DUUCA 9

Ecammajä’e tönoowanoomadö anonto’jocoomo Jesuuquidiito wwä

1Yääje mma yaawä Jesuuquidiito cöni’jummaicho tönoowanoomadö, ñanno amoojadooto de’wä aaco’como. Chäwwäiñe cuntui ijääduduucomo, odo’shancomo ija’canö’joto’como, cädäi ejiichö’totoojo mmaja. 2Töwö cönaanontoicho Wanaadi töcaajichaanaije tödöödö jäcä ecammajä’e, cädäija’como adonca mmaja. 3Töwö cönä’döaacä chäwwäiñe:

—Töuwaque’da mmaane ojoncomo. Adhe’sejiichomo manaadätäi’che, acanwaichomo mmaja, ädducoomo mmaja, ajöödataichomo mmaja. Tooni mma owoomöcoomo anaadätääcä’de, aacä’da. 4Yää maa chaaca mä’döaato’dedö taca eichäcä’de aneiñaja äätädööcomo wa’cä. 5Anejja jataawoncomo aashicha ayöödötäiñe’da yeiya’comjäcä, yää jataawonno ojoncomo’de, ä’juduucomo she’secaadöje mma, eta’se’da yeichöcoomo ene’ju’tojooje; quee cönä’döaacä Jesuuquidiito.

6Ñanno cönääma’toicho yaawä. Jata waadäi cöntonto aashichaato wätunnä ecammajä’ancädä, soto ejiichö’tancädäiñe mmaja, tameedä yeichö wa’cä.

Juan Wautiita wääma’jödö

7Yääje mma yaawä cajiichaana Edoodhe cöneetaacä Jesuuquidiito ecaadö. Jooje tötö’tajä’e cönä’jaacä, edääje anejjacoomo wä’dödööcomo weijäcä: “Juan ñäädä, töwäämaajo jonno yaadoncaajä;” quee yä’dödööcomo weijäcä. 8Anejjacoomo ’quene Edíaje töne’tä cönä’ja’to; anejjacoomo mmaane Wanaadi wa’deuwödö ecammanei jenaado’jä waadoncaajäje töne’tä cönä’ja’to. 9Edoodhe cönä’döaacä yaawä:

—Juan wijönco’jone. ¿Änääcö määdhä, yääje yeiya’jäcä, mädä wa’cä tacaade naadö? quee cönä’döaacä.

Ene’se töweiye cönä’jaacä.

Ijaatoodea miide soto ewanshincho’jocoomo

10Ñanno anonta’como wennaca’comjäcä Jesuuquidiito wwä cöneecammajäätöicho tameedä tönnö’jocoomo. Jesuuquidiito töjaadä cönaadoicho yaawä Wesaada ña, soto ’jemjönö aca. 11Soto wwäiñe iiña yeichö eta’jäcä, cönaaje’caicho yaawä. Töwö aneenejä’täiñe’da’da cöneiyacä; Wanaadi töcaajichaanaije weiñä jäcä cöneecammajä’acä chäwwäiñe. Cädäija’como cönaadoncaicho dea.

12Cho’momjai yä’döa’jäcä, ñanno amoojadooto de’wä aaco’como ñoowanoomadö cöneejoto Jesuuquidiito wwadäädä; cönä’döa’to chäwwä;

—Enno’jacooto canno soto, jata cawoodhecääcäiñe naadö aca täiyeto, täwanshiñööcoomo aneejodöiyeto iiña, tönnö’to’como mmaja, jataawä cöweichöcoomojöönö; quee cönä’döa’to ñoowanoomadö.

13Jesuuquidiito cönä’döaacä chäwwäiñe:

—Änwannoone ewanshinchätääcä.

Tönwanno cönä’döa’to:

—Ijaatoodea uu i’yaca’jödö mma cöwwäiñe na, na’cwacaano’cä aacä mma, jataaca cööto’jocoomode äwanshi ejeema, tameedä canno ewanshiñööcomo; quee cönä’döa’to.

14Ñanno töwääwashinchaamo cönä’jaato ijaatoodea miide dhanwaacomo. Jesuuquidiito cönä’döaacä yaawä tönoowanoomadö wwäiñe:

—Soto ajiimajootäcä wannai, aaca sotooto de’wä amoojadäi.

