Jâŋ 18
18
Pə́ ghǒu Yěso
(Mat 26.47-56; Mks 14.43-50; Lks 22.47-53)
1Yěso sʉ̂ʉtə Tə́ ye yə́rə́, gháp pə ngaŋə-jyêʼ-no yé shîʼ ńkə́u toʼo, ə́ ntə́u nci Sedərôŋ, ə́ ndə̌r lə̂ cǒ njʉŋə́, ə́ nkə́u cər có nkâʼ yi ə́ lə pə́ yʉʼ wó. 2Ə́ ghi pə́ Yúda yi a lə féi Yěso ŋə́ pə̂ ntsuŋú njî yʉʼ zêi, ńté ńgó Yěso gháp pə ngaŋə-jyêʼ-no yé lə yaa nyáŋ ntó ńkə̂itə yʉʼ wó. 3Yúda nyâŋ tə ngí pə́ tô yé lə̂ yʉʼ wó, ə́ mpfú mbi pəsóghəi pəlóma gháp pə pəpáp ndə̂ Sê pi pətə́-ndə̂ pənuŋú-poʼ Sê gháp pə pəfalísia tə̂u; ə́ ŋə̌i lə̂ mənkeʼ mǒghʼ, lə́ pəlâm, mbaa lə̂ məzə̂u ntso. 4Yěso pə̂ njî zə̂u tsəm yi ə́ wo ncə́r zʉ́, ə́ ntó ḿbə́utə́ gháp, ə́ ntúŋú gháp ngô: «Pei lou wó?» 5Gháp pwor lə́ zʉ́ ngô: «Ə́ Yěso ŋuu Nǎazalêi.» A lâʼ lə́ páp ngô: «Ə̂ mə̂ŋ!» Ə́ ngǐ pə́ laʼ yə́rə́, gháp pə Yúda yi a lə féi yé ŋə́ lei naa ntə́ʉ yʉʼ wó. 6Yěso lêi tə ndáʼ ńgó «Ə̂ məŋ», gháp pəʉ nzəmə-nzəmə mpfúŋtə́ sê. 7A kə̂ ncí ntuŋú gháp pə̂ shwi shwî ngô: «Pei lou wó?» Gháp pwor ngô: «Ə́ Yěso ŋuu Nǎazalêi!» 8A pwôr lə́ páp ngô: «N ndaʼ mə́ wéi ńgó “ə̂ məŋ”, ə́ lə̌i nkə́ mbə́ məŋ yi pei lou, pei nyêr pwo pye gháp lər.»
9Ə́ lə pə́ yə́rə́ ə́ ndághʼ ḿbə̂utə lə̂ tsâr yi Yěso lə lǎʼ mbó Tə́ ye ngô: «Káa cǒ ŋuu lə́ pye pi o lə ŋə́ lə́ məŋ lə̂ kə̂u yé cwí.» 10Ə́ ghí pə́ Síməu Pyêh ghwô nyǐ ntso, ə́ sǒŋ cər ngwâa, ə́ mə́ ndôu lə̂ ndághʼ ńkhwóʼ ngaŋə-faʼ tə́-ndə̂ pənuŋú-poʼ, ə́ kə̂u nzáʼ lətuŋú yé yi təʉ máʼ sê. Ləjôghʼ ngaŋə-faʼ wêi pə̂ Máashúsʉ. 11Lə́ Yěso lâʼ lə́ Síməu Pyêh ngô: «cóghʼ nyǐ zô cər ngwâa. O kwaŋ ńgó n ngwo nó ntə̂uʼ ngwôʼ yi Tə́ ghâa ŋə̌ lə́ məŋ po mo?»
Pə́ laghʼ Yěso ńdə́r lə̂ mbi Ánə
12Tə́-ndə̂ pəsóghəi gháp pə pəsóghəi pé, ə́ nkʉʼʉ́ pəpáp ndə̂ Sê pi pəkə̌m pəyúda yǎa ntə́u ghou Yěso, ə́ nkə́r yé. 13Ə́ nkə́r yé yə́rə́, ə́ ntsə̌mbi ndaghʼ yé ńdə́r lə̂ nzeʼ Ánə. A pə̂ tə́-kʉʼ Kayífa yi a lə pə́ tə́-ndə̂ pənuŋú-poʼ Sê lə́ zêi nguʼ. 14Kayífa wêi lə pə́ ŋuu yi a lə ŋə́ ntǎghʼ lə́ pəkə̌m lâʼ pəyúda ngô: «Ə́ poŋ ńgó mboʼ tâʼ ŋuu kwʉ̂ lə̂ tû lâʼ.»
