DUUCA 8

Ñanno wodiiñamo, Jesuuquidiito i’wa’tännamo’jödö

1Yää ’jeje Jesuuquidiito cönäämannä’acä jata waadäi, aashichaato wätunnä Wanaadi töcaajichaanaije tödöödö jäcä ecammajä’ancädä. Ñanno amoojadooto de’wä aaco’como ñoowanoomadö chääjadä cönä’ja’to dea. 2Chääjadä cönäämannä’a’to dea anejjacoomo wodiiñamo odo’sha ’ja’como’jödö wääjichö’to’jocoomo, cädäija’como’jödö mmaja. Ñanno cönä’ja’to Madía Maacadeena, ñäädä aacä amoojato’como odo’shancomo chaacanno cöneeja’caichodö; 3Juana mmaja cönä’ja’dea, Chuusa jiñamo, ñäädä Edoodhe jödaatai edhaajä; Susaana mmaja cönä’ja’dea; jooje anejjacoomo wodiiñamo mmaja, töwwäiñe töweiyato que Jesuuquidiito i’wa’tännamo.

Ñaatö’tänei dö’seeno

4Jooje soto jata waadoinchomo we’a’como cöne’jummaicho yaawä Jesuuquidiito döiña. Töwö cöneecammajäätöi chäwwäiñe yö’seeno joi; cönä’döaacä chäwwäiñe:

5—Ñaatö’tänei cönnatö’taacä. Chäwwä ñaatö’tädaawä dhantai dhadöödö cönä’mei ääma taawä. Soto cöneeta’jätöicho yaawä. Tadiiñaamo cöneena’jätöicho dea. 6Dhantai dhadöödö cönä’mei toojajaato de’wä. Töwa’tadööje mma cuiñu’tai yaawä, tuna ’je’da yeijäcä. 7Dhantai mmaane wesooca ’jano de’wä cönä’mei. Wesooca cöna’tai chääjadä; cöneetatannä’cai yaawä. 8Anejja dhadöödö aashichaato nono de’wä cönä’mei. Yää jaiñoone aashicha cöna’tai, cöneejössatai yaawä; ijaatoodea soto ’cäwa’cä chääjedöödö cönä’jaacä; que cönä’döaacä Jesuuquidiito.

Mädä jäcä töwa’deuwödö’jo, töwö töcä’de cönä’döaacä:

—Eta’sato neta’ñojo; quee.

Jesuuquidiito wwä yö’seenoje ecammajäätö’jödö

9Yaawä ñoowanoomadö cöneecamma’joicho; cönä’döa’to:

—¿Aaquene töwä’dö’se yeichö mädä yö’seeno? quee cönä’döa’to.

10Jesuuquidiito cönä’döaacä chäwwäiñe:

—Änwanno äwwäiñe u’ajä na Wanaadi töcaajichaanaije weiñä jäcä owoowanoomato’como, yää owaanojöönö’jödö. Anejjacoomo wwä mmaane yö’seeno joi ecammadö, töwwäiñe ene’mataame aneene’da eiyeto, etaajä’taame aneeta’da eiyetoode.

Ñaatö’tänei dö’seeno jäcä ecammajäätö’jödö

11“Edääje töwä’dö’se yeichö mädä yö’seeno. Dhadöödö yää Wanaadi a’deddu. 12Yää ääma taawä cönä’meichö, Wanaadi a’deddu etannamo cu’tädö yää. Odo’sha ne’a yaawä; Wanaadi a’deddu etaajä chö’tajäätödö jäconno nichö’taque’ja yaawä, chäwwäiñe ecamjödö queiñe, yääwanaacadööcomo queiñe. 13Yää dhadöödö toojajaato de’wä cönä’meichö mmaane, ñanno ta’cwaiñe Wanaadi a’deddu etannamo cu’tädö yää. Tömiiche’daane tönwanno. A’dhe mma necaanö’aato; wä’yunaacajoonä cu’nädö awä ne’nomjaato yaawä. 14Yää dhadöödö wesooca ’jano de’wä cönä’meichö ’quene, Wanaadi a’deddu etannamo’jödö cu’tädö yää. Yääje töweichöcoomo jonno edä nono de’wono jummadö que nätääwansuudäjaato yaawä, mösooma ijummadö que mmaja. Ejössata’da tönwanno yaawä. 15Yää dhadöödö aashichaato nono de’wä cönä’meichö mmaane, chäänönge tötö’tajäätödööcomo que Wanaadi a’deddu etannamo cu’tädö yää. Ñanno chö’taqueejö’da netaato, yoije tönnöe yaawä. Chäänönge töweichöcoomo que nejössataato yaawä.

