Luc 16

Utɔntɔnli un yáb̀ee

1Yeesu gíti kútì ki lī u-boonnooliibi yii: «Ugaaja ubɔ di bí ní ki cáá utɔntɔnli un kpèé u-wanti kɔkɔee, ní bi tùkū-u yii utɔntɔnlee cáá u-wanti ki bíiĺ. 2Ní u yíiń-u, ní ki bí-u yii: <An kaa mɔ́ɔkiǹ-mi m nín gbìl̄ tin a ŋáańee. Ŋá akɔntaa kí tīī-mi kí tùkù-mi a nín túń ditundi ki gíiǹ puee, kun puee aa làá nīn gíti kpèé m-wanti.> 3Ní utɔntɔnlee bālifì u-ba yii: <M-kpiliu làá jà-mi dee, m làá ŋá mana dee? Ḿ cùú nīn kù tikpaalaaa? Maa cáá mpɔn kí kpɔ̀. Ḿ cùú nīn mèéee? An cáá-mi icoo! 4M béè m nín làá ŋá pu ní bi yaa jìn̄-mee, binib ń fōō-mi bi-dumpuyee.> 5Niinee ní u yíiń bin kɔkɔ cáá u-kpiliu apɔɔnee ubɔ ubɔ, ní ki bālifì upeepeekaa yii: <Mana ní a cáá m-kpiliu dipɔndi ní?> 6Ní u bí-u yii <Ŋkpam aŋkɔrab dilaataal.> Ní u fātìi bí yii: <A-pɔndi gbɔŋku sèé, fōō kí kàl̄ kí ŋmà malaa yii a cáá dipɔndi aŋkɔrab ili nì saalaa.> 7Ní u bí un kíǹee yii: <Sii fáà, a-pɔndi sá mana?> Ní úǹ bí yii: <Idi kutukub dilaataal,> ní u bi yii: <A-pɔndi gbɔŋku sèé, fōō kí ŋmà idi kutukub imuŋku inaa.> 8Utɔntɔŋkpitee kpiliu nín gbìl̄ tin u ŋée, ní u pàkā-u u nín yáb́ ki ŋá miŋyee: di sá yii bin kaa sá Unimbɔti nibee wálifì bi-jutiibi bɔti pu ki jítiǹ bin sá u-yabee.»

9Ní Yeesu lī yii: «Man tùkù nimbi yii: Nín̄ cáámaan ni-gaajati ki ŋáań min fáatì Unimbɔtee, án nín làá ŋá pu, tì yaa láa kúntì ni-ceeyee, Unimbɔti ń fōō-ni kí kàan̄ ikɔŋkoon in bí jaanjaanee nee. 10Un ŋúb̀ tiwan fiii nì deedeeyee tí ŋúb̀ tiwaŋkpaandi mun deedee ní. Un kaa ŋúb̀ tiwan fiii nì deedeeyee kaa tí ŋúb̀ tiwaŋkpaandi mun nì deedee. 11Ni yaa kaa ŋūǹ kí ŋúb́ duulinya gaajati tin kaa sá timɔntiilee, Unimbɔti kaa dāa dù u-gaajawammɔntiiti kí ŋúbíǹ-ni. 12Tin tin sá ubɔ wantee, ni yaa kaa ŋúb́-tì nì deedeeyee, Unimbɔti kaa tìì ni mun tin sá ni-yatee.

13«Utɔntɔnli ubɔ kaa ŋūǹ kí nīn bí bikpilib bili cee. Asee ú nīn ná ubɔ kí nīn néeń un kíǹee, kí dū u-ba kí tīī ubɔ, kí nīn kpèé un kíǹee fám. Naa ŋūǹ kí kpāfì Unimbɔti nì animbil kí nóó#16.13 Dūú ŋmàntī nì Maat 6.24..»

Yeesu wòon̄ Fariisab

(Kpèè Maat 11.12-13, 5.31-32, Maar 10.11-12)

14 Fariisab nín gbìl̄ an bɔtee ní bi bíi bèel̄ Yeesu, kun puee bíǹ néeń animbil. 15Ní Yeesu bí-bi yii: «Ni là binib ń nīn wāĺ-ni yii ni sá deedeedambi. Ama Unimbɔti nyí tin kā ni-pɔbiliŋ poonee. Tin binib kpèé yii an sá tiwaŋkpaandee, an sá ntimbiil wanti ní Unimbɔti nimbiin.