Pyêh ghó káa a pə́ njî yé Yěso
(Mat 26.69-70; Mks 14.66-68; Lks 22.55-57)
15Síməu Pyêh gháp cǒ ngaŋə-jyêʼ-no Yěso zûŋtə nzəm Yěso. Tə́-ndə̂ pənuŋú-poʼ lə pə́ njî wêi ngaŋə-jyêʼ-no Yěso, pə́ ghi lǎghʼ Yěso só kə́u tətáa tə́-ndə̂ pənuŋú-poʼ, a kə̂ nkə̂u yé lə́wó. 16Pyêh tə̂ʉ péi mbəʉ ntsʉ ntôʼ. Ngaŋə-jyêʼ-no yi tə́-ndə̂ pənuŋú-poʼ lə pə́ njî yé lei pə̂ʉ ńgwó ńdǎʼ no lə́ məngyě yi a lə pâp ntsʉ ntôʼ tə ə́ kuʼ, a ghʉ̂ Pyêh kə̂u cər nkâʼ. 17Pyêh kə̂u cər nkâʼ, məngyě yi a pâp ntsʉ ntôʼ túŋu yé ngô: «Tə koo o pə̂ zô cǒ ngaŋə-jyêʼ-no ŋuu yi pə́ ghǒu yé lə̂?» Pyêh pwôr ngô: «Ə ngə́, kâa m mbə̂ ghâa cǒ.»
18Ə́ lə ghí pə́ fwôghʼ pə̂ nkó, pəghaŋə-faʼ gháp pə pəpáp ndə̂ Sê tsuŋu mǒghʼ tətáa, ə́ ntə́ʉ mə́ ńzâghʼ. Pyêh tô ńtə́ʉ yʉʼ wó, ə́ nkə́ mə́ nzâghʼ yé lə́wó.
Tə́-ndə̂ pənuŋú-poʼ Sê yi njwǐ pə̌ ntúŋu Yěso məno
(Mat 26.59-66; Mks 14.55-64; Lks 22.66-71)
19Tə́-ndə̂ pənuŋú-poʼ Sê yi njwǐ túŋu Yěso no ńté ngaŋə-jyêʼ-no yé mbaa lə̂ zə̂u yi a jyêʼ pye zěi. 20Yěso pwôr lə́ zʉ́ ngô: «N ndə tə̂ʉ mbi lâʼ ə́ ndaʼ no tsəm pə̂ sâa-sǎa, n ndə jyêʼ pye zə̂u məndə̂ cûʼtə pəyúda mbaa məndə̂ Sê ə́ yʉʼ yi pəyúda pə́tsəm kəitə wó, káa láʼ lâʼ ghâa có no lə́só. 21O túŋu pə́ ghâa məno ńté hó? Túŋú pye pi gháp lə zúʼ məno mi n ndə jyêʼ, gháp tsúŋu mə́ njî zə̂u tsəm yi n ndə lǎʼ.» 22Ə́ ndǎʼ yə́rə́, cǒ tâʼ lə́ pəpáp ndə̂ Sê pǐ lə pə́ yʉʼ wó ghi pə́ sə̂u ləfěi tû zʉ́, ə́ mə́ ntúŋu yé ngô: «Yo ghíʼ pə́ pwor no lə́ tə́-ndə̂ pənuŋú-poʼ Sê yi njwǐ?» 23Yěso pwôr lə́ zʉ́ ngô: «Ə́ lə̌i mbə́ yi n ndaʼ tə́poŋ, o lâʼ ghâa yʉʼ yi n ngwʉ̌ wó; ə́ kə́ mbə́ yi n ndaʼ shʉʼʉ, o pôu sə́u ghâa ńté hó?» 24Ə́ ndǎʼ yə́rə́, ə́ mbyér pə́ mənkʉ, Ánə cághʼə yé ŋə́ lə́ Kayífa, a pə̂ nuŋu-poʼ Sê yi njwǐ.
Pyêh kə̌ ncí ndáʼ pə̂ shwi shwî ńgó káa a pə́ njî yé Yěso
(Mat 26.71-75; Mks 14.69-72; Lks 22.58-62)
25Pə́ ghi pə́ laghʼ yé lə̌r, Síməu Pyêh nyâŋ yʉʼ wó mə́ nzâghʼ mǒghʼ. Pə́ túŋu yé ngô: «Gho zô, koo o pə̂ cǒ ngaŋə-jyêʼ-no ŋuu yi pə́ ghǒu yé lə̂?» Pyêh lə̂ʼ, ə́ ndáʼ ngô: «Kâa mbə̂ ghâa cǒ!» 26Cǒ tâʼ ngaŋə-faʼ nuŋú poʼ Sê yi njwǐ yi a lə pə́ fə̌r ŋuu yi Pyêh lə záʼ lətuŋú yé lə̂ lâʼ lə́ zʉ́ ngô: «Káa n nyáa njwó wéi zʉ́ cər nkâʼ?» 27Pyêh kə̂ ncí ndə̂ʼ pə̂ shwi shwî, mənkhwoʼ lêi-lěi ntóŋ.
