Lúʼkáasʉ 17
17
Cǐ yi mboʼ pye Yěso ghwo
(Mat 18.6-7; Mks 9.42)
1Yěso lâʼ lə́ ngaŋə-jyêʼ-no yé ngô: «Ə̂ no lə́nə́ʉ ńgó mboʼ zə̂u yi ŋuu fû mə̂u faa no pûŋ yé po. Lə́ ndʉʉ-tə́poŋ ŋuu yi a ghʉ cǒ fâa no. 2Mbî ghíʼ mboʼ pə́ kâp tə́koʼ ləghǒ lóŋ ngaŋ, ə́ mǎʼ yé cər mə̂i-nci, ə́ nděi ghíʼ mboʼ a ghʉ̂ cǒ tâʼ lə́ pôu ghəpə́ pwo lêi lə́ zʉ́ mboŋə́ fǎa no. 3Pei laghʼə́ tû zéi shʉʼʉ! Ə fə̌r ghô lə̌i ńgʉ́ no tə́poŋ lə́ gho, o tsuŋu sâʼ yé. A pə́i wʉ no yé mbi gho, o lyəghʼə məfaa yé. 4A lə̌i fâa no mbi ghô mpfu saambwô lə̂ leʼé mbî, ə́ mbǒu nkə́ ńtó mpfu saambwô ə́ mbə́i wʉ no yé mbi gho, o lyə́ghʼə məfaa yé.»
Mbə̂u yi mboʼ ŋuu yi a pə̌i no Yěso lâghʼ ńcóghʼ ntə̂ʉ yé lə̂ Sê
(Mat 17.20)
5Ngaŋə-ntə̂u Nde lâʼ lə́ zʉ́ ngô: «Kʉʼʉ́ pə̂i-ntə̂ʉ zághʼ!» 6Nde pwôr ngô: «Mboʼ pə̂i-ntə̂ʉ zéi tə́i mbə́ wó tə nyéʼ ngúʼ ghíʼ mbyəghʼ tə́shú, mə́i pei lə̌i ndâʼ lə́ tʉ̌ yo ngô: “Tsóʼó ngwó ńjə́ghʼ mbəʉ zô cər mə̂i-nci”, mə́i ə́ wo zúʼ ntsʉ wéi.» 7-8Wǒ ŋuu lə́ pei lə̌i ngwô ngaŋə-faʼ ye yi a faʼ nkâʼ zʉ́ kəʉ mə́ mbâp pə̂ mənye mé, ngaŋə-faʼ ye wêi kə̂ nkə́u lə̂ nkwó tyer, mə́i a wo myághʼə́ lǎʼ lə́ zʉ́ ńgó a lêi-lěi nyáŋə́ sê ńzʉ́ zə̂u mo? A lə̌i nkwó mə́i lə́u a wo lǎʼ lə́ zʉ́ pə́ ńgó a kə́pə́ məndǐ mé, ə́ fátə́ ntsúŋú məzʉ̂ ńŋə́ a zʉ̂ mbóu nó zə̂u, záʼa-ndě a poŋə́ zʉ́ ə́ kə́ nô yé zə̂u lə́wó po? 9Káa a ghwo ye lə̂ ŋə́ nkhwo lə́ ngaŋə-faʼ ye wei ńté ghíʼ a ghʉ̌ faʼ yi a ghwǒ lə̂ ngʉ́. Kəʉ kâa pə́ yə́rə́ ló? 10Ə́ wo lə́ pei ə́ nkə́ mbə́ pə́ yə́rə́. Pei lə̌i ndáʼ fâʼ faʼ yi pə́ ŋə́ lə́ pei tə myâghʼ, pei lâʼ ngô: «paghʼ pə̌ zághʼ pə́ pəghaŋə-faʼ ŋuu, paghʼ faʼ pə̂ faʼ yi paghʼ yǎa ngwǒ lə̂ fâʼ.»
Yěso ghʉ pəghaŋə tsóʼ-páp ləghə̂m shwítə
11Yěso lə pə́ ndə́r lə̂ Yelúsalêm, ə́ mə́ ŋə̂i lə̂ ndaghʼə Samalə̂i gháp Galilêi, 12ə́ ŋə̌i tə mə́ nzéʼ ńkə̂u cər có lâʼ, pəcó pəghaŋə tsóʼ-páp ləghə̂m tô lə̂ mbə̂utə́ yé. Ə́ ngapə́ ntə́ʉ pə́ ndǐ təsə, ə́ ndǎʼ lə̂ təʉ ngô: 13«Yěso, ə́ Nde, tsáa məjʉ̂ŋ mághʼ! 14Yěso jwô gháp, ə́ ndǎʼ lə́ páp ngô: Pei wó nyarə́ mbəʉ zéi lə́ pənuŋú-poʼ Sê. Gháp pə̂ ndə́r ə́ nkə́u laŋə́-ndə̂u nshwítə́. 15Cǒ tâʼ lə́ páp jwô ghíʼ a shwitə́ mə́, ə́ mbə̌ʉ nzəm, ə́ ŋə́i ńgûʼtə Sê lə̂ təʉ. 16Ə́ ntó ńshíʼ ńkʉ́ʼtə́ mbi Yěso, ə́ ntsʉ́ŋə́ sʉ̂ yé sê ńŋə́ nkhwo lə́ zʉ́. Ŋuu wêi lə pə́ ŋuu Samalə̂i. 17Yěso cʉ̂ʼ ndâʼ ngô: Káa gháp pêi ləghə̂m shwítə́ mo? Pi ləpfuʼú ghǒ? 18Kâa cǒ ŋuu lə́ páp kwâŋ yé lə̂ mbə̂ʉ ńtó ńŋə́ nkhwo lə́ Sê tə ndyéʼ ngəʉ wo!» 19Yěso pôu ndâʼ lə́ zʉ́ ngô: «Lěsê ńdə̌r ghó; pə̂i-ntə̂ʉ zô ghʉ o cwôr.»