Adhaawa dö’seeno

16“Tödhaawadö tönemjannädö aneewötö’tä’da weiñä nai, wöwa o’nä ännö’da mmaja. Dha’täi ye’wääne tödöödö, tameedä iiñancomo womoomödö wwä tawaane eiye. 17Tameedä etoone’taajä töwääcatu’nacaamöje na. Tameedä tacaademjönö töweecataamöje na dea, owaanäcä töwä’döeemöje mmaja.

18“Yääje yeijäcä aashichaane etaatäcä. Ñäädä töweiyato wwä jooje’cä nä’tua’de. Ñäädä a’cato mmaane nätänwajiiñaja’de yää töwwoto wa’cä nichö’tamme’caadö que; quee cönä’döaacä Jesuuquidiito.

Jesuuquidiito dhenö weejö’jödö, dhacontomo mmaja

19Yaawä Jesuuquidiito acontoncomo cöneejoto yoiña, yeenö mmaja. Jesuuquidiito ejoodöjai’cha cönä’ja’to, jooje soto weichomjäcä. 20Chäwwä anejjacoomo cöneecammaicho; cönä’döa’to:

—Aanö, adhaacontomo jödo’na naato, adheene’se naato; quee cönä’döa’to.

21Töwö Jesuuquidiito cönä’döaacä chäwwäiñe:

—Ñanno Wanaadi a’deddu etannamo, tödönnamo mmaja, ñannoone ñanno maama, yaacontomo mmaja; quee cönä’döaacä Jesuuquidiito.

Jejeichä edennanö’jo’jödö

22Aneedawä anooto awä Jesuuquidiito cönä’täi cudiiyada aca tönoowanoomadö jadäiñe. Töwö cönä’döaacä chäwwäiñe:

—Ma’chomo, chu’jä mänsemjona que’dä’täiye; quee.

Cönääma’toicho yaawä. 23Töwe’dätäädawäiñe Jesuuquidiito cönnöcöi. Yaawä jejeichä joojato cönaajäntäi chääjäcäiñe. Cudiiyada cönaadö’taacä, ñaadöjai tödööene. 24Tönwanno Jesuuquidiito cönemjacaicho yaawä; cönä’döa’to:

—Owaanomaanei, cönnadöödöcoomo dajaane mädä.

Töwö cönammöi yaawä; jejeichä cöneedennanö’joi, madaataca mmaja. Jejeichä cöneedennai yaawä. Tameedä unque’da cönä’jaacä yaawä. 25Yaawä Jesuuquidiito cönä’döaacä tönoowanoomadö wwäiñe:

—¿Aaquene aneecamjö’da maato dea? quee.

Tönwanno tösaade cönä’ja’to jooje, töwääcatonca mmaja. Tönwannoje dea cöna’deujä’a’to; cönä’döa’to:

—¿Änääcöömääne määdhä. Jejeichä dha’deddu töneeta, tuna mmaja? quee.

Cadhaada ñano odo’sha ’jano’jödö

26Cadhaada ñano nonoodö de’cäi cönä’döicho yaawä, chu’jä mänsemjona, Caadideea ñano je’taca. 27Jesuuquidiito wä’tädaawä chäwwadäädä cöneejä dhanwa, yää jataawono. Odo’sha ’je töwö cönä’jaacä, jenaadä yääje yä’dö’jödö. Töwonque’da töweiye cönä’jaacä, ä’sawä ei’cha mmaja; äwa döiña mma töweiye cönä’jaacä. 28Töwwä Jesuuquidiito eneea’jäcä tä’mudhe cönä’döi ije’taca; töcä’de cöna’deuwacä; cönä’döaacä chäwwä:

—¿Ane’cotoojo caquiimaanä amäädä Jesuuquidiito, Wanaadi O’jodhaato nnedö? Yääje wä’döa äwwä, cämmaminchai; quee cönä’döaacä.

