Matius 16
16
Kawan pomimpin agama Yahudi monuntut Yesus nguan aang co mosotahir
16:1-4
(Mrk. 8:11-13)
1Opaiyoh, oko pira-pira pomimpin agama Yahudi ingkan kolompok Parisi hintang kolompok Saduki, iroh dombut hia Yesus. Iroh nyau monjebak Are. Jadi, iroh nyawot ina Yesus nguan aang co mosotahir ika mombukti ma iroh bahawa kuasai-Eh ingkan Mohotara. 2Tapi Yesus museh, “Amun langit bohandang hiah waktu ondo cohit, maka ikan mantun, ‘Mositi ondoeh angar pio.’ 3Tapi amun langit bohandang hintang ngohium waktu manyuap ondo, maka ikan mantun, ‘Mositi ondoeh ceet.’ Jadi, amun ikan noto langit, tangar lau ikan lian mombeda koadaan ondo. Tapi oluco ikan kito kawan ciri jaman co tojadi makitu, ikan tenden aroko lian monau roncana Mohotara.#16:3 Ocop oko orong aang co tojadi: Korombut Yohanes Pembaptis, Yesus tonganak, aang co mosotahir co pian Yesus, kawan ajaran-Eh hintang co bokon-bokon. Kokon iyoh mombukti bahawa roncana Mohotara rahat jarin nyata, iyohonon Mohotara nyoruhan Yesus, Laca co Tomonjanji-Eh. Tapi pomimpin agama Yahudi kuloi momporhati kokon iyoh. 4Jadi, kawan dulun isan ikan co monuntut ico ciri iyohco dulun co jahat. Ikan aroko sotia ma Mohotara. Tapi baya ico leh ciri co angar tomihi ma ikan, baya aang co mosotahir isan co tojadi ma Nabi Yunus hiah jaman sinan.”#16:4 Aang co mosotahir co tomaksut Yesus iyohco waktu Are bolum hopuli. Nabi Yunus oko nyan olom ocin kotahin tolu ondo. Yesus mahi oko nyan ponah kolowong kotahin tolu ondo sorinai Are bolum hopuli.
Opah iyoh, Yesus tulak naat iroh.
Jaga arop ina aroh umba ajaran dulun Parisi hintang Saduki
16:5-12
(Mrk. 8:14-21)
5Hiah waktu iroh mitah danau, kawan murid Yesus solingo mehen rute. 6Yesus mantun ma iroh, “Jaga arop me ma dagi ingkan kawan pomimpin agama Yahudi ingkan kolompok Parisi hintang kolompok Saduki.”
7Jadi, iroh momikir-mikir tintun antun Yesus yoh. Iroh mantun ico ma co bokon, “Yesus mantun onon awi ito aroko mehen rute.”
8Tapi Yesus monau ome co tomander doh. Jadi Are mantun, “Kura ikan momposoal tintun aroko rute? Ikan kurang porocaya! 9Main ikan incah arinai paham ka? Mambu ocop solingo me jah tintun aang co mosotahir co ocop tonguan Kuh? Akuh mihi kanon limo ribu dulun ma limo kodilat rute, paluh oko pira koranjang lowieh co tongumpur me? 10Atawa waktu Akuh mihi kanon opat ribu dulun ma pitu kodilat rute, paluh oko pira koranjang lowieh co tongumpur me? 11Maindeoi songola ikan aroko paham, Akuh aroko mantun ma ikan tintun rute? Tapi bojaga arop me ma dagi ingkan kawan dulun Parisi hintang kawan dulun Saduki.”
12Kotika iyoh punan doh bat paham bahawa maksut-Eh aroko ina doh botawat ma dagi rute, tapi ma ajaran dulun Parisi hintang Saduki.
Rasul Petrus mantun Yesus iyohco Kristus, iyohonon Laca co Tomonjanji Mohotara
16:13-20
(Mrk. 8:27-30; Luk. 9:18-21)
13Opah iyoh Yesus tulak hia derah dokin kota Kaisarea Pilipi. Nyan intin Are ngisok ma kawan murid-Eh, “Hien dulun orong, omeboh co tonisi ‘Anak Kolunon?’ ”
14Useh doh, “Oko co nisi iyohco Yohanes Pembaptis. Oko ka co nisi Nabi Elia. Oko tonga dulun co nisi Nabi Yeremia atawa ico ingkan nabi bokon.”
15Paluh, Yesus ngisok ma iroh, “Tapi, monurut ikan leh, omeboh Akuh tuh?”
16Simon Petrus museh, “Iko iyohco Laca Co Tomonjanji Mohotara, co tonisi to ‘Kristus’. Iko iyohco Anak ingkan Mohotara co bolum.”
