Yohaane 12
12
Yeesu onttikittheliwa oBetaniya
1Mahuku mathannamosa ahinaaye mPaska* Yeesu aaphiya oBetaniya aakhalaawe Lazaru, mwa yoowo aamvenyereringhaawe mookhwaani. 2Weiwo yaamurehererela yooca Yeesu. Marta arumeelaka, Lazaru areene mmoha a yaale yaakilaathiye vameesa ni Yoowo. 3Vano Mariya aakuxa mukoomba woosareya makhura ooreera a enardu* yaari makhura oorikaxa. Aattikitthela inaawo sa Yeesu ni aamuukuttha ni mayihaawe. Ni empa yaasareya ni wunkhela wa makhura ale. 4Mmohatho a oohuseraawe, Yudasi Iskariyoti, mwa yoowo eera amvarihe Yeesu, aattaandawula: 5“Heeni makhura ala ahithumihiwaaya ni musurukhu enavahiwa atthu oohaawa? Saangwina idinaariyu 300.” 6Owo khuulumme hiiho aapwatthaka atthu oohaawa, mene niwoko aari namwiiya. Ntoko namalipelela a nihottha na musurukhu, annakhovelela ovenxa yeeyo yaaheliwamo. 7Yeesu aamwaakhula: “Munghiye muthiyana mmuretteleni. Yeeyo opankaawe eri ya nihuku na ovithiwawaka. 8Vano, atthu oohaawa eniikhale ni nyuwo mahuku ootheene, mene Miyo nkinrowa okhala ni nyuwo mahuku ootheene.” 9Yeereiyaka hiihaale, atthu ancipale a aYuda, yoonelelaka weera Yeesu aari vaavaale, yaahoowa khoohiyono paahi omoona Yeesu, menetho Lazaru, yoowo Yeesu aamvenyereringhaawe mookhwaani. 10Hiiho ahooleli a asaserdoti* yaavaanela weera emwiivetho Lazaru, 11woonaka weera niwoko na yoowo ancipale yaahaahiya aYuda emuroromelaka Yeesu.
Ovolowa oYerusaleemu
12Oxaawaya, atthu ancipale yaarwiiye ofestani yaahiiwa yeeriwaka weera Yeesu eera aphiyaka oYerusaleemu. 13Yaakuxa iphandi sa nivare ni yaavenya weera yamukumanane ekhuwelaka: “Hosana*! Ooreelihiwa ti Yoowo ongwa mwa Nsina na Apwiya! Ooreelihiwa ti Mwene a aYixrayeli!” 14Yeesu aamphwanya buuru mwaaxaana ni aangwela ntoko elempwaaya: 15Ohoove mwaana muthiyana a Siyoni. Woone, Mwenaawo aneera awaaka angwenleene buuru mwaaxaana. 16Ompacereroni oohuseraawe khayiiwexexa yeeyo. Paahi vahoolo wa ovuwihiwa wa Yeesu, awo yaahiiwexexa weera yeeyo yaalempwe yaari mwaha wa Yoowo ni weera itthu iye saamukhumelenle Yoowo. 17Atthu ancipale yaari ni Yoowo aamulamulenlaawe Lazaru okhuma munihiyeni ni aamvenyererihale mookhwaani, yaapwaherera omwaramwaxa etthu yeereiye. 18Atthu ancipale yaavenya erowaka omukumanano, niwoko yaahiiwa yeeriwaka weera Owo aapaka eneneero ele yootikhiniheya. 19Hiiho aFarisi* yaaheerelana: “Ngwehe, khaniwenre etthu. Moone moota elapo yootheene enimuttharaaya Yoowo!”