29Töwö yääje cönä’döaacä tötaacanno odo’shancomo ija’canö’jodö weijäcä Jesuuquidiito wwä. Töwö odo’sha wwä töwaatadoojojä’e töweiye cönä’jaacä. Weiñäje dhamäädö jäcä soto töni’wadö’tä töweiye cönä’ja’to cadheena que, i’judu jäcä mmaja. Töwö yää sejaadadi tönaacä’e töweiye cönä’jaacä; odo’sha nadäädöje tööta cönä’jaacä jata ’jemjönö aca. 30Yaawä Jesuuquidiito ñäädä dhanwä cöneecamma’joi:

—¿Änääcö täätö amäädä? quee.

Ñäädä cönä’döaacä:

—Öwö yeetö Wanna; quee.

Töwö yääje cönä’döaacä jooje odo’sha tötaaca yoomomö’jocoomo weijäcä. 31Ñanno odo’shancomo cönä’döa’to Jesuuquidiito wwä:

—Ya’tadö inwadö ’jemjönö aca mma ñaa manenno’jai; quee cönä’döa’to.

32Yäätä cönä’ja’to jooje cuushi; wääwashinchänääje cönä’ja’to jöö dacääcä. Ñanno acaiñe odo’shancomo cönaatamonno’joja’to. Jesuuquidiito cönaamonno’joicho yaawä. 33Odo’shancomo cöneeja’caicho yaawä ñäädä dhanwa acanno; cuushi acaiñe cönoomomöicho. Ñanno cuushi cöneeca’tömöicho yaataca’jödö wwadäädä. Na’cwaca cönä’meicho yaawä, töwä’jajoodöcoomoje mma.

34Yää eneea’jäcä, ñanno cuushi edai’chännamo’jödö cönäänejeicho yaawä tösaadöcoomoje. Jataawoncomo wwä cöneecammajäätöicho yaawä, jata tö’woncomo wwä mmaja. 35Soto cöntonto yaawä ene. Jesuuquidiito döiña töwä’döa’comjäcä ñäädä odo’sha ’jano’jödö cöneedantoicho töwonque, shuucu, Jesuuquidiito o’wawä. I’jeta’da cönä’jaacä yaawä. Tönwanno tösaade cönä’ja’to yaawä. 36Ñanno enennamo’jödö soto wwäiñe cöneecammajäätöicho yaawä odo’sha ’jano’jödö ejiichö’tä’jödö jäcä. 37Yaawä tameedä ñanno Cadhaada ñancomo Jesuuquidiito cönenno’ja’to töjonnoiñe, tösaade töweijäcäiñe. Yääje yeijäcä Jesuuquidiito cönä’täi yaawä cudiiyada aca, töwennacaadöcoomo wetä. 38Ñäädä chaacanno odo’shancomo weja’ca’jödö cönä’döaacä Jesuuquidiito wwä:

—Ajaadä wötäiye; quee.

Jesuuquidiito anaadä’da cöneiyacä; cönä’döaacä chäwwä:

39—Adhennacaacä ämmai chaca. Ajimmä wwäiñe ecammajä’cä’de tameedä äjääcä Wanaadi nödö’jödö.

Ñäädä cöntämä yaawä. Tameedä yää jataawoncomo wwä cöneecammajäätöi töjääcä Jesuuquidiito nödö’jödö.

Jaido nnedö adonca’jödö, Wodi wwä Jesuuquidiito womö ajoojo’jödö mmaja

40Chu’jä mänsemjona Jesuuquidiito wennaca’jäcä ñanno soto ta’cwaiñe cöna’dejjaicho, tameedä töwwäiñe yoomocöödö weijäcä. 41Yaawä dhanwa cöneejä, Jaidoje chäätö. Töwö cönä’jaacä judhío we’jummato’como edhaajä. Töwö tä’mudhe cönä’döi Jesuuquidiito o’wawä. Tömmai chaca cönaadäaacä, 42tönnedö tooniyaano wäämanääje yeijäcä. Ñäädä cönä’jaacä ajei’choto’jeje, amoojadooto de’wä aacä wedu. Ääma tai iichädaawäiñe jooje soto Jesuuquidiito cönanwacö’ja’to.

