Yohaane 8
8
1Wa soothesene, Yeesu aarowa omwaako wa Sooliveira. 2Oxaawaya, Owo aavolowatho Empa ya Muluku, mwa weiwo muloko wa atthu wootheene waathukumannaaya omurukureenreene. Vano Owo aakilaathi weera axuttihe. 3Anamawera a nlamulo* ni aFarisi* yaamuruuhela muthiyana mmoha yaamvanraaya araruwaka. Yaamulamulela weemela ohoolo wa atthu ootheene, 4enamweerela Yeesu: “Muhusiha, muthiyana ola oovariwa araruwaka. 5Munlamuloni, Moisesi onnilamulela waavonya maluku asithiyana ntoko yoola. Vanonto, Apwiya – munghima eheeni?” 6Awo yaakoha hiiho ntoko ntapha weera ephwanye nthowa na omoothera. Yeesutho aahuurama ni aapacera olepa vatthayani ni ekatha. 7Woonaka weera awo yannatepa omukohakoha, Yeesu aaheemela, anaweerela: “Akhala mmoha a nyuwo ohikhanleno yoottheka, akhale oopacera omvonya nluku.” 8Aahuuramatho ni aapwaherera alepaka vatthayani. 9Yaawo yaamwiiwale yaapacera orowa, mmoha-mmoha, okhuma asitokweene. Yeesu aahanle paahi ni muthiyana eemenleene vahoolowawe. 10Yeesu aaheemela, anamukoha: “Muthiyana, ale ari woowi? Khaawo oothorihaleni?” 11Owo aaheera: “Khaawo, Apwiya.” Yeesu aahima: “Miyotho nkinoothorihani. Vano, murowe ni muhiye okumaanyu wa wootthekeya.”
Muluku onimukhalelatho onamoona Yeesu
12Uulumakatho ni muloko wa atthu, Yeesu aaheera: “Miyo ti Waara wa elapo ya vathi. Yoowo onkitthara Miyo, kharwa eetta mpiphini, mene onookhalano waara wa okumi.” 13aFarisi* yaamweerela: “Nyuwo muniikhalela onamoona muneenaanyuru. Onamoonaanyu khoohiyono woowaakhuleleya.” 14Yeesu aawaakhula: “Kiri mweeraru Miyo kiikhalelaka onamoona muneenaakaru, onamoonaaka ori wa ekhaikhai niwoko koosuwela kinkhumaaka ni kinkelaaka. Vaheera nyuwo khamusuwenle kinkhumaaka, hata kinkelaaka. 15Nyuwo munthoriha ni mukhalelo wa omutthu. Miyo khaawo kinimuthorihaaka. 16Hata Miyo kathoriha, olakelawaka ori wa ekhaikhai niwoko nkikhanle meekhaaka. Miyo kiri ni Atiithi akiruminghe. 17Munlamulonimwanyu olempwe weera onamoona wa asilopwana eeli ti woowaakhuleleya. 18Miyo kiniikhalela onamoona mwaha wawaka; onamoona mukina ori Atiithi akiruminghe.” 19Vano yaamukoha: “Atithinyu ari woowi?”Yeesu aawaakhula: “Nyuwo khamukisuwenle Miyo, hata Atithakatho. Nyuwo mwaakisuwenle, mwaamwaasuwelatho Atithaka.” 20Owo aahima masu awo axuttihaka Mpaani mwa Muluku, vakhiviru wa nipuro weiwo atthu yaahelaaya soovahasaya. Wa soothesene, khaawo yaamutthunke niwoko ehuhuwaawe yeera ehinaaye ophiya. 21Yeesu aaweerelatho: “Miyo kinoottimula ni nyuwo mmwikaasaase ni mmwikhwe mootthekanimwanyu. Weiwo kinrowaakawo, khamungwera orowa.” 22Niwoko na yeeyo aYuda yaakohana: “Weeraka Owo aneere wiixiiva? Niwoko eenre: ‘Kinrowaakawo, khamungwera orowa’?” 23Vano Owo aapwaherera wuuluma: “Nyuwo muri a vathi; Miyo kiri a wiirimu. Nyuwo muri a elapo ya vathi; Miyo nkihiyono a elapo ya vathi. 24Miyo kohooleelani weera mmwikhwe mootthekanimwanyu. Nyuwo mwaahiroromela weera Miyo kiri, vekhaikhai mmwikhwe mootthekanimwanyu.” 25Awo yaamukoha: “Nyuwo taani?” Yeesu aawaakhula: “Miyo ti Yoowo kooleelaakani ehuhu yootheene! 26Kookhalano masu mancipale weera kihime wa nthorihelonanyu, mene Yaawo akiruminghe amphwanela ororomeliwa, ni Miyo kinghima wa elapo ya vathi paahi yeeyo kiiwalaaka wa Yaawo.” 27Awo khayiiwexenxe weera aaleela mwaha wa Atiithi. 28Vano Yeesu aaweerela: “Nyuwo mwaamuttukhulaka Mwaana a mutthu, mmwisuwele weera Miyo kiri, ni kheewo kimpakaaka ya muneenaakaru. Vekhaikhai, kinuuluma yeeyo paahi Atiithi akixuttinghaaya. 29Yaale akiruminghe ari ni Miyo. Awo khaakihiyale meekhaaka niwoko mahuku ootheene kimpaka yeeyo enaasiveliha.” 30Ahimaka itthu iye, atthu ancipale yaamuroromela Yoowo.
