Yohaane 9
9
Yeesu onimulamiha mutthu oohoona okhuma oyariwawawe
1Aviraka, aamoona mutthu oohoona okhuma oyariwawawe. 2Oohuseraawe yaamukoha: “Muhusiha, taani otthenke: mulopwana ola, hoye hoye asinaangolowaawe, eenre ayariwaka oohoona?” 3Yeesu aaweerela: “Khahiyono mulopwana ola, hata asinaangolowaawe atthenke. Eyo yeereiye weera muteko wa Muluku woonihereiye mookuminimwawe. 4Oreene nlelo othana, onthuneya weera hiyo nipake muteko wa Yaale akiruminghe. Ohiyu onookhuveela aneeraawe ahikhale anaavare muteko. 5Miyo kireene mweelaponi, ti Waara wa elapo ya vathi.” 6Uulumaka yeeyo, aasenyela vatthayani, anatakansera etthaya ni isenye, anattikitthela mmaithoni mwa mulopwana. 7Vano aamweerela: “Murowe ni mwiirapihe vantthiyani wa Silowami.” (Eyo entaphulela: oorummwa). Mulopwana aarowa, aniirapiha, anahokolowa oonaka. 8Amwaattamanaawe ni yaawo yaamoona okhuma khalayi avekaka yaakohana: “Khahiyono mulopwana ola yoole aakhovelela okilaathi avekaka?” 9Akina yaaheera weera ti yoole. Akinatho yaaheera: “Hoye, onlikana ni yoole paahi.” Mene owo muneenaawe aaheera: “Ti yoomi.” 10Awo yaamukohakoha: “Vano, ahuleiye hai maithwaanyu?” 11Owo aawaakhula: “Mulopwana oniitthaniwa Yeesu aatakansa etthaya ni isenye, anakittikitthela mmaithonimwaka, anakeerela weera kirowe ni kiirapihe vantthiyani na oSilowami. Koorowa, kohiirapiha ni kinimoona!” 12Awo yaamukoha: “Ori woowi Mulopwana Owo?” Owo aaheera: “Nkisuwenle.”
aFarisi* ankohexexa olamiha
13Vano yaamuronghela aFarisi* mulopwana aari oohoona. 14Nihuku Yeesu aatakansalaawe etthaya ni isenye ni aahunlaawe maitho a mulopwana ole naari eSaabadu. 15aFarisi* yaamukohatho moota heeni owo aawenraawe woona. Mulopwana aawaakhula: “Owo aakittikitthela mmaithonimwaka etthaya yootakanseriwa isenye. Vano kiniirapiha ni kinoona.” 16Akina a aFarisi* yaaheera: “Mulopwana Owo khahiyono a Muluku niwoko khanttittimiha eSaabadu.” Akinatho yaakoha: “Ongwereya hai namattheka opaka ineneero sootikhiniheya iya?” Vano, waakhala ohiiwanana variyariwaya. 17Yaamukohatho oohoona: “Onghima eheeni weyo mwaha wa Yoowo? Ti maithwaawo Owo ohunlaawe.” Mulopwana aawaakhula: “Owo ti Mprofeeti!” 18aYuda khayaakhulenle weera owo aari oohoona analamihiwa. Tivawo yaawiitthannaaya asinaangolowaawe 19ni yaahaakoha: “Yoola mwaninyu mwa yoowo muneeraanyu aayariwe oohoona? Onoona hai vano?” 20Asinaagolowaawe yaawaakhula: “Noosuwela weera owo ti mwanihu ni aayariwa oohoona. 21Khanisuwenletho weera onoona hai, hata taani omuhunle maithwaawe. Munkohe ola. Ohunnuwa. Onoowera wuuluma muneenaawe.” 22Asinaangolowaawe yeenre yeeyo ewoovaka aYuda, niwoko ale yaalakela weera mukina alapa weera Yeesu ti Kristu, anoomoliwe muSinagogani*. 23Tivawo asinaangolowaawe yeenraaya: “Ohunnuwa. Munkohe ola.” 24Emaara yanaaveeli yaamwiitthana mulopwana aari oohoona, enamweerela: “Omvuwihe Muluku! Noosuwela weera Mulopwana Owo ti namattheka.” 25Owo aawaakhula: “Nkisuwenle weera Owo namattheka, naari hoye. Etthu emoha koosuwela: Miyo kaari oohoona ni vano kinimoona!” 26Vano yaamukoha: “Eheeni oopakenlaawe weyo? Oohunle hai maithwaawo?” 27Owo awaakhula: “Miyo kohooleelani, mene nyuwo khamwiiwale. Heeni muntthunaanyu wiiwatho? Apaale nyuwotho muntthuna okhala oohuseraawe?” 28Vano yaamuruwana ni yaamweerela: “Oohuseraawe ti weyo! Hiyo nri oohusera a Moisesi! 29Noosuwela weera Muluku aahuuluma ni Moisesi, mene mwaha wa Yoowo – khanisuwenle hata onkhumelelaawe.” 30Mulopwana aawaakhula: “Moone, eyo ti etthu yootikhiniheya! Nyuwo khamusuwenle onkhumelelaawe, wa soothesene Owo ookihula maithwaaka. 31Noosuwela weera Muluku khammwiiwelela namattheka, mene ommwiiwelela yoowo onimuttittimiha Muluku ni ompaka otthunawawe. 32Khaawo otonke wiiwa weera mutthu oohoona eyareliwaawe aahuliwa maithwaawe. 33Mulopwana Owo ahaakhanle a Muluku khaawera opaka etthu.” 34Awo yaamwaakhula: “Weyo waayariwe oosareya yoottheka! Ontthuna onihusiha?” Vano yaamoomola.
Ohoona wa mmunepani
35Yeesu aahiiwa weera aahoomoliwa ni amphwanyaka, aamukoha: “Nyuwo munoomuroromela Mwaana a mutthu?” 36Mulopwana aamukoha: “Apwiya, Yoowo taani weera miyo kinroromele?” 37Yeesu aamweerela: “Nyuwo moomoona. Ti Yoole onuuluma ni nyuwo.” 38Vano mulopwana aamweerela: “Apwiya kinoomuroromela.” Ni aamulapa. 39Yeesu aamweerela: “Miyo kirweenle mweelaponimu othoriha: weera ahinoona yoone ni anoona ekhale oohoona.” 40aFarisi* akina yaari vamoha ni Yoowo yaamwiiwa ahimaka yeeyo ni yaamukoha: “Apaale hiyotho nri oohoona?” 41Yeesu aaweerela: “Nyuwo mwaari oohoona, khamwaakhala ni nthowa na yoottheka. Vanonto mweenre mweeraka: ‘Ninnoona,’ nthowananyu ninoopwaherera.
നിലവിൽ തിരഞ്ഞെടുത്തിരിക്കുന്നു:
Yohaane 9: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.
