LUKE 22
22
Judas Iskariot Lehpanna
(Matt. 26.1-5; Mk. 14.1-2; Jn. 11.45-53)
11 Huan Tanghou Silngou Sohlouh Ankuangluini, Paikan Ankuangluina kichi a naita hi. 2Siampu liante leh laigelhmite’n hihlupna dan a zong ua, vantang lah a kihta uhi. 3Sawmlehnihte lak a pang, Judas, Iskariot kichi sung ah Setan a lut hi. 4Huchi in amah a vapai a siampu liante leh heutute kiang ah zuausan a matsak theihna ding dan a va kihoupih hi. 5Amau a kipak mahmah ua, a kiang ah dangka piak a chiamta uhi. 6Aman lem a sa a, mipi omlouh kal a zuausan a matsakna lemtang a zawngta hi.
Paikan Ankuang Nanung
(Matt. 26.17-25; Mk. 14.12-21; Jn. 13.21-30)
7Huan Tanghou Silngou Sohlouh ni, Paikan Ankuangluina belamnou gohna ding ni, a hongtungta hi. 8Huchi in Jesu’n, “Peter leh Johan a sawl a, Paikan Ankuang i nek ding in hon va bawlsak un” chi in.
9Huan amau a kiang ah, “Koi ah vabawl le ung na ut a?” a chi uhi.
10Huan aman a kiang uah, “Ngai un, khopi a na lut un, pasal, bel a tui pua in hontuak ding a, a lutna inn ah zuilut un” a chi hi. 11Inn neipa kiang ah, “Sinsakpa’n, ka nungzuite toh Paikan Ankuang ka nekna ding uh, mikhual inn pindan koilai ahia, a honchi, na chi ding uh. 12Huchi in aman indan tungnung zapi, van omsa, a hon ensak ding; huai ah hih un,” a chi hi.
13Huan a hohta ua, a kiang ua a gen bangtak in a muta ua; huan Paikan Ankuang a vabawl uhi.
Ankuang Siangthou
(Matt. 26.26-30; Mk. 14.22-26; 1 Kor. 11.23-25)
14Huan a nek hun in, aman an a um a, a sawltakte’n a umpih sam uhi. 15Huan a kiang uah, “Ka thuak ding ka thuak ma in hiai Paikan Ankuang hon nekpih ka ut mahmah hi. 16K’on hilh ahi, hiai Pathian gam a a taktak a hih masiah, ka ne nawn kei ding” a chi hi.
17Huan nou a la a, kipahthu a genkhit in, “Hiai la unla, kihawm un; 18K’on hilh ahi, tuban Pathian gam a hongtun masiah grepgui gahtui ka dawn nawn kei ding” a chi hi.
19Huan tanghou a la a, kipahthu a genkhit in a balkham a, a kiang uah a pia a, “Hiai ka sapum ahi, na sikua piak ding ahi; keimah theihgigena in hihzel un” a chi hi. 20Huchibang in nitak annek zoh in nou a la a, “Hiai nou ka sisan a thukhun thak, na sikua pawt ding ahi.
21Himahleh ngai un, zuausan a hon mansak dingpa khut ka kiang ah dohkan tung ah a omta hi. 22Mihing Tapa a seh bangtak in a pai ding hi, himahleh zuausan a mansak dingpa mihing tung a gik hi!” a chi hi.
23Huan amau lak ah “Huchibang thilhih ding kua ahi dia le?” chi in, a kidong uhi.
Thupina Thu A Kiselna
24Huan a lak uah kuapen ahia thupipen a seh chih thu ah, kiselna a hongpawt hi. 25Aman a kiang uah, “Jentel kumpipate a tung uah a thunei gige uh a, a tung ua thuneite Nu leh Pa, a chi gige uh. 26Himahleh nou zaw huchibang na hi kei ding uh; na lak ua thupipen nauzaw bang in om henla, makai pen leng na sempen bang in omzaw hen. 27Kua ahia thupizaw, an um hia, an pepa? An um hilou hia? Himahleh kei zaw na lak uah nasempa bang in ka om hi.
28“Ze-etna ka tuah sung noute kei hon ompihte na hi uh; 29Huchi in kei ka Pa’n gam a hon sehsak bang in gam k’on sehsak ahi. 30Ka gam a ka dohkan a na nek ua na dawn theihna ding un; huchi in, Israel nam sawmlehnih vaihawm sak in mangtutphah ah na hongtu ding uhi.
Peter Kitheihmohbawl Ding Genkholhna
(Matt. 26.31-36; Mk. 14.27-31; Jn. 13.36-38)
31“Simon, Simon, ngai in, Setan in buhsep bang a a honsep theihna ding in, noute hon ngen eive. 32Himahleh na ginna a manlouhna ding in k’on thumsak hi; na kihei nawn chiang in nang na unaute hihkip in, a chi hi.
33Huan aman a kiang ah, Toupa, na kiang ah suangkulh ah leh sihna ah leng pai sam ngap ka hi, a chi hi.
34Aman Peter, k’on hilh ahi, n’on theihna ah thumvei n’on kitheihmohbawl masiah tuni in ak a khuang kei ding” a chi hi.
Hongtung Ding Kidouna
35Huan a kiang uah, “Dangka iplou, kawlzal lou leh khedap lou a k’on sawlkhiak in bang na tasam ua?” a chi hi. Amau, “Bangmah” a chi uhi.
