Yohaane 11
11
Okhwa wa Lazaru
1Vano, mulopwana mmoha iitthaniwa Lazaru aamvoreiwa. Aakhala oBetaniya, muttetthe wa Mariya ni munneiye Marta. 2Mariya mwa yoowo murokoriye Lazaru aavoreiwa, aari Mariya yoowo aattikitthenle Apwiya ni aawuukuntthe inaawosaya ni mayihaawe. 3Vano axirokoriye yaamuruma omweerela Yeesu: “Apwiya, yoole munimusivelaanyu onoovoreiwa.” 4Iiwalaawe yeeyo, Yeesu aaheera: “Eretta eyo kheehiyono eneera emwiive. Ti wa ovuwa wa Muluku weera Mwaana a Muluku avuwihiwe niwoko na yeeyo.” 5Yeesu aamusivela Marta, munneiye ni Lazaru. 6Vekhaikhai, iiwaka weera Lazaru aamvoreiwa, aakhala mahuku meelitho weiwo aaraawewo. 7Vahoolowaya, aaweerela oohuseraawe: “Nrowe nihokoleele oYudeiya.” 8Awo yaamweerela: “Muhusiha, vanaanoweene aYuda yaaheerera woovonyani maluku. Hata hiiho, muntthuna ohokoleelawo?” 9Yeesu aawaakhula: “Nihuku khaninono iwoora muloko ni piili? Yoowo oneetta othana khankwattuliwa, niwoko onimoona ngwaarani mwa elapo ya vathi. 10Eettaka ohiyu, onookwattuliwa niwoko mwa yoowo khoowowo waara.” 11Amalihaka ohima yeeyo, aapwaherera aweerelaka: “Nthamwenaahu Lazaru onookona, kinkelatho weiwo weera kamvenxe.” 12Oohuseraawe yaamwaakhula: “Apwiya owo akona, onoolama.” 13Yeesu uuluma mwaha wa okhwawawe, oohuseraawetho yuupuwela weera Owo aahima paahi sa ikhove. 14Vano Owo aahaaleela nnenesene: “Lazaru ohookhwa, 15ni niwoko na nyuwo koohakalala Miyo nkaakhanlewo weera nyuwo muroromele. Nrowe wa yoowo.” 16Vano, Tomaxi, iitthaniwa Didimu, aaweerela oohusera akina: “Nrowetho weera nakhwe ni Yoowo.”
Yeesu onaapepesa axirokoriiye Lazaru
17Aphiyaka, Yeesu aahoona weera Lazaru aari munihiyeni wookwana mahuku maxexe. 18Orakamelana oBetaniya ni oYerusaleemu waari ikilomeetru* sookwana ixexe 19ni aYuda ancipale yaarowa omuxekura Marta ni Mariya weera yaapepese niwoko na oriheya wa murokoraya. 20Iiwalaawe Marta weera Yeesu onoophiya, aavenya weera amukumanane, mene Mariya aahala owaani. 21Marta aamweerela Yeesu: “Apwiya, mwaari wenno, murokoraka saano ahikhwiiye. 22Koosuwelatho weera, hata vaanaano va, Muluku anoovaheeni sootheene muneeraanyu mumvekele.” 23Yeesu aamweerela: “Murokorinyu onoovenyerera.” 24Marta aamwaakhula: “Koosuwela weera anaavenyerere moovenyererani wa nihuku nookisera.” 25Yeesu aamweerela: “Miyo ti Ovenyerera ni Okumi. Yoole onkiroromela Miyo, hata akhwe, anaakhale ni okumi, 26ni yoowo onkhala ni okumi ni onkiroromela Miyo, kharwa akhwa wa mahuku ootheene. Munroromela yeeyo?” 27Owo aamwaakhula: “Aani Apwiya, miyo koororomela weera Nyuwo Kristu, Mwaana a Muluku eera aweeke elapo ya vathi.” 28Amalihaka ohima yeeyo, aarowa owaani ni amwiitthanaka vakhwipi Mariya, aamweerela: “Muhusiha ori va ni onoowiitthanani.” 29Iiwaka yeeyo, Mariya aavenya woowaakuveya ni aarowa wa Yoowo. 30Yeesu nlelo eera ahinaaye ovolowa mmuttettheni, mene aari vanipuroni aakumannaaweno Marta. 31aYuda yaari ni Mariya mpaani empepesaka, yoonaka weera owo aavenya woowaakuveya ni aakhuma, yaamutthara yuupuwelaka weera owo aakela onihiyeni weera iinlewo. 32Aphiyaka vanipuroni aaraawe Yeesu ni amoonaka Yoowo, Mariya ahuuramela inaawosawe ni aamweerela: “Apwiya, mwaari wenno, murokoraka saano ahikhwiiye.” 33Amoonaka Mariya ni aYuda yaamuhoonle yiinlaka, Yeesu aathananaxa ni aariipiwa murima. 34Owo aamukoha: “Mmwiyaathiye woowi?” Awo yaamwaakhula: “Ngwe ni moone, Apwiya.” 35Yeesu aahiinla. 36Vano aYuda yaaheera: “Moone moota Owo aamusivelaawe.” 37Akinatho a yaawo yaaheera: “Owo aahunle maitho a mutthu oohoona khaawera omooceeliha mulopwana owo okhwa?”
