Lúʼkáasʉ 16
16
Saghʼ-ləghaa lə́ no ngaŋə-faʼ yi a lə táa zúŋ
1Yěso pôu ndâʼ lə́ ngaŋə-jyêʼ-no yé ngô: «Tâʼ ngaŋə-zə̂u lə ghwo ŋuu yi a nâŋtə zə̂u pé. Pə́ nyâŋ tə ntó ńdâʼ yé ńgó ŋuu wêi pə̌ tə̂m séi lə́ zə̂u pé pêi. 2A fûŋ yé, ə́ ntúŋú yé ngô: N nzǔʼ pə́ laʼ ńgó o pə̌ ngʉ gháʼá lə́ məzə̂u mâa ló? Tʉ́ŋtə́ məzə̂u mâa mə́tsəm, ə́ nyárə́ ghâa, ə́ ndər ghô, ńté ńgó o kə́ pǒu faʼ ghô mbó məŋ po. 3Ngaŋə-faʼ wêi zûʼ, ə kwaŋtə tô tû zʉ́ ngô: Tə́-faʼ ghâa wo zǔŋ ghâa faʼ n ngʉ́ gháʼá? Káa n ngwô ghâa mətəʉ lə̂ ndághʼ ńkhwóʼ sô, n ndə̌i mbə́i ngaŋə-ndôu, mə́i sə̂ʉ wo kó ghâa. 4M mə̌ njî zə̂u yi n ngwo ghʉ̌ tə ghwǒ pye pi mboʼ gháp tâa mpfú ghâa məndə̂ páp mpfu yi pə́ zǔŋ ghâa faʼ. 5A cʉ̂ʼ fúŋ pye pə́tsəm pi gháp pə tə́-faʼ ye ghwǒ nzǒ pə̂ moʼ moʼ, ə́ ntúŋú nduŋ-mbi ŋuu ngô: O ghwo lə̂ ŋə́ hó lə́ tə́-faʼ ghâa? 6A lâʼ ńgó: N ngwo lə̂ ŋə́ məwə̂r pəkáasʉ nkʉ lə́ zʉ́. Ngaŋə-faʼ lâʼ ngô: Ŋwaʼa nzǒ gho wo, fátə́ nyáŋə́ sê ə́ ŋwáʼá ńgó ə̂ pəkáasʉ mə̂m-taa. 7Ə́ mbóu ndâʼ lə̂ cǒ ŋuu ngô: Gho zô, o pə̌ ngwo tə́-faʼ ghâa hó? Wêi ŋuu pwôr ngô: Ə́ ngəsâŋ-ncʉ̂ŋ məpaa nkʉ. Ngaŋə-faʼ lâʼ lə́ zʉ́ ngô: Ŋwaʼa nzǒ gho wo, cʉ́ʼ ŋwaʼá pə́ ńgó ə̂ məpaa mə̂m-fǎa. 8Tə́-faʼ fə́tə ngaŋə-faʼ məfutə́ wêi lə̂ mbə̂u yi a lǎghʼ ńtáa zúŋ pə́ ghíʼ ŋuu yi a jǐ no. Ńté ńgó pətəpə̌i no Sê jî ntʉ́ŋtə́ məno təcər páp, ə́ nděi pye pi gháp jí Sê.»
