Luc 18

Ukpiipu nì ubɔsoonli ubɔ bɔŋmantikaati

1Ní Yeesu dū tibɔti nee ki ŋmāntì kí dàkà yii an máaǹ bí nīn pée mèé kí taa gbèen̄. 2U nìn bí yii: «Ubɔsoonli ubɔ di nìn bí kitiŋ kiban, kaa fàŋkí Unimbɔtaa, kaa tɔ́ unil mun. 3Kitiŋ gbanti poonee, ukpiipu ubɔ nìn bí ki dòoń ubɔsoonlee cee múlmul ki bí-u yii: <M-nannanliu ŋá-mi tibɔti, pɔ̀ m-bɔti kí tīī-mi.> 4Ní ubɔsoonlee tafal kpá, an tin yúntì, boonee ní u dāa bí u-ba yii: <Nì min kɔkɔ maa fàŋkí Unimbɔti, kaa tɔ́ unilee, 5ukpiipu nee nín dòoń ki páb̀-mi pu nee, m làá sòoǹ bi-bɔti nee kí tīī-u. An yaa sá fám, u làá nīn pée dòoń ki páb̀-mi yéè ní kí dāá tìl̄ m-fam.>» 6Ní ti-Dindaan gíti bí yii: «Pīlifìmaan ubɔsooŋkpitee nín lī puee. 7Míǹ ní Unimbɔti làá sòoǹ kí pɔ̀ bin u lútì bi tíminsí-u ŋwiimpu nì kunyeeuee, waa làá yàntī-bi, u làá tūtuǹ-bi malaa. 8Ibaamɔn ní m tùkù-ni, see ú sòoǹ kí pɔ̀ bi-bɔti. Ama, man Kinibiki yaa láa fātìi gítìńee, m làá ká fookiidambi kitiŋ puɔɔɔ?»

Fariisa ubɔ nì ufɔtil bɔŋmantikaati

9Yeesu gíti dū tibɔti nee ki ŋmāntiǹ bin nìn lì yii bíǹ bí deedee Unimbɔti nimbiin nì bi-ba nyítam ki kpèé ki sìnkīǹ bin kíǹeeyee, 10yii: «Binib bili di nìn cūtì kunimbɔtidiin kí mèè, ubɔ nìn sá Fariisa ní un kíǹee sá ufɔtil. 11Fariisee nìn yú ki mèé u-ban, yii: <Óo Unimbɔti, m jáaḿ-si man nín kaa bí kii bin kíǹee nín bí pu ki sá binaayub, binikpitib, bilaakpaadambee, m jáaḿ-si man nín kaa bí kii ufɔtil un bí neeyee. 12M bōob̀ kinyɔkɔ mili kinyɔŋ poon, ní m-wanti tin kɔkɔ m kāntée, m lèekī saalaa sá kamaa puee kubɔ kubɔ ki tìì-si.> 13Ní ufɔtilee, úǹ yúń kudandaŋu, kaa là kí yáatí u-yil gba, ki fátí u-bindi ki yáliŋkí u-kpitii pu ní ki lì yii: <Óò Unimbɔti, sɔ̄ m-saai, m sá unikpiti ní!>» 14Ní Yeesu gíti lī yii: «M tùkù-ni yii ufɔtilee fātì u-dumpu, Unimbɔti dū u-kpitii ki pú-u, kaa pú un béeyee. Kun puee un sá kamaa yaa yòontí u-ba yilpuee, Unimbɔti làá sìntīǹ-u taapu, ní un sìntīǹ u-ba taapuee, Unimbɔti làá yòon̄-u yilpu.»

Yeesu fōō mbiyaamu

(Kpèè Maat 19.13-15, Maar 10.13-16)

15Binib nìn cāabìń mbiyaawaamu gba Yeesu cee ú dū u-ŋal kí páań mu-pu kí mèè. U-boonnooliibi nín ká mimmee ní bi bíi ki jì-bi. 16Ní Yeesu yíiń mbiyaamuee u-cee ki bí yii: «Yàntīmaan mbiyaawaamu ń dāan̄ m-cee. Ní taa pìin̄-mu nsan, kun puee Unimbɔti Beel sá ki tīī bin náań nì muee ní. 17Ibaamɔn ní m sòoǹ nì ni, un kamaa yaa kaa fōō Unimbɔti Beel kii kibiyaawaayee kpá kí kɔ́ di-ni.»

