Luc 17

Ikpiti nì i-pɔ̄tam

(Kpèè Maat 18.6-7,21-22, Maar 9.42)

1Ní Yeesu tí bí u-boonnooliibi yii: «Kun làá nīn yàntī binib ń nīn ŋáań ikpitee làá nīn pée bí ní. Ama mbusu dɔ̄ ki cí un pu ní án làá dīńee. 2Bi yaa bàà dū ŋŋmii ki kúĺ kutaŋkpanaau ki dūu léeǹ u-neen, ki cáá-u ki tɔ́ tiŋkun, an bàà sɔ́ nì ú yàntī ŋwaamu nee kiba ń lítí ikpitin. 3Ní nīn nyíǹ ni-ba tiŋan!

«A-nabiki yaa ŋá ikpitee, á wòoǹ-u ú taa ti ŋá míǹ. U yaa bí yii u-bɔti kpíìyee, dūú pɔ̄-u. 4U yaa yīntiǹ-si áli miluli ŋwimbaanti ní ki dɔ́miń miluli gbantee ki tùkù-si yii: <M-bɔti kpíìyee,> dūú pɔ̄-u.»

Fookii

5Ní Yeesu kpambaliŋ bí-u yii: «Ti-Dindaan, kūtì-ti fookii.» 6Ní ti-Dindaan kíí-bi yii: «Ni yaa bàà cáámaan fookii ní báà u yaa bí fiii kii dijɔnjɔmbilee#17.6 Kpèè Maat 17.20., ni bàà ŋūǹ kí tùkù busubu nee yii: <Á kpìkitī laakin a yú nee kí cùú cóoń tiŋku poon,> ní bú ŋá ni nín lī puee.»

Utɔntɔnli tundi

7«Ni-kansikin ubɔ yaa cáá utɔntɔnli, u gbāā ki kù-u tikpaal àá u kpàá-u tiwaŋkuti, ní utɔntɔnlee yaa nyánní kusaau ki bāańee, u kíikí kí tùkù-u yii: <Dāan̄ malaa kí dāá nīn jīǹ tijinaaa?> 8See ú tùkù-u yii: <Ŋá-mi tijin, kí kpántí a-bɔkutil kí yòon̄ tijin kí cáań-mi. Man yaa jíń ki nyùn̄ee, si mun ń nín jī a-yati.> 9Aa cáá ijaam kí jāam̀ a-tɔntɔnliu u nín túń ditundi din a tīī-uee pu. 10Míǹ mbaantiim ní an sá ni mun cee. Ni yaa ŋá tin Unimbɔti bí ní ŋée kɔkɔ ki dóòyee, lìmaan yii: <Timbi sá bitɔntɔnliibi bin kaa bí tibanee ní, ti-tundi din ti máaǹ kí tɔ̄ee ní ti túń nee.>»

Yeesu cáaǹ binyaŋgbantiibi saalaa

11Yeesu nín nìn còom̄ ki cá Jeerusaleemee, u nìn jítì Samaarii nì Galiilee kansikin ní. 12U làá kɔ́ kitimbilii kibanee ní binyaŋgbantiibi saalaa túŋkìń-u ki dɔ́miń ki yú kudandaŋu#17.12 Kpèè Akoo 13.45-46., 13ní ki káaǹ yii: «Ukpil Yeesu, sɔ̄ ti-saai!» 14Yeesu ká-bee ní ki bí yii: «Cáámaan ni-ba kí dàkà bisaraaŋaliibi#17.14 Kpèè Akoo 14.2-3..» Ŋyunti ŋun bi cée, ní bi pɔ́ɔkì. 15Bi-kansikin ubɔ nín dáań ki ká yii u pɔ́ɔkèe, ní úǹ gbēeǹ niin ki fātì u-taaŋi pu ní ki nín gítiń ki sòoǹ mpɔn ki pàkà Unimbɔti. 16U dɔ́miń ki tātìi dōoǹ Yeesu nimbiin dicincibil ki jáam̀-u. Kijapaayee nìn sá usamaariija ní. 17Ní Yeesu bí yii: «M cáaǹ binib saalaa ní, kin biwa bin kíǹee bí la? 18Mimmee báà ubɔ kaa dākafì kí gítiń kí nyɔ̄ŋkì Unimbɔti see unicaan nee babaaa?» 19Ní Yeesu bí-u yii: «Yīkì kí nīn cá, a-fookiiu di fīī-si.»