17Hien Yesus maeh, “Simon Petrus anak Yunus, iko ocop ihin aang co pio hinut ingkan Tamang-Kuh co nyan sorga. Awi iko ngohaba pomahaman tintun aang conon ingkan Are, aroko ingkan kolunon. 18Ngonehlah! Iko iyohco Petrus ‘Batu’ co borohon. Poko tului iyoh, Akuh angar hapo iko jarin pondasi ika mangun jomaat-Kuh. Iroh angar porocaya ma koborohon hintang kuasan pompatoi aroko lian ngalah iroh.#16:18 Tisi co ‘maut’ nyan intoi boraoi borati kuasan Lacan Setan atawa pompatoi sumong kotahi. Yesus mantun bahawa Lacan Setan aroko angar umpi jomaat-Eh umbot porocaya ma-Eh. ATAWA Yesus mantun bahawa jomaat-Eh angar bolum sumong-kotahieh nyan sorga. 19Akuh angar mihi indammu kunci Korojaan Sorga. Ome bewe co tomowot mu nyan dunia tuh, aang cioh angar tomowot ka nyan sorga. Ome bewe co tomolapas mu nyan dunia tuh, aang cioh tomolapas ka nyan sorga.”#16:19 Ayat cotuh borati Yesus mihi kuasa indan Petrus ika momimpin jomaat-Eh.
20Opah iyoh, Yesus ngosiit kawan murid-Eh mara hia ome bewe bahawa Are iyohco Kristus, iyohonon Laca Co Tomonjanji Mohotara.#16:20 Noto cotatan ponjelasan nyan Lukas 9:21.
Yesus mara tintun pondoritaan co angar tomongalami-Eh
16:21-23
(Mrk. 8:31-33; Luk. 9:22)
21Molai ingkan waktu iyoh, Yesus monjelas ma kawan murid-Eh bahawa Are sobulih tulak hia Yerusalem. Kawan pomimpin bangsa Yahudi, kawan imam kopala, hintang kawan guru agama Yahudi angar umpi Are mondorita. Are angar tongompatoi tapi Mohotara umpi Are bolum hopuli nyan ondo kotolu. 22Tapi Petrus narik Yesus hia bolikat paluh nopoh Are. Hien Petrus, “Aroh, Tuhan! Mudahan Mohotara aroko moholu Iko buah aang cioh!”
23Yesus lansung nonturong Petrus. Hie-Eh, “Buho iko Lacan Setan! Iko mohalang Akuh molalus roncana Mohotara. Iko ngumba pikiran kolunon, bokon pikiran Mohotara!”
Kokon murid Yesus sobulih bosodia mondorita tapi mahi angar bolum nyan sorga
16:24-28
(Mrk. 8:34–9:1; Luk. 9:23-27)
24Opaiyoh Yesus mantun ma kawan murid-Eh, “Amun ico dulun bujur-bujur nyau jarin murid-Kuh, are sobulih naat kojereeh tarop. Are sobulih bosodia monangung beban hintang nohimo pondoritaan, malah dapot matoi. Are sobulih nyanon sompolakieh. Kawan murid-Kuh sobulih isan iyoh hintang horoholuh ngumba Akuh. 25Awi dulun co nyau mompotahan tambung songaieh, angar niho tambung songaieh. Tapi dulun co mongorban tambung songaieh indang-Kuh, angar habaeh. 26Ome kobohujung eh indan are, amun ngolauh dunia tuh jarin are empuieh tapi are niho tambung songai? Lian pai tambung songa cioh tonganti ma aranaang? 27Awi aroko tahi oni Anak Kolunon angar dombut hopuli ingkan sorga tongohomboh kawan molekat-Eh ma kuasa ingkan Tamai-Eh. Hiah waktu iyoh, Are angar maleh sika dulun sosuai ma alogawieh. 28Monauehboh, sobujur eh oko dulun nyan halo kokon ikan nyan intoi co aroko angar matoi sorinai kito Anak Kolunon dombut sobagai Laca ponah korojaan-Eh.”#16:28 Oko tolu komungkinan atawa labih indan waktu doh angar kito Korojaan Mohotara. 1) waktu pira pira rasul-Eh boraoi kito komuliaan-Eh nyan tungkui puruk (17:1-8), 2) waktu Are matoi nyan sompolaki paluh bolum hopuli, ATAWA 3) waktu Roh Mohotara mihi iroh kuasa (Kesah 2).
നിലവിൽ തിരഞ്ഞെടുത്തിരിക്കുന്നു:
Matius 16: TBSS
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
