Hanana Enjil 8
8
Bag. 8.
1Ama Yesu zetunna gunagir bujusum.
2Fejirki jamagir rejae tasum. Teddogon jema male tennai tasum. Ter tegosirgi akurkidirsum. 3Abajiligon Farisichigon en mili wekki seler ebros tekki wetirsan: 4„Wo arif, in en morogirtakkisum asoroskingon. 5Musegon sheriar argi weseirsum ini galigki kuluged berarki. Won er mine wen?“ 6Ingi wesan, teddo dalgi nallu an, wide were wekki sudkin, tekked tekki tin shekeru an. Ama Yesu togogir suriyos tenna sobaged ariddogor abajsum. 7Tinna isigar digrianingad tenna gumurki ogodegir wetidirsum: „Idder wer on zenbikiy ekin, ter koyalgi kulugi inji tendogor lufer agad.“ 8Wide togogir suriyergi abajsum ariddogor. 9Ama tiri ingi gijred wide tinna damiri tirgi wabiherangad, wer wekked belsan, tinna dulloton kinarir junbokon. Yesu agudan kewidsum, engon tenn agarro seler kute tebingon. 10Yesu tenna urki ogodegir zol wekk elkomnum, eng anmenkin. Tekki wetirsum: „El en, tir se ekki ashekeli? Wekkon ekki dinekomnum?“ 11Ter wesum: „Zol wekkon, wo arif, aigi dinekomnum.“ Yesu wetirsum: „Wala ai ekki adinemnim. Enna girro ju. Ama owittiged hatyemen.“
12Wide owittiged Yesu wetidirsum: „Ai terrim alamna nur. Aigi tebael dulumar bitalemnum, ama nur ayardi bitendanin.“ 13Farisichi tekki wetirsan: „Er ennewertigi ashehedetiringad, enna shahada alemnum.“ 14Yesu rude wetidirsum: „Ai on annewertigi ashehedetirkiringon, anna shahada alem. Mine ai sayerton wide saïgir ajurangi iyirburingad. Ama iri iyirmunun sayerton wala saïgir ajuringi. 15Iri jitana mujibir adinerun. Ama ai zol wekkongi adinemnim. 16Ai on zol wekki dinekringon anna dinad alem, mine agudemendingad: Abo aigi ishinel aigodon engad. 17Inna sheriargon bajbun ogj owina shahada alem an. 18Ai ter terrim annewertigi ashehedetiril. Wide abo aigi ishinel aig ashehededenin.“ 19Tekki wetirsan: „Saïre enna in timbab?“ Yesu rudesum: „Ir aig aïyirmunun, wala abogi. Ir on aigi iyirkokrun, abogon wide biyirsum.“ 20In werechigi Yesu wesum duguna dadina kello, jaman tur akurkidiringon. Wekkongon tekki morogirkomnum, tenna saa tameningad.
21Yesu wide wetidirsum: „Ai nogburin. Iri aigi bikashkandun, wide inna zenbiged bidikandun. Ai ajurinn agarrogon iri eske bitamnun.“ 22Yahudichi wesan: „Aba tennewertigi bibena? In were galigki awen: Ai ajurinn agarro ir eske bitamnum an.“ 23Tirgi wetidirsum: „Iri togorton eru. Ama ai dogorton eri. Iri in alamirton eru. Ama ai in alamirtonminim. 24Ai irgi wetidirsim, iri inna zenbir bidiru an. Mine ir on amnemenkurun ai ter ter eringi, ir bidirun inna zenbichir.“ 25Tekki wetirsan: „Er ni terre?“ Yesu wetidirsum: „Ai ai ter eringi ma irgi kelloton awetidirsim? 26Annai haja digri wer dan, tekked baindin wide tekked hukmerin, inna jihaged. Ama aigi ishinel alema. Aigon tennaiton gijirsingi alamgi awetirrin.“ 27Wala fehmekomnan ter timbabna gisagi awetidirsingi. 28Tirgi Yesu wetidirsum: „Zolna todti sokerunna wattigi, manin saagi biyirkandun ai ter ter eringi. Wala haja wekki annewertirton aawminim, abo aigi kurkidisinna wereg anmenkin. Aigi ishinelgon aigodonum. 29Wala aigi agudegir amugmunum. Mine dime ter awersingi aawringad.“