15Ñoowanoomadö cönnöicho yaawä tanonto’jocoomo nönge; soto cönaajimaajoicho yaawä. 16Jesuuquidiito uu cönannäjöi yaawä, yää ijaatoodea i’yaca’jödö, na’cwacaano’cä mmaja, a’nädäncädä. Caju ña ene’mancädä yää äwanshi jäcä cöna’deuwöi. Uu cöni’yajäätöi yaawä. Tönoowanoomadö wwäiñe cuntui yaawä soto wwäiñe ecaamodö wetä. 17Tameedäädä cönääwashinchoicho yaawä, töwensu’tädööcomo wa’cä. Yää ’jeje i’yajä’ajä wäädetö’jödö cönancuicho yaawä, amoojadooto de’wä aacä wöwa.

Peedhodo wwä Äwaanacaaneije Jesuuquidiito weichö ecamma’jödö

18Yääje mma yaawä Jesuuquidiito töudäje Wanaadi wwä ya’deuwödaawä, ñoowanoomadö chääjadä cönä’ja’to. Töwö cöneecamma’joicho:

—¿Änääcöje soto ye’tätä weneeneto? quee cönä’döaacä.

19Tönwanno cöneccujä’a’to:

—Anejjacoomo Juan Wautiitaje adhe’tätä weneeneto; anejjacoomo ’quene, Edíaje. Anejjacoomo mmaane, Wanaadi wa’deuwödö ecammannamo jenaado’jocoomo jimmä waadoncaajäje adhe’tädö weneeneto; quee cönä’döa’to.

20Jesuuquidiito cönä’döaacä chäwwäiñe:

—¿Änwanno ’na, änääcöje ye’tätä määnetääne?

Yaawä Peedhodo cönä’döaacä:

—Äwaanacaanei amäädä, ñäädä Wanaadi nnedö; quee cönä’döaacä.

Jesuuquidiito necamma’jödö töwäämatoojo

21Jesuuquidiito tönoowanoomadö cönwätuujaicho jooje Äwaanacaaneije töweichö aneecammajäätö’da yeichöcoomo wetä. 22Töwö cönä’döaacä chäwwäiñe:

—Soto nnedö töwäntunaanö’emööje na; töwä’quiiñeme’joomöje na dea inchoncomo wwä, Wanaadi wwä töwa’deuwaamo edhaajotoncomo wwäiñe mmaja, judhío owaanomannamo wwä mmaja. Tönwanno nemaato’de. Yaawä aaduwaawä anoototo ai töwö naadonca’de; quee cönä’döaacä.

23Yaawä töwö cöna’döa’dea tameedä chäwwäiñe:

—Ñäädä jaadä töwei’shato tötö’tajäätödö woije mma eijai’cha na. Töwö cone’da tödööjai’cha na anooto waadäi öwö jääcäinchädä töwäntunamjödö, cuduusa jäcä tajoijodö jadä’jödöödä. Umjummadö woije eijai ña. 24Ñäädä töweichö ewontänei, töweichö nennanö’ca’de. Ñäädä öwö jääcäinchädä töweichö u’nei mmaane, töweichö neneea’de. 25¿Aaquene mmaja aashicha eichö deeade’ tameedä edä nono de’wono chaana’ca’jäcä soto wwä töweichö ennanö’cataame? 26Ñäädä öwö Soto nnedö jöichänei, ya’deddu jöichänei mmaja, öwö mmaja wijöicha’dede Cajiichaanaje we’a’jäcä, Jaaja nnataadö jääcä, amoode aashicha’como nnataadö jääcä mmaja. 27Chäänönge yääje wä’döa äwwäiñe, dhantai eetä maatoodö äwäämadööcomo owaajo meneeato’de Wanaadi Cajiichaanaje yäänejoodö; quee cönä’döaacä Jesuuquidiito.

Jesuuquidiito wenwacaama’jödö

28Yääje mma yaawä aaduwaawä amoojato anooto yääje töwa’deuwö’jeje, Jesuuquidiito cöntämä jöö de’cäi, Wanaadi wwä a’deuwe. Chääjadä cönä’ja’to Peedhodo, Jacoowo mmaja, Juan mmaja. 29Wanaadi wwä töwa’deuwödaawä, Jesuuquidiito jedö cönenwacaamai yaawä anejjeja. Yoomö mmaja cönenwacaamai chea tajääde’de, weijotä. 30Yaawä cönäänejoicho aacä dhanwaacomo; Jesuuquidiito jadä cöna’deujä’a’to. Ñanno cönä’ja’to Moisé, Edía mmaja. 31Tönwanno cönäänea’to tawaanato tawoodhecääcäiñe. Jeduusadén ña Jesuuquidiito wäämatoojo jäcä cöna’deuwa’to. 32Peedhodo, ijimmä mmaja, wetuuje töweichaameiñe, öncö’da cönä’ja’to; Jesuuquidiito nnataadö cöneenea’to yaawä, ñanno aaco’como dhanwaacomo chääjadä cönä’ja’todö nnataadö mmaja. 33Yääje mma yaawä Jesuuquidiito jonno ñanno wä’sancwadaawäiñe Peedhodo cönä’döaacä Jesuuquidiito wwä.