43Ñanno soto do’tacaiñe cönä’jaacä wodi, munu ’jano, amoojadooto de’wä aacä wedu yääje chäädäicha’jödö. Ñäädä wodi täjiichö’tännamoojato’jödö ejeemato’comooje tameedä tönnöjäätödö acoicha’jödö weichaame äächädä ä’dö’da cönä’jaacä. 44Ñäädä cöneejä Jesuuquidiito ncadheedä, yoomö a’sadö cönaajojoi. Yaawä dea mma munu cöneedennai.

45Yaawä Jesuuquidiito cönä’döaacä:

—¿Änääcö yaajojoi? quee.

Tameedä anaajojo’da yääcamma’comjäcä Peedhodo cönä’döaacä:

—Owaanomaanei, ¿aaquene canno jooja’como soto wwäiñe adhanwacö’jotaame, adhaajojoonei’jödö mecamma’jaanä? quee cönä’döaacä Peedhodo, chääjadoncomo mmaja.

46Jesuuquidiito cönä’döaacä:

—Töweiye dajaane na yaajojoonei’jödö. Jäädudu weja’cadö dajaane yaajojoi; quee cönä’döaacä.

47Tacaade’da eijai’cha tötö’ta’jäcä, ñäädä wodi cöneejä Jesuuquidiito wwadäädä, tötäätä’nöngancädä. Tä’mudhe cönä’döi yo’wawä. Töwö cönääcammai yaawä tameedä soto netaadöcoomoje töwääjichö’totoojoje ajoojo’jödö töwwä; töwääjichö’tä’jödö mmaja cöneecammai chea. 48Yaawä Jesuuquidiito cönä’döaacä chäwwä:

—Äwwä ecamjödö weijäcä maadoncai, wodi’chä. Täncanoode’da äjääne eduuwa; quee cönä’döaacä.

49Yääje Jesuuquidiito wa’deutaame, ñäädä judhío we’jummato’como edhaajä sotoi cöneejä immai chacanno. Töwö cönä’döaacä Jaido wwä:

—Ännedö näämai; Owaanomaanei manaaquiimai eduuwa; quee cönä’döaacä.

50Yää eta’jäcä, Jesuuquidiito cönä’döaacä Jaido wwä:

—Määcatoncai. Täcaanö’e mmaane ecaanö’cä; ännedö naadonca’de; quee cönä’döaacä.

51Maa taca töwä’döa’jäcä töjaadä soto anaamonno’jotäiñe’da Jesuuquidiito cöneiyacä. Peedhodo mma cönaamonno’joi, Juan mmaja, Jacoowo mmaja, ajei’choto’jaato umö mmaja, yeenö mmaja. 52Tameedä ñanno soto cönaamoa’to. Jesuuquidiito cönä’döaacä chäwwäiñe:

—Maamotäi. Ääma’da dajaane na mä’dä wodi’chä, iiñöcöödö mma mädä; quee.

53Tonno’e mma ñanno soto cönennojöicho yaawä, dhowaanäcäiñe yeijäcä ajei’choto’jaato töwääma yeichö. 54Yaawä Jesuuquidiito yäämaajä cönaajäi dhamäädö jäcä. Töcä’de cöna’dejjai:

—Aanöncä, wodi’chä; quee cönä’döaacä.

55Yääje mma yaawä ñäädä cönaadoncai. Yaawä dea mma cönammöi. Jesuuquidiito ñäädä ajei’choto’jaato cöneewashinchojoi yaawä. 56Yuumö, yeenö mmaja cönääcatoncaicho. Jesuuquidiito soto wwäiñe aneecammajoojätö’da cöneiyacä chäwwäiñe yääje tönnö’jödö jäcä.

നിലവിൽ തിരഞ്ഞെടുത്തിരിക്കുന്നു:

DUUCA 8: MCH

ഹൈലൈറ്റ് ചെയ്യുക

പങ്ക് വെക്കു

പകർത്തുക