Yeesu onimvenyereriha Lazaru
38Yeesu, athanananxeene veeli, aarowa onihiyeni. Naari nikhuku ni nluku ntokotoko niikaathiwe vamulako. 39Owo aaheera: “Mvenxe nluku.” Marta, murokoriye aakhwiiye aamweerela: “Apwiya owo onimunkhaxa niwoko aakwana mahuku maxexe.” 40Yeesu aamweerela: “Miyo nkooleenleni weera mwaroromela, munimoona ovuwa wa Muluku?” 41Vano yaavenxa nluku. Yeesu aaweha osulu ni aaheera: “Tiithi, Miyo kinootthapelani niwoko mookiiwa. 42Koosuwela weera munkiiwa mahuku ootheene, mene kineera yeeyo mwaha wa muloko wa atthu ori va, weera ororomele weera Nyuwo mukirumihale.” 43Amalihaka ohima yeeyo, Yeesu aakhuwelaxa: “Lazaru, mukhumele vaate!” 44Ookhwa aakhuma ni matata ni inaawo sivitikeleliweene esaanda ni ekhovaawe ekhuneeliweene ekuwo. Yeesu aaweerela: “Mvenxe esaandaawe ni munghiye arowe.”
Yoovaanelela omwiiva Yeesu
45Ancipale a aYuda yaarwiiye omuxekura Mariya, yoonaka yeeyo Yeesu aapankaawe, yaamuroromela. 46Akinatho a yaawo yaarowa wa aFarisi* ni yaahaaleela yeeyo Yeesu aapankaawe. 47Vano ahooleli a asaserdoti* ni aFarisi* yaalattula muthukumano wa eSineedriyu*. Awo yaakohana: “Neereke hai? Iwo ori Mulopwana Owo apakaka ineneero sootikhiniheya. 48Hiyo namuhiya hiiho, ootheene eniimuroromele, vano aRooma eniiwe ni eniinanarihe nipuronahu nitho mulokwaahu.” 49Mmoha a yaawo, iitthaniwa Kayafasi, wa eyaakha yeele aari mutokweenexa a asaserdoti*, aaheera: “Nyuwo khamuniiwexexa etthu! 50Khamwiiwexenxe weera fataari akhwe mutthu mmoha wa muloko wa atthu, ohikhanle oriheya muloko wootheene?” 51Owo khaahima yeeyo iihimaka muneenaawe, mene areene mutokweenexa a asaserdoti* eyaakha yeele, aathalihera otthuna wa Muluku weera Yeesu eera akhwele muloko wa aYuda. 52Ohikhanle paahi wa muloko wa aYuda, menetho wa anamwane a Muluku amwaramwareiye weera aathukumanyihe mmulokoni mmoha. 53Hiiho evenyero vaavaale awo yaavaanela omwiiva. 54Tivawo Yeesu eetteettaawe mwaatthuni eriyari ya aYuda. Ohiyanawaya aahiivenxa arowaka elapo emoha vakhiviru wa nikare, wa muttetthe mmoha wiitthaniwa Efrayimi aakhalaawewo ni oohuseraawe. 55Ekhuveelaka ehuhu ya mPaska* a aYuda, atthu ancipale a elapo yeele yaarowa oYerusaleemu weera ekwanihere ikhovelelo sa orapiha ahinaaye mPaska*. 56Atthu yaapwaherera omwaasaasa Yeesu ni Mpaani mwa Muluku yannakohana: “Munuupuwela hai? Weeraka Owo anaawe ofestani?” 57Vano, ahooleli a asaserdoti* ni aFarisi* yaavaha malamulo weera mukina asuwela nipuro oraawe Yeesu, aaleele weera emvare.
നിലവിൽ തിരഞ്ഞെടുത്തിരിക്കുന്നു:
Yohaane 11: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.