36Aman a kiang uah, “Tun zaw dangka ipnei in keng henla, kawlzal toh, kuapeuh namsau neilou in a puan zuak henla, lei hen. 37K’on hilh ahi, Amah talekte lak ah sim tel ahi, chih gelh ka tung ah a hongtung ahi; ka tungtang thu tungkim ngei ding ahi ngal a” a chi hi.
38Huan amau, “Toupa, en dih, hiai ah namsau nih a om” a chi ua. Aman a kiang uah, “A hun” a chi hi.
Gethsemani Huan A Jesu Thumna
(Matt. 26.36-46; Mk. 14.32-42)
39Huan amah a pawt a, a ngeina dan in Olive tang ah a hohta a; nungzuite’n leng a zui uhi. 40A mun a vatun un, a kiang uah, “Khemna a na lutlouhna ding un, thum un” a chi hi.
41Huan suang a denphak tan vel ah a vapai tuamta hi; 42Huan a khukdin a, a thum a, “Pa, hoih na sakleh hiai nou ka kiang apan lasuan in; himahleh kei thu hilou in, nangmah thu hi zaw hen” a chi hi. 43Huan van a kipan angel khat a hihhat ding in a kiang ah a hong kilak hi. 44Huan a gim mahmah a, phatuamngai nawnsem in a thum a; a kho-ul, sisan bang in mal liantak in lei ah a takkheta hi.
45Huan a thum khit a a thoh in, nungzuite kiang ah a hongpai a, a lungkham ziak un a na ihmu uh a mu hi. 46Huan a kiang uah, “Bangdia ihmu na hi ua? Khemna a na lutlouhna ding un thou unla, thum un” a chi hi.
Jesu Matna
(Matt. 26.47-56; Mk. 14.43-50; Jn. 18.3-11)
47Huan huai a genlai tak in, ngai dih, mipi a hongpai ua, sawmlehnihte lak a tel Judas in a ma uh a kai a; tawp tum in Jesu a honzuan hi. 48Himahleh Jesu’n, a kiang ah, “Judas, Mihing Tapa tawp a mansak ding na hi maw?” a chi hi.
49Huan a kim a mite’n thil hongtung ding a theihun, “Toupa, namsau in ka sat ding uam?” a chi uhi. 50Huan a lak ua kuahiam in siampu lianpen sikha a sat a, a bil taklam a satkhiak sak hi.
51Huan Jesu’n, “Hih nawn ken” a chi a, a bil a khoih a, a hihdamta hi.
52Jesu’n a kiang a hong siampu liante Pathian biakin heutute leh upate kiang ah, Namsau leh khetbuk tawi in, suamhat man ding bang hial in na hong kuan uh maw? 53Pathian biakin a na kiang ua niteng a ka omlai in hon mat tum in n’on sawk kei ua; himahleh tu mial thuneihna toh na tat hun uh ahi, a chi hi.
Peter In Jesu Kitheihmohbawl
(Matt. 26.57-58,69-75; Mk. 14.53-54,66-72; Jn. 18.12-18,25-27)
54Huan a man ua, a pi ua, siampu lianpen inn ah a pilut uhi. Peter in gamlapi ah a zui hi. 55Huan inn huangsung intual ah mei a chih ua, a tu khawm ua, Peter a lak uah a vatu sam hi. 56Huan meivak a a tutlai in nungak kuahiam in a mu a, a en nilouh a, “Hiai mi leng a kiang a om ahi” a chi hi.
57Aman bel, “Numei, amah ka theikei” chi in a kitheihmohbawl hi. 58A denchiang deuh in midang in a hong munawn a, nang leng a lak ua mi na hi ve, a chi hi. Peter in bel, “Mihing aw, ka hi kei” a chi hi.
59Huan dakkal khat phial nung in, midang in, “Hiai mi leng a kiang a om ahi tham hi; Galili gammi ahi” a chi chiltel hi.
60Huan Peter in, “Mihing aw, na thugen ka theikei” a chi hi. Huan thakhat in, a paulaitakin ak a khuangta hi. 61Huan, Toupa a kihei a, Peter a en hi. Peter in, “Ak khuanma in thumvei n’on kitheihmohbawl ding, chi a Toupa’n a kiang a a thugen a hon theikhe nawnta hi.” 62Huan a pawt a, a kap huphup hi.
Jesu Nuihsat Leh Vuakna
(Matt. 26.67-68; Mk. 14.65)
63Jesu lente’n nuihza bawlna’n a zang ua, a sat uhi, 64A mit a tuam ua, “Kua ahia honsat, gen in?” chi in a dong uhi. 65Thu dang tampi in leng a gensia un a kou uhi.
Juda Vaihawmpawlte Ma A Jesu Pina
(Matt. 26.59-66; Mk. 14.55-64; Jn. 18.19-24)
66Huan khovak tak in Upa hon, siampu liante leh laigelhmite, a hong kikhawm ua, a vaihawmna uah a pi uhi. 67“Khrist na hihleh honhilh in” a chi uhi. Huan aman a kiang uah: “Honhilh mah leng na gingta kei ding uh; 68Ken noute thu hon dong lengleng, n’on dawng kei ding ua, na honkhah sam kei ding uh. 69Himahleh tuban siah Mihing Tapa, Pathian thilhihtheihna taklam ah a tu ta ding” a chi hi. 70Huan avek un, “Nang Pathian Tapa na hi maw leh?” a chi ua. Aman a kiang uah, hi e, n’on chih bang un, a chi hi. 71Huan amau bang theihpihna dang i deih lai dia? Eimah mah in amah kamsuak i zata ve le” a chi uhi.
നിലവിൽ തിരഞ്ഞെടുത്തിരിക്കുന്നു:
LUKE 22: PAITBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