—Owaanomaanei, aashicha eetä caato. Ämmaichomo ñaa nanaamo’ñojo aaduwaawä, tooni amäädä ämmai, tooni mmaja Moisé mmai, tooni mmaja Edía mmai; quee.

Towaanäcä’da yeichaame yääje töwö cöna’deuwacä. 34Yääje ya’deutaame dea ca’dutu cöneejä yaawä immai’chäiñe. Tönwanno cönääcatoncaicho ca’dutu do’taca töwäädanta’comjäcä. 35A’deu cönäätaacä yaawä ca’dutu do’taca:

—Määdhä ñäädä önnedö umjummadö; dha’deddu etaatäcä; quee cönäätaacä a’deu.

36Yää a’deu wä’ca’jäcä Jesuuquidiito töjääcäjeene cöneedantoicho. Yää ncäcäädä tönwanno äucwätä’da cönä’ja’to; anejjacoomo wwäiñe aneecammajäätö’da cöneiya’to töneene’jocoomo.

Mude’cä’cä odo’sha’ jano adonca’jödö

37Yää jenamma naadöje jöö de’wonno töwä’tä’jejeiñe, jooje soto cöneejoto Jesuuquidiito wwadäädä. 38Ñanno soto do’tacannoiñe tooni dhanwa Jesuuquidiito cöna’dejjaacä; cönä’döaacä:

—Owaanomaanei, önnedö eneejo’se wa äwwä, dhanwa’cä. Ñäädä mma määdhä önnedö. 39Edääje weneene töwö; odo’sha chääjäcä weneene; jadheedä töcä’tönge töwö yaawä. Yaawä odo’sha töneenönnäi’chä weneene, tönta’deweecajoone. Mädääje tömmamincha weneene, etööma’se’da. 40Onoowanoomadö wwäiñe wijaacanö’jojannö’je, a’que noneejaicho; quee cönä’döaacä ñäädä dhanwa.

41Jesuuquidiito cöneccujä’acä; cönä’döaacä:

—Mädä wa’cä aneecamjö’da maato. ¿Ä’waasa’cäne mma numa ajaadäiñe wei’she maato? Numa dajaane wä’döi äshinchädööcomooje. Sadäädä ene’cä mä’dä ännedö; quee cönä’döaacä Jesuuquidiito.

42Jesuuquidiito wwadäädä yeejödaawä ñäädä mude’cä’cä, odo’sha nono jo cöneemajjoi; tumjunne’da cöneenönnäi’chäi. Yaawä Jesuuquidiito odo’sha cöneuwöi; mude’cä’cä cönaadoncai; yuumö wwä cuntui yaawä. 43Tameedä cönääcatoncaicho yaawä, o’jodhe Wanaadi weichö ene’jödö weijäcä töwwäiñe.

Töwäämatoojo jäcä Jesuuquidiito necammajäätö’jödö mmaja

Töwwä tödööjätöödö eneedö’jo tameedä soto wääcatoncadööcomo weijäcä, Jesuuquidiito cönä’döaacä tönoowanoomadö wwäiñe:

44—Tätaane etaatäcä edä ya’deuwaadö; ätö’taque’täi’che. Soto nnedö nä’tuja’de soto wwäiñe; quee cönä’döaacä.

45Ñoowanoomadö dhowaanäcäiñe’da cönäätaacä yääje ya’deuwödö, etaatojo ’je’da yeijäcäiñe. Tösaade cönä’ja’to, Jesuuquidiito ecamma’jo’se’da yääje yä’dö’jödö jäcä.

¿Änääcö o’jodhe’cä nai?

46Yääje mma yaawä Jesuuquidiito nowaanomaadö cönaajäntoicho töwäätäccujäätödööcomo: ¿Änääcö cantawäiñe o’jodhe’cä nai? queeto jäcä cönäätäccujä’a’to. 47Jesuuquidiito dhowaanäcä cönä’jaacä yääje chö’tajäätödööcomo. Töwö mude’cä’cä cönä’dejjai; tödö’tä cönnöi. 48Yaawä töwö cönä’döaacä tönoowanoomadö wwäiñe:

—Ñäädä öwö jääcäinchädä määdhä mude’cä’cä aashicha tödöönei, öwö mmaja aashicha yöödöa dea. Ñäädä aashicha yöödönei, yaanontänei’jödö aashicha tödöödö wa’cä mmaja na dea yää. Ñäädä dho’noncomo adhantawäiñe, ñäädä ñäädä adhe’jodha’como; quee cönä’döaacä Jesuuquidiito.

