Hanana Enjil 7
7
Bag. 7.
1Inin aharro Yesu Jeliltur juka tasum. Mine Yahudiyer juka tararki abirigkomnum, Yahudichi tekki berarki akashranna joro. 2Yahudichina kore kerichindi awt esum. 3Timbesi tekki wetirsan: „Indoton belligi Yahudiyegir ju, enna hiranigi enna awdi er bawinigi nalw an. 4Mine zol wekkon haja wekki boker aawmunum, tennewertigi sheheradti awersingon. Er on in hajachigi aawkin, ennewertigi alamgi shehretiru.“ 5Mine timbesigon tekked aamnekomnan. 6Yesu tirgi wetidirsum: „Anna watti elgon takomnum. Ama inna watti dime hadrebun. 7Alam eske irgi tisimnum. Ama aigi atisin, tendogor ashehederingad tenna awdi milichi erangad. 8Kujwe iri in koregir. Ai eleken akujminim in koregir. Mine anna watti elgon takomnum.“ 9Ingi werossidir Jelillo welesesum.
10Timbesi kujossann aharro tekkon wide koregir kujsum, beyingirmunum, ama bokeged. 11Yahudichigon tekki kashka isigarro tebsan koren tur. 12Wide awesan: „Man saïre?“ Jemachirgon isigar digri wer dasum tenna joro. Tiddeton weri awesan tekki serem an. Wide echeli werigon awesan: „Ila, gebilagi aberigrin.“ 13Ama wekkon tiddeton koyir abainkomnum, Yahudichina sarkeged.
14Korena seler Yesu jamagir kujirgi akurkidisum. 15Yahudichi ajibe wesan: „Won minegon in kitabigi aïyirin kurekiyir?“ 16Yesu rude wetidirsum: „Anna kurkidar andimnum, ama aigi ishineldum. 17Zol wer on abirigkin ter awersingi awarki, in biyirin, kure artinaiton ekin, wala ai annewertirton abainkirin. 18Zol tennewertirton bainil tennewertina dulkanegi akashin. Ama zol tekki ishinelna dulkanegi akashil, ter alema. Wala tedder zulum wer damnum. 19Won irgi Muse sheriagi tidirkomnum? Wekkon iddeton sheriaged aawmunum. Ir ma aigi berarki akashrun?“ Jema rude wesum: „Er sawbuna? 20Ni terre akashil ekki berarki?“ 21Yesu rude wetidirsum: „Awid habbekki awringad ir male ajebir tosun! 22Muse irgi merarki tidirsum — Ama Museged takomnum. Timbabiged teran takosum — wide iri samter zolgi amertirrun. Won zol on samter merarki ageblekin, 23Musena sheriagi togsindogor, won andogor sahterua ogij kamil wekki samter gengirringad? 24Koyir hukmemenwe. Ama hukum seregi hukmewe.“
25Urushalimirton weri wesan: „In eleken ter termunum akasshan, beru an? 26Wide ahangon shehirkir abainin. Wala tekki haja wekki awetirminan. Aba samli seregir iyirossande in aleged komisbul ter engi? 27Ar ingi seregir aïyirrun ter sayerton engi. Ama komisbul tan kello wekkon iyirmunum sayerton engi.“ 28Yesu jamar akurkidingon uwe wesum: „Ir aigi aïyirrua, wide sayerton eringi? Ama ai annewertirton takomnim. Wer dan aigi aleged ishinsum. In teran iri aïyirmendunna tirti. 29Ai tekki iyirrin, teddeton eringad. 30Wide tekkon aigi ishinsum.“ Birigsan tekki morograrki. Ama wekkon tenna igi tendogor kujurkomnum. Mine tenna saa tameningad.
31Tekked digri wer jemarton amnesan. Wide wesan: „Komisbul tan kello, inin dogor digrigir ayachigi bawkanna?“
32Farisichi gijirsan jema tenna jihar seregi awengi. Wide Farisichigon fegirina samli duligon ishinsan hadami werigi, tekki morogirw an. 33Yesu tirgi wetidirsum: „Ai irgodon watti urtunatoddekki darin. Terin aharro aigi ishinelgir bijurin. 34Iri aigi bikashkandun. Wala belkanmunun. Ai darinn agarrogon iri eske bitakanmunun.“ 35Yahudichi ittiwrin barer wesan: „Saïgir in bijuri en? Wide ar tekki belkanmunun? Aba newyebuna Yahudichi Rumichina barer gulibulinai jurgi wide Rumichigi kurkidirri an? 36Won in were minde ter wesin: Aigi bikashkandun wala belkanmunun! an? Widegon: Ai darinn agarro iri eske tamnum an?“
37Korena ugros dul kemaldir Yesu kute tebirgi uwe wesum: „Zol wer on eridbukin, aig abidi targi ni agad. 38Kitab wesin nawite: Aiged amnelna turton essichi aïbuli bibodran.“ 39Ter ingi wesum newertina jihar, tekked amneli tekki awtir bigeblekandangi. Mine newerti gadisebul elgon tirtakkikomnum, Yesu tenna kidir elgon mejidtakkimeningad.
40Jemachirton digrichi weri in weregi gijredirgi wesan: „Aleged in nebi teran.“ 41Echeli weri wesan: „In teran komisbul.“ Wide echeli weri wesan: „Aba komisbul Jelilloton bitana? 42Won kitab awemnum tekki Dawudna jerrotonm an wide Betlahmirtonm an, medine tedder Dawud agsin, teddoton komisbul bitan an?“ 43Tenna joro jema bagbusum. 44Tiddeton weri tekki morograrki birigsan. Ama wekkon tendogor igi kujurkomnum.
45Hadami fegirina samli dulinai wide Farisichinai wide tasan. Ingu wetidirsan: „Ir ma tekki attamensure?“ 46Hadami tirgi rudetidirsan: „Kidir zol wer bainkomnum in zol bainsin nawite.“ 47Farisichi rude wetidirsan: „Irgon terre tuhossun? 48Samlirton wer wala Farisichirton tekked amnelerkiri dana? 49Ama in jema sheriagi afehmemenil — nāleburan!“ 50Nikudimus tirgi wetidirsum — Yesunai ugu wekki takorel. Tekkon tiddeton wer esum—: 51„Annā sheria zolkirigi ahukmena, tenn agilloton gijir wide ter mingi awsingi iyirmeningon?“ 52Tiri rude tekki wetirsan: „Ekkon terre Jelillotonum? Kash uru nal, ter on nebi wer Jelilloton belkokin!“
53Wer nutin tenna kagir nogsum.
നിലവിൽ തിരഞ്ഞെടുത്തിരിക്കുന്നു:
Hanana Enjil 7: XNZ1912
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Published by the British and Foreign Bible Society in 1912.
