युहन्ना 13

प्रभु भोज

1वल्हाडण तीवारोओ पेल्लू एहलो उव्यो का येशुई दुनिया मेहेरोत ओमे बाह्हाआ जाआलोआ आपाआ वेल आवित गोइही का ओ जोग सोडित बाह्हाआ इही जाहो ते माआ मांहे ऐ जे जगामे ओ जेहलो प्रेम मेलतू ओतु शेवटी जाआ ऐहलोच प्रेम मेलतू रोयु. 2हाजेपोर्यो रोटू कोईत ओते शैतान ओमेजा शिमोन इस्करियोती चा पोऱ्या यहुदा याआ मोनामे टाक्ये ओते का येशुहू धोक्यात घेऊन तोईत आपलू 3येशु ओ उलखित्लू ओतु का माआ बाह्हू आखे किबी तियाआ आथे होफहोपिन आप्लु होय अने तो परमेश्वारापोरोत आवयू होय अने पर्मेश्वरारी फासी जात होय, 4त्याकोता रोटू सोडीत उबु रोला तिये आपाआ बारथे कापडे काढ्ये अने एक रुमाल आपाआ कोमरेहे बांध्यू.

येशु चेलाआ गुडा तुवयु

5फासाडी होमला गंगाळाम पाई ओतीत आपाआ शिष्यांआ गुडू तुवूहू लाग्यू अने तियाअ कमरुहू बांधीत मेकल्या रुमालावांही नुसहू लाग्यू. 6फासाडी जाहा तो शिमोन पेत्राआ जागे गोल्यो तेहलाम पेत्राई कोयु, प्रभू नाहाकोत तू माआ गुडू तुवीत होय? 7उत्तर आपित येशु कोयु, ओमे ताहु मालुम नाहा का आय नाहाकोत कोईत होय, फासाडी ताहु मालुम उवे. 8पेत्राई तियाहा कोयु, तू माआ गुडू केधीज तुव्ही नाहा, येशु तियाहा उत्तर आप्लु, जर आय तुव्ही नाहा ताहा ताहु मा आहने जागू मिले नाहा. 9शिमोन पेत्राई तियाहा कोयु, प्रभू फक्त माआ गुडूच नाहा ताहा माआ आथे अने माआ मुंडको पण तोवीत आप. 10येशु तियाहा कोयु, जीआ उंगलीलो कोअयी होय तियाहा आपाआ गुडाआ व्यतिरिक्त किबी तुविला आवश्यकता नाहा ताहा तो पुरो शुद्ध ओतू तुमु मांहे शुद्ध होय पण आखेज नाहा. 11येशु तियाहा उलखित्लू ओतु जो तियाहा धोक्यात तोईत आपे ओतु त्याकोता तिये कोयु ओते, “तुमु आखे शुद्ध नाहा.”

गुडा तुवलो अर्थ

12फासाडी जाहा त्याआं गुडू तुण्यो गोये तेहलाम तिये आपाआ बारथे कापडे फासी कालीत लेधलो अने आपाआ जाग्तली फासी आविलो बोहयु नाहाकोत तुमु उलखित्लू होय का आय तुमा कोअता नाहाकोत कोल्यु? 13तुमु माहु गुरु अने प्रभू कोतेहे अने तुमु योग्य होय काहाके आय तो होय. 14त्याकोता जर आय प्रभू अने गुरु ओमेत तुमाआ गुडू तुण्यो ताहा तुमु पण एकमेकाआ गुडू तुवूहुं हवे आय तुमा आगाडी आय एक उदाहरण आप्लु होय. 15काहाके आय तुमाहा नमूनों देखाडीत देदलू होय का जेहलो आय तुमाआ आरी कोयु होय तुमु बी तेहलोज कोअते रोआ. 16आय तुमामे खोरो कोत्लू एक सेवक आपाआ मालिकापेक्षा वोडू नाहा अने न संदेश आपणारो वोडू होय जीआ ताहु मोकल्यीत होय. 17जर तुमु याआ गोठी उलखित्लू होय अने तेहलो सालतेहे ताहा तुमु धन्य होय.

(मत्ती 26.20-25; मरकुस 14.17-21; लूका 22.21-23)

18आय तुम्हाआ आखा विषयी कोयु नाहा आय तियाहा ओलखीत्लू ज्याहा आय निवडिले होय (अने ओ पण का यहुदा विश्वासघात कोअनारा होय) परंतु आय तियाहा याकोअता निवडिले होय का शास्त्राआ वचन खोरो उवे अने जीआ माआ भाकर खादल्यी तो माविरुध ओवयू. 19ओमे ए घटना घाडीला आगाडी आय तुमामे विश्वास कोत्लू का तो आय होय 20आय तुमामे खोरो-खोरो कोत्लू का जो कोडु माहु मोकलील्यांहा ग्रहण कोअत्लू तो माहु ग्रहण कोअत्लू अने जो माहु ग्रहण कोअत्लू तो तियाहा ग्रहण कोअत्लू जीआ माहु मोक्ल्यीत होय.

