एहुना 1

ईसू भगवानराः सरवन हवे

1चउंदीस बुँहड़ीन अते मनाड़ंग सरवन दोहोना अरू हना सरवन भगवान सुदा दोहोना अरू सरवन भनगवान दोहोना।#रेःएत 1:1; 1 एहु 1:1; उदुःतो कता 19:13; एहु 17:5 2अरू हनाँय भगवान सुदा मनाड़ंग अतेय दोहोना।

3हनाँय जमा बरानाः जिनिसकूने तुलाकेरा#कुलू 1:16; 1 कुरि 8:6; इब 1:2 अरू हाँय बेगर, तोनोंगाः जिनिस मेर बड़ाँवगना। 4हनाँय जमाकू लगा जीवे एमेकेरा अरू हना जीव होड़कू सताय एचे सुदीकूता हना मरसल दोहोना। 5मरसल अंदरारे विड़चेड़ता। मनदो अंदरा हना मरसल ओरो इड़ीग अवेतेरा।

6भगवान आँयग अगीते मी होड़ एटाः होड़े वारतिरिया। हाँयराः ञाव दोहोना एहुना।#1:6 नाःआरे ओजाःतो इदा हाँयग एहुना नाःआ कागदे ओजाःतेरा हाँयग एहुना ना लवे। मनदो नाँय बतिसमा एमेयीग होड़ एहुना हवे। 7अरू हाँय मरसलराः बदीरे होड़कू उदुःवा लगाय वेगनेना, जेमहा हाँयराः हिदइत होड़कू अयूमकेडखन मरसल हवे हाँयग होड़ एचेरेकू बिसवास अवेय। 8मरसल एमेयीग होड़ हाँयग एहुना मेरेय दोहोगान। मनदो मरसल इदानिया हाँयग होड़ बदीरे हिदइत उदुः लगाय वेजेडा। 9होड़कू लगा सताय जीवराः मरसले एमेता हाँयग होड़ चउंदीसरे वेग लगाय दोहोना।

10हाँय चउंदीसरेय दोहोना अरू चउंदीस हाँयते बड़ाँवकिया, मनदो चउंदीसरिकुःआ होड़कू हाँय मेरकू सिनहागडीग। 11हाँय अनँयगरिकुःआ निकता होड़कू एचेरेय वेजेडा, मनदो हँकुःआ होड़कू हाँय मेरकू मनेवागडीग। 12मनदो हाँय एचेरेकू बिसवासकेरा, हँकुःआ जमा होड़कू भगवानरिकुःआ लइंकू होयाः लगा हातपाते एमेवाडकुःआ। 13हँकुःआ होड़कू, होड़कूराः नइड़-बाँसते सहे अइमी मरद जुमाः अते सहे तोनोंगीग होड़राः ओंगोल इया मेरकू जनमाःता, मनदो भनगवानराः ओंगोल इयाकू जनमाःता।

14दो हना सरवन मनुवाराः सुरइत मुरइतरे होड़कू तलारेय डेरानेना। हाँय अपांग भगवानरीग मिनी होड़ बेटात इदानिया अरू अबू हाँय तुमिन मरंग इदानिया हनाबू ञेलतेरा। हाँयराः जीवरे जनामा सतायते अरू मयाते पेरेगतो दोहोना। 15बतिसमा एमे होड़ एहुना हाँय बदीरेय कतातेरा, ननाँयग होड़ बदीरे मड़ंगरेयिंग कता उदुःतेरा, ईंग तयोमतेय वेगता हाँय, ईंग अते मनाड़ंग वरीते इदानिया। हनालगा हाँय ईंग अते अगम मान मरजइतगेयीग इदानिया। 16अरू हाँय उडु-बुडूत होयानेन अते अबू जमाकूराः जीवरे मुनुरुक मयाबू पवावनेना। 17भगवानराः नियम मोसेसतेय एमेकेरा मनदो ईसू मसीते भगवान अबूय मयावारा अरू अनँयगराः सताय अबूय एचे उदुःवारा। 18तोनोंगीग होड़ भगवान कहियो मेरकू ञेलगडिया, मनदो भनगवानरीग दुलारीग मिनीटोंग बेटात एकला, अबू एचेरे भगवाने एचे उदुःकेरा।

बतिसमा एमेयीग होड़ एहुना बदीरे हिदइत

(मती 3:1-12; मरकूस 1:1-8; लूका 3:1-18)

19एरुसलेमरिकुःआ एहूदाकू बतिसमा एमेयीग होड़ एहुना एचेरे भगवानराः ओड़ाःरिकुःआ पुजउरी होड़कू अरू लेवी होड़कूकू वारगोतेडकू अरूकू एचे होंबरतिडिया, आम इये हवे, माःआन।

20दो हाँय हँकू एचेरे कताय लगा मेरेय रोंकावगान। मनदो हाँय हँकू एचेरे जमाकूने कता उदुःगोतेड, ईंग मसी ना लवे, माःआन।

21दो हँकू एहुना एचेरेकू होंबोरतेरा, “दो आम इये हवे? इलियाह#मला 4:5 हवे जा?”

