DUUCA 10

Aaduwaawä sotooto de’wä amoojado’como anonto’jocoomo

1Yää ’jeje Cädhaajotoncomo Jesuuquidiito cöne’toicho dea anejjacoomo tanontaamo daja, aaduwaawä sotooto de’wä amoojadä. Töwö towaajo cönaanontoicho aacäi, tameedä jata töötotoojo waadäi; 2conä’döaacä chäwwäiñe:

—Tadaawaaju jooje naadö’je, töweetadaawa’cajaamo mmaane wanna’da. Yääje yeijäcä adha’deutäcä tadaawaaju Edhaajä wwä, töwö tötaadawaajui dödö jäcä soto anaanontäiyeto. 3Ojoncomo eduuwa; öwö manaanontaato. Änwanno maato’de oweeja mado antawäiñe eijai ñaatoodöje. 4Acanwaichomo mma manaadätäi’che, jödaata ewöötö mmaja, asaajatuichomo mmaja manaadätäi’chede. Ääma taawä soto jadäiñe owoojodööa’comjäcä, numa mma adha’deujä’täi’che chääjadäiñe. 5Yää maa, chaaca odhoomongato’dedö taca owoomomöödawäiñe, edääje caichäcä’de: “Aashicha awei’sheiñe ñaa na, änwanno edä maa tawoncomo;” quee caichäcä’de. 6Yäätä aashichaato töweiye yeiya’jäcä, yää aashicha yeicho’como mecammaato’dedö chäwwä na’de. Aashichaato ’je’da yeiya’jäcä mmaane, äwwäiñe mma aashicha aweicho’como na’de. 7Yää tawä dea eichäcä’de aneiñaja äätädööcomo wa’cä. Adheewashinchäneichomo wwä utuudu woije ääwashinchätääcä’de, chäwwäiñe amuudädö woije mmaja. Tadaawaaju tödöönei ätääjema’da’da töweiye nai. Ä’sa waadäi mma määmannä’täi’che. 8Anejja jataaca äwä’döa’comjäcä, chäwwäiñe aashicha ayöödöa’comjäcä chäwwäiñe ejoodödö woije ääwashinchätääcä’de. 9Cädäija’como adoncatääcä’de yää jataawoncomo. Edääje caichäcä’de chäwwäiñe: “Amoinche’da nä’döi Wanaadi acaajichaanaichomooje yä’dötoojo;” quee caichäcä’de. 10Anejja jataaca äwä’döa’comjäcä, yää jataawoncomo aashicha ayöödötäiñe’da yeiya’comjäcä mmaane, ä’sacanno adheeja’catääcä’de, äätädööcomooje mma. Edääje caichäcä’de: 11“Nossajaato ñaa ’judu jäcä yaajäiyajä jadä’jödöödä ñaa nishe’seca, eta’se’da aweichöcommo ene’ju’tojooje. Yääje yeichaame Wanaadi acaajichaanaichomooje yä’dötoojo töwä’döeemöje dea na;” quee caichäcä’de. 12Yääje wä’döa äwwäiñe, wätämmencajootojo anooto awä yää jataawoncomo nätä’maminchajaato’de Sodhooma ñancomo e’jodhe’cä.

Jesuuquidiito wwä täcannö’jöncomo ijiiyemeecö’jödö

13“Wentumje maato’de änwanno Coodasín ñancomo, Wesaada ñancomo mmaja. Yää täneemö aneenedööcomooje wödöönedö Tiido ña, Sidhón ña mmaja wännö’jo mmaane, jenaadä tötö’tajäätödööcomo sha’duminchadö cöneiya’to; cone’da ä’döjoodö cöneiya’to töcoone’nadiiyöcoomo jäcä. 14Yääje yeijäcä wätämmencajootojo anooto awä änwanno mäntunaanö’ato’de Tiido ñancomo e’jodhe’cä, Sidhón ñancomo e’jodhe’cä mmaja. 15Änwanno Cajeedamu ñancomo, ¿o’jodha’como wa’cä määcanö’ato? Yä’ja’a’como weicho’como ña dajaane mataadojootantäi; quee cönä’döaacä Jesuuquidiito.

