Matius 14
14
Yohanes Pombaptis tongompatoi
14:1-12
(Mrk. 6:14-29; Luk. 9:7-9)
1Nyan waktu cioh, Herodes iyohco gubernur derah Galilea. Are ngoneh kawan borita tintun Yesus. 2Jadi, are mantun ma kawan pojabat-eh, “Mositi otuh Yohanes Pombaptis co ocop bolum hopuli! Onon tuluieh Are oko kuasai ika nguan aang co mosotahir.”
3-4Soun ma onon Herodes horuh ma Herodias, oluco batuh Herodias non iyohco oruh Pilipus konduang Herodes. Jadi, Yohanes piji nopoh Herodes. Hieeh, “Iko aroko boraoi horuh ma Herodias!” Poko tului iyoh, Herodes nyuhu ika Yohanes tonawan, tomowot ma rantai paluh tomokuntam hia ponah seper. 5Sobujur eh Herodes jere ngompatoi Yohanes, tapi are takut ma kawan dulun, awi iroh mongangap Yohanes nabi. 6Tapi hiah ondo ulang tahun Herodes, anak bawe Herodias ngarang nyan muka kokon dulun co oko nyan pesta cioh. Karang eh yoh korinah ngonyorih atoi Herodes, 7dapot Herodes bojanji hintang bosumpah ma bawe lehoi cioh, are angar mihi ome bewe co tonyawot eh. 8Bawe lehoi cioh tongajuk pian tinaieh, Herodias. Jadi bawe lehoi cioh mantun, “Akuh nyawot ina kuhung Yohanes Pombaptis tomungkong, tomandak nyan ponah apar paluh tomehen hia intoi!”
9Ngoneh iyoh, Herodes jarin jorung. Tapi are ocop bojanji hintang bosumpah nyan muka kokon tamueh. Awi iyoh, are morentah ina sawot bawe lehoi cioh tomolalus. 10Are nyuhu ina kuhung Yohanes tomungkong nyan seper. 11Paluh kuhung eh tomehen nyan ponah apar holuh tomihi indan bawe lehoi cioh. Bawe lehoi cioh mehen eh hia tinaieh. 12Opah iyoh, kawan murid Yohanes Pombaptis monu ontun Yohanes ingkan seper paluh ngolowong eh. Opah iyoh, iroh tulak mahah Yesus paluh mara ome co ocop tojadi.
Yesus nguan aang co mosotahir mihi kanon indan limo ribu beti
14:13-21
(Mrk. 6:30-44; Luk. 9:10-17; Yoh. 6:1-13)
13Waktu Yesus ngoneh borita cioh, Are cakat jukung tarop hintang naat ika cioh, ika tulak mahah ico ika co ngolohiui. Tapi kotika kawan dulun ngoneh tintun aang cioh, iroh naat kawan kota doh hintang tulak ngonulu Yesus buah calan tana. 14Waktu Yesus toka ingkan jukung, kitai orong lau dulun nyan intin. Jadi, Are nongkomo masi ma iroh paluh pomambuh kawan dulun co hotoro nyan halo iroh.
15Kotika ondo molai ulailo, kawan murid Yesus mahah Are. Hien doh, “Ondo molai ulailo hintang ika cotuh ocu ma ika dulun. Jadi, nyuhu boh dulun orong tuh tulak ika iroh lian moli kanon nyan kawan lowu co dokin intoi.”
16Tapi Yesus mantun ma iroh, “Dulun orong tuh aroko usah tulak. Ikan leh boh co mihi kanon doh!”
17Useh doh, “Kaih baya oko limo kodilat rute hintang duo kontuluh ocin.”
18“Mehen onon hia intoi,” hien Yesus. 19Paluh Are nyuhu dulun orong yoh tuot nyan tungkui uru. Opaiyoh, Yesus monu limo rute hintang duo ocin yoh, nolangon hia langit, mucap torima kasih ma Mohotara. Paluh Are hosila rute taiyoh, mihieh hia kawan murid-Eh ina tomagi-magi hia dulun orong taiyoh. 20Iroh uras kuman dapot bosuh. Opah iyoh, kawan murid-Eh ngumpur lowieh ma koranjang. Oko duo balas koranjang co kuntop! 21Co umba kuman oko kira-kira limo ribu beti bakah, arinai tohitung bawe hintang kawan daja.
Yesus nyalan nyan tungkui danum
14:22-33
(Mrk. 6:45-52; Yoh. 6:16-21)
22Opah iyoh, Yesus nyuhu kawan murid-Eh cakat jukung hintang nosoun Are hia pohoi danau. Sopondehan iyoh, Are nyuhu dulun orong yoh buli. 23Opah dulun orong yoh tulak, Yesus nosarang ico lungkuh tarop ika bodoa. Waktu ocop mamalom, Yesus incah oko nyan intin tarop. 24Tapi jukung co tongumba kawan murid-Eh ocop ocu ingkan banut, oko bahi muhat co hokolawan arah ma jukung cioh dapot jukung cioh lumbeng-lukup. 25Kira-kira jam tolu homalom, dombutbat Yesus hia iroh, nyalan nyan tungkui danum. 26Kotika kawan murid-Eh kito Are nyalan nyan tungkui danum, iroh tokocit lau. “Aau noon ontuu!” Hien doh. Iroh noriak-riak awi takut.
27Tapi jion Yesus mantun ma iroh, “Tenang leh! Akuhboh otuh yoh. Aroh Takut!”
28Paluh Petrus mantun ma-Eh, “Tuhan, amun mula tuu-tuu Iko, nyuhu akuh hia-Iko, nyalan nyan tungkui danum.”
29Hien Yesus, “Haasboh!” Jadi Petrus toka ingkan jukung, nyalan nyan tungkui danum mahah Yesus. 30Tapi kotika Petrus nongkomo bahi muhat yoh, maka are jarin takut paluh molai dotong. Are noriak, “Tuhan, dohop akuh!”
31Yesus lansung nyoro silui-Eh, nantot Petrus. Hien Yesus, “Iko kurang porocaya! Kura iko ragu-ragu?”
32Paluh Yesus doruo Petrus cakat ponah jukung, bahi muhat yoh mahi ranai. 33Kawan murid Yesus co oko nyan jukung yoh nyembah nyuku Are. Hien doh, “Iko bujur-bujur Anak Mohotara!”
Yesus pomambuh kawan dulun hotoro nyan Genesaret
14:34-36
(Mrk. 6:53-56)
34Opah dapot nyan pohoi danau, iroh toka ingkan jukung nyan Genesaret. 35Kotika kawan dulun nyan ika cioh nyono bahawa Are yoh Yesus, iroh maraeh hia kokon derah cioh. Kokon dulun co hotoro tomehen doh hia-Eh. 36Iroh nyawot asi hia-Eh ina boraoi nyantuk jubah-Eh, olu baya pungkoeh leh. Uras co nyantuk-Eh jarin mambuh.
നിലവിൽ തിരഞ്ഞെടുത്തിരിക്കുന്നു:
Matius 14: TBSS
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