विश्वासघातो वोल संकेत

21ऐ कोल्याफासाडी येशु आत्माम कासावीस ओवयू अने साक्षी आप्यी आय तुमामे खोरो कोत्लू, तुमा मेहेरोत एक एहेलू होय का तो माहु धोका आपित तोईत आपे. 22तेहलाम तियाआ शिष्य एक दिहराहा देखाडहु लागाडीत तियाहा निच्छित उवनारा निमिले का तो कोढाकोअता गोगीत होय 23तिया एक शिष्य तियाआ जागे बोहयु ओतु तियाहा येशु जाखो प्रेम कोईत ओतु. 24तेहलाम शिमोन पेत्राई इशारु कोअयु का फुसा का तो कोडू ओवुहू शकतो ज्यावीरूढ येशु गोगीत ओतु? 25येशुउ गोमाणाऱ्या शिष्याने तियाहा सहज तियाआ सातीपो टूगुवोलीत तियाहा फ़ुस्ल्याआ, “ओ प्रभू तो कोडू होय?” 26येशु लेतजा उत्तर आप्लु, रोटाहा बोटकु वाटकामेहे बुडालीत ज्याहा आय आपी तोज होय फासाडी येशु रोटाहा बोटकु वाटकामेहे बुडाळयु अने तो विसित शिमोन इस्करियोती चा पोऱ्या यहुदाहा आप्यू. 27ज्याहबी यहुदाने रोटाहा बोटकु लेदो तीयाम शैतान वास कोअयु फासाडी येशु तियाहा कोयु, जे तू कोअला निघाल्यू होय ते वेगु को. 28पोन तिया जागापो खाअलाकाजे बहित रोल्यामे कोडोबी ओ होमजे नाहा येशु ओ काहा कोयु. 29काहीही विचार कोअयु का पोशाआ खोत्ली रोत ओती त्याकोता येशु तियाहा कोयु होय का वल्हाडन तिवार याकोअता किबी आवश्यक साधन घेऊन आवे किंवा कोत ओतु का गोरब्योहो किबी आपित आपलो त्याकोता यहुदाने रोटाहा बोटकु लेदो. 30रोटू कोईलानंतर तो तत्काळ निहित गोल्यो ए रातीई वेल ओतु.

एक नवली आज्ञा

(मत्ती 26.31-35; मरकुस 14.27-31; लूका 22.31-34)

31तो निहित गोयेनतर येशु कोइतलु, “माअहा पोऱ्या ओमे गौरवात आवयू होय अने तियाआ त्यापोरत परमेश्वरोओ गौरव ओवयू होय” 32जर तियाद्वारे परमेश्वरोओ गौरव ओवयू होय ताहा परमेश्वर आपाआ द्वारे तियाहा गौरव आपी अने तियाहा गौरव लग्गेज ए आपी. 33ओ माआ गोमाणाऱ्या पोरयां, आय ओमे थोडोज वेल तुमाआरी होय तुमु माहु होदहा अने जेहलो आय यहुदी अधिकाऱ्यांना कोयु ओते, तेहलूज तुमु तियाअ जागापो आवहू शकत नाहा तियाअ जागापो आय जात होय, तेहलूज तुमामे पण कोत्लू. 34आय तुमामे नवो आज्ञा आपोहो का तुमु एकमेकाआरी प्रेम को जेहलो आय तुमामे प्रेम कोल्यु होय तेहलूज तुमुबीही एकमेकाआरी प्रेम को. 35जर तुमु एकमेकाआरी प्रेम कोअनारू तेहलाम हर एक जोओ ओलखीत लेही का तुमु माआ शिष्य होय.

येशु द्वारा पतरसो ईन्कारो भविष्यवाणी

36शिमोन पेत्राई तियाहा फ़ुस्ल्याआ, ओ प्रभू, तू कोठे जात होय? येशु तियाहा उत्तर आप्लु, “तू ओमे माफासाडी आवहू शकत नाहा परंतु फासाडी तू माफासाडी आविलो.” 37पेत्राई तियाहा फ़ुस्ल्याआ, “ओ प्रभू, ओमे आयताआ ताआ फासाडी काहा आवहू शकत नाहा? आयताहा ता कोअता माआ जीव पण आपित आपी.” 38येशु उत्तर आप्लु, “तू खुदोओ जीव आपी? आय ताहु खोरो कोत्लू का जो पर्यंत तू माहु तीन टायमोआ नकार आपी नाहा तो पर्यंत कुकडू वाहे नाहा.”

നിലവിൽ തിരഞ്ഞെടുത്തിരിക്കുന്നു:

युहन्ना 13: NOINT

ഹൈലൈറ്റ് ചെയ്യുക

പങ്ക് വെക്കു

പകർത്തുക