हनते एहुना कतातेड, “ईंग ना लवे।”

“दो भगवान वारगेय लगाय जबानतेरा हाँयग भगवानराः बड़रा कतायीग होड़ अनम हवे जा?”#दो. नि. 18:15

दो एहुना कतातेरा, “बुरी।”

22हनते हँकू हाँय एचेरेकू होंबोरतेड, “अले उदुःवालेमे आम इये हवे, जेमहा नाःआते आम एचेरेकू वारकेडलेःआ, हँकुःआ होड़कू एचेरे तोनोंगाःले कता उदुः अवे। आम अनम बदीरे चेले माःआनमे कतायतना?”

23दो भगवानराः बड़रा कतायीग होड़ एसयाहराः कता इया एहुना कतातेरा,

“परबू लगा दूरपे सोएगगोड, माःआन टयंगाब ततेररे खिररीवाडखने कतायता हाँयग होड़ इनिंग हवे।”#एस 40:3

24नँकुःआ होड़कू फरीसी होड़कू वारगोतेडकुःआ 25अरू हँकू एहुना एचेरेकू होंबोरतेरा, “आम मसी, सहे इलियाह सहे भगवान वारगेय लगाय जबानतेरा हाँयग भगवानराः बड़रा कतायीग होड़ ना लवे दो आम चिला लगा होड़कू बतिसमाम एमेवाकूता?”

26दो एहुना कता कुदावाडकू, “ईंग दाःते बतिसमायिंग एमेयता। मनदो अपे अते मी होड़ इदानिया। हाँय बदीरे अपे मेरपे सुसुदीतना। 27हनाँयग होड़ ईंग तयोमतेय वेगता अरू हाँयराः चाटीराः डोरा लड़ा जुकूर हों ईंग कोवायिंगा।”

28नाःआ जमाकून एहुना होड़कू बतिसमाय एमेवाकुःआ हना एरदन नईराः पुरुब होराः बेतनिया गाँवरे होयानेना।

ईसू भगवानरीग भेड़ा होन हवे

29एटाः दिन एहुना आँयग अगी ईसू वेगतो ञेलतिडिगखने कतातेरा, “ञेलेयपे, चउंदीसरिकुःआ होड़कूराः कसूरे बराव एंडाता भगवानरीग भेड़ा होन ननाँय हवे। 30ननाँय बदीरे मड़ंगरेयिंग कतातेरा, मी होड़ ईंग तयोमतेय वेगता अरू हाँय ईंग अते मनाड़ंग जूग वरीतेय दोहोना। हनालगा हाँय ईंग अते मान मरजइतगेयीग इदानिया। 31हाँय इये हवे माःआन ईंग हों मेरिंग सुसुदीःआ। मनदो नाँय बदीरे इसराएल होड़कू सुदी अवेय लगा दाःते होड़कू बतिसमायिंग एमेवाकुःआ।”

32हनते एहुना नाःआ हिदइत एमेवाडखने कताया, “पेरवाँ तितीग इया सेरमो देस अते सुद बिरुवा हाँय एचेरे उतरावतोयिंग ञेलतेरा। 33नाःआ अते मड़ंग ईंग इनिंग हाँय मेरिंग सुदी अवेगडीग। मनदो ईंग होड़कू दाःते बतिसमा एमेवाकू लगाय वारतिडिंगा हाँयग भगवान ईंग एचेरेय कताया, सुद बिरुवा सेरमो देस अते उतरावकियानखन रोंकावतोम ञेलता हनाँयग होड़ सुद बिरुवाते होड़कू बतिसमाय एमेवाकूता, माःआन। 34अरू हनायिंग ञेलतेरा अरू हाँय बदीरेयिंग कताबाःगेतना, हाँय भगवानरीग बेटात हवे, माःआन।”

ईसूरिकुःआ मड़ंग चेलाकू

35एटाः दिन एहुना आँयगरिकिनाः बार होड़ चेलाकिन सुदा चँड़ातकू दोहोना। 36अरू ईसू हँकू मड़ंगरेय सेने पारयान दो एहुना ञेलतिडिगखने कताया, “ञेलेयबा, नाँय दो भगवारीग भेड़ा होन हवे।”

37हनते हना बड़रा अयूमतेडखन हँकिनाः बना होड़ चेलाकिनतेन ईसूराः देह दूरकिन ओतोंगयान। 38दो ईसू हँकिनाः होड़किन आँयग देह दूर ओतोंग वेगतोय ञेलतेडकिना। दो हाँय हँकिन अगी उलटावनेनखने होंबरेःआ, “अबा चिलाबा चहाःतना?”