Yěso pə́ mbi Piláto
(Mat 27.1-2,11-14; Mks 15.1-5; Lks 23.1-5)
28Pəkə̌m lâʼ pəyúda laghʼ Yěso fú nzeʼ Kayífa ńdə́r lə̂ nzeʼ ngə́mnaa pəlóma. Ə́ lə pə̂ gháʼa məmbaʼa-mbaʼ, lə́u gháp kə̂u gháp cər ntôʼ ngə́mnaa po, ə́ mbóghʼ lə̂ nkhwôr lǒʼ, ə́ kə̂ʼtə gháp lə̂ nzʉ́ záp lətsei Pásʉ́ka pəyúda. 29Piláto kwâr nkâʼ, ə́ ntúŋú gháp ngô: «Pei pûtə ŋuu wo ńté hó?» 30Gháp pwor ngô: «Ŋuu wo tə̌i ndə̌iʼ ghʉ̌ no tə́poŋ po, mə́i káa paghʼ lâghʼ wághʼ yé ńtó mbi gho.» 31Piláto lâʼ lə́ páp ngô: «Pei lághʼ yé ńdə́r, ə́ ngwo fêʼ kôr yé ghíʼ ləpə̌ʉ lâʼ zéi pə́ ntúŋú.» Pəkə̌m lâʼ pəyúda pwor lə́ zʉ́ ngô: «Káa pei pəlóma pə́ mbə̂i wéi ńgó paghʼ jwí ŋuu.»
32Ə́ pə̂ yə́rə́ ə́ ndághʼ ḿbəutə lə̂ no yi Yěso lə lǎʼ, ńté mbə̂u ləwʉ̂ yi a ghʉ̌ kwʉ́ zěi. 33Piláto pəʉ ńkə́u cər nkâʼ, ə́ ngʉ̌ pə́ laghʼ Yěso ńtó; a túŋu yé ngô: «Ô fou pəyúda áa?» 34Yěso túŋu yé ngô: «Yo no o túŋu ghâa lo kwar pə́ ntə̂ʉ gho, kəʉ pəcó pye lə́ lǎʼ ghô ńgó mə̂ŋ fou?» 35Piláto pwôr ngô: «O jwǒ m mbə̂ ŋuu pəyúda mô? Ə lâʼ zéi gháp pə pətə́-ndə̂ pənuŋú-poʼ lə́ féi ghô ŋə́ lə́ məŋ. Ə́ ngí féi ghô ńŋə́ lə́ məŋ, mə́i o ghʉ hó?» 36Yěso pwôr ngô: «Ləfou zâa káa fû yé mbó pye nzʉ̂ yo. Ləfou zâa tə́i fú mbó pye nzʉ̂ yo, mə́i pəməncʉŋ-ndə̂ pâa kə lwóʼó ńdaghʼ ńzôŋ tû zâa tə pə́ fêi yé ghâa ńŋə́ lə́ pəkə̌m pəyúda po. Ə ngə́, káa ləfou zâa fû yé ndəu nzʉ̂ yo.» 37Piláto túŋu yé ngô: «Ńjí ńgó ô fou póo?» A pwôr ngô: «Gho lǎʼ yə́rə́: mə̂ŋ wěi. Pə́ lə jí ghâa, n ntô cər nzʉ̂ lə̂ ndáʼ pye zə̂u yi no lə́nə́ʉ pə́ zěi. Ŋuu yi a pə̌ ngaŋə no lə́nə́ʉ pə̌ nzûʼ no n ndaʼ zěi.» 38Piláto túŋu yé ngô: «Ə no lə́nə́ʉ hó zə̂u?»
Pə́ záʼ kôr ńgó pə́ wo jwí Yěso
(Mat 27.15-31; Mks 15.6-20; Lks 23.13-25)
Piláto lâʼ yə́rə́, ə́ nkə́ ncí nkwár péi, ə́ njwó pəkə̌m pəyúda; ə́ ndáʼ lə́ páp ngô: «Kâa n njwô ghâa có no yi a ghʉ̌ tə mboʼ pə́ laʼ ńgó a wʉ no. 39Lə́ ə́ yaa mbə́ lə́ mar wéi ńgó n ngwó lə́ maa lətsei Pásʉ́ka ntsəm, ə́ nkwárə́ tâʼ ngaŋə-tsâŋ ə́ ŋə́ lə́ pei. Pei pə̌ nkoŋ ńgó n ŋə́ fou pəyúda lə́ pei?» 40Gháp pə́tsəm naa máʼ wâr, ə́ mə́ ndâʼ ngô: «Ə ngə́, koo o ŋə̂ pə́ ŋuu, ŋə́ pə́ Barabásʉ lə́ paghʼ!» Barabásʉ wêi lə pə̂ tâʼ ntəʉ ntsǒŋ.
നിലവിൽ തിരഞ്ഞെടുത്തിരിക്കുന്നു:
Jâŋ 18: NLA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
