LUKE 23
23
Pilat Ma a Jesu Pina
(Matt. 27.1-2,11-14; Mk. 15.1-5; Jn. 18.28-38)
1Huan mipi tengteng ading ua, Jesu Pilat kiang ah a pita uhi. 2“Hiai mi’n ka chite uh a pimang a, Kaisar kiang ah siahliau a kham, Khrist, kumpipa, a kichih ka za uh” chi in a hekta uhi.
3Pilat in, a kiang ah, “Judate kumpipa na hi hia?” chi in, a dong a. Aman “Hi e,” chi in a dawng hi.
4Pilat in siampu liante leh mipite kiang ah, “hiai mi tung ah bangmah khelhna ka mu kei,” a chi hi.
5Himahleh amau, “Galili gam a kipan Judia gam khuateng leh hiai mun tan ah thuhilh in, mi tengteng a fuihse gige” chi in, a khauh semsem uhi.
Herod Mai a Jesu Dinna
6Pilat in huai a zak in, hiai mi Galili gam a mi ahi hiam chih a dong hi. 7Huchi in Herod uk sungmi ahi chih a theihtakin Herod kiang ah a sawlta a; huailai in amah leng Jerusalem khua ah a om hi. 8Herod in Jesu a muh in a kipak mahmah a; a tanchin a zak ziak in, tuma siah apat muh a ut him ahi a, a thillamdang hih banghiam bek muh a lamen hi. 9Huan thu tampi a dong a; himahleh bangmah in a dawng tuankei hi. 10Siampu Liante leh laigelhmite’n ding in nakpitak in a hek uhi. 11Herod leh a sepaihte’n Jesu a simmawh ua, nuihzabawlna’n a zang uh, puan thupitak silhsak in Pilat kiang ah a sawlnawnta hi. 12Huai ni nitakin Herod leh Pilat a kihouthei ta uhi; huai masiah zaw kihouthei lou ahi uhi.
Jesu Si Ding a Thutanna
(Matt. 27.15-26; Mk. 15.6-15; Jn. 18.39—19.16)
13Pilat in siampu liante, heutute, mi tengteng a samkhawm a, a kiang uah, 14“Mite a pimang chi in, hiai mi ka kiang ah n’on pi uhi, ngai un, na ma ua ka etchet nung in na hekna thu uah hiai mi tung ah bangmah khelhna ka mu kei hi; 15Herod in leng a mu sam kei. I kiang uah a hon sawlnawnta hi. Ngai un, sihna khop hial bangmah a hih kei hi. 16Huchi in ka vaw ding a, ka pawtsak mai ding” a chi hi. 17Ankuangluini a lak ua mi khat a pawtsak teitei ding ahi ngal a.
18Himahleh kituaktakin a kikou ua, “Hiai mi hih mangthang inla, Barabba pen hon pawtsak zaw in” a chi uhi. 19Huai mi khopi a helna leh, tualthah ziak a suangkulh tang ahi.
20Pilat in bel Jesu khah a ut a, a kiang uah thu a gen nawn hi. 21Himahleh “Kros ah kilhden in, Kros ah kilhden in” chi in a kikou uhi.
22Huan aman, a thumveina ah a kiang uah, “Bang ding in maw? Hiai min bang ahia ahihkhelh? Sihna khop hial a tung ah bangmah ka mu kei; ka vaw ding a, ka khah mai ding” a chi hi.
23Amau bel aw ngaihtak in Kros a kilhden ding in a ngen teitei uhi. Huan a aw un a vau daita uhi. 24Pilat in a nget bang ua hih ding in thu a hihpukta hi. 25Helna leh tualthah ziak a suangkulh tang a nget uh a khah a; Jesu bel a utut a loh ding un a peta hi.
Jesu Kilhdenna
(Matt. 27.32-44; Mk. 15.21-32; Jn. 19.7-27)
26A pimanglai un, Simon Kurini khaw mi, gam lam a kipan hongpai a man ua, Jesu nunglam paw ding in a tung ah Kros a ngata uhi.
