Jâŋ 17
17
Yěso sʉ̂ʉtə Sê tû ngaŋə-jyêʼ-no yé
1Yěso lə tsár yə́rə́ tə nâʼ, ə́ mbəʼə́ tû yé náŋ tʉ́ ndǎʼ ngô: «Tǎa, ə mpfu kuʼ mə́, ghʉ̌ pye-mə́soŋ jwó ləghûʼ Môu gho, ńjí ńgó Môu gho ghʉ pye-mə́soŋ jwô ləghûʼ gho. 2O lə ŋə̂ mətəʉ lə́ zʉ́ lə̂ ndághʼ náŋ pye-mə́soŋ pə́tsəm, ńjí ńgó a ŋə̌ ləcwôr tə me lə́ ŋuu ntsəm yi o lə ŋə́ lə́ zʉ́; 3lə́ ləcwôr tə me wêi pə̂ ńgó gháp jí pə́ ndaʼ ghô yi o pə̌ kwaʼ Sê, ə́ mbou njí ŋuu yi o lə tə́u yé, a pə̂ Yěso Kəlísto. 4N ndə ghʉ̂ məfaʼ mi o kə ŋə́ lə́ məŋ tə myâghʼ; ə́ mbou ngʉ́ pə́ jwô ləghûʼ gho ndəu ndesé. 5Ə́ pou ntə́ʉ mpfu wo gháʼa; Tǎa, ghʉ̂ n ngwô ləghûʼ mbəʉ gho, ləghûʼ yi n ndə ghwǒ mbəʉ gho mpfu yi ə́ lə ghí pə́, mə́i ngoŋ kə́ pə́ wó. 6N ndə ghʉ̂ pye pi o kə fú ndəu nzʉ̂, ə́ fǎghʼ gháp ńŋə́ lə́ məŋ jî gho. Gháp kə pə́ pye pô, o ŋə̂ gháp lə́ məŋ, gháp zûʼ tsâr zô, ə́ ngʉ̌ ghíʼ ə́ pə́ ntúŋú. 7Gháp pə̂ mpfu wo, ə́ mə́ njî ńgó zə̂u tsəm yi o kə ŋə́ lə́ məŋ, kə fú pə́ kwaʼ mbó gho; 8ńté no n ndə kə́ ndǎʼ gháp məno mə́tsəm mi o lə tsətə́ lə́ məŋ, gháp kə̂ nzúʼ; ə́ mbou nkə́ mbə́i ńgó n ndə kwar pə́ ndəu gho; ə́ nkə́ ncí mbə́i ńgó gho kə tə́u ghâa.»
9«N sʉ̂ʉtə ghô gháʼa ńté gháp; kâa n sʉ̂ʉtə ghâa ghô ńté pye ndəu nzʉ̂; n sʉ̂ʉtə ghô ńté pye pi o lə ŋə́ lə́ məŋ; gháp kwaʼ pye pô. 10Zə̂u pâa tsəm ə̂ pô, zə̂u pô tsəm pə̂ pâa. Pə́ pou ndêi pə́ lə́ páp ńjwô ləghûʼ ghâa. 11Lə́ ghíʼ mpfu pwô, n nkə́ mbyér mbə̂ ghâa cər nzʉ̂ po, lə́ gháp pə̂ cər wó lə̂; m mə̌ ntô lə̂ ncə̌r gho. Tǎa, gho yi o pə̌ ndêi-lěi, lǎghʼ mətəʉ mô mi o kə ŋə́ lə́ məŋ lə̂, ə́ mbápə́ gháp, ńjí ńgó gháp nâatə́ mbə́ tâʼ, ghíʼ poghʼo kə̌ naatə zóghʼo mbə́ tâʼ lə̂. 12Ə́ kə pə́ mpfu yi paghʼ pə pǎp kə pə́, n ndâghʼ mətəʉ mi o kə ŋə́ lə́ məŋ lə̂ mbápə́ gháp. N nkə tóutə́ gháp tə kâa cǒ gháp kə̂u yé cwí, tə ndyéʼ ŋuu yi a kə ghwǒ lə̂ nkə́u cwí, ńjí ńgó no yi pə́ lə ŋwáʼá cər ŋwaʼa Sê pəutə. 