युहन्ना 11

लाजरोओ मृत्यु

1मरियम अने तोई बोईहही मार्थाआ गाव बैथानिया लाजर नावाआ एक, माहू मांदवाड्यू ओतु. 2ए तेज मरिया ओती जीयी प्रभूपो इत्र टाकीत तियाआ गुडाहा आपाआ केहावाही नुसल्यो ओते, यीज पाही लाजर मांदवाड्यू ओतु. 3कोईत तियाआ बोईहीही कोत मोकल्ये, “ओ प्रभू पाला, ज्यापो तू प्रेम कोअत्लू, तो मांदवाड्यू ओतु” 4ओ होमलित येशु कोयु, “ओ आजार मोईला नाहा, पण परमेश्वरोओ गौरव कोअता होय, का तीयावाही परमेश्वरोओ पोऱ्याआ गौरव होय,” 5येशु जाहा मार्था अने तियाआ बोईहही अने लाजर यापो येशु प्रेम कोईत ओतु. 6तेबी पोन तिये होमल्यु तो मांदवाड्यू होय तो ज्या जागापो ओतु तीइही बेन दीही फासी थोबिलो गोल्यो 7याआनंतर तिये शिष्यांआ कोयु, “आव आपु फासी यहुदात जाऊ” 8शिष्यांनी तियाहा कोयु, “ऐ स्वामी, ओमे ते यहुदी तापो डोणो देही होय, तेबी तू होमजीत्लो जात्लू?” 9येशु उत्तर आप्लु, “नाहाकोत दिहाआ बारा तास उवनारा नाहा? जर कोडु दिहोम सालनारू ताहा तो ठोकर खाही नाहा काहाके आव जगोआ प्रकाश पालत्लू.” 10जर कोडु पण राती सालही ताहा तो ठोकर खाहोव काहाके तीयाम प्रकाश नाहा. 11तिये याआ गोठी कोयु याआनंतर त्यां कोहू लाग्यू, “आमाआ हेगांति लाजर हुवीत गोल्यो होय, पण आय तियाहा जागतू कोअला जात होय” 12तेहलाम शिष्यांनी तियाहा कोयु, “ओ प्रभूजी जर तो हुवीत गोल्यो होय ताहा हाजू ओतगोयु जानारू” 13येशुई ताहा तियाआ मोइला विषयी कोयु पण ते होमज्ये का तिये हुविलाबद्दल कोयु होय 14तेहलाम येशु तियाहा हीदू पणे कोत आप्लु, लाजरस मोईत गोल्यो होय; 15अने आय तुमा कोअता आनंदाम होय आय तीइही ने ओतू ज्याहा तुमु विश्वास को पोन ओमे आव आपु त्याजागे जाऊ. 16तेहलाम थोमाई जो दिद्दमुस कोयू जात्लू, आपाआ आरीवालाआ शिष्यांआ कोयु, “आव, आमाहा पण ह्याच्या बरोबर मोहुहू साला.”

येशु पुनरुस्थान अने जीवन

17तीइही पुगित कोईत येशुहू मालुम उवे का लाजराहा कब्रोमे मेकीत चोर दीही उवे होय. 18बेथानी यरुशलेमाआ जागे बेन मैल अंतरापो होय. 19जास्तीज यहुदी मार्था अने मरियाजागे आपाआ पाहीओ मोयलापो तियाहा सात्वना आपलो कोअता आव्ये ओते. 20जाहा मार्थाए येशुउ आविलाआ माहिती जोडल्यापो ती तियाहा मिलीला गोयी पण मरिया कोअमे बोहित रोली. 21मार्था येशुहू कोयी, ओ प्रभू जर तू इही रोला ओतलू ताहा माआ पाही मोअयू नसते. 22पोन ओमे पण आय होमजतोलो काजे किबी तू परमेश्वारापोरोत मांगनारू परमेश्वर ताहु आपी. 23येशु तियाहा कोयु, “ताआ पाही फासी जिवंत उठनारू” 24मार्था लेतजा तीही कोयु आय होमजतोलो का शेवटच्या दिहोम पुनरुस्थानाच्या टायमोमें तो जिवंत उठनारू. 25येशु तियाहा कोइतलु पुनरुस्थान अने जीवोन आयुज होय; जो कोडु मापो विश्वास मेकोहो तो मोअनारू तेबी पण जिवंत उठनारू, 26अने जो कोडु जिवंत होय अने मापो विश्वास मेकोहो तो अनंतकाल पर्यत मोअनारू नाहा नाहाकोत तू आव गोठीपो विश्वास कोअते? 27तिये तियाहा कोयु, ओ, ओ प्रभू आय विश्वास कोअते का परमेश्वरोओ पोऱ्या जो ख्रिस्त जगुमे आविलो ओतु तो तांहुज होय.