Kâa pôŋ yé ńgó nkâp lə̂ pə̂ sâʼ pye pi gháp pə́ nzəm Sê
9«Məŋ tsuŋu ndâʼ wéi, pei lághʼ məfuʼ məfutə́ mi cər nzʉ̂ yo ńnúŋú sə̌u zéi ńjí ńgó mpfu yi měi tǎa me, pəsə̌u péi pêi pfú wéi cər ləcǐ-mbî tə me. 10Ŋuu yi a Pə̌ ndʉŋ-ndʉŋ lə́ pəmə́ceʼé məzə̂u kə̌ mbə́ ndʉŋ-ndʉŋ lə́ mi jwǐ pə́ yə́rə́; ŋuu yi a pǒu mbə́ ngaŋə-məfutə́ lə́ pəmə́ceʼé məzə̂u kə̌ mbou mbə́ ngaŋə-məfutə́ lə́ mi jwǐ pə́ yə́rə́. 11Pei lə̌i nkə lə́iʼ pə́ ndʉŋ-ndʉŋ lə̂ mbə̂u yi pei kə lǎghʼ ńgwô məfuʼ məfutə́ mi cər nzʉ̂ yo po, mə́i mboʼ wǒ pôu ncóghʼ mi lətəi-ndwuŋ mbó pei ńgó pei pə́ náŋtə́? 12Pei lə̌i nkə lə́iʼ pǒu ghwǒ wéi zə̂u yi kâa pə̂ ye zéi shʉʼʉ po, mə́i wǒ pǒu ŋə́ yi pə́ nâŋtə wéi lə́ pei? 13Mboʼ cǒ ngaŋə-faʼ fâʼ yé mbó pətə́-faʼ pə́pwô po. Mə́i a wo paa cǒ, ə́ koŋ cǒ, ə́ ndə́iʼ pó mə́i a wo ŋə́ məkuʼ cǒ, pǒu wâghʼ cǒ. Mboʼ o pə̂ fâʼ gho mbó Sê mbou kə́ mə́ fâʼ mbó nkâp po.»
Pəfalísia koŋ nkâp ə́ nděi no Sê
14Pəfalísia pi gháp lə pə́ yʉʼ wó zûʼ yə́rə́, ə́ nǎa sôu, ə́ njwǐ Yěso ńté ńgó gháp lə koŋ no nkâp gháʼate. 15Yěso lâʼ lə́ páp ngô: «Pei jôghʼ fûtə pye-mə́soŋ ńgó pei pəghaŋə no lə́nə́ʉ, lə́ Sê pôu mə́ njí ghíʼ məntə̂ʉ méi pə̂. Ńté ńgó zə̂u yi pye-mə́soŋ fə́tə, Sê nyə́ghʼə zěi nyəghʼə́.»
Ləfou Sê lei ləpə̌ʉ yi mpfu tsəmbi
(Mat 11.12-13)
16Yěso kə̂ ncí ndâʼ ngô: «Jâŋ kə ghi tó, pə́ pə̂ nzûʼ pə̂ ləpə̌ʉ Mə̌usə̂i gháp pə məno mi ə́ wə́ cər pəŋwaʼa pətsətə́-nkəʉ Sê. Tə fú mpfu wêi, pə́ cʉ̂ʼ ndâghʼ pə̂ Nkəʉ Shʉʼʉ ńtsə̂tə no Ləfou Sê. Wǒwó pə̂ sâʼ təʉ lə̂ nkə̂u yé cər wó. 17Mboʼ ləfaŋ gháp ndesé fátə mé, lə́ ə́ ngwǒ lə̂ ləpə̌ʉ Sê, mə́i mboʼ mələtyaghʼ nyúʼu yé mə́u po.»
18«Ŋuu lə̌i nzúŋ ngwě ye, ə́ nzóʼ məngyě yi ndeʼe, mə́i a ghʉ gháʼá məghap. Ŋuu póu nzóʼ məngyě yi ndə̂u ye zǔŋ yé, mə́i a kə̌ ngʉ gháʼá pə́ məghap.»