Anamwane a Abrahaamu ni anamwane a Diyabu*
31Yeesu aaweerela aYuda yaamuroromenle: “Nyuwo mwapwaherera ni nthiti mwa nsunaka, vekhaikhai munookhala oohuseraaka. 32Vano mmwisuwele ekhaikhai ni ekhaikhai eniyootapuxeni.” 33Awo yaamwaakhula: “Hiyo nri ekhapira ya Abrahaamu ni khanitonke okhala ipottha sa mukina. Heeni Nyuwo muneeraanyu weera nnikhale maneethi?” 34Yeesu aawaakhula: “Miyo kinooleelani ekhaikhai: khula mutthu onkhala atthekaka ti epottha ya yoottheka. 35Epottha kheenkhala mahuku ootheene ni emusaaya, mwaanatho ori a emusaawe mahuku ootheene. 36Tivawo, Mwaana oovuluxani, nyuwo vekhaikhai mmwikhale maneethi. 37Miyo koosuwela weera muri ekhapira ya Abrahaamu. Wa soothesene, munaasaasa okiiva niwoko khamuntthuna waakhela nsunaka. 38Miyo kinooleelani yeeyo koonnaaka kaakhalaaka ni Atthiiti ni nyuwo mumpaka yeeyo mwiiwalaanyu wa atithinyu.” 39Awo yaamwaakhula: “Abrahaamu ti atithihu.” Yeesu aaweerela: “Nyuwo mwaari anamwane a Abrahaamu, mwaamupaka miteko Abrahaamu aapakaawe. 40Munaasaasatho okiiva, hata kireene Yoowo ooleenleni ekhaikhai kiiwalaaka wa Muluku. Abrahaamu khaapaka hiiho. 41Nyuwo mumpaka miteko sa atithinyu.” Vano awo yaamweerela: “Hiyo khaniyariwe mooraruwani. Atithihu amoharu ti Muluku.” 42Yeesu aaweerela: “Muluku aari atithinyu, nyuwo mwaamukisivela niwoko Miyo kaawiiye wa Muluku, ni vaanaano kiri va. Miyo nkiwiiye wa muneenaakaru, mene wa Awo akiruminghe. 43Heeni muhiniiwexexaanyu nuulumonaka? Niwoko khamungwera wiiwa yeeyo kinghimaaka. 44Nyuwo ti anamwane a Diyabu* ni muntthuna opaka ohaawelawawe. Owo aari namwiiva okhuma ompacereroni, ahittharaka ekhaikhai niwoko kheewowo ekhaikhai mwa yoowo. Owo oothaka, onuuluma nuulumonawe muneenaawe niwoko ti namootha ni ori atiithi a wootha. 45Wa soothesene, nyuwo khamunkiroromela niwoko kinooleelani ekhaikhai. 46Mukina a nyuwo onoowera okoothera wa yoottheka emoha? Miyo kuulumaka ekhaikhai, heeni muhinkiroromelaanyu? 47Yoole ori a Muluku oniiwa yeeyo Muluku onghimaawe. Nyuwo khamummwiiwa niwoko khamuhiyono a Muluku.”
Soohima sa Yeesu mwaha wa muneenaawe
48aYuda yaamwaakhula: “Hiyo naahuuluma nnene neeraka weera Nyuwo ti muSamariya ni murino munepa woonarara.” 49Yeesu aaweerela: “Nkinono munepa woonanara. Ohiyanawaya, kinaattittimiha Atithaka ni nyuwo khamunkittittimiha. 50Miyo nkinaasa ovuwawaka. Ti Atiithi anaasa ovuwawaka ni Awo anthoriha. 51Miyo kinoororomelihani weera akhala mukina oniiwelela maswaaka, kharwa akhwa mahuku ootheene.” 52Vahoolo wa yeeyo, aYuda yaamweerela: “Noosuwela vaanaano va weera murino munepa woonanara! Abrahaamu ahookhwa nitho maprofeeti. Vano Nyuwo muneera weera mukina iiwelela maswaanyu, kharwa akhwa mahuku ootheene! 53Nyuwo mohaapwaha atithihu Abrahaamu? Awo ahookhwa nitho maprofeeti. Nyuwo munuupuwela weera taani?” 54Yeesu aawaakhula: “Kiivuwiha Miyo muneenaaka, ovuwawaka ori wa siiyo. Atithaka, mwa Yaawo nyuwo mungweerelaanyu ari Mulukwaanyu, ti Yaale ankivuwiha. 55Nyuwo khamwaasuwenle, mene Miyo kohaasuwela. Miyo keenre weera nkaasuwenle, saano kikhanleene namootha ntoko nyuwo, vekhaikhaitho Miyo kohaasuwela ni kiniiwelela maswaaya. 56Abrahaamu, atithinyu, yaahakalala niwoko yeera yoone nihukunaka. Awo yaahoona ni yaahakalalaxa.” 57aYuda yaamweerela: “Nyuwo nlelo khamunono iyaakha miloko mithanu ni moomoona Abrahaamu?” 58Yeesu aawaakhula: “Miyo kinooleelani: Abrahaamu ahinaaye oyariwa, Miyo kaakhala!” 59Vano yaasaasa maluku weera emvonye, mene Yeesu aahiipitha ni aakhuma Mpaani mwa Muluku.
നിലവിൽ തിരഞ്ഞെടുത്തിരിക്കുന്നു:
Yohaane 8: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.
