एहुना 2

ईसू दाःते अंगूरराः रसे तुलातेरा

1पेय दिनरे गलील छतरराः काना सहररे तोनोंगीगराः बियाह दोहोना। ईसूरीग एंगात हों हंडाय दोहोना। 2दो ईसू अरू आँयगरिकुःआ चेलाकू हों हना बियाहरे टिवाकू एमेवातेडकुःआ।

3दो रंजावतो अंगूरराः रस चबायान दो ईसूरीग एंगात ईसू एचेरेय कताया, “ने बेटा, बियाह ओड़ाःरे अंगूरराः रस चबायना।”

4दो ईसू हाँय एचेरेय कताया, “ने अइमी, नाःआ लगा ईंग चिलायिंग एचे? ईंगराः बेला अरीन सुदरुःआ।”

5दो ईसूरीग एंगात हंडाकुःआ सेवकिया होड़कू एचेरेय कताया, “हाँय कतायता हनन इयापे एचेय।”

6दो हंडा छोगोटोंग कुंडाकूनकू मंडावतो दोहोना। हना मेमेडटोंग कुंडाकूनरे अंदांज अससी अते मी सव बीस लिटर वरी दाः सयोबा। नाःआ कुंडाकून एहूदाकू अँनकूराः रिती-बिधी इया बुहालगुः लगाकू उपयोतगेःआ।

7दो ईसू हँकुःआ सेवकिया होड़कू एचेरेय कताया, “नाःआ कुंडाकूनरे दाःपे दूल पेरेगगोड।” अरू हँकू हना कुंडाकूनराः मुहका वरी दाःकू पेरेगगोतेड।

8हनते हाँय हँकू एचेरे अरूय कताया, “गुनहोन दाः उडुंगगेपे अरू कोटवाड़ एचेरेपे इदीय।”

दो हँकू गोःयाडकू। 9हनते कोटवाड़ अंगूरराः रस बड़ाँवयान हना दाःए ञू सोतेडा अरू हाँयग होड़ मेरेय सुदी अवेगाड हना अंगूरराः रस करेःआ दोहोना। मनदो दाःकू उडुंगतेरा हँकुःआ सेवकिया होड़कू नाःआ बदीरेकू सुदीया। हनते कोटवाड़ बरबाबूय राःतेरा, 10अरू हाँय एचेरेय कताया, “जमाकू मड़ंगरे अड़िजंग सेबेल अंगूर रसकू एमेयता अरू गुतियाकू ञू रंग झटायान तयोमते भोरोंडो इयाकू एमेयता। मनदो आम ननपाय रस नुँहू वरीम बनसावकेरा।”

11गलील छतरराः काना सहररे ईसू आँयगराः मड़ंगाः बयाव जुवाः इयाःआ बुता एचेतेडखन मान मरजइतगेयीग माःआने एचे उदुःनेना अरू आँयगरिकुःआ चेलाकू हाँय एचेरेकू बिसवासतेरा।

12हना तयोमते ईसू आँयग एंगात, बोपोहकू अरू चेलाकू सुदा कपरनहूम सहर तोराकू। अरू हँकू हंडा तोनोंग दिन वरीकू दोहोना।

भगवानराः ओड़ाः अते फेरवइत होड़कूराः एचे उडुंग

13दो एहूदाकूराः पसहा परोब लेनेसान निचकाःआ दो ईसू मरंग सहर एरुसलेम अगीय रकबनेना। 14उरिगकू, भेड़ाकू अरू पेरवाँ तितीगकूकू अकिरिंगा अरू ढिबुवाकूनकू बदलाःआ हँकुःआ होड़कू एरुसलेमरे भगवानराः ओड़ाःराः राचरेकू दुड़ुःकुःआ। 15हनते ईसू डोराराः मीटोंग गुरुंदे तुलातेड अरू जमा भेड़ाकू अरू उरिगकू हाँय भगवानराः ओड़ाः अतेय जोः उडुंगगोतेडकू। अरू ढिबुवाकूनकू बदलाःआ हँकुःआ होड़कूराः टिबुलकून उलटाव एंडागोतेडखन ढिबुवाकूने छितियाव एंडागोतेड। 16पेरवाँकूकू अकिरिंगा हँकुःआ होड़कू एचेरे ईसू कतातेरा, “नँकू नाःआ अते गोःयाकूपे। ईंग अपांगराः ओड़ाः हाट बजार अहापे तुलाय।”

17दो हनमेला भगवानराः कागदरे ओजाःतो इदा हना कता हाँयरिकुःआ चेलाकू उहियार अगूतेरा,

“आमराः ओड़ाःराः ओंगोलते ईंगराः जीव मेर सिडाःतना।”#सेरेंगकून 69:9

18हनते एहूदाकूरिकुःआ मूक होड़कू ईसू एचेरेकू कतातेरा, “नाःआ इया एचेय लगा आम इये हातपाते ओवाडमेःआ अरू हना अले सुदीबाःका लगा चिला चिनहाम उदुःवालेता?”

19दो ईसू कतातेड, “भगवानराः ओड़ाःपे एचे रूबगोड दो ईंग पेनेय दिनरे अरूयिंग तुलागोडता।”

20दो हँकू कता कुदातेरा, “भगवानराः नाःआ ओड़ाः तुतुला लगा छेयालिस बरिस लगावनेना अरू आम पेनेय दिनरेम तुलागोडता जा?” 21मनदो ईसू भगवानराः ओड़ाःराः अउल-तउलरे अनँयगराः देह बदीरेय कतातेरा। 22ईसू गोएगतो अतेय जियाव रेमनेना हना तयोमरे आँयगरिकुःआ चेलाकू नाःआ कताकू उहियार अगूतेरा। हँकू हनमेला भगवानराः कागदरे नाःआ बदीरे ओजाःतो दोहोना हना कताकून अरू ईसू कता उदुःतेरा हना जमाकूनकू बिसवासतेरा।

ईसू जमा होड़कूराः ओंगोले सुदीयता

23ईसू पसहा परोब मेला एरुसलेमरेय दोहोना अरू हाँय मुरुक बयाव जुवाः इयाःआ बुताय एचेतेरा। हना ञेलतेडखन मुरुक होड़कू हाँय एचेरेकू बिसवासतेरा। 24अरू हाँय जमा होड़कूय सुसुदीःआ। हनालगा हाँय तोनोंगीग एचेरे मेरेय भरसागाड। 25मनुवाकूराः जीवरे चिनचिला ओंगोल इदा हना जमाय सुसुदीःआ। हनालगा तोनोंगीग होड़ एटाः होड़ बदीरे हाँय एचेरे ककता लगा कोवानेःआ।

നിലവിൽ തിരഞ്ഞെടുത്തിരിക്കുന്നു:

एहुना 2: kfp

ഹൈലൈറ്റ് ചെയ്യുക

പങ്ക് വെക്കു

പകർത്തുക