Ugaaja ubɔ bɔti

(Kpèè Maat 19.16-30, Maar 10.17-31)

18Niinee, Juuda yab kpiliu ubɔ bālifì Yeesu yii: «Ukpimɔnti, m làá ŋá mana ní kí ká dimaŋfal din kaa cáá dikúntilee ní?» 19Ní Yeesu fātìi kíí-u yii: «Ba pu ní a yíiń-mi yii umɔnti? Ubɔ kaa bí ki sá umɔnti, see Unimbɔti. 20Kéè, sii a-ba nyí Unimbɔti marabaa! An lī yii: <Á taa ŋá tilaakpaal, kí taa kpɔ̀ unil, kí taa yɔ̀, kí taa mɔ̄ntì kí páań ubɔ pu fám, kí nīn tɔ́ a-baa nì a-na#18.20 Kpèè Disa 20.12-16, Ditee 5.16-20..>» 21Ní uninjee fātìi kíí-u yii: «Doooo m-naacimpɔntin ní m pée ŋúb́ an marab gbanti.» 22Yeesu gbìl̄ u nín lī puee, ní ki bí-u yii: «Kuwambaantiiu di kíǹ-si á ŋá. Nín̄ cá kí nyāfì tin kɔkɔ a cááyee kí dūú yàkatī bifalaadambi kí tin ká tigaajati Unimbɔti cee. A yaa ŋá mimmee, á dāan̄ kí nīn nóó-mi.» 23Kijapaayee nín gbìl̄ mimmee, kunimbaau kɔ́-u, kun puee u nìn cáá tigaajawan tikpil. 24Yeesu nín ká yii kunimbaau kɔ́-uee, ní u bí yii: «An pɔ̄ɔ̄ tikpil ki tīī bigaajab bí kɔ́ Unimbɔti Beelineeee! 25An pɔ̀fì ki tīī ugutaamu ń jītí ujoo buŋŋun ki jítiǹ ugaaja ń kɔ́ Unimbɔti Beelin.» 26Ní bin nìn bíi pílifíǹ-uee bí yii: «Kin, ŋma di làá nín ká difiil dee?» 27Ní Yeesu kíí-bi yii: «Tin pɔ̄ɔ̄ binib ceeyee, kaa pɔ̄ɔ̄ Unimbɔti cee.» 28Ní Peetroo bí yii: «Kin timbi bin cāntì tin ti cááyee ki táá-see fáà?» 29Ní Yeesu kíí-u yii: «M sòoǹ nì ni ibaamɔn ní, un kamaa di yaa fá u-dumpu nì u-nimpuu nì u-nabiyaamu nì u-baa nì u-na nì u-biyaamu, Unimbɔti Beel puee, 30làá fōō tipaal tikpil ŋyunti ŋun ti bí nee poon. U làá dāá gíti fōō dimaŋfal din kaa cáá dikúntilee ŋyunti ŋun dòońee.»

Yeesu gíti sòon̄ ntataatiim u-kúm nì u-fìkititam pu

(Kpèè Maat 20.17-19, Maar 10.32-34)

31Ní Yeesu gāntì u-kpambaliŋ saalaa nì alee ní ki bí-bi yii: «Ní pīlifì tiŋan, Jeerusaleem un ti cá nee, tin kɔkɔ Unimbɔti bɔnaatiliibi nìn ŋmàn̄ ki yóoǹ yii an làá dāá bàń man Kinibiki puee, ŋyunti bāań ní nee án ŋá míǹ. 32Bi làá cúú-mi kí tīī bin kaa sá Juuda yabee bí bèel̀-mi, kí sìì-mi, kí tíiĺ timɔtan kí làbitì-mi. 33Bi làá gbá-mi anaalab ní kí kpɔ̀-mi. Ní iwiin ita dalee ḿ fìkitī.» 34Ama u-kpambaliŋ kaa nìn gbìl̄ tíǹ gbanti kɔkɔ taapu, kaa nyí tin pu ní Yeesu sòoǹ mimmee, kun puee tibɔtee nìn dáá bí-bi dibalin.

Yeesu cáaǹ ujɔfu ubɔ Jeeriikoo

(Kpèè Maat 20.29-34, Maar 10.46-52)

35Yeesu nín tóobiń Jeeriikooyee, uninja ubɔ nìn kā disaŋkaŋkpil ki sá ujɔfu ki mèé tiwan. 36U gbìl̄ kunipaau jītée, ní u bālifì yii: «Án sá ba ní?» 37Ní bi tùkū-u yii: «Yeesu Naasaareeti yɔuee di jītí.» 38Niinee ní u téeń mpɔn yii: «Yeesu, Daafiidi naantiiu, sɔ̄ m-saai!» 39Ní bin nìn līī nyɔkɔpuee bíi kpàtī u-pu yii ú ŋmīĺee. Ní u mɔ̄tìi bíi kāantí yii: «Daafiidi naantiiu, sɔ̄ m-saai!» 40Ní Yeesu sāā ki síl̀, ní ki bí yii bí cáań-u u-cee. U bāańee, ní Yeesu bālifì-u yii: 41«Ba ní a là ḿ ŋá kí tīī-si ní?» Ní u bí yii: «Ukpil, m là kí wāl̀ ní.» 42Ní Yeesu bí-u yii: «Nín̄ kíǹ ki wāĺ! A-fookiiu di fīī-si.» 43Niin niin ní u-nimbiliŋ cúu ŋúbitì ní u wál̀ ní ki kíǹ ki táá Yeesu ki nyɔ́ŋkí Unimbɔti. Kunipaauee kɔkɔ nín ká mimmee, ní bi bíi pàkà Unimbɔti.

നിലവിൽ തിരഞ്ഞെടുത്തിരിക്കുന്നു:

Luc 18: BASSARDC

ഹൈലൈറ്റ് ചെയ്യുക

പങ്ക് വെക്കു

പകർത്തുക