16Yaawä töwö cönä’döaacä tönoowanoomadö wwäiñe:

—Ñäädä adha’dedducoomo etaanei, öwö ya’deddu mmaja töneeta. Ñäädä aquiiñeme’nenaamo, öwö quiiñeme’tä mmaja. Ñäädä öwö quiiñeme’nei, yaanontänei’jödö chiiñemeecödö wa’cä mmaja na dea yää; quee cönä’döaacä Jesuuquidiito.

Jesuuquidiito nanonto’jocoomo wennaca’jocoomo

17Ñanno aaduwaawä sotooto de’wä amoojado’como Jesuuquidiito nanonto’jocoomo ta’cwaiñeiñe cönennacaicho yaawä. Tönwanno cönä’döa’to:

—Cajiichaana, odo’shancomo jadä’jödöödä adheetö joi tanontädaawäiñe ñaa woije weneeneto; quee cönä’döa’to Jesuuquidiito wwä.

18Jesuuquidiito cönä’döaacä chäwwäiñe:

—Weneeaqueene Caajuushawa wejuccadö caju ñanno, yäncucuudu nönge. 19Äwwäiñe wu’ne äcääyu etaajatoojo, mönäätä mmaja, tameedä cutu’de’täneichomo jäduudu e’jodheinchatoojo mmaja. Tönwanno mmaane ayöödöjaiñe’da naato. 20Yääje yeichaame odo’sha onontätäiñe yeichö jäcä’daane ta’cwaiñe eijai maato, caju ña adheetöcoomo tömennä yeichö jäcäinchädääne; quee cönä’döaacä Jesuuquidiito.

Jesuuquidiito wa’cwaincha’jödö

21Yaawä Jesuuquidiito cöna’cwainchai Epíiditu Santo woije. Töwö cönä’döaacä:

—Ta’cwaiñe wäänene äjääcä Jaaja, amäädä caju Edhaajä, nono Edhaajä mmaja, edä anaawanaanö’ca’da awei’jödö weijäcä towaanojo’na’como wwä, töseedujä’na’como wwä mmaja. Mudeeshi’chä nönga’como wwä mmaane mawaananö’cane. Chäänönge na, Jaaja, mädääje tödö’se aweiyeetö’da.

22“Jaaja cuntui öwwä cajiichaanaje weichojo. Anejja dhowaanäcä’da na Iiñedö; Yummö mmaane dhowaanäcä. Yuumö owaanäcä’da mmaja, Iiñedö mmaane dhowaanäcä; ñäädä mmaja Yuumö dhowaanäcä, Iiñedö nowaanomaadö; quee cönä’döaacä Jesuuquidiito.

23Töwö tönoowanoomadö wwadäädäiñe cönä’jedennacai yaawä; cönä’döaacä chäwwäiñe:

—Ta’cwaiñe eijai maato änwanno, yää töneene määnetäänedö enennamo. 24Chäänönge yääje wä’döa äwwäiñe, jooje Wanaadi wa’deuwödö ecammannamo, jooje cajiichaanacoomo mmaja, ene’se cönä’ja’to mädä töneene määnetäänedö; aneene’daane cöneiya’to. Eta’se cönä’ja’to dea mädä töneeta määnetäänedö; aneeta’daane cöneiya’to; quee cönä’döaacä Jesuuquidiito.

Samaadiya ñano nödö’jödö jäcä ecammajäätö’jödö

25Yääje mma yaawä judhío owaanomannamo jimmä cönammöi; töwö Jesuuquidiito oneejadööje cönä’döaacä:

—Owaanomaanei, ¿ane’cäämö tödööjai wanä weichö töwaatamemjönö chaana’catoojoje? quee cönä’döaacä.

26Jesuuquidiito cönä’döaacä chäwwä:

—¿Aaquene waanontänä imennaajä nä’döaanä? ¿Aaquene töna’de’tä määnene?

27Ñäädä cöneccujä’acä; cönä’döaacä:

—“Adheedhajä Wanaadi ijummacä adheewanö jadäädä, odo’tadö jadäädä mmaja, äjäädudu jadäädä mmaja, ätö’tajäätödö jädäädä mmaja; aweichacoono ijummacä amäädä äwä’jummadö nönge dea;” quee waanontänä imennaajä wä’dödö na; quee cönä’döaacä ñäädä.

28Jesuuquidiito cönä’döaacä chäwwä:

—Chäänönge meccujäätöi. Yää tödööcä’de tameedä, aweichö meneiye’de yaawä; quee cönä’döaacä Jesuuquidiito.