27Huan mi nazong leh numei amah kah a mau zelzul, mipi tampitak in a zui uhi. 28Jesu bel amaute lam nga in, “Jerusalem tanute aw, honkah kei un, noumau leh na tate uh ading in kap zaw un” a chi hi. 29Ngai un, a ni a hongtung ding a, ‘huai ni’n, numei chingte, naupai ngeilouhna gilte, naungek tep ngeilouh nawite a hampha uh,’ a chi ding uhi. 30Huai hun chiang in mite’n, ‘tangte kiang ah hondelh un’ a chi ding uh, mualte kiang ah, honkhuh un, a chi ding uhi. 31Sing a hinlai a bawn hichibang a a hih uh leh; a keu chiang in bang a lohta phet ding ua?” a chi hi.
32Huan a kiang ah midang nih, migilou, hihlup ding in a pisam uhi. 33Luguhmun, a chih uh a tun un, migiloute, a taklam ah khat, a veilam ah khat toh Kros ah a kilhden uhi. 34Jesu’n, “Pa, amau ngaidam in; a thilhih uh a theikei ua ahi, a chi hi. Huchi in a puansilhte kihawm in, ai a san uhi. 35Huan mi vantang in ding kawm in a en uhi. Huchi in vaihawmmite’n, “Midang bawn a hondam a ka; Pathian tel Khrist a hihtaktak leh amah leng ki hondam hen aw,” chi in a enghou uhi.
36Sepaihte’n leng amah nuihzabawlna’n a nei ua, a kiang ah a hong ua, zuthuk a pia uhi. 37“Judate kumpipa na hih taktak leh ki hondam in” a chi uhi.
38Huan a lutung zawn Kros ah, Grik, Latin leh Hebru laimal in, “HIAI JUDATE KUMPIPA AHI” chi in, laigelh a tak uhi.
39Huan a migilou kilh khat un Jesu a tai a, “Khrist na hi ka hia? Ki hondam inla, kou leng hon hondam tanla” a chi hi.
40Himahleh khatpa’n dawng kawm in, a taihilh a, “Pathian nangawn na kihta ka hia kibang sap a hon gawt uh? 41Eizaw gawt tuak him i hi; i thilhih manlel mu i hi a; hiai min bangmah a hihkhial ngalkei a” a chi hi. 42Aman, “Jesu Toupa na Kumpi gam a n’ong pai chiang in hon theigige in” a chi hi.
43Aman a kiang ah, “Chihtaktak in k’on hilh ahi, tuni in ka kiang ah Paradise ah na omsam ding” a chi hi.
Jesu Sihna
(Matt. 27.45-56; Mk. 15.33-41; Jn. 19.28-30)
44Huan dakgukna ding ahi a, huai nungsiah dak kua na huntan in gam pumpi a hong mialvekta a, nivak a beita hi. 45Pathian biakin puanzak a lai ah a hong keksuak hi. 46Jesu aw ngaihtak in a kikou a, “Pa, na khut ah ka kha k’on kemsak hi” a chi hi. Huai a chihzoh in a kha a khahta hi.
47Sepaih zaheutupa’n thil omdan a muh in, “Hiai mi pellou in midik ahi ngeingei” chi in Pathian a phat hi.
48Huai etnop en ding a mipi hong kikhawm tengteng te’n thil omdante a muh un a awm uh kitum in a kiknawnta uhi. 49Huan a meltheihte tengteng leh numei Galili gam a kipan a honzuite, huai thilte en in gamla tak ah ading uhi.
Jesu Vuina
(Matt. 27.57-61; Mk. 15.42-47; Jn. 19.38-42)
50Huan ngai un, mi khat a min Joseph, vaihawmmi, mi hoihtak, diktak, Judate khua khat Arimathai a kipan a om hi, 51A vaihawm uah leh a thilhih uah leng a ki awikei him hi. Pathian gam a lamen gige hi. 52Huai mi Pilat kiang ah a hoh a, Jesu luang a ngen hi. 53Huan a lakhia a, puanmalngat in a tuam a, han, suang khuakkuak, kuamah sial nailouhna ah, a sial hi. 54Huan huai ni kisakkholhna ni ahi, khawlni a hong tundek ziak in. 55Galili gam a kipan a kiang a numei hongte’n a zuizel ua, han leh a luang sialdan a mu uhi. 56Huan a pai nawn ua, gimnamtui leh thaunamtui a bawl uhi.
നിലവിൽ തിരഞ്ഞെടുത്തിരിക്കുന്നു:
LUKE 23: PAITBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
