Lúʼkáasʉ 18
18
Saghʼ-ləghaa lə́ no mpfǒghʼ məngyě gháp feʼ-məno yi tə́poŋ
1Yěso laghʼ saghʼ-ləghaa ńdâʼ lə́ ngaŋə-jyêʼ-no yé ńgó gháp kə́ sʉ̂ʉtə Sê pə̂ mpfu tsəm tə́ kâa. 2Ə́ ndǎʼ lə́ páp ngô: «Cǒ feʼ-məno lə pə́ cər có túsoŋ, káa pə́ pôghʼ yé Sê, ə́ mbou káa pə́ laghʼ yé ŋuu-məsoŋ fûŋ có zə̂u. 3Cǒ mpfǒghʼ məngyě kə̂ mbə́ yé túsoŋ wêi, ə́ nyáŋ ntô mpfu tsəm ndâʼ lə́ zʉ́ ngô: Fěʼ no yi ə́ pə́ təcər paghʼ ngaŋə-mbəu ghâa. 4Mpfǒghʼ məngyě wêi lə kə́ nyáŋ ntô tǒ, lə́ káa feʼ-məno wêi láʼ nâŋtə yé no yé zêi, tə ngʉ́ mbə̂ có leʼé, ə́ ndǎʼ cər ntə̂ʉ zʉ́ ngô: Məŋ mbə̌ tə káa pə́ póghʼ ghâa Sê, káa pou pə́ laghʼ ghâa ŋuu-məsoŋ fûŋ có zə̂u, 5lə́, ghíʼ mpfǒghʼ məngyě wo kə̌ ńtó mbə̂u ghâa pə̂ mpfu tsəm lo, ə́ pə́ ntúŋu ńgó n ntsuŋú no yé zêi, ə́ mbóghʼ lə́ pə́ yi mboʼ a kə̂ nyáŋ ńtó mbə̂u ghâa pə̌u.» 6Nde pôu nkʉ́ʼʉ́ ndǎʼ ngô: «Pei zúʼ no yi feʼ-məno yi tə́poŋ wêi laʼá! 7Tə mboʼ pye pi Sê lə tsóʼ gháp ndághʼ ńgʉ́ pye pé pə́ ntsə́rə́ ńfûŋ yé ntə̌ʉ-nəu gháp lətwûʼ, a tî tə́ pfútə́ gháp? Ə́ nyaa mbə́i ncúŋú lə̂ mpfútə́ gháp? 8Məŋ ndaʼ wéi. A wo fátə́ pfútə́ gháp. Lə́, tə Môu Ŋuu táa ghǐ tó, ə́ jwó pye-mə́soŋ ndəu ndesé pi gháp ghwǒ pə̂i-ntə̂ʉ?»
Ŋuu falísia gháp mpfu ntsəp
9Yěso kə̂ ncí ndâghʼ cǒ saghʼ-ləghaa ńdâʼ lə́ pye pi gháp pə́ nkwaŋ ńgó gháp wə́ lə́nə́ʉ, ə́ mbou mə́ nyə́ghʼə pəcó pye ngô: 10«Pye pə́pwô láʼ ngwǒ ndə̂ Sê lə̂ sʉ́ʉtə́ Sê, tâʼ pə̂ ŋuu falísia, cǒ pə̂ mpfu ntsəp. 11Ŋuu falísia tə̂ʉ tə̌ʉ, ə́ mə́ sʉ̂ʉtə Sê cər ntə̂ʉ zʉ́ ńdâʼ ngô: M mə̌ ngûʼtə ghô Sê ńté ghíʼ káa m mbə̂ ghâa ghíʼ pfuʼ pye-mə́soŋ pi gháp ghou məzə̂u pye mpfú, ə́ mbə́ pəghaŋə məfutə́, ə́ mbə́ pəghʉ̌-məghap; m mə̌ ŋə̂ nkhwo lə́ gho ghíʼ kâa m mbə̂ ghâa ghíʼ mpfu ntsəp wo. 12M mə̌ nyáŋ nkôŋ ghâa koŋə́ nyâŋ nji ə́ sʉ́ʉtə́ ghô mpfu pwô lə̂ ngap lâʼ, ə́ mbǒu ngâptə zə̂u pâa tsəm yʉʼ ləghə̂m, ə́ ŋə̂ tâʼ yʉʼ lə́ gho. 13Mpfu ntsəp wêi tə̂ʉ yé pə́ ndǐ təsə, káa pə̌i fəiʼ yé fəiʼí lə̂ mbəʼə́ tû yé, lə́ nzápə́ pô yé nzoʼ zʉ́, ə́ mə́ ndâʼ ngô: Tǎa Sê, tsáa məjʉ̂ŋ mâa, m mbə̂ ghâa pə́ tâʼ ngaŋə-məfaa. 14Məŋ ndaʼ wéi, mpfu ntsəp wêi lə ghí pə̌ʉ lə̂ nzeʼ zʉ́, Sê pəi no yé lə́ kâa pə̂i yé yi ŋuu falísia. Ńté ńgó ŋuu lə̌i ŋáʼtə́ mbəʉ yé, mə́i pə́ wo shúʼú yé ńŋə́ sê. Ə́ mbóu shúʼú mbəʉ yé ńŋə́ sê, mə́i pə́ wo ŋáʼá yé ńŋə́ tʉ́.»
