एहुना 3

ईसू अरू निकुदिमूस

1निकुदिमूस ञावीग मी होड़ होड़ दोहोना। हाँय फरीसी होड़ अरू एहूदाकूरीग मूक होड़ होंय दोहोना। 2दो हाँय मी दिन, रइत मेला ईसू एचेरे सेनेडखने कताया, “ने गुरुजी, भगवान आम सुदा मेरेय दोहोकुः दो, आम एचेयता हना बयाव जुवाः इयाःआ बुता तोनोंगीग ओरोय एचे अवेतेरा। हनालगा अले सुसुदीतना आम भगवान अगीते अले चेडले लगाम वेगकिया।”

3दो ईसू हाँय एचेरेय कता कुदातेरा, “आम ईंगमे अयूम, तोनोंगीग होड़ अरू मी तुरहा, मेरेय जनमाः दो हाँय भगवानराः राइजरे ओरोय मेसा अवेनेना।”

4दो निकुदिमूस होंबोरतेरा, “ओहरे! तोनोंगीग होड़ डोकरायान दो हाँय करा इया अरूय जनमाःता? तोनोंगीग होड़ अनँयग एंगातराः दोंगे पेंदारेय कुदा बोलोकियानखन अरू मी तुरहाय जनमाव अवेनता जा?”

5दो ईसू कतातेरा, “ईंगमे अयूम! तोनोंगीग होड़ भगवानराः राइजरीग होड़ बड़ाँः लगा इदान दो हाँय दाः अरू भगवानराः सुद बिरुवाते जनमावगुः लगा इदा।#एज 36:25-27 6चउंदीसरे मी होड़ अनँयग एंगात अपाततेय जनमाःता मनदो भगवानराः सुद बिरुवातेय जनमाःता हाँयग होड़ भगवानरीग होड़े बड़ाँःता। 7आम बार तुरहा जनमागुः लगायिंग कतायतना दो आम अहम बयाः। 8अयुमेमे! होय करा अगी सेन लगा इदा हना अगी सलाःता। आम हनाराः अरोम अयूमता मनदो मेरेम सुदीयता करा अगीते वेगता अरू करा अगी सलाःता। भगवानराः सुद बिरुवातेय जनमाःता, हाँयग होड़ हनन इयाय दोहोनता।”#3:8 उनानी भासीरे होय अरू बिरुवा लगा मिनीटोंग लबदकू उपयोतगेता।

9दो निकुदिमूस होंबोरतेरा, “नाःआ दो करा इया होयाःता?”

10नाःआ अयूमतेडखन ईसू हाँय एचेरेय कताया, “आम इसराएल होड़कूरीग चेडदार होड़ हवे। हनते हों आम नाःआ कताकून मेरेम बुझाःतना जा? 11आम ईंगमे अयूम, अले सुदीयतना हनाले कतायतना अरू अले अयूमकेरा हनाले उदुःतना। मनदो अपे अलेराः कता मेरपे मनाःता। 12चउंदीसरे होयाःता हना कताकून बदीरेयिंग कतायतना दो आम मेरेम बिसवासगेतना, दो सेरमो देसरे होयाःता हना कताकून बदीरे आम एचेरे करा उड़ीयिंग उदुःगे? 13सेरमो देस अतेय वेगनेना हनाँयग मनुवारीग बेटात एकला सेरमो देसे सेनेकिया।”

14“मोसेस टयंगाब ततेररे पितड़राः बींग मीटोंग कंभारेय देगतिरिया हनन इया मनुवारीग बेटात होंकू देगगोडेयता,#दो. नि. 21:8-9 15जेमहा हाँय एचेरेकू बिसवासगेता, हँकुःआ होड़कू ओरो टुटीगनेना हना जीवकू पवाः।”

16“भगवान चउंदीसरिकुःआ होड़कू सुदा मुरुक दुलारकेडखन अनँयगरीग मिनीटोंग बेटाते एमेगोतेड, जेमहा हाँय एचेरेकू बिसवासगे हँकुःआ होड़कू अहाकू लायगुः, मनदो ओरो टुटीगनेना हना जीवकू पवाः। 17चउंदीसरिकुःआ होड़कू डंडियावकू लगा कोवान, मनदो हँकुःआ होड़कू सडावकू लगा भगवान अनँयग बेटाते वारतिरिया। 18हाँय एचेरेकू बिसवासगेता हँकुःआ होड़कू डंड मेरकू पवाःता, मनदो हाँय एचेरे मेरकू बिसवासगेता हँकुःआ होड़कू डंडकू पवाःता। हँकुःआ होड़कू भगवानरीग मिनी होड़ बेटात एचेरे मेरकू बिसवासगाड। हनालगा हँकुःआ होड़कू डंडियावकू लगा भगवान एटाःकेडकुःआ। 19चउंदीसरे मरसल वेगकिया, मनदो होड़कूराः बुता बेलूर इदा। हनालगा हँकू मरसल अते अंदराकू मंजूरवाता अरू हना ओजाहते भगवान होड़कूय फड़ियावता। 20बेलूर बुताकूनकू एचेयता हँकुःआ होड़कू मरसल मेरकू मंजूरवाता। हँकूराः बेलूर बुताकून जमाकू सुदी अवेयता। हनालगा हँकू मरसल अगी मेरकू सेनता। 21मनदो भगवानराः सतायरेय सलाःता हाँयग होड़, भगवान हाँयराः जीवरेय एचेकेरा हना जमा होड़कू सुदी अवेय लगा मरसल अगीय सेनता।”