Ləfou Sê wə́ təcər pei
20Pəfalísia túŋu Yěso ńgó Ləfou Sê táa tó shʉ́ŋə́? A pwôr lə́ páp ngô: «Ləfou Sê táa tó lə̂ mbə̂u yi mboʼ ŋuu jwô yé ghíʼ ə́ pə́ ntó po. 21Mboʼ pə́ tâa ndâʼ yé ńgó ə́ yo yaʼa káa ńgó ə́ yi yiʼi po. Lə́ pei jí ńgó Ləfou Sê pə́ mə́ təcər pei.»
Leʼé yi Môu Ŋuu wo ghʉ̌ pə̌ʉ nzəm
22Yěso pôu ndâʼ lə́ ngaŋə-jyêʼ-no yé ngô: «Cǒ mpfu táa kǔʼ, pei tsáa lə̂ njwó Môu Ŋuu pə́ ndaʼ tâʼ leʼé, lə́ jwô wéi yé po. 23Pə́ táa lǎʼ wéi ngô: “Â wo yaʼa gháʼa!” káa ngô: “Â yi yiʼi ghíʼi!” Lə́ koo pei wô wéi yʉʼ, koo pei zûŋtə. 24Môu Ŋuu ghʉ̌ yǎa pə̌ʉ nzəm pə́ ghíʼ nyǐ-mbʉŋ ŋwâŋ lə́faŋ, ə́ nkêʼ yʉʼ tsəm tâʼ mpfu lə. 25Lə́, ə́ pə́ ntúŋu ńgó a yáa tsə̌mbi njwó ngwôʼ gháʼate, ləwěi pye yi mpfu wo póu ndə̌ʼ no yé. 26Ə zə̂u yi ə́ lə lěi mpfu yi Nówa, ə́ táa kə́ cí lěi lə̂ məleʼé mi Môu Ŋuu. 27Pye lə pə́ mpfu wêi, ə́ mə́ nzʉ́ mbóu mə́ nó, mbiŋə pə̂ nzóʼ, pəngyě pə̂ ngwó nzóʼ tə kə́u leʼé yi Nówa lə kə́u cər láanji; mbʉŋ lô, nci kôʼ, ə́ mbə́ghʼ pfuʼ pye pə́tsəm. 28Ə́ táa pə́ ghíʼ mpfu yi Lôt. Ə́ lə pə́ mpfu wêi, pye pə̂ nzʉ́, ə́ mə́ nó, ə́ mə́ ntâŋ mətǎa, ə́ mə́ mbî zə̂u, ə́ mbou mə́ nkə̂r məndə̂; 29lə́ leʼé yi Lôt lə fú Sodôm nkwár ńdə̌r, Sê lə ghʉ mǒghʼ məkaa fû tʉ́ shíʼ ghíʼ mbʉŋ, ə́ mbə́ghʼ pfuʼ pye pə́tsəm. 30Leʼé yi Môu Ŋuu táa nyarə́ mbəʉ ye, ə́ ghʉ̌ kə́ pə́ pə́ yə́rə́. 31Ə́ lə̌i ntáa mbə́ leʼé wêi, koo ŋuu yi a pə̌ tʉ̌-ndə̂ lâʼ ńgó a wo shíʼ sê pyé məzə̂u mé. Koo ŋuu yi a pə̌ nkâʼ lâʼ ńgó a wo pə̌ʉ lə̂ nzeʼ. 32Pei kʉ́ʉtə́ zə̂u yi ə́ kə ghʉ̌ ngwě Lôt. 33Ŋuu yi a táa lǒu lə̂ mbáa ləcǐ-mbî ye, a táa cwí wěi; lə́ ŋuu yi a táa cwí ləcǐ-mbî ye, a táa ghwǒ wěi. 34Məŋ ndaʼ wéi ə́ táa pə́ lətwûʼ leʼé wêi, pye pə́pwô nûŋ ndəu tâʼ kə̌u; pə lâghʼ tâʼ ńdə́r, ə́ nyêr cǒ. 35Pəngyě pə́pwô táa pə́ nǎa ghoʼ zə̂u, ə́ pə lâghʼ tâʼ ńdə́r, ə́ nyêr cǒ. 36Mbiŋə pwô táa pə́ cər tâʼ nkâʼ, ə́ pə lâghʼ tâʼ ńdə́r, ə́ nyêr cǒ.» 37Ngaŋə-jyêʼ-no túŋu yé ngô: «Ə́ Nde! Tə zêi yo no táa lěi ghó yʉʼ?» A pwôr ngô: «Yʉʼ yi pfû zə̂u táa nǔŋ wó, pəghə̌u táa kəitə́ yʉʼ wó.»
നിലവിൽ തിരഞ്ഞെടുത്തിരിക്കുന്നു:
Lúʼkáasʉ 17: NLA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