Saghʼ-ləghaa lə́ no ngaŋə-zə̂u gháp Lazâa
19«Cǒ ngaŋə-zə̂u lǎʼ mbə́ wó, ə́ nkə́ nyáŋ mâʼ yé pə̂ məndǐ mi ə́ cóghʼ gháʼate, ə́ mbə̂ leʼé tsəm, ə́ nkə́ ntwôr yé tworə́ mbou nzʉ̂ yé pə̂ nzʉ̂ shʉʼʉ. 20Cǒ mbûŋ yi pə́ fûŋ yé ńgó Lazâa nûŋ ntsʉ ləzeʼé ndə̂ zʉ́, məfʉ̌ŋ pə̂ lə́ zʉ́ tə myâghʼ mbəʉ yé tsəm. 21Lazâa lə́ pə́ ntsâa ńgó mboʼ ngaŋə-zə̂u wei pə̂ nzʉ̂ məzʉ̂, a pə̌ ndâghʼtə mənyuʼ měi mi ə́ cwərə́ sê ḿpfár. Ngwʉ̂ lə pou mə́ ńtó ndâŋ məfʉ̌ŋ mé. 22Mbûŋ wə̂ ghʉ̂ nkwʉ́, pəcwôʼ Sê khwor yé ńdaghʼ ndə̂r lə̂ mbəʉ Ábələhâm. Ngaŋə-zə̂u ghʉ̂ nkwʉ́ yé lə́wó, pə́ ntʉ̂ŋ yé. 23A kə̂u lâʼ pəpfû, ə́ mə́ njwô ngwôʼ tə́sə́ʉ, ə́ ntə́ʉ ndǐ təsə, ə́ mbəʼə́ nyôghʼ mé ńjwó Ábələhâm, Lazâa pə̂ mbəʉ zʉ́. 24Ə́ pə̂ yə́rə́, ngaŋə-zə̂u wei laghʼ ləghe ńdâʼ ngô: Tǎa Ábələhâm, tsáa məjʉ̂ŋ mâa, ə́ ntə́u Lazâa ńgó a tsə̂p shípo ye nci ńtó ńtsə̂ʼ lə̂ʉ məŋ, ńté ńgó m mbə́ yaʼa cər mǒghʼ mə́ njwô ngwôʼ gháʼate. 25Lə́ Ábələhâm lâ lə́ zʉ́ ngô: Môu ghâa, kʉ́ʉtə́ ńgó o lə pə́ cər ləcǐ-mbî gho ndəu ndesé, ə́ ngí pə́ zûʼ shʉʼʉ, ə́ mbə̂ ghó ngaŋə-zə̂u. Lazâa pə̂ njwô ngwôʼ mpfu wêi, a pou ḿbə́ yaʼa gháʼa mpfu wo, ə́ ngí pə́ zûʼ shʉʼʉ o pə̂ njwô ngwôʼ. 26Ə́ yaa ngí pə̂, tə́koʼ tâa tə́ ləlyəghʼtə́ pə̂ təcər paghʼə, tə ə́ pə́ yi ńgó ŋuu lə̌i mə́ nkôŋ fú yaʼa ngwó mbəʉ pei yʉʼ wó, a kûʼ yé mə́u po, ŋuu pou mə́ nkôŋ lə̂ fú yʉʼ yi o pə̌ wó ńtó yaʼa, a kûʼ yé mə́u po. 27Ngaŋə-zə̂u lâʼ ngô: Tǎa, n sʉ́ʉtə́ ghô, tə́u Lazâa nzéʼ tə́ ghâa; 28ńté ńgó pəfə̌r pâa pə́ wó pə́taa. Ńjí ńgó a wo shuŋtə́ mətuŋú máp, ə́ ŋə́ gháp ntǎghʼ, ə̂ lêitə́ yə́rə́, lə́u gháp tô gháp záp lə́wó ńkə́u cər lâʼ ngwôʼ yo po. 29Ábələhâm pwôr ngô: Mə̌usə̂i gháp pə pətsətə́-nkəʉ Sê pə́ wó lə̂ shúŋtə́ mətuŋú pəfə̌r pô pei; ghâp zúʼ ntsʉ gháp! 30Ngaŋə-zə̂u wei lâʼ ngô: Ə ngə́ tǎa Ábələhâm ə́ kə́ kûʼ yé, ŋuu lə̌i fú lâʼ pəpfû, ə́ mbə̌ʉ ngwó ńdǎʼ gháp no, mə́i gháp wo zúʼ ə́ kə́p cǐ záp. 31Lə́ Ábələhâm lâʼ lə́ zʉ́ ngô: Gháp lə̌i ndə̂ʼ gháp lə̂ nzúʼ ntsʉ Mə̌usə̂i gháp pə yi pətsətə́-nkəʉ Sê, mə́i ŋuu lə̌i mbə́i nděsê pə́ təcər pəpfû ńtó ńdâʼ gháp no, mə́i gháp wo zûʼ gháp po.»
നിലവിൽ തിരഞ്ഞെടുത്തിരിക്കുന്നു:
Lúʼkáasʉ 16: NLA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