Yěso pə̌ mpfû ghəpə́
(Mat 19.13-15; Mks 10.13-16)
15Pəcó pye lə pə́ ndâghʼ pəmə́ceʼé ghəpə́ ńtó ńcə̂r Yěso ńgó a zápə́ mbô lə́ páp. Lə́ ngaŋə-jyêʼ-no yé jwô yə́rə́ ə́ mə́ ntôʼ gháp. 16Yěso ghʉ pə́ laghʼ gháp ńcʉ́ŋə́ mbáatə́ yé. A lâʼ ngô: «Pei nyér pəmə́ceʼé ghəpə́ gháp tó ńcə́r ghâa, koo pei kə̂ʼtə gháp, ńté ńgó Ləfou Sê gháʼá mbə́ pə́ yi pye pi gháp pə́ ghíʼ páp. 17Məŋ ndaʼ wéi kwaʼ lə́nə́ʉ, ŋuu lə̌i ndə́iʼ mpfú Ləfou Sê ghíʼ mə́ceʼé môu po, a lâʼ nkə̂u yé cər wó po.»
Cǒ ngaŋə-zə̂u môu-ngwəsəu túŋu Yěso no
(Mat 19.16-30; Mks 10.17-31)
18Cǒ nkə̌m pəyúda tô ńtúŋú Yěso ngô: «Cícye yi shʉʼʉ. M mboʼ ngʉ̂ zâa gháʼá tə ndáʼ ngwô ləcwôr tə me?» 19Yěso lâʼ lə́ zʉ́ ngô: «Ńté hó o fûŋ ghâa ńgó ŋuu shʉʼʉ? Ŋuu shʉʼʉ kâa pə̂ yé wó tə ndyéʼ ndaʼ Sê. 20O pə̌ njî ləpə̌ʉ Sê tə myâghʼ: Koo ghʉ̂ məghap; koo jwî ŋuu, koo jû, koo o laghʼ məlaa ńnó ngwu ŋuu, ŋə́ məkuʼ tə́ gho gháp mə́ gho.» 21Nkə̌m wêi pwôr ngô: «Tə fú ghíʼ m mbə̌ môu ngwəsəu, n ndə̌i nkə́ ŋə̂i pə́ ghíʼ ləpə̌ʉ zêi tsəm pə́ ntúŋú.» 22Yěso zûʼ, ə́ ndâʼ lə́ zʉ́ ngô: «Ə́ pyér mə́ mbûŋ ghó tâʼ zə̂u: Fə̌i məzə̂u mô mə́tsəm, ə́ ngǎp nkâp zěi lə́ pəpûŋ, ə́ ntsə́ʉ nzəm məŋ, fuʼ zô ghʉ́ nzáa tʉ̌-lə́pû.» 23A zûʼ yə́rə́, ə́ fú nshʉ́ŋə́ sʉ̂ yé gháʼate ńté mbə̂u yi məfuʼ mé lə lǎghʼ nzáa. 24Yěso jwô mbə̂u yi a lǎghʼ ńshʉ́ŋə́ sʉ̂ yé, ə́ ndǎʼ ngô: «Ə́ yaa mbə̌i ntə̂i mbó ngaŋə-zə̂u lə̂ nkə́u cər Ləfou Sê! 25Ə́ təi mbó ngaŋə-zə̂u lə̂ nkə́u cər Ləfou Sê tə ndêi ghíʼ mboʼ shwô sô lə̂ ngwʉ̂ lyaghʼə.» 26Pye pi gháp lə pə́ nzʉ́ʼtə no yi a laʼ zěi túŋu yé ngô: «Tə lə̌i mbə́ gháʼá, mə́i wǒ ŋuu wo láʼ cwór?» 27Yěso pwôr ngô: «No yi ə́ tsə pye-mə́soŋ kâa pə́ tsə̂ yé Sê.» 28Pyêh lâʼ ngô: «Paghʼ lə nyér məzə̂u mághʼ mə́tsəm, ə́ ńtsə́ʉ nzəm gho.» 29Yěso lâʼ lə́ páp ngô: «Məŋ ndaʼ wéi, ə̂ no lə́nə́ʉ ńgó ŋuu lə̌i mêʼ ndə̂ ye, ə́ mêʼ ngwě ye, ə́ mêʼ pəfə̌r pé, ə́ mêʼ tə́ ye gháp mə́ ye, kəʉ mêʼ ghəpə́ yé nté Ləfou Sê, 30mə́i a pǒu pyér pə̂ pə́ cər wo ngoŋ, ə́ ghwǒ məzə̂u ə̂ záa ə́ ndéi mi a kə měʼ lêi, ə́ táa pǒu pə́ cər ngoŋ shwî, ə́ ghwǒ ləcwôr tə me.»