13Lə̂ mpfu wo, m mə̌ tô lə̂ ncə́r gho. N ngí pə́ tsâr gháʼa, ə́ mbyér pə́ cər nzʉ̂, ńjí ńgó gháp ghwo lətsei yi a fǔ mbó məŋ tə lə́u có zə̂u kə̂ mbûŋ yé mə́u po. 14N ndə laʼ gháp tsâr zô, pye ndəu nzʉ̂ paa gháp, ńté ńgó káa gháp pə́ ngʉ̂ gháp ghíʼ pye ndəu nzʉ̂, ghíʼ məŋ yi kâa mə́ ngʉ̂ ghâa ghíʼ pye ndəu nzʉ̂. 15Kâa m mə́ ndâʼ ńgó o fú cər nzʉ̂ nkwárə́ gháp, lə́ n ndaʼ pə́ ńgó koo o pə̂i tə Sə́tə kə̂u gháp. 16Kâa gháp pə́ ngʉ̂ gháp ghíʼ pye ndəu nzʉ̂, ə́ ndʉŋ-ndʉŋ ghíʼ kâa n nkə́ mə́ ngʉ̂ ghâa zâa ghíʼ pye ndəu nzʉ̂. 17Ghʉ gháp lêitə́ lə̂ tsâr zô, ə́ njí no lə́nə́ʉ. Tsâr zô pə́ lə́nə́ʉ. 18Ghíʼ o kə tə́u ghâa cər nzʉ̂ lə̂, n nkə̌ ntə́u gháp záp lə́wó cər nzʉ̂. 19Ə́ ngwǒ lə́ məŋ, mə́i n fǔ ŋə́ mbəʉ zâa ntsəm lə́ gho ńté gháp; ə́ njí ńgó gháp lei lə̂ no lə́nə́ʉ, ə́ ncʉ́ʼ fú mbə́ pye pô.»
20«Kâa n sʉ̂ʉtə ghâa ghô ə́ ntê pə́ ndaʼ gháp, n sʉ̂ʉtə ghô ńté mbaa pye pi gháp wo zúʼ tsâr záp, ə́ pə́i no zâa. 21N sʉ̂ʉtə ghô ńgó o ghʉ gháp pə́tsəm tə́mtə́ ńcʉ́ʼ tâʼ ŋuu, ghíʼ o təmtə́ lə́ məŋ, n ntə̂mtə zâa lə́ gho lə̂; Tǎa, ghʉ gháp tə́mtə́ mbə́ tâʼ, ńjí ńgó pye ndəu nzʉ̂ pə́i ńgó gho kə tə́u ghâa. 22N ndə ŋə́ ləghûʼ yi o kə ŋə́ lə́ məŋ lə́ páp, ńjí ńgó gháp cʉ́ʼ tâʼ ghíʼ poghʼo kə̌ mbə̂ zóghʼo tâʼ ŋuu lə̂. 23M mbə́ lə́ páp, o pə̂ lə́ məŋ; gháp fú mbə́ tâʼ, ńjí ńgó pye-mə́soŋ jí ńgó gho lə̂ kə tə́u ghâa ə́ mbǒu njí ńgó o kǒŋ gháp ghíʼ o nkǒŋ ghâa zâa. 24Tǎa, o kə ŋə́ gháp lə́ məŋ, m mbou mə́ nkôŋ ńgó paghʼ pə pǎp nâa mbə́ yʉʼ yi m mbə̌ wó, ńjí ńgó gháp jwó ləghûʼ ghaa, ə́ ləghûʼ yi o kə ŋə́ lə́ məŋ; o kə koŋ ghâa tə mbyér pə́ tə tsuŋú nzʉ̂. 25Tǎa, ô ngaŋə no lə́nə́ʉ, káa pye nzʉ̂ kə jî gháp gho, lə́ m mə̂ njî gho, pwo pye kə jí ńgó gho lə̂ kə tə́u ghâa. 26N nkə ghʉ gháp jî gho, n ngwo kʉʼʉ́ ghʉ̌ gháp jí gho, ńjí ńgó nkoŋə yi o ghwǒ nzəm məŋ pə̌ təcər páp, n nkə mbə̂ zâa məntə̂ʉ páp.»
നിലവിൽ തിരഞ്ഞെടുത്തിരിക്കുന്നു:
Jâŋ 17: NLA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
