Jâŋ 16
16
1«N ndaʼ wéi mwo məno, ńjí ńgó pei cʉ̌ʼ nzəm lə́u ncwî wéi pə̂i-ntə̂ʉ zéi nzəm məŋ po. 2Pə́ ghʉ̌ fú cər məndə̂ cûʼtə pəyúda zǔŋ wéi. Ə mpfu pə́ mə́ nkǔʼ ghíʼ pye ghǐ jwítə́ wéi, ə́ kwǎŋ ńgó gháp ghʉ yə́rə́, ə́ ndághʼ ńgûʼtə Sê. 3Gháp ghʉ̌ ghʉ̌ yə́rə́ ńté ńgó káa gháp pə́ njî gháp Tə́ ghaa, káa kə́ pə́ jî gháp ghâa. 4Lə́ n ndaʼ wéi gháʼá ńjí ńgó mpfu zêi lə̌i ngʉ́ nkǔʼ pei kʉ̂ʉtə ńgó n nkə yaa mə́ ndâʼ wéi.»
Faʼ Zəghʼə Ndêi-lěi
«Tə fú ghíʼ pei lə tsə́ʉ nzəm məŋ, káa n ndâʼ ghâa wéi yo no, ńté ńgó n ndə pyér mbə́ pə́ təcər pei. 5M mbou ntə́ʉ mpfu wo lə̂ ndə́r lə̂ mbəʉ ŋuu yi a lə tə́u ghâa cər nzʉ̂. Lə́ kâa cǒ wei túŋu yé ghâa ngô: “O lər lə̂ ghó?” 6Lə́ pei pə̌ shʉ́ŋə sʉ̂ wéi ńté no n ndaʼ wéi ńgó m mə̌ ndə̌r. 7Lə̂ mpfu wo, n ndaʼ wéi gháʼa no lə́nə́ʉ ńgó ə́ pə́ ntúŋu ńgó n ndə̂r, ə́ njí ńgó pei zʉ̂ pəi; ńté no n ndə̌i ndə́iʼ lə̌r po, nzoŋ-tû wei tô yé po. Lə́ n ndə̌i ndə́r, n nkə́u ńtə́u yé ńŋə́ lə́ pei. 8A ghʉ̌ tó, ə́ ghʉ̌ pye ndəu-nzʉ̂ jí ńgó gháp ghʉ pə̂ no tə́poŋ, ə́ mbou lə́u mbyér njî gháp zə̂u yi no tə́poŋ ə̂ zěi po, lə́u mbyér njî gháp zə̂u yi no lə́nə́ʉ ə̂ zěi po, lə́u ə́ mbyér njî gháp zə̂u yi ə fêʼ kôr laghʼ ńdâʼ po. 9No tə́poŋ yi a ghʉ̌ ghʉ̌ gháp jí pə̂ ńgó káa gháp pə̂i gháp no zâa; 10ə no lə́nə́ʉ pə̂ ngô: n ngwo lə̌r lə̂ mbəʉ Tə́ ghaa, ə́ pei kə́ njwô wéi ghâa po; 11ə́ ngwǒ lə̂ no féʼ kôr, mə́i pə́ feʼ mə́ kôr fou yi a sâʼ nzʉ̂ yo.»
12«M mbyěr ngwǒ məno tə nzáa mi ngwo lǎʼ wéi, lə́ mboʼ pei kûʼ wéi lə̂ nzúʼ mpfu wo po. 13Ə Zəghʼə Ndêi-lěi ghʉ̌ tó, ə́ ghʉ̌ pei jí no lə́nə́ʉ tsəm, ńté no zʉ́ lâʼ no lə́nə́ʉ. A ghʉ̌ lâʼ yé məno mi ə́ kwǎr cər ntə̂ʉ zʉ́ po, lə́ a ghʉ̌ leʼtə pə̂ məno mi a zǔʼ, ə́ pǒu leʼtə́ wéi məno mi ə́ pə́ mbi mə́ ntó. 14A ghʉ̌ nyarə́ wéi ghíʼ ləghûʼ ghâa pə̌, ńté ńgó a ghʉ̌ lǎʼ wéi pə̂ məno mi ə́ fú mbó məŋ. 15Ə zə̂u tsəm yi Tə́ ghaa ghwǒ pə́ pə̂ zâa. Ə̂ zə̂u yi ghʉ̌ n ndâʼ ńgó Zəghʼə Ndêi-lěi ghʉ̌ zûʼ tsâr zâa, ə́ tó leʼtə wéi.»