Unimbɔti Beel dāantam

(Kpèè Maat 24.23-28,36-41)

20 Fariisab bālifì Yeesu yii: «Ŋyunti ŋulɔŋu ní Unimbɔti Beel làá bàń ní?» Ní Yeesu kíí-bi yii: «Unimbɔti Beel kaa dòoń yéè kpìrrr bí ká-dì. 21Baa dāa lì yii: Kpèèmaan di bí dooyaaa, di bíń lapu doo, ama ní béé yii Unimbɔti Beel kíǹ ki bí ni-kansikin doo.»

22Ní u bí u-boonnooliibi yii: «Ŋyunti ŋubɔ dòoń ni dāa nyàab̀ man Kinibiki wiiŋyi nee ŋubɔ, kaa làá ká. 23Bi dāa tùkù-ni yii: <U bí doo ní!> <Aayee, u bí lapu ní!> Taa sāǹ kí cùmaan laaba. 24Man Kinibiki dāantam wiiŋŋu dal dāa sá kii utaa nín ŋmóò ki ŋmíntí pu kí kíliń kutagbɔŋu kílilaŋki kí nīn cá ku-kuntilaŋkee ní. 25Ama kí wàatī míǹ ń nín bàńee, see ḿ jī falaa tikpil, waanee nib ń dū-mi kí fá. 26Tin nìn jítì Noowa yuntiŋuee, tíǹ tibaantiil di làá dāá ŋá man Kinibiki mun wiiŋŋu dal. 27Binib nìn jīǹ, ki nyù, bininjab cāab̀ binimpoobi ní binimpoobi mɔ́ń ticati áli ki tin sāā ŋyunti ŋun Noowa dāa kɔ́ meelanee, ní nnyiŋgbeen dɔ́miń ki kúntì bi-kɔkɔ pílpil#17.27 B. 26-27: kpèè Diny 6.9-7.24..

28«An làá dāá pée tí ŋá kii Looti yuntiŋuee ní: binib nìn jīǹ, ki nyù, ní bin dāāyee dāā, ní bin nyáfée nyáfí, ní bin kù tikpaalee bí ki kù, ní bidimaliibi bí ki māā. 29Ama daliŋkin Looti yíkì Soodoomee, ní farwata nì ŋŋmi nyánní yilpu kii utaayee ki nìn̄ kitiŋ pu ní ki wùn̄ ki kúntì bi-kɔkɔ nyíki nyiki#17.29 B. 28-29: kpèè Diny 18.20-19.25.. 30«Daliŋkin man Kinibiki yaa láa páaǹnée, min làá dāá ŋée dee.

31Yaadal wiiŋŋuee, un yaa láa bí dicindee ń taa lì yii u làá kpákatí kí kɔ́ kudii poon kí yòon̄ u-wanti tiba#17.31 bí dicindee: Isirayeel yab yaa nìn máń kudiiyee, baa nìn píǹ, bi nìn bɔ̀b̀ ní kí lēē dicindi kudiiyee yilpu, ní kí mā akɔl kí tin sāā dicindee. - ...yòon̄ u-wanti tiba: kpèè Maat 24.17., míǹ ní un bí kusaauee mun ń taa fàtīń mmɔŋki. 32Téetímaan Looti nimpuu pu#17.32 Kpèè Diny 19.26.. 33Un là kí fīī u-maŋfalee làá fá-dì. Ama un fá u-maŋfalee làá kpāafì-dì. 34Ibaamɔn ní m tùkù-ni, an nyeekuee, binib bili dāa dɔ̄ kilambaŋ pu ní án yòon̄ ubɔ kí yàntī un kíǹee. 35Binimpoobi bili dāa gbāā ki nà kunabaantiiu pu ní án yòon̄ ubɔ kí yàntī un kíǹee. [ 36Bininjab bili dāa gbāā kusaau ki kù, ní án yòon̄ ubɔ kí yàntī un kíǹee#17.36 Uyakatikaa nee kaa bí tigbɔŋkpikil tikpil poon, (kpèè Maat 24.40)..»] 37Ní u-boonnooliibi bālifì-u yii: «Ukpil, la ní míǹ làá dāá ŋée?» Ní Yeesu kíí-bi yii: «Laakin diwaŋkpil yaa dɔ̄ee, niin ní kaajiikub kpáfí#17.37 Dūú ŋmàntī nì Yoob 39.30..»

നിലവിൽ തിരഞ്ഞെടുത്തിരിക്കുന്നു:

Luc 17: BASSARDC

ഹൈലൈറ്റ് ചെയ്യുക

പങ്ക് വെക്കു

പകർത്തുക