ईसू अरू बतिसमा एमेयीग होड़ एहुना

22हनते ईसू आँयग चेलाकू सुदा एहूदिया छतर तोराय। अरू हंडा हाँय हँकू सुदा दोहोकियानखन होड़कू बतिसमाय एमेवाकुःआ। 23सालिम गाँवराः लेसान एनोनरे बगरा दाः सूतीकून दोहोना। हनालगा एहुना हंडा होड़कू बतिसमाय एमेवाकुःआ। 24(हनमेला एहुना जेहेलरे मेरकू गोःगातेडीग।)

25दो मी दिन सुदगुः लगा तिःईकून अरू काटकून बुहालराः रिती-बिधी बदीरे एहुनारिकुःआ चेलाकू अरू मी होड़ एहूदा होड़ सुदाकू अड़ा-चउकीयान। 26अरू चेलाकू एहुना एचेरे सेनेडखनकू कताया, “ने गुरुजी, एरदन नई मार परोम आम सुदाय दोहोना हाँयग होड़, अरू हाँय बदीरे हिदइतमे एमेतेरा हाँय, होड़कू बतिसमाय एमेवाकूतना अरू मुरुक बगरा होड़कू हाँय एचेरेकू सेनतना।”

27दो एहुना कतातेरा, “भगवान सेरमो देसते तोनोंगीग एचेरे मेरेय एमेवा, हना वरी हाँय तोनोंगाः ओरोय पवावनेना। 28ईंग अपे एचेरेयिंग कतातेरा, ईंग मसी ना लवे, मनदो हाँय अते मड़ंग भगवान ईंगे वारकेरा। नाःआ कता अँननपे अपे ईंग अतेपे अयूमकेरा। 29कनियानुनी बरवारीग हवे मनदो बरवारीग सउंगता सपड़ावकेडखन बरवाय तंगीता अरू हाँय बरवाराः अरो अयूमकेडखने बहाल जुवाःता। हनन इया नुँहू ईंग हों मुरुकिंग बहालयना। 30नाःआ इया होनोयाः लगा इदा, हाँय मरंग जुवाः अरू ईंग हुडिंग जुवाः।”

सेरमो देस अतेय वेगता हाँयग होड़

31“सेरमो देस अतेय वेगता हाँयग होड़ जमाकू अते मरंग इदानिया। चउंदीसरेय जनमावकिया हाँय नानाः चउंदीसराः कताकूने कतायता। हनालगा सेरमो देस अतेय वेगता हाँयग होड़ जमाकू अते अगम मरंगे दोहोनता। 32हाँय अयूमकेरा अरूय ञेलतेरा हना कता बदीरेय कता उदुःगेतना। मनदो तोनोंगीग हाँयराः कता मनाः लगा मेरकू चहाःता। 33भगवानराः कताय मनाःता हाँयग होड़ भगवान सताये कतायता माःआने उदुःबाःकाता। 34भगवान अनँयग सुद बिरुवा मिनी जीवकेडखने एमेयता। हनालगा भगवान वारकिरिया हाँयग होड़, भनगवानराः कताकूने कता उदुःता। 35अपांग भगवान अनँयग बेटाय अलार-दुलारता अरू जमा जिनिसकून हनाँय एचेरेय जिमाकेरा। 36बेटात एचेरेय बिसवासगेता हाँयग होड़ ओरो टुटीगनेना हना जीवे पवाःता। मनदो बेटाते आड-बेकारवाता हाँय, ओरो टुटीगनेना हना जीव ओरोय पवावनेना अरू भगवान हाँय सुदा मुरुक रीसतोय दोहोनता।”

നിലവിൽ തിരഞ്ഞെടുത്തിരിക്കുന്നു:

एहुना 3: kfp

ഹൈലൈറ്റ് ചെയ്യുക

പങ്ക് വെക്കു

പകർത്തുക