Ə ngwôʼ zei ghʉ̌ shərə́ cʉ́ʼ lətsei
16«Mpfu pwô pei kə́ njwô wéi ghâa po, lə́ ə̂ cî yé po, pei kə́ ncí njwó ghâa.» 17Yěso lâʼ yə́rə́, pəcó ngaŋə-jyêʼ-no yé pə̂ ntúŋu təcər páp ngô: «Ə́ laghʼ ńdâʼ ńgó ho? A laʼ lə́ paghʼə ngô: “Mpfu pwô pei kə́ njwô wéi ghâa po, ə̂ cî yé po, pei kə́ ncí njwó ghâa,” ə́ mbou ndáʼ ngô: “N ndər lə̂ ncə́r Tə́ ghaa.” Ə́ laghʼ ńdâʼ ńgó ho? 18Mpfu pwô yi a laʼ lêi laghʼ ndâʼ ńgó ho? Káa paghʼə pə́ nzûʼ wághʼə no yi a lou ndáʼ zěi.» 19Yěso jî ńgó gháp pə́ ndou ńtúŋú yé no, ə́ ndǎʼ lə́ páp ngô: «N ndaʼ lə́ pei ngô: “Mpfu pwô pei kə́ njwô wéi ghâa po, ə̂ cî yé po, pei kə́ ncí njwó ghâa. Pei pə̌ ndou təcər lə̂ njí zə̂u yi no yi məŋ ndǎʼ lo laghʼ ńdâʼ áa?” 20Məŋ ndâʼ wéi kwaʼ lə́nə́ʉ ńgó pei ghʉ̌ tsə́rə́, ə́ pǒu lǎa ə́ mpfu yi pye ndəu-nzʉ̂ pə́ ntsěi. Pei ghʉ̌ pə́ zʉ́ŋ, lə́ nzʉ́ŋ zei póu shərə́ ńcʉ́ʼ lətsei. 21Məngyě lei tə môu pə̂ ndə̂u yé, a zʉ̂ŋ ńté ńgó mpfu ngwôʼ kûʼ mə́. Ə́ mbou nkə́ ndéi tə njí, káa kə́ kʉ̂ʉtə yé ngwôʼ yi a yǎa mbə́ cər wó lêi. Ə́ ncʉ́ʼ mbə́ pə́ cər lətsei ńté ńgó tâʼ ŋuu-məsoŋ tǒ ndəu ndesé. 22Pei zéi lə́wó pə̂ mpfu wo, ə́ mə́ nzʉ́ŋ; lə́ n ntáa ghǐ pǒu jwó wéi shwi shwî, pêi cʉ́ʼ mbə́ pə́ cər lətsei, cǒ ŋuu póu kûʼ yé lə̂ nkə́ʼtə́ wei lə̂ ntsêi po.»
23«Ə́ ghʉ̌ pə́ leʼé wêi, pei kə́ ntúŋu wéi ghâa có no po. Məŋ ndâʼ wéi kwaʼ lə́nə́ʉ ńgó pei lə̌i ndághʼ ləjôghʼ zâa ńdóu zə̂u mbó Tə́ ghâa, mə́i a wo ŋə́. 24Lə́ tə nkə́u mpfu wo, pei kə́ laghʼ wéi ləjôghʼ zâa ńdóu có zə̂u mbó Sê. Pei lóu, Sê wo ŋə́ lə́ pei, ə̂ lêi yə́rə́ lətsei pə́ məntə̂ʉ pei, ə́ fú mbə́ tə có zə̂u pûŋ yé mə́u po.»
Yěso mâʼ ntso ńzʉ́
25«N ntə̌i ndǎghʼ pə́ pəsaghʼ-ləghaa ńdáʼ wéi məno mêi mə́tsəm, mpfu pə mə́ nkǔʼ yi n nkə́ laghʼ ghâa pəsaghʼ-ləghaa lǎʼ no lə́ pei po, lə́ ə́ cʉ́ʼ laʼ wéi məno mi ə́ náŋtə́ Tə́ ghâa pə̂ sâa-sǎa. 26Ə́ ghʉ̌ pə́ leʼé wêi, pei lághʼ ləjôghʼ zâa ńdóu zə̂u mbó Tə́ ghaa; lə́u n nkə́ ngwô ghâa lə̂ sʉ́ʉtə́ yé ńté wéi po; 27ńté no tû-mbəʉ Tə́ ghaa kǒŋ wéi. A koŋ wéi ńté ńgó pei koŋ ghaa, ə́ mbou mə́ mbə̂i ńgó n ndə fú mbó zʉ́. 28N ndə fú mbó Tə́ ghaa ńtó ndəu nzʉ̂; lə́ mpfu wo, m mə̌ fû ndəu nzʉ̂ mbəʉ lə̂ ngwó ncə́r Tə́ ghaa.» 29Yěso tsâr yə́rə́, ngaŋə-jyêʼ-no yé lâʼ lə́ zʉ́ ngô: «Jwô, o cʉ̌ʼ ndâʼ no mpfu wo pə̂ sâa-sǎa tə́ lǎghʼ saghʼ-ləghaa ńdâʼ. 30Paghʼ pə̌ njî mpfu wo ńgó o pə̌ njî zə̂u tsəm, ə no yi paghʼ kwǎŋ kwaŋə́ lə̂ ntúŋú ghô, o jî. Ə̂ zə̂u yi ə́ ghʉ̌ paghʼ pə̂i ńgó o fû mbó Sê.» 31Yěso pwôr lə́ páp ngô: «Pei pə̂i no zâa mpfu wo mo? 32Ə mpfu pə mə́ nkǔʼ, ə pəi mə́ nkǔʼ kuʼú ghíʼ pə́ wo ghʉ̌ pei sêi, wǒwó pyê yé ndə̂u ə́ nkhʉ yé, ə́ meʼ ghâa yaʼa məŋə məŋ. Lə́ kâa m mbə́ ghâa məŋə məŋ, paghʼ Tə́ ghaa pə̂. 33N nzâʼ nzʉ̂ ndaʼ wéi mwo məno, ə́ njí ńgó pei lâr mbəʉ zéi lə́ məŋ, ə mbwórə pə̂ məntə̂ʉ pei. Pei ghʉ̌ jwó ngwôʼ cər nzʉ̂, lə́ pei sáʼ mətəʉ məŋ nkə mâʼ ngoŋ, ə́ nzʉ́.»
നിലവിൽ തിരഞ്ഞെടുത്തിരിക്കുന്നു:
Jâŋ 16: NLA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