हनते हँकिन हाँय एचेरेकिन कता कुदातेरा, “ने रबबी, आम करेम डेरनता?” (इबरानी भासीरे रबबीराः मतलोब गुरुजी हवे।)

39दो ईसू हँकिन एचेरेय कताया, “दबूबा ञेञेल लगा।” अरू हँकिन हाँय सुदा सेनेकियानखन हाँय करा ततेररेय दोहोना हनाकिन ञेलतेरा। दो हना दिन सिंगाड़यान। हनालगा हँकिन हनाँय सुदाकिन दोहोयान। 40दो एहुनाराः कताकिन अयूमतेरा अरू ईसूरिकिनाः चेलाकिन बड़ाँवनेना, हँकिन अते मी होड़राः ञाव दोहोना अंदरियास। हाँय सिमोन पतरसरीग बोहोते दोहोना। 41मड़ंगरे हाँय आँयग वगात सिमोन सुदा जुमावनेनखने कताया, “अलंग मसी सुदालंग जुमावयना।” (इबरानी भासीरे मसीराः मतलोब सुनावतो होड़ हवे।) 42हना तयोमरे अंदरियास, ईसू एचेरे सिमोने गोःयाडीग।

दो ईसू, सिमोन ञेलतेडखने कताया, “आम एहुनारीग बेटात सिमोन हवे। आम कइपा माःआनकू कतावामता।” (कइपाराः मतलोब मरंग दिरि हवे अरू हान उनानी भासीरे पतरस माःआन इदा।)

ईसू पिलिपूस अरू नतनएले राःतेरा

43एटाः दिन ईसू गलील छतर अगी सेन लगाय ओंगोल दोहोतेरा। दो हंडा सोदोरनेनखन पिलिपूस सुदाय जुमावनेना अरूय कतातेरा, “आम ईंगरीग चेलाम बड़ाँः।” 44अंदरियास अरू पतरस बेतसइदा सहररिकिनाः दोहोना अरू पिलिपूस हों हनंडायीग दोहोना।

45दो पिलिपूस, नतनएल सुदा जुमावनेनखन हाँय एचेरेय कतातेरा, “भगवानराः नियम कागदरे मोसेस अरू भगवानराः बड़रा कता होड़कू इये बदीरेकू ओजाःतेरा, हाँयग होड़ सुदाले जुमावनेना। अरू हनाँय हवे नसरत सहररीग उसूपरीग बेटात ईसू।”

46दो नतनएल हाँय एचेरेय होंबोरतेरा, “नसरत सहर अते नाःआ इया करा उड़ी होया अवेनता?”

दो पिलिपूस हाँय एचेरेय कताया, “सेनेकियानखनमे ञेल।”

47हना तयोमते ईसू नतनएल आँयग अगी वेगतो ञेलतिडिगखने हाँय बदीरेय कताया, “ञेलेयपे, नाँय सनातायते इसराएल होड़ हवे अरू नाँय मुरुक सुधिया होड़ इदानिया।”

48नतनएल हाँय एचेरेय कतातेरा, “आम ईंग करा उड़ीम सुदींगता?”

दो ईसू हाँय एचेरेय कता कुदातेरा, “पिलिपूस आमे राः अते मड़ंग, आम लुवा दूब पेंदारेम दुड़ुःकुःआ हनमेला आमिंग ञेलतेरा।”

49नतनएल कतातेरा, “ने गुरुजी, आम भगवानरीग बेटा अरू इसराएल जइत होड़कूरीग राजा हवे।”

50दो ईसू हाँय एचेरेय कतातेरा, “आम लुवा दूब पेंदारेयिंग ञेलतेडमेःआ माःआनिंग कतातेरा दो आम बिसवासकेरा। मनदो नाःआ अते आम मरंग मरंग कताकूनमे ञेलता।” 51ईसू, नतनएल एचेरे अरूय कताया, “आम ईंगमे अयूम, आम सेरमो देस गीगतोम ञेलता अरू सेरमो देसरिकुःआ बराहीलकू मनुवारीग बेटात एचेरे उतराः देगतोम ञेलकूता।”

നിലവിൽ തിരഞ്ഞെടുത്തിരിക്കുന്നു:

एहुना 1: kfp

ഹൈലൈറ്റ് ചെയ്യുക

പങ്ക് വെക്കു

പകർത്തുക