Yohaane 10
10
Mukukhuli ooreera
1Miyo kinoororomelihani weera yoole ohimvolowa munikhoolani na ikhondoolo aviraka vamulako, mene ongwela nipuro nikina, owo ti namwiiya ni mutakhali. 2Yoole omvolowa vamulako ti mukukhuli a ikhondoolo. 3Namalipelela a mulako onoomuhulela mukukhuli nsele ni ikhondoolo sinimwiiwa nsunawe. Owo onniitthanela masina a ikhondoolosawe ni onnakhumihera vaate. 4Akhumiheraka vaate ikhondoolosawe, owo onoohoolela ni iyo sinoomutthara niwoko soosuwela nsunawe. 5Khasirwatho simutthara oohisuwanyeya, vekhaikhai, nsimutthawe yoowo niwoko khasisuwenle nsu na mutthu oohisuwanyeya.” 6Yeesu aapaka niphwanaphwaniho nne, mene awo khayiiwexenxe yeeyo aaleenlaawe. 7Vano Yeesu aahima veeli: “Kinooleelani ekhaikhai: Miyo ti mulako wa ikhondoolo. 8Ootheene yaarwiiye kihinaaye Miyo, yaari anamwiiya ni anamatakhala, mene ikhondoolo khasaawiiwale. 9Miyo ti mulako. Yoowo omvolowa wa Miyo anaavuluxiwe. Anaavolowe, anaakhume ni anaaphwanye sooca. 10Namwiiya onrweela wiiya, wiiva ni ophwata paahi. Miyo kaarweenle weera atthu ekhalane okumi, aani okumi woowaattaxa. 11Miyo ti Mukukhuli ooreera. Mukukhuli ooreera omvaherera ikhondoolo okumaawe. 12Namuteko ooliveliwa khahiyono muneene a ikhondoolo. Hiiho, oonaka weera mwiici onimoowa, onoohiya ikhondoolo ni onootthawa. Vano mwiici onoovara ikhondoolo ni onoomwaraxa. 13Owo ontthawa niwoko ti ooliviwa ni khampwattha ikhondoolo. 14Miyo ti Mukukhuli ooreera. Koosuwela ikhondoolosaka ni iyo sookisuwela, 15hiiho ntoko Atiithi akisuwenlaaya ni Miyotho kohaasuwela. Miyo kimvaherera ikhondoolo okumaaka. 16Kookhalano ikhondoolo sikina sihikhanle sa nikhoola nna. Ontthuneya weera Miyo kikukhuletho iyo. Iyo nsiiwe nsunaka ni hiiho nsikhale nikhoola nimoha sikhalanaka Mukukhuli mmoha paahi. 17Tivawo Atithaka ankisivelaaya, niwoko kimvaha okumaaka weera kikuxetho yoowo. 18Khaawo onkaakha okumaaka, mene Miyo kimvaherera yoowo niwoko na olakelawaka. Kookhalano ikuru woovaha ni wookuxatho. Nlamulo nna kaakhenle wa Atithaka.” 19Waakhumelelatho onyakulihana variyari wa aYuda niwoko na masu ale. 20Ancipale a yaawo yaaheera: “Owo orino munepa woonanara ni ti naanepa! Heeni nimmwiiwaahu?” 21Akinatho yaaheera: “Masu ala khaahiyono a Mulopwana orino munepa woonanara. Munepa woonanara onoowera ohula maitho a mutthu oohoona?”
Ohiroromela wa aYuda
22Vano, yaakhala efesta ya wuupuwelela otteelihiwa wa Empa ya Muluku oYerusaleemu. Waari mulaala 23ni Yeesu aari Mpaani mwa Muluku aviraka mpithela wa Salomoni. 24aYuda yaathukumana emurukureenreene emweerelaka: “Mpaka yaakhani hiyo nneeraahu niweherere yoowaakhulaanyu? Nyuwo mwaari Kristu, munileele mwaatthuni.” 25Yeesu aaweerela: “Miyo kohooleelani, mene khamunroromela. Miteko Miyo kimpakaaka mwa Nsina na Atithaka, sinnakikhalela onamoona; 26nyuwotho khamunroromela niwoko khamuhiyono a ikhondoolosaka. 27Ikhondoolosaka sinniiwa nsunaka; Miyo koosuwela iyo ni iyo sinnikitthara. 28Miyo kimvaha okumi woohimala ni iyo khasirwa siriheya. Khaawo aneera awere okaakha mmatatanimwaka. 29Atithaka akivanghe seiyo ti oowaapwaha ootheene. Khaawo aneera awere owaakha mmatatani mwa Atithaka. 30Miyo ni Atiithi nri mmoharu.” 31aYuda yaattottatho maluku weera emvonye, 32mene Yeesu aaweerela: “Miyo koowooniherani miteko sincipale sooreera sinrweela wa Atiithi. Niwoko na muteko heeni wa seiye nyuwo muntthunaanyu okivonya maluku?” 33aYuda yaamwaakhula: “Hiyo khannoovonyani maluku niwoko na muteko wooreera, mene niwoko na oveiha. Vano, murookhalaru mutthu paahi mohiixoonihera ntoko Muluku!” 34Yeesu aawaakhula: “Kheelempwe munlamulonimwanyu: ‘Miyo keenre weera nyuwo muri miluku’? 35Hapo Muluku oowiitthana miluku yaale nnaarweela nsu na Muluku – ni Yoolempwa* kheenooceeleya – 36ankha Yoole Atiithi amutteelinghaaya ni amuruminghaaya mweelaponimu? Vano, heeni nyuwo munkootheraanyu weera kinooveiha keeraka weera kiri Mwaana a Muluku? 37Miyo kaahipaka miteko sa Atithaka, muhikiroromele. 38Kapakatho miteko sa Atithaka, orookhalaru weera khamuntthuna okiroromela, muroromele mwa miteko weera musuwele ni mwiiwexexe weera Atiithi ari mwa Miyo ni Miyotho mwa Yaawo.” 39Awo yaaheerera veeli omvara, mene Owo aahoopowa mmatatanimwaya. 40Vano Yeesu aalapuwatho oYordanu ni aarowa vanipuroni nne Yohaane aapatisaawe mmahukuni oopacera a mutekwaawe. Aakhalawo 41ni atthu ancipale yaarowa weiwo aaraawewo yeeraka: “Ori mweeraru Yohaane ahinatoke opaka eneneero yootikhiniheya, sootheene owo aahimaawe mwaha wa Mulopwana Ola saari sa ekhaikhai.” 42Ni weiwo ancipale yaamuroromela Yeesu.
നിലവിൽ തിരഞ്ഞെടുത്തിരിക്കുന്നു:
Yohaane 10: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.