29Ñäädä, owaanomannamo jimmä, chäänöngatooje töwäätä’tädööje, cönä’döaacä Jesuuquidiito wwä:

—¿Änääcö ñäädä weichacoono?

30Yaawä Jesuuquidiito cöneccujä’acä; cönä’döaacä:

—Dhanwa cöntaacä Jeedicó ña Jeduusadén ñanno. Töötädaawä cönaatajoijoi yaawä tämeena’como wwä. Ñanno cönenwajiiñaicho tameedä chäwwä cönä’ja’dö que, yoomö jadä’jödöödä. Tönwanno cönaiju’jätöicho. Yaawä acoichamjödö’jo cönnämoicho, yäämaatäi. 31Yää ’jeje Wanaadi wwono wa’deuwödö cöne’acä yää ääma tai. Ñäädä yaatacoichaajä ene’jödö weichaame amoinche cömja’dätäi. 32Yää ’jeje Wanaadi weichojo tacaano wetaadawa’cajoodö mmaja yö’täcä cöneeja’dätäi chea, ñanno dewiita täätö jimmä. Töwwä ene’jödö weichaame, töja’dä’e mma cömja’dätäi. 33Yääje mma yaawä Samaadiya ñano cöneejä yää ääma tai. Ñäädä edanta’jäcä wentumje cöneeneaacä. 34Cöneedennai yaawä yö’tä. Shimi che cöneejichö’täi etuunui’chäjäätö’jödö, chääjedöödö eccudu que mmaja. Yää ’jeje camiisha que cönwontäi. Yaawä täcöönö de’wä cönaadäi jataaca, soto wä’döto’como taca. Yäätä cöneedai’chaacä. 35Yää jenamma naadöje, yäätonno töötädaawä, aacä jödaata cuntui soto wä’döto’como edhaajä wwä; cönä’döaacä chäwwä: “Määdhä edai’chäcä’de öwwä. Mädä jödaata äwwä wutuichö e’jodhe’cä acoicha’jäcä äwwä määdhä edai’chädö jäcä, iiñano’jödö wä’döä’jäcä chääwa’cä jeene maneejema’de;” quee cönä’döaacä ñäädä Samaadiya ñano. 36¿Äshono ñanno aaduwaawo’como tämeena’como nimaamincha’jocoomo weichacoonoje nichö’taanä äwwä? quee cönä’döaacä Jesuuquidiito.

37Ñäädä owaanomannamo jimmä cönä’döaacä yaawä:

—Ñäädä ’cännä, wentumje eneenei’jödö; quee.

Yaawä Jesuuquidiito cönä’döaacä chäwwä:

—Mädääje mmaja eichäde amäädä; quee cönä’döaacä.

Maadata, Madía mmaichomo taca Jesuuquidiito wei’jödö

38Yäätonno Jesuuquidiito cönääma’toicho dea yaawä. Cönä’döicho yaawä jataaca. Yäätä wodi cönamonno’joicho tä’saca, Maadataje töwö chäätö. 39Ñäädä acoono cönä’jaacä Madíaje chäätö. Ñäädä Madía cönaatajiimai Jesuuquidiito o’wawä, chäwwä ecammajäätödö etaadö wetä. 40Maadata mmaane cönaatansu’daacä jooje tötaadawaajui tödööemö yeichö jäcä. Jesuuquidiito wwadäädä cöneejä; cönä’döaacä chäwwä:

—Owaanomaanei, ¿cone’da ayöödö’da ca’ nai yaacono wwä jääcäjeene taadawa’cajoodö? Cö’wa’tojoocä chäwwä; quee cönä’döaacä Maadata Jesuuquidiito wwä.

41Jesuuquidiito cöneccujä’acä yaawä; cönä’döaacä:

—Amäädä Maadata, jooje deja ataadawaajui jäcä mätäncano’ta dea. 42Tooni mma na tujunnato jaiñoone. Madía mmaane aashichaato nijumma. Yää que ätänwajiiñajo’da na’de; quee cönä’döaacä Jesuuquidiito.

നിലവിൽ തിരഞ്ഞെടുത്തിരിക്കുന്നു:

DUUCA 10: MCH

ഹൈലൈറ്റ് ചെയ്യുക

പങ്ക് വെക്കു

പകർത്തുക