Cutu’de’täneichomoojönö cö’wa’täneichomooje yeichö

49Yääje mma yaawä Juan cönä’döaacä chäwwä:

—Owaanomaanei, soto ñaa cöneeneaacä odo’shancomo ija’canö’jodööje amäädä adhe’tancädä. Chäwwä yääje ännöjo’da ñaa cöneiyacä, cöjaadoncomooje’da yeijäcä.

50Jesuuquidiito cönä’döaacä chäwwä:

—Ännöjo’da’daane eichäcä’de. Ñäädä cutu’de’täneichomoojönö, cö’wa’täneichomooje na; quee cönä’döaacä Jesuuquidiito.

Jesuuquidiito wwä Jacoowo, Juan wätuuja’jocoomo

51Yääje mma yaawä caju ña töötotoojo cu’nädö amoinche’da yä’döa’jäcä, Jesuuquidiito Jeduusadén ña töötädö jäcä cönä’jädu’täi. 52Töwö tösootoi towaajo cönaanontoicho. Ñanno cöntonto Samaadiya ñano jataaca, Jesuuquidiito wä’dötoojo edantädö wetä. 53Ñanno Samaadiya ñancomo tödöiñaiñe Jesuuquidiito wä’dö’se’da cönä’ja’to, Jeduusadén ña iichädö weijäcä. 54Yää eneea’jäcä ñoowanoomadö wwäiñe, Jacoowo, Juan mmaja, cönä’döa’to:

—Cajiichaana, ¿wa’to ja ca’ ñaa nänne’jaanä caju ñanno, yau’cwato’comooje, Edía cönnöichöje mmaja? quee cönä’döa’to.

55Jesuuquidiito cönä’jedennacai chäwwadäädäiñe; cömjiiyemeecöicho; cönä’döaacä:

—Ng’jn; odhoowanääcäiñe’da dajaane na aweicho’como. 56Öwö, Soto nnedö, we’ne soto töja’eiñe’da, ewaanacaiñeene; quee cönä’döaacä.

Yää ’jeje tönwanno cöntonto anejja jataaca.

Jesuuquidiito jadä töwei’sha’como’jödö

57Ääma tai töötädaawäiñe anejja dhanwa cönä’döaacä Jesuuquidiito wwä:

—Cajiichaana, ajaadä wötäiye. Äätäjäätödö waadäi täjä’jai wa ajaadä; quee cönä’döaacä.

58Jesuuquidiito cönä’döaacä chäwwä:

—Que’cweedu täwö’que töweiye nai; tadiiñaamo mmaja taiñanque töweiye naicho dea. Soto nnedö mmaane iiñö’tojo ’je’da na; quee cönä’döaacä Jesuuquidiito.

59Edääje cönä’döa’dea anejja wwä:

—Ma’che jaadä; quee.

Ñäädä cönä’döaacä yaawä:

—Cajiichaana, jaaja weneeta’ñojo awa’de, yääma’jäcä wewaacaiye’de; quee cönä’döaacä.

60Jesuuquidiito cönä’döaacä chäwwä:

—Yä’ja’a’como dea mmaane newaaca’ña’to töwä’ja’a’como. Amäädä mmaane Wanaadi töcaajichaaneije tödöödö jäcä ecammajä’ta; quee cönä’döaacä.

61Anejja daja yääje cönä’döa’dea yaawä Jesuuquidiito wwä:

—Cajiichaana, ajaadä wei’she wa. Wääcammata’ñojo awa’de jimmä wwäiñe; quee cönä’döaacä.

62Jesuuquidiito cönä’döaacä chäwwä:

—Ñäädä öwö taadawaajui tödöödö jäcä töwaajäntä’jödö weichaame jenaadä töwei’jödö wwadäädä töwä’jedennaca’sato Wanaadi anoonöje eijai’cha na; quee cönä’döaacä Jesuuquidiito.

നിലവിൽ തിരഞ്ഞെടുത്തിരിക്കുന്നു:

DUUCA 9: MCH

ഹൈലൈറ്റ് ചെയ്യുക

പങ്ക് വെക്കു

പകർത്തുക