30Ter ikke abainingon, tekked digrichi weri amnesan. 31Yesu Yahudichigi tekked amnereligi wetidirsum: „Ir on anna werer kewidkurun, aleged anna hiraniyandun. 32Alegon biyirrun. Wide in alegon irgi biatigeirin.“ 33Tekki widegirtirsan: „Ari Ebrehinna terirton eru. Wala id werna nugdimnun. Won minegon er awen?: Iri biatigtakkikandu an.“ 34Yesu rudetidirsum: „Aleged, aleged irgi wetidirri, zenbigi awil nutin ter zenbina nugdum. 35Nugudton kar dimen bokon akewidmunum. Ama tod dimen bokon akewdin. 36Tod on irgi atigeirkin, aleged iri biatigtakkurun.“
37„Ai iyirburin iri Ebrehinna terirton erungi. Elekengon aigi berarki awerisrun. Mine anna were idder agar wekki komeningad. 38Ai abaindin abonai nalsinged. Wide irgon aawrun intimbabnai nalsunged.“ 39Rude wetirsan: „Antimbab Ebrehin teran.“ Yesu wetidirsum: „Ir on Ebrehinna toni ekokrun, Ebrehinna awdigi bawsun. 40Elekengon aigi berarki awerisrun. Won aigon irgi alegi wetidirel terrim artinaiton gijirsingi. Ingi Ebrehin awkomnum. 41Ir aawrun intimbabna awdigi.“ Tekki wetirsan: „Ar soroskaneged uskitakkikomnum Ar abo habbekki korun, tekkon arti teran.“ 42Tirgi Yesu wetidirsum: „Arti on intimbab ter ekokin, aigi iri bidolsun. Mine artinaiton ai bel tasim. Wala annewertirton takomnim. Man teran aigi ishinel. 43Ir ma anna weregi afehmemendun? Anna weregi eskergi agijirmendungad. 44Iri abo werroton eru, tekkon Iblis teran. Wide intimbabna shehwagi awarki awerisrun. Man koyalloton zoligi abeirsum. Wala aler akewidmunum. Mine tenna kidir ale wer dameningad. Mursiged bainkin, ter tedder dalloton teran abainin, ter mursaj engad, wide mursajina timbab ter engad. 45Ama ai alegi aweringad, iri aigi aamnemnun. 46Iddeton ni wer aigi zenbi wekked barin? Ai on alegi awekrin, ir ma aiged aamnemendun? 47Zol tirdi tirna weregi agijrin. Inin joro iri agijirmunun, artirtonmendungad.“
48Yahudichi rude wetirsan: „Eleken ari seregi awemnun ekki Samirandum an, wide edder shetan dabun an?“ 49Yesu rudetidirsum: „Adder shetan dabumnum. Ama abogi akermerin. Irgon aigi aheyinerun. 50Ai anna dulkanegi akashminan. Wer dan tekki akashil — wide adinel. 51Aleged, aleged ai irgi wetidirrin, zol wer on anna weregi hafadekin, dimen bokon diarki nalmunum.“ 52Yahudichi tekki wetirsan: „Alagide ari iyirsun edder shetan dabungi. Ebrehin dioskosum wide nebichigon. Won er wena?: ‚Anna weregi wer on hafadekin, dimen bokon diarki nalmunum’ an. 53Er Ebrehin antimbab dieldogor dulle? Wala nebichi dielin dogor? Ennewertigi nigredagin?“ 54Yesu rudesum: „Ai on annewertigi adulgirkirin, anna dulkane wermunum. Abo teran aigi adulgiril. Tekki iri awerun inna tir term an. 55Won tekki aïyirmendungon. Ama ai tekki iyirburin. Ai on tekki aïyirminim an wekrin, in nawite bimursajandin. Ama ai tekki iyirrin. Tenna weregon hafadedagrin. 56Intimbab Ebrehin gurekosum, ann ugrosigi nalli an. Naledirgon gurekosum.“ 57Yahudichi tekki wetirsan: „Elgon er hamsin jengi durkomnum, Ebrehingi nalma?“ 58Yesu wetidirsum: „Aleged, aleged irgi wetidirrin, elgon Ebrehin eltakkimeningon ai dasim.“ 59Kulwigi soke injisan, tirged tin beru an. Ama Yesu bokirgi jaman turton bolossum tinna barerton.
നിലവിൽ തിരഞ്ഞെടുത്തിരിക്കുന്നു:
Hanana Enjil 8: XNZ1912
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Published by the British and Foreign Bible Society in 1912.