Yěso pə̌ mbwʉ̂ ləwʉ̂ yé
(Mat 20.17-19; Mks 10.32-34)
31Yěso gháp pə ngaŋə-jyêʼ-no yé ntsap pwô lə̂ ləghə̂m kwarə mbəʉ záp, a lâʼ lə́ páp ngô: «Pei jí ńgó paghʼə lər lə̂ Yelúsalêm gháʼá, ə́ kə́u wó, zə̂u tsəm yi pətsətə́-nkəʉ Sê lə ŋwaʼá ńté Môu Ŋuu, ə̂ pə̂utə́. 32Pə́ lə ŋwáʼa ńgó pə́ táa féi yé ńŋə́ mbó pətəpə̌i no Sê, ghâp zôutə́ yé, ə́ njwǐ yé, ə́ tyə̌ghʼ mətê lə́ zʉ́. 33Gháp táa lǎghʼ ngwaa sə́u yé, ə́ pǒu jwí yé. Ə́ póu mbə́ mbâatə leʼé tárə́, â zʉ́ʉ lə̂ ləwʉ̂.» 34Ləcʉŋ no zêi lə lwo tə káa ngaŋə-jyêʼ-no yé zêi zûʼ gháp no yi a laghʼ ńdâʼ; káa pə̌i kə́ jí gháp no yi ə́ laghʼ ńdâʼ.
Yěso ghʉ tâʼ fwoghʼ-mə́nyôghʼ jwô yʉʼ
(Mat 20.29-34; Mks 10.46-52)
35Yěso lər tə mə́ nkə̂u Yeríko, cǒ fwoghʼ-mə́nyôghʼ nyâŋ nkaŋ laŋə́ ə́ mə́ ndóu. 36Lâʼ pə̂ ncûu ńděi, a zûʼ ńtúŋú ngô: «Ə̂ hó zə̂u áa?» 37Pə́ laʼ yé ńgó ə̂ Yěso ŋuu Nǎzalêi a lei. 38A cʉ̂ʼ nkə́ ndâʼ lə̂ təʉ ngô: «Yěso môu fou Ndavîd, tsáa məjʉ̂ŋ mâa!» 39Pye pi gháp lə pə́ mbi pə̂ sâʼ yé ńgó â nâʼ. Lə́ a ghâʼ lə̂ ndâʼ lə̂ təʉ ngô: «Môu fou Ndavîd tsáa məjʉ̂ŋ mâa!» 40Yěso tə̂ʉ, ə́ ndâʼ ńgó pə lâghʼ yé ńtó. Pə laghʼ yé ńtó tə nkə́u mbəʉ zʉ́, a túŋu yé ngô: 41«O koŋ ńgó n ngʉ̂ gháʼá lə́ gho?» A pwôr ngô: «Ə́ Nde, ghʉ n nkə́ ncí njwó yʉʼ.» 42Yěso lâʼ lə́ zʉ́ ngô: «Jwó yʉʼ! Pə̂i-ntə̂ʉ zô ghʉ o shwîtə.» 43Fwoghʼ-mə́nyôghʼ wêi kə̂ ncí njî lə̂ njwó yʉʼ pə̂ mpfu wêi mpfu wêi, ə́ ncʉ́ʼ ntsə́ʉ nzəm Yěso, ə́ mə́ ŋə́i ńgúʼtə́ Sê. Lâʼ tsəm jwô yə́rə́, ə́ ncʉ́ʼ nkə́ njî záp pə́ lə̂ mə́ ngûʼtə Sê.
നിലവിൽ തിരഞ്ഞെടുത്തിരിക്കുന്നു:
Lúʼkáasʉ 18: NLA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