Yeesu onuuluma sa okhwawawe
20Wa yaawo yaarongwe ofestani weera yamulape Muluku, yaakhala aGrego akina. 21Awo yaamwaattamela Filipe aari oBetisayida wa oGalileiya ni nivekelo nimoha: “Apwiya, nintthuna omoona Yeesu.” 22Filipe aarowa omuleela Andreiya, ni ooweeli vamoha yaamuleela Yeesu. 23Yeesu aawaakhula: “Yoophiya ehuhu ya ovuwihiwa wa Mwaana a mutthu. 24Miyo kinooleelani ekhaikhai weera enuku emoha ya etrigu yaahimorela vatthayani ni yaahikhwa, eniikhale emoha paahi. Yakhwatho, eniyiime soowiima sincipale. 25Yoowo onsivela okumaawe anaayeleele, mene yoowo onthanya okumaawe mweelaponimu, anaasungere okumi woohimala. 26Yoowo onkirumeela, ontthuneya okitthara, ni kiraakawo, murumeiyaaka anaakhalewotho. Atithaka eniimuttittimihe yoowo onkirumeela. 27Vano munepaaka woothananaxa ni nkeere eheeni? Tiithi, mukivuluxe mwa ehuhu yeela! Hoye, kirweenle vekhaikhai wa yeeyo; wa ehuhu yeela. 28Tiithi, mvuwihe Nsinananyu!” Vano naahoowa nsu na wiirimu: “Miyo koovuwiha ni nkivuwihetho.” 29Atthu ancipale yaari vaavaale ni yiiwale yaaheera weera waakukutteiya. Akina yaaheera weera ndyelo aamuulumela. 30Yeesu aaweerela: “Nsu nno nohoowa niwoko na nyuwo, ohikhanle wa Miyo. 31Yoophiya ehuhu ya nthorihelo na elapo ya vathi ela. Vano mutokweene a elapo ya vathi anoomoliwe. 32Miyo, kaattukhuliwaka vatthayani, nkaapurulele ootheene wa Miyo.” 33Owo aahima yeeyo weera awoonihere moota wa okhwa eeraawe ahaawe. 34Atthu ancipale yaamweerela: “Nohiiwa munlamuloni weera Kristu anaakhale mahuku ootheene. Mungwera hai weera: ‘Ontthuneya ottukhuliwa Mwaana a mutthu?’ Taani Yoowo Mwaana a mutthu?” 35Vano Yeesu aaweerela: “Wa ehuhu vakhaani nlelo, waara onuukhale variyariwanyu. Mweette nlelo mureeneno waara weera epiphi ehoovareni niwoko yoole oneetta mpiphini khasuwenle onkelaawewo. 36Muroromele mwa waara nlelo mureeneno weera muthatuwe anamwane a waara.” Amalihaka wuuluma, Yeesu aavenya ni aawiipitha yaawo.
Ohiroromela wa aYuda
37Aari mweeraru apankeene Yeesu ineneero sootikhiniheya sootheene iye vamaithonimwaya, awo khayaamuroromenle. 38Eyo yeereiye weera ekwaniheriwe masu a mprofeeti, Yesaya yeenre: Apwiya, taani ororomenle mutthengaahu ni wataani ooniheriwe moono wa Apwiya? 39Tivawo awo yahaaweraaya ororomela niwoko, ntoko Yesaya eenraawe nipuro nikina: 40Aatatuxa oohoona maithwaaya ni ahuumiha mirimasaya weera ehoone ni maithwaaya, hata ehiiwexexe ni murima, hata ehirukunxe mirimasaya, ni Miyo kihaalamihe. 41Yesaya aahima yeeyo niwoko aahoona ovuwa wa Yeesu ni aahuuluma sa Yoowo. 42Hata hiiho, asitokweene ancipale yaamuroromela Yoowo. Khayaalapatho nroromelonaya niwoko na aFarisi*, yoovaka woomoliwa muSinagogani*. 43Vano yaasivela ovuwa wa atthu, ohikhanle ovuwa wa Muluku. 44Yeesu aaheera akhuwelaka ni nsu ntokotoko: “Yoowo onkiroromela Miyo, khankiroromela Miyo paahi, menetho Yaale akiruminghe. 45Yoowo onkoona, ongwoona Yaale akiruminghe. 46Miyo kaarweenle mweelaponimu ntoko Waara weera atthu ootheene ankiroromela Miyo, ehipwaherere okhala mpiphini. 47Akhala mukina oniiwa maswaaka ni ahineettela, Miyo nkinimuthoriha. Vano, nkirweenle othoriha elapo ya vathi, mene weera kivuluxe. 48Ookhala mphuki wa yoowo onkhootta ni ohinaakhulela maswaaka. Masu maneenexa kinghimaaka, eniimuthorihe nihuku noomalihera. 49Vano nkiixuulumenle muneenaaka, mene Atiithi akiruminghe yaakilamulela yoohima ni yoowuuluma. 50Koosuwela weera nlamulonaya ti okumi woohimala. Tivawo, yeeyo kinghimaaka ti nnenesene yeeyo Atiithi akirummaaya ohima.”
നിലവിൽ തിരഞ്ഞെടുത്തിരിക്കുന്നു:
Yohaane 12: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.