16«Mooyiisi marab nì Unimbɔti bɔnaatiliibi nín sòoǹ tiŋyee nìn bí ki dāa sāā Yoowaneesi un fùul̀ binib Unimbɔti nyimee yuntiŋu. Ŋyunti ŋun Yoowaneesi bāańee ní binib gbìl̄ Unimbɔti Beel bɔti, ní báà ŋma kíǹ ki bíi mɔ̀ kí kɔ́ di-ni. 17An pɔ̀fì ki tīī kutagbɔŋu nì kitiŋ ń jītí ki jítiǹ marab ŋmaŋmabiku kubɔ ń kpìtī.

18«Un kamaa yaa jìn̄ u-nimpuu ní ki fātìi cáá upɔɔnee, udaan ŋá tilaakpaal Unimbɔti nimbiin, ní un cáá unimpu un u-cal jìn̄ee mun ŋá tilaakpaal Unimbɔti nimbiin.»

Yeesu sòon̄ ugaaja nì Laasaar bɔti

19Ní Yeesu bí yii: «Ugaaja ubɔ di nìn bí ki pèentí abɔkutinyaan ŋin pɔ̄ɔ̄ kudaau tikpilee ní ki pée bí ki jīǹ jiŋaal mmɔntiimin baabadal. 20Usoodaan ubɔ nìn bí bi yíì-u Laasaar. U nìn dɔ̀ ugaajee punyɔkɔpu ibunsoon píń u-wunti pu. 21U bàà nìn là kí nīn tòó ugaajee nín jīǹ tin gbátí ki lítí kitiŋee kí kpíiǹ u-ba, ní iboo mun gíti dòoń ki líntí u-buuŋyi. 22Usoodaanee dūu kpíì, ní Unimbɔti tuuŋyi dɔ́miń ki yōoǹ-u ki cáa nín jɔ́ḿ yilpu ki kāaǹ Abraam cee#16.22 Dūú ŋmàntī nì 13.28.. Ní ugaajee mun dāa dūu kpíì, ní bi síb́-u. 23U bàn̄ ditaŋkpiilinee ki bíi jīǹ falaakpaan. U bí falaa poonee ki wáaǹ ki kpēēyee ki ká Abraam ndan, Laasaar kā u-cee. 24Niinee ní u téeń mpɔn yii: <Ti-baa Abraam, sɔ̄ m-saai kí pée tɔ̄ń Laasaar ú dū u-ŋambiki kí sēē nnyim kí cáań kí mèel̀ m-limbil, kun puee m bíi jīǹ falaa ŋŋmi nee poon tikpil.> 25Ní Abraam kíí-u yii: <M-biki, téetí yii a nín nìn bí duulinyanee, a nìn jíń mmɔn, ní Laasaar úǹ jíń falaa. Kɔŋkɔnnee u mun bíi fòol̄ u-mɔŋŋu dee, ní si mun bí falaani. 26Áli gba mbookpaan ŋubɔ di pītì timbi nì nimbi kansikin. Bin yaa bàà là kí nyānní timbi cee kí cù nimbi ceeyee ń taa ŋmāaa, bin mun yaa bàà là kí nyānní nimbi ceen kí dāan̄ timbi cee dooyee mun ń taa ŋmā.> 27Ní ugaajee bí yii: <Mimmee, m gbàam̄-si, á tɔ̄ Laasaar m-baa dumpu, 28kun puee m cáá nnabiyaamu muŋmoo, ú cù kí kpāafì-bi bíǹ ń taa dāan̄ nnaabu ŋun poon man bí nee ni.> 29Ní Abraam kíí-u yii: <Bi cáá tin Mooyiisi nì Unimbɔti bɔnaatiliibi ŋmàn̄ee, bí nóó tíǹ.> 30Ní ugaajee bí yii: <Aayee, m-baa Abraam, ubɔ di yaa bàà fīkitì bitaŋkpiibi kansikin ki cūtèe, bi bàà kpántí bi-bimbim.> 31Ní Abraam fātìi bí-u yii: <Bi yaa kaa làá nóó Mooyiisi nì Unimbɔti bɔnaatiliibi nín ŋmàn̄ tiŋyee, báà ubɔ yaa nyáń bitaŋkpiibi kansikin ki fīkitì ki sòon̄ nì bi, baa làá fōō udaan bɔti kí kíí.>»

നിലവിൽ തിരഞ്ഞെടുത്തിരിക്കുന്നു:

Luc 16: BASSARDC

ഹൈലൈറ്റ് ചെയ്യുക

പങ്ക് വെക്കു

പകർത്തുക