma kaih tindung cioh niin.”
16Useh Yesus, “Ikan incah arinai paham ka? 17Main aroko me monaueh pai bahawa kanon korih co muntam ponah bau, nosuloh hia ponah olom, paluh tomane nyan kakus? 18Tapi luang-antun co topolua ingkan bau borasar ingkan atoi. Kawan aang taiyoh co lian umpi dulun jarin pali. 19Awi ingkan atoi nyomput kawan pikiran jahat, co posabap dulun ngompatoi, hokoruh ma bawe atawa bakah co bokon ma oruh atawa banai co sah, umpi dosa hokoruh, nako, bosaksi potampa dulun, mantun poceet dulun. 20Kawan aang tanon boh co umpi dulun jarin pali, aroko tului aroko manyo silui sorinai kuman!”
Ico bawe co bokon Yahudi porocaya bahawa Yesus bokuasa
15:21-28
(Mrk. 7:24-30)
21Opaiyoh, Yesus naat ika cioh paluh tulak hia derah Tirus hintang Sidon. 22Ico bawe ingkan derah cioh dombut hia Yesus. Bawe cioh ingkan bangsa Kanaan. Are mantun muhat, “Tuhan, Laca ingkan koturunan Daud. Dohop akuh boh! Anak kuh co bawe tonyarung roh jahat. Are korinah mondorita. Dohop pomambuh are!”
23Tapi Yesus aroko museh bawe cioh sama sindo. Paluh, kawan murid Yesus dombut. Iroh nyawot ma Yesus, “Nyuhu bawe conon tulak. Are horoholuh leh ngonulu ito samir noriak-riak.”
24Jadi, Yesus museh kawan murid-Eh, “Mohotara baya nyoruhan Akuh hia kawan dulun Israel. Iroh co ocu ingkan Mohotara samah isan kawan domba co dajat.”#15:24 Sobujur eh, Yesus mongasihi kokon dulun. Are baya mantun otuh ika monekan pikiran dulun orong co sala. Orong dulun Yahudi bopikir Laca Co Tomonjanji Mohotara dombut ika nyolamat iroh leh. Iroh mongangap bangsa bokon aroko pantas, nohani musuh doh isan bangsa Kanaan. Tapi, Yesus nara ine cotuh awi are porocaya ma-Are.
25Tapi bawe cioh ngoroni Yesus paluh bosujut nyan tohimo Are. Hien bawe cioh, “Tuhan, dohop akuh boh!”
26Tapi Yesus museh, “aroko patut monu rute co tonyodia indan kawan daja paluh tonyakah hia asu!”
27Hien bawe cioh, “Bujur Tuhan. Tapi asu yoh mahi kuman juwuk rute co bororowoi nokah ingkan meja tempuieh.”
28Paluh Yesus mantun maeh, “Bu, korinah lau koporocaya mu! Maka, oluboh tojadi sosuai ma sawotmu.” Nyan hiah iyoh ka anak bawe cioh lansung mambuh.
Yesus pomambuh orong dulun hotoro
15:29-31
29Opaiyoh Yesus naat derah cioh paluh nyalan nyan saran Danau Galilea. Are nosarang hia tungkui lungkuh paluh tuot nyan intin. 30Orong dulun dombut hia-Eh. Iroh mehen kawan dulun ma orong macam toro. Oko dulun co lumpuh, oko co bobuto, oko co pikak, oko dulun uong, hintang orong dulun ma kawan toro co bokon. Iroh mandak kawan dulun hotoro taiyoh nyan muka Yesus. Paluh, Are pomambuh kokon dulun hotoro taiyoh. 31Dulun orong yoh kagum noto dulun co uong boraoi hopander, dulun co pikak ocop mambuh, dulun co lumpuh lian nyalan, hintang dulun co bobuto boraoi noto. Awi iyoh, iroh uras nara Mohotaran bangsa Israel.
Yesus nguan aang co mosotahir mihi kanon indan opat ribu beti
15:32-39
(Mrk. 8:1-10)
32Paluh Yesus naah kawan murid-Eh. Hie-Eh, “Akuh korinah masi ma dulun orong tatuh. Ocop tolu ondo iroh halo Akuh. Makitu iroh arelu oko kuman. Akuh aroko kolu nyuhu iroh buli ma halo kodou awi mungkin iroh angar pisan ponah solanan doh.”
33Kawan murid-Eh mantun ma-Eh, “Ika cotuh ocu ma ika dulun. Aroko bodai ito haba rute indan dulun kuhat otuh!”
34Hien Yesus ma iroh, “Ikan oko empun pira kodilat rute?” Useh doh, “Oko pitu kodilat hintang pira-pira kontuluh ocin kolik.”
35Paluh, Yesus nyuhu dulun orong yoh tuot nyan tana. 36Opaiyoh, Yesus monu pitu rute hintang pira-pira ocin taiyoh paluh mucap torima kasih hia Mohotara. Are hosila rute hintang ocin taiyoh, mihieh hia kawan murid-Eh ina tomagi-magi indan dulun orong taiyoh. 37Iroh uras eh kuman dapot bosuh. Umbot iyoh, kawan murid-Eh ngumpur lowieh ma koranjang. Oko pitu koranjang co kuntop! 38Co umba kuman oko kira-kira opat ribu beti bakah, arinai tokitung bawe hintang kawan daja.
39Opah iyoh, Yesus nyuhu dulun orong yoh buli. Are cakat jukung, tulak hia derah Magadan.
നിലവിൽ തിരഞ്ഞെടുത്തിരിക്കുന്നു:
Matius 15: TBSS
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