लाजरोहो जिवाड्यु

28ओ कोत ती निहित गोयी अने आपाआ बोईही मरिया हादीत तीही गुपचुप कोयु का, “स्वामी आवयू होय अने ताहु हादीत होय” 29ओ होमलीताज ती लागेज उठित त्याजागे आवयी. 30येशु ओमे गावून पुगीतगोयू नेओतुपोणे तियाआ जागापो ओतूजींही मार्था लेतजा तियाआ भेट लेदि ओती. 31तेहलाम यहुदी तीआरी कोआ ओते, जे तीही सात्वना आपित ओते ओ पालीत ती मरिया लागेज उठित बारथे गोयी होय ती कबरेपो रोडहू जात होय ते तिया फासाडी जाऊ लागाडीत. 32जाहा मरिया तीइही पुग्यी जीही येशु ओतुताहा तियाहा पालताज तियाआ गुडापो पोडीत कोहू लागीई, ओ प्रभू जर तू इही रोला ओतलू, ताहा माआ पाही मोल्यु नसते. 33जाहा येशुई तीही अने यहुदीयाहा जे तीआरी आव्ये ओते तियाहा रोडीलावेले पालील्यो तेहलाम आत्मावांहि दुखित अने खिन्न ओवयू, 34अने कोयु, तुमु तियाहा कोठे मेक्ल्ये होय? ओ प्रभू आविलो पालहु ल्या. 35येशु रोड्यू. 36तेहलाम यहुदी कोहू लागाडीत, पाला, तो तियापो केतो प्रेम कोईत ओतु. 37पोन त्यामेरोत किबी जानोतांहि कोयु, नाहाकोत ओ जीआ आंदलाआ डोआं उगड्यो, ओ पण कोहू शकला नाहा का ओ माहुहू मोल्यु नसते? 38फासी येशु मोनामे जास्तीज खिन्न ओतगोयु कबरेपो आवयू ती एक गुफा ओती अने तीपो एक डोणो मेकलू ओतु. 39येशु कोयु, “डोणो सेटे को” तियाअ मोल्याआ बोईहही मार्था तियाहा कोहू लागीई, ऐ प्रभू, त्यामेरोत ओमे घाणवास येत काहाके तियाहा माईत चोर दीही उवे होय. 40येशु तियाहा कोयु, नाहाकोत आय ताहु कोयु निमिले का, जर तू विश्वास कोअनारू ताहा परमेश्वरोओ गौरव पालही. 41तेहलाम तिये तियाअ डोणुहु सेटे कोल्यु येशु डोआं उपो कोईत कोयु, ओ बाह्हू, आयताआ धन्यवाद कोअत्लू का तू माआ होम्लाडित लेधलो होय. 42माहु मालुम ओते, हरेक टेमे तू माआ मानत्लू पण जी गोर्दी आगाडी फासाडी उबी होय त्यापोत आय ओ कोयु ज्यावाही का ते विश्वास कोअला जोवे का तू माहु मोक्ल्यीत होय. 43ओ कोत तिये वोडो शब्दावाही आवाज माईत कोयु, ओ लाजर, निहित आव. 44जो मरण पाव्यू ओतु तो गाडीत्वाआ फडकावाही आथे गुडू बांधीत मेकलये निहित आव्यू अने तियाआ सोब रुमालावांही बानदल्यो ओते येशु तियाहा कोयु, तियाहा सोडीत दया अने जाऊ दया.

येशु विरुद्ध मेहे योजना

(मत्ती 26.1-5; मरकुस 14.1-2; लूका 22.1-2)

45तेहलाम जे यहुदी मरियाजागे आव्ये ओते अने तियाआ ओ काम पालीत तियापो तीयामरोत केताहा विश्वास कोअयु. 46पोन तियाआ मायरोत किबी जोओ परुश्याही जात येशुउ का माहा माहिती आप्यी. 47यापो मुख्य याजक अने परुसी इये महा सभा हादिलो अने कोयु, आमाहा नाहाकोत कोईत होय? ओ मांहु ताहा खुपुच चिन्हे देखाडीत होय. 48जर आमू तियाहा ऐहलेच सोडीत आपुहू ताहा आखे तियापो विश्वास मेकीत लेही अने रोमी आविलो आमू जागापो अने जाती बेनुपो राज्य कोहू लेही. 49तेहलाम तियाआ मायरोत कैफा नावाआ होमला माहुई जो तियाअ सालाआ महायाजक ओतु तियाहा कोयु, ताहु किबी मालुम नाहा; 50अने ओ पण होमजाडीत नाहा का तुमा कोअता ओ हाजो होय का आमा मांहाकोअता एक माहुहू माईलु अने आखी जाती नष्ट उवूंहू नाहा. 51ए गोठी तिये आमापोरोत कोयु नाहा पण तियाअ सालाआ महायाजक ओतगोयु भविष्यवाणी कोअयी का येशु आव जातीकोता देही, 52अने तियाअ जातीकोअता नाहा ताहा यकोअता पण का परमेश्वरोओ तितर बितर उवलो पोऱ्याहा एकठे कोईत आपी. 53कोईत तियाअ दिहेरोत ते तियाअ तियाहा माईत टाकिलाआ प्रयत्न कोहू लागाडीत. 54त्यामुळे येशु तिया टायमोपो रोत यहुदीमे नावाजीत ओतगोयु फिर्यु नाहा पोन तिहीरोत जंगलातले, जागेण्या प्रांतात एफ्राईम नावोओ नगरामे निहित गोल्यो आपाआ शिष्याआरी होमजीत्लो रोंहु लाग्यू. 55यहुदीयाहा वल्हांडन तिवार जागे ओतु अने जास्तीज मांहे तिवाराआ पाल्या दिहेरोत यरुशलेमेत गोये का स्वतः शुद्ध कोअनारू. 56कोईत ते येशुहू होदहू लागाडीत, अने मंदिरोम उभे रोत आपसामेहे कोहू लागाडीत, “तुमु नाहाकोत विचार कोअता नाहाकोत तो तीवारोमे आविलो नाहा?” 57मुख्य याजक अने परुश्यांहि ए आज्ञा आपित मेकल्यी का जर कोडाआ मालुम होय का येशु कोठे होय ताहा कोओलो म्हणजे ते येशुहू तोईत लेही.

നിലവിൽ തിരഞ്ഞെടുത്തിരിക്കുന്നു:

युहन्ना 11: NOINT

ഹൈലൈറ്റ് ചെയ്യുക

പങ്ക് വെക്കു

